1 ಥೆಸಲೋನಿಕೆರೆಗ್‌ 1 - ಪೊಸ ಒಡಂಬಡಿಕೆ

¹ ಅಮ್ಮೆ ಆದುಪ್ಪು ದೇವೆರೆಡ್ಲಾ ಕರ್ತವೆ ಆದುಪ್ಪು ಯೇಸು ಕ್ರಿಸ್ತಡ್ಲಾ ಉಪ್ಪು ಥೆಸ್ಸಲೋನಿಕ ಸಭೆಕ್, ಪೌಲು, ಸೀಲೆ, ತಿಮೋಥಿ ಪನ್ಪಿ ಎಂಕುಲು ಬರೆಪಿನಿ ದಾನೆಂದ್ಂಡ, ನಿಕ್ಲೆಗ್ ದಯಲಾ ಸಮಾಧಾನಲಾ ಆವಡ್.

ಥೆಸ್ಸಲೋನಿಕ ಸಭೆತ ಜೀವನ ಬೊಕ್ಕ ನಂಬಿಕೆ

^2-3 ಎಂಕುಲು ನಂಬಿಕೆದ ಫಲವಾಯಿ ನಿಕ್ಲೆ ಬೇಲೆನ್ಲಾ ಪ್ರೀತಿ ದಿಂಜಿದುಪ್ಪು ನಿಕ್ಲೆ ಪ್ರಯಾಸೊನ್ಲಾ ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತನ ಮಿತ್ತ್‌ದ ನಿರೀಕ್ಷೆಡ್ದ್ ಉಂಡಾಯಿ ನಿಕ್ಲೆನ ತಾಳ್ಮೆನ್ಲಾ ನಮ ಅಮ್ಮೆ ಆದುಪ್ಪು ದೇವೆರೆ ದುಂಬು ಮದಪಂದೆ ನೆನೆಪು ಮಲ್ತೊಂದು ಎಂಕ್ಲೆ ಪ್ರಾರ್ಥನೆಲೆಡ್ ನಿಕ್ಲೆಗಾದ್ ನಟ್ಟೊನ್ನಗ ನಿಕ್ಲೆ ಸಂಗತಿಡ್ ದೇವೆರೆಗ್ ಏಪಲಾ ಉಪಕಾರ ಸಂದಾವ.

⁴ ಸಹೋದ್ರೆರೇ, ದೇವೆರ್ ನಿಕ್ಲೆನ್ ಪ್ರೀತಿ ಮಲ್ತ್‌ದ್ ನಿಕ್ಲೆನ್ ತನ ಸ್ವಂತದಾಕುಲಾದ್ ಅಜತ್‌ದ್ ದೆತ್ತೊಂದೆ ಪಂಡ್ದ್‌ಲಾ ಎಂಕ್ಲೆಗ್ ತೆರಿದುಂಡು.

⁵ ದಾಯೆಗಂದ್ಂಡ ಎಂಕುಲು ನಿಕ್ಲೆಗ್ ಸುವಾರ್ತೆ ಬಾಯಿ ಪಾತೆರೊಡು ಮಾತ್ರ ತೆರಿಪಾದಿನಿ ಅತ್ತ್, ಶಕ್ತಿಡ್ದ್‌ಲಾ ಪರಿಶುದ್ಧಾತ್ಮಡ್ದ್‌ಲಾ ಐತ ಸತ್ಯೊಲೆ ಮಿತ್ತ್ ಪೂರ್ತಿ ಭರವಸೊಡ್ದು ತೆರಿಪಾಯ. ನಿಕ್ಲೆಡೊಪ್ಪ ಉಪ್ಪುನಗ ಎಂಕುಲು ಎಂಚ ಜೀವನ ಮಲ್ತ ಪನ್ಪಿನೆನ್ ನಿಕುಲುಲಾ ತೆರಿದರ್.

⁶ ಉಂದತ್ತಂದೆ ನಿಕುಲು ಮಸ್ತ್ ಭಂಗ ಅನುಭವ ಮಲ್ಪೆರೆ ಇತ್ತ್ಂಡಲಾ ಪರಿಶುದ್ಧಾತ್ಮಡ್ದ್ ಉಂಡಾಯಿ ಸಂತೋಷದೊಟ್ಟುಗು ದೇವೆರೆ ಪಾತೆರೊಲೆನ್ ಅಂಗೀಕಾರ ಮಲ್ತ್‌ದ್ ಎಂಕ್ಲೆನ್ಲಾ ಕರ್ತವೆ ಆದುಪ್ಪು ಯೇಸುನ್ಲಾ ಬೆರಿ ಪತ್ತುನಾಕುಲು ಆಯರ್.

⁷ ಇಂಚ ಮಕೆದೋನ್ಯೊಡ್ಲಾ ಬೊಕ್ಕ ಅಖಾಯೊಡ್ಲಾ ಕ್ರಿಸ್ತನ್ ನಂಬುನಾಕುಲೆಗ್ ಮಾತೆರೆಗ್ಲಾ ಮಾದ್ರಿ ಆಯರ್.

⁸ ಕರ್ತವನ ಪಾತೆರ ನಿಕ್ಲೆಡ್ದೇ ಮಕೆದೋನ್ಯೊಡ್ಲಾ ಬೊಕ್ಕ ಅಖಾಯೊಡ್ಲಾ ಪ್ರಕಟ ಆಯಿನಿ ಅತ್ತಂದೆ ದೇವೆರೆ ಮಿತ್ತ್ ನಿಕುಲು ದೀತಿನ ನಂಬಿಕೆ ಮಾತ ಜಾಗ್‌ಲೆಡ್ಲಾ ಸುದ್ಧಿಗ್ ಬತ್ತ್ಂಡ್, ಅಂಚಾಯಿನೆಡ್ದ್ ಎಂಕುಲು ದಾಲಾ ಪನಿಯೆರೆ ಇಜ್ಜಿ.

⁹ ಎಂಕುಲು ನಿಕ್ಲೆನಡೆ ಬತ್ತಿನಪಗ ನಿಕುಲು ಎಂಕ್ಲೆನ್ ಎಂಚ ಸ್ವೀಕಾರ ಮಲ್ತರ್ ಇನ್ಪಿನೆನ್ ಅಲ್ಪದ ಜನೊಕುಲು ತನ್ಕುಲೇ ಪಾತೆರ್‌ವೆರ್. ಅವು ಅತ್ತಂದೆ ನಿಕುಲು ಎಂಚ ಮೂರ್ತಿಪೂಜೆ ಬುಡ್ದು ದೇವೆರೆ ಕಡೆಕ್ಕ್ ತಿರ್ಗ್‌ದ್ ನಿಜವಾಯಿನ ಜೀವೊಡುಪ್ಪು ದೇವೆರೆನ ಸೇವೆ ಮಲ್ತರ್,

¹⁰ ಬೊಕ್ಕ ಮರಣೊಡ್ದು ಲಕ್ಕಾಯಿನ ದೇವೆರೆ ಮಗೆ ಆದುಪ್ಪು ಯೇಸುನು ಬಾನದ ಉಲಯಿಡ್ದ್ ಬರ್ಪಿನೆನ್ ನಿಕುಲು ಎಂಚ ಎದುರು ತೂಪಿನಕುಲಾದುಲ್ಲರ್ ಪಂಡ್ದ್‌ಲಾ ಆ ಜನೊಕುಲೇ ಪನ್ಪೆರ್. ಉಂದೇ ಯೇಸು ದುಂಬಗ್ ಬರ್ಪಿ ದೈವಕೋಪೊಡ್ದು ನಮನ್ ತಪ್ಪಾವುನಾಯೆ.