1 ಪೇತ್ರೆ 5 - ಪೊಸ ಒಡಂಬಡಿಕೆ1 ಸಭೆತ ಹಿರಿಯಾಕುಲೇ, ನಿಕ್ಲೆನ ಜತೆ ಹಿರಿಯಾಯೆ ಆಯಿ ಯಾನ್ ಕ್ರಿಸ್ತ ಶ್ರಮೆಲೆಡ್ ಸಾಕ್ಷಿದಾಯೆ; ನನ ದುಂಬು ತೋಜಿದ್ ಬರ್ಪಿ ಮೈಮೆಡ್ ಪಾಲ್‌ದಾರೆ ಆಯಿ ಯಾನ್ ನಿಕ್ಲೆನ್ ಉತ್ತೇಜನ ಮಲ್ತ್‌ದ್ ಪನ್ಪಿನಿ ದಾನೆ ಪಂಡ, 2 ನಿಕ್ಲೆನ ವಶೊಟು ಕೊರ್ತಿನ ದೇವೆರೆ ಪುಂಡುನು ಕಾಪುಲೆ. ಬಲಾತ್ಕಾರೊಡ್ದು ಅತ್ತ್ ದೀನ ಮನಸ್‌ಡ್ದೇ, ದುಡ್ಡುದ ಆಸೆಡ್ದ್ ಅತ್ತ್, ಯಥಾರ್ಥ ಮನಸ್‌ಡ್ದ್ ಸೇವೆ ಮಲ್ಪುಲೆ. 3 ದೇವೆರ್ ನಿಕ್ಲೆನ ವಶೊಟು ಕೊರ್ತಿ ಸಭೆತ ಮಿತ್ತ್ ಗುರ್ಕಾಮೆ ತೋಜಾವಂದೆ ಸಭೆಕ್ ಮಾದ್ರಿ ಆದ್ ನಡಪುಲೆ. 4 ಮಾಮಲ್ಲ ಕುರುಬೆ ತೋಜಿದ್ ಬನ್ನಗ ನಿಕುಲು ಏನಿತ್ಯೇನಿಗ್ಲಾ ಬಾಡಂದಿ ಮೈಮೆದ ಕಿರೀಟೊನು ಪಡೆವೊನ್ವರ್. 5 ಅಂಚೆನೆ ಜವನ್ಯೆರೇ, ನಿಕುಲುಲಾ ಹಿರಿಯಾಕುಲೆಗ್ ವಶ ಆದುಪ್ಪುಲೆ. ನಿಕುಲು ಮಾತೆರ್ಲಾ ದೀನ ಮನಸ್‌ಡ್ ಒರಿ ಒರಿಯಗ್ ಸೇವೆ ಮಲ್ಪುಲೆ. “ದೇವೆರ್ ಅಹಂಕಾರಿಲೆಗ್ ಎದುರುಂತುವೆ, ಆಂಡ ತಗ್ಗ್‌ದಿನಾಕುಲೆಗ್ ದಯ ಕೊರ್ಪೆ.” 6 ಅಂಚಾಯಿನೆಡ್ದ್ ದೇವೆರೆನ ಬಲ ಇತ್ತಿ ಕೈತ ತಿರ್ತ್ ನಿಕ್ಲೆನ್ ತಗ್ಗಾವೊನ್ಲೆ; ಆಯೆ ತಕ್ಕ ಸಮಯೊಡು ನಿಕ್ಲೆನ್ ಮಿತ್ತ್ ಕನಪೆ. 7 ನಿಕ್ಲೆನ ಮಾತ ಚಿಂತೆಲೆನ್ ಆಯಗ್ ಒಪ್ಪಿಸಾಲೆ; ಆಯೆ ನಿಕ್ಲೆಗಾದ್ ಚಿಂತೆ ಮಲ್ಪುವೆ. 8 ಜಾಗ್ರತೆ ಆದುಪ್ಪುಲೆ; ಎಚ್ಚರಿಕೆ ಆದುಪ್ಪುಲೆ; ನಿಕ್ಲೆನ ವಿರೋಧಿ ಆದುಪ್ಪು ಸೈತಾನೆ ಗರ್ಜನೆ ಮಲ್ಪುನ ಸಿಮ್ಮದ ಲೆಕ್ಕನೆ ಏರೆನ್ ದಿಂಗೊಲಿ ಅಂದ್‌ದ್ ನಾಡೊಂದು, ತಿರ್ಗೊಂದುಲ್ಲೆ. 9 ನಿಕುಲು ನಂಬಿಕೆಡ್ ದೃಢ ಆದಿತ್ತ್‌ದ್ ಸೈತಾನಗ್ ಎದುರುಂತುಲೆ; ಲೋಕೊಡುಪ್ಪು ನಿಕ್ಲೆ ಸಹೋದ್ರೆರ್‌ಲಾ ಅಂಚಿನವೇ ಸಂಕಟೊಲೆನ್ ಅನುಭವ ಮಲ್ತೊಂದುಲ್ಲೆರ್ ಅಂದ್‌ದ್ ನಿಕ್ಲೆಗ್ ಗೊತ್ತುಂಡತ್ತಾ? 10 ಯೇಸು ಕ್ರಿಸ್ತಡ್ ಒಂಜಾದುಪ್ಪು ನಿಕ್ಲೆನ್ ತನ ನಿತ್ಯ ಮೈಮೆಗ್ ಲೆತ್ತಿ ಪೂರ್ತಿ ದಯತ ದೇವೆರ್, ಒಂತೆ ಸಮಯ ಸಂಕಟ ಬತ್ತಿ ಬೊಕ್ಕ ನಿಕ್ಲೆನ್ ತಕ್ಕ ಸ್ಥಿತಿಗ್ ಕನತ್‌ದ್ ದೃಢ ಮಲ್ತ್‌ದ್, ಬಲ ಪಡೆಪಾವೆ. 11 ಆಯಗ್ ಏನಿತ್ಯೇನಿಗ್ಲಾ ಆಧಿಪತ್ಯ ನಿಲೆ ಆದುಪ್ಪಡ್. ಆಮೆನ್. ಪೇತ್ರನ ಕಡೆತ ವಂದನೆಲು 12 ನಂಬಿಗಸ್ತೆ ಆದುಪ್ಪು ಸಹೋದರೆ ಸಿಲ್ವಾನನ ಸಹಾಯೊಡ್ದು ಈ ಎಲ್ಯ ಪತ್ರಿಕೆನ್ ಬರೆತಿನಿ. ಉಂದೆಡ್ದ್ ನಿಕ್ಲೆಗ್ ಉಮೇದ್ ತಿಕ್ಕೊಡು ಬೊಕ್ಕ ಉಂದು ಮಾತ ದೇವೆರೆ ದಯೊಟು ಸತ್ಯಾದುಂಡು ಅಂದ್‌ದ್ ಯಾನ್ ಸಾಕ್ಷಿ ಕೊರ್ಪೆ. ಈ ದಯೊಟು ನಿಕುಲು ಗಟ್ಟಿಯಾದ್ ಉಂತುಲೆ. 13 ದೇವೆರ್ ಅಜತ್‌ದ್ ದೆತ್ತೊಂಡಿ ಬಾಬೆಲ್‌ಡ್ ಉಪ್ಪು ಸಹೋದ್ರಿ ಸಭೆಲಾ ಎನ ಮಗೆ ಆದುಪ್ಪು ಮಾರ್ಕೆಲಾ ನಿಕ್ಲೆನ್ ವಂದಿಪುವೆರ್. 14 ಪ್ರೀತಿದ ಮುದ್ದು ಕೊರ್ದು ಒರಿಯನ್ ಒರಿ ವಂದಿಪುಲೆ. ಕ್ರಿಸ್ತಡುಪ್ಪು ಸಮಾಧಾನ ನಿಕ್ಲೆಗ್ ಮಾತೆರೆಗ್ಲಾ ಉಪ್ಪಡ್. ಆಮೆನ್. |
New Life Literature