1 ಪೇತ್ರೆ 4 - ಪೊಸ ಒಡಂಬಡಿಕೆ

¹ ಕ್ರಿಸ್ತೆ ಈ ಲೋಕೊಡುಪ್ಪುನಗ ಶರೀರೊಡು ಕಷ್ಟ ತಡೆಯಿನೆಡ್ದ್ ನಿಕುಲುಲಾ ಅವ್ವೇ ರೀತಿಡ್ ನಿಕ್ಲೆ ಮನಸ್‌ನ್ ತಯಾರ್ ಮಲ್ಪುಲೆ. ದಾಯೆಗಂದ್ಂಡ ನಿಕುಲು ಶರೀರೊಡು ಕಷ್ಟ ತಡೆಯೊಂಡ ಪಾಪೊಲೆಡ್ದ್ ದೂರ ಆಪರ್.

² ಒರಿದಿನ ಜೀವಮಾನ ಕಾಲೊಡು ನಿಕುಲು ಶರೀರೊಡು ನರಮಾನಿಲೆ ಆಸೆಗ್ ಬೋಡಾದ್ ಬದ್‌ಕಂದೆ ದೇವೆರೆ ಚಿತ್ತೊಗು ಬೋಡಾದ್ ಬದ್‌ಕಿಯೆರೆ ಪ್ರಯತ್ನ ಮಲ್ಪುಲೆ.

³ ನಿಕುಲು ಬಂಡ್‌ತನ, ದುರಾಶೆಡ್, ಅಮಲ್‌ಡ್, ದುಂದುಗಾರಿಕೆಡ್, ಒಟ್ಟು ಕೂಡ್ದು ಪರ್ಪಿನೆಟ್ಟ್ ಬೊಕ್ಕ ನೀಚ ಆಯಿ ಮೂರ್ತಿಪೂಜೆಡ್ ನಡತೊಂದು ಪಿದಯಿದ ಜನೊಕುಲೆಗ್ ಸರಿಯಾದ್ ಹಾಳ್ ಕೆಲಸೊಲೆನ್ ಮಲ್ತೊನೆಟ್ಟ್ ಕಾಲ ಕಳೆಯಿನ ಯಾವು.

⁴ ನಿಕುಲು ಅವ್ವೇ ಪಟಿಂಗತನೊಟು ಸೇರಂದಿನೆಕ್ಕ್ ಅಕುಲು ಅಚ್ಚಿರ ಆದ್ ನಿಕ್ಲೆನ್ ದೂಷಿಯುವೆರ್.

⁵ ಅಂಚಾಯಿನೆಡ್ದ್ ಅಕುಲು ಬದುಕುನಾಕುಲೆಗ್ಲಾ ಸೈತ್ ಪೋತಿನಾಕುಲೆಗ್ಲಾ ನ್ಯಾಯತೀರ್ಪೆರೆ ತಯಾರಾದುಪ್ಪು ದೇವೆರೆಗ್ ಲೆಖ್ಖ ಕೊರೊಡು.

⁶ ಉಂದೆಕ್ಕ್ ಬೋಡಾದ್ ಸೈತಿನಾಕುಲು ಶರೀರೊಡು ನರಮಾನಿಲೆ ತರೊಟು ತೀರ್ಪು ಪಡೆಯೆರ್. ಆತ್ಮೊಡು ದೇವೆರೆಗ್ ತಕ್ಕ ಬದುಕುಲೆಕ್ಕ ಅಕ್ಲೆಗ್ಲಾ ಸುವಾರ್ತೆ ಸಾರಿದುಂಡು.

ದೇವೆರ್ ವರೊಕ್ಲೆನ್ ಎಡ್ಡೆಗಾದ್ ಉಪಯೋಗ ಮಲ್ಪುಲೆ

⁷ ಮಾತೆತ್ತ ಅಂತ್ಯ ಆಪಿನ ಕಾಲ ಮುಟ್ಟ ಬೈದ್‌ಂಡ್; ಅಂಚಾಯಿನೆಡ್ದ್ ಪ್ರಾರ್ಥನೆಗ್ ತಯಾರಾದ್ ಸ್ವಸ್ಥ ಬುದ್ಧಿಡ್ ಎಚ್ಚರಿಕೆ ಆದುಪ್ಪುಲೆ.

⁸ ಮಾತೆಡ್ದ್ ದುಂಬು ನಿಕ್ಲೆನ ಉಲಯಿ ಯಥಾರ್ಥವಾಯಿನ ಪ್ರೀತಿ ಉಪ್ಪಡ್. ಆ ಪ್ರೀತಿ ಏತೋ ಪಾಪೊಲೆನ್ ಮಾಜಾವುಂಡು.

⁹ ಗುಣುಗುಟ್ಟಂದೆ ಒರಿ ಒರಿಯಗ್ ಸತ್ಕಾರ ಮಲ್ಪುಲೆ.

¹⁰ ನಿಕ್ಲೆಡ್ ಪ್ರತಿ ಒರಿಲಾ ದೇವೆರೆ ದಯೊಡ್ದು ಆತ್ಮೀಕ ವರೊನು ಬೇತೆ ಬೇತೆ ರೀತಿಡ್ ಪಡೆತರ್. ಐಡ್ದಾವರ ದೇವೆರೆ ಎಡ್ಡೆ ಸೇವಕೆರಾದ್ ಮಾತೆರೆನ ಸೇವೆ ಮಲ್ಪೆರೆ ನಿಕ್ಲೆನ ವರೊನು ಉಪಯೋಗ ಮಲ್ಪುಲೆ.

¹¹ ಒರಿ ಬೋಧನೆ ಮಲ್ಪುವೆಡ ದೇವೆರೆ ಪಾತೆರ ಅಂದ್‌ದ್ ಬೋಧನೆನ್ ಮಲ್ಪಡ್. ಒರಿ ಸೇವೆ ಮಲ್ಪುವೆಡ ದೇವೆರೆಡ್ದ್ ಬಲೊನು ಪಡೆಯೊಂದು ಮಲ್ಪಡ್. ಉಂದೆಡ್ದ್ ಯೇಸು ಕ್ರಿಸ್ತಡ್ದ್ ದೇವೆರೆಗ್ ಉಪಕಾರ ಸ್ತುತಿ ಆವೊಂದುಪ್ಪುಂಡು. ಯೇಸು ಕ್ರಿಸ್ತಗ್ ಮೈಮೆಲಾ ಬಲಲಾ ಏನಿತ್ಯೇನಿಗ್ಲಾ ಆವಡ್, ಆಮೆನ್.

ಕ್ರಿಸ್ತಗಾದ್ ಸಂಕಟ ತಡೆಯುನವು

¹² ಪ್ರೀತಿದಾಕುಲೇ, ನಿಕ್ಲೆಗ್ ತೂತ ಲೆಕ್ಕಂತಿನ ಕಷ್ಟ ಬನ್ನಗ ವಿಪರೀತದವು ಪಂಡ್ದ್ ಅಚ್ಚಿರ ಬುಡಡೆ. ಉಂದು ಪೂರ ನಿಕ್ಲೆನ ನಂಬಿಕೆನ್ ಪರೀಕ್ಷೆ ಮಲ್ಪುನು. ವಿಪರೀತವಾಯಿನ ಸಂಗತಿಲು ಆಪುಂಡು ಪಂಡ್ದ್ ಚಿಂತೆ ಮಲ್ಪಡೆ.

¹³ ನಿಕುಲು ಏತ್‌ನೆಂಗೆ ಕ್ರಿಸ್ತ ಶ್ರಮೆಟ್ ಪಾಲ್‌ದಾರೆರ್ ಆದುಪ್ಪುವರಾ ಆತ್‌ನೆಂಗೆ ಸಂತೋಷೊಡುಪ್ಪುಲೆ. ಅಂಚೆನೇ ಕ್ರಿಸ್ತೆ ಮೈಮೆಡ್ ತೋಜಿದ್ ಬನ್ನಗ ನಿಕುಲು ಉಲ್ಲಾಸಾದುಪ್ಪುಲೆ.

¹⁴ ಕ್ರಿಸ್ತನ ಪುದರ್‌ಗಾದ್ ನಿಕ್ಲೆಗ್ ನಿಂದೆ ಮಲ್ಪುವೆರ್ಡ, ನಿಕುಲು ಭಾಗ್ಯವಂತೆರ್. ದಾಯೆಗಂದ್ಂಡ ಮೈಮೆದ ಆತ್ಮೆ ಆದುಪ್ಪು ದೇವೆರೆ ಆತ್ಮೆ ನಿಕ್ಲೆ ಮಿತ್ತ್ ನಿಲೆ ಆದುಂಡು.

¹⁵ ನಿಕ್ಲೆಡ್ ಏರಾಂಡಲಾ ಮಾನ್ಯ ಕೆರ್ಪಿನಾಯೆ, ಕಲ್ವೆ, ದುಷ್ಟೆ ಬೊಕ್ಕ ಬೇತೆಕ್ಲೆ ಕೆಲಸೊಡು ತರೆ ಪಾಡುನಾಯ ಒಟ್ಟುಗು ಇತ್ತರ್ಡ ಕಷ್ಟೊಡು ಬೂರುವರ್.

¹⁶ ಆಂಡ ನಿಕುಲು ಕ್ರೈಸ್ತೆರಾದ್ ಶ್ರಮೆ ಅನುಭವ ಮಲ್ಪುವರ್ಡ ಅಂಚಿನಾಕುಲು ನಾಚಿಗೆ ಮಲ್ಪೊಡಂದ್‌ದ್ ಇಜ್ಜಿ. ಕ್ರೈಸ್ತೆರ್ ಅಂದ್‌ದ್ ಪುದರ್ ಪಡೆಯಿನೆಕ್ಕಾದ್ ದೇವೆರೆನ್ ಪುಗರೊನ್ಲೆ.

¹⁷ ನ್ಯಾಯತೀರ್ಪುದ ಸಮಯ ಕೈತಲ್‌ ಬೈದ್‌ಂಡ್. ಆ ತೀರ್ಪು ದೇವೆರೆ ಇಲ್ಲಡ್ದೇ ಸುರು ಆಪುಂಡು. ಅವು ನಮಡ್ದೇ ಸುರು ಆಪಿನಾಂಡ, ದೇವೆರೆ ಸುವಾರ್ತೆ ನಂಬಂದಿನಾಕುಲೆನ ಗತಿ ದಾನೆ ಅವು?

¹⁸ ಗ್ರಂಥೊಡು ಪನ್ಪಿಲೆಕ್ಕ, “ನೀತಿ ಇತ್ತಿನಾಯಗ್ ರಕ್ಷಣೆ ಪಡೆಯೆರೆ ಕಷ್ಟ ಆಂಡ, ಭಕ್ತಿದಾಂತಿನಾಯನಲಾ ಪಾಪಿಷ್ಟನಲಾ ಗತಿ ದಾನೆ ಆವು?”

¹⁹ ಅಂಚಾಯಿನೆಡ್ದ್ ದೇವೆರೆ ಚಿತ್ತದ ಪ್ರಕಾರ ಭಂಗೊನು ಅನುಭವ ಮಲ್ಪುನಾಕುಲು, ತನ್ಕುಲೆ ಪ್ರಾಣೊನು ನಂಬಿಕೆದ ಸೃಷ್ಟಿ ಕರ್ತವಗ್ ಒಪ್ಪಿಸಾದ್ ಕೊರ್ದು ಎಡ್ಡೆಂತಿನೆನ್ ಮಲ್ಪುನಾಕುಲು ಆವೊಡು.