1 ಯೋಹಾನೆ 5 - ಪೊಸ ಒಡಂಬಡಿಕೆದೇವೆರೆ ಮಗನ ಮಿತ್ತ್ ನಂಬಿಕೆ 1 ಯೇಸುನು ಕ್ರಿಸ್ತೆ ಅಂದ್‌ದ್ ನಂಬುನ ಪ್ರತಿ ಒರಿಲಾ ದೇವೆರೆಡ್ದ್ ಪುಟ್ಟಿನಾಯೆ ಆದುಪ್ಪುವೆ. ಬೊಕ್ಕ ಏರ್ ಪುಟ್ಟಾಯಿನ ಅಮ್ಮೆ ಆದುಪ್ಪು ದೇವೆರೆನ್ ಪ್ರೀತಿ ಮಲ್ಪುವೆನಾ, ಆಯೆ ದೇವೆರೆನ ಜೋಕುಲೆನ್ಲಾ ಪ್ರೀತಿ ಮಲ್ಪುವೆ. 2 ದೇವೆರೆನ್ ಪ್ರೀತಿ ಮಲ್ತ್‌ದ್ ಆಯ ಅಪ್ಪಣೆಲೆನ್ ಕೈಕೊನುನೆಟ್ಟೇ, ನಮ ದೇವೆರೆ ಜೋಕುಲೆನ್ ಪ್ರೀತಿ ಮಲ್ಪುವ ಅಂದ್‌ದ್ ತೆರಿಯೊನ್ವ. 3 ದೇವೆರೆನ್ ಪ್ರೀತಿ ಮಲ್ಪುನು ಪಂಡ; ನಮ ದೇವೆರೆ ಅಪ್ಪಣೆಲೆನ್ ಕೈಕೊನುನವು ಆದುಂಡು. ಬೊಕ್ಕ ಆಯ ಅಪ್ಪಣೆಲು ದುನ್ನದವು ಅತ್ತ್. 4 ದಾಯೆಗಂದ್ಂಡ ದೇವೆರೆಡ್ದ್ ಪುಟ್ಟಿನಾಯೆ ಪ್ರತಿ ಒರಿಲಾ ಈ ಲೋಕೊನು ಜೈಸಿನಾಯೆನೇ. ಬೊಕ್ಕ ಲೋಕೊನು ಜೈಸಿನ ಜಯ ನಮ ನಂಬಿಕೆನೇ. 5 ಲೋಕೊನು ಏರ್ ಜೈಸೊಲಿ? ಯೇಸುನು ದೇವೆರೆ ಮಗೆ ಅಂದ್‌ದ್ ನಂಬುನಾಕುಲೇ. ಯೇಸು ಕ್ರಿಸ್ತನ ವಿಚಾರೊಡು ಸಾಕ್ಷಿ 6-7 ಯೇಸು ಕ್ರಿಸ್ತೆ, ಆಯೆನೇ ನೀರ್‌ದ ದೀಕ್ಷಾಸ್ನಾನೊಡ್ದುಲಾ, ಕ್ರುಸ್ಸುಡು ಗುತ್ತಿನ ನೆತ್ತೆರೆಡ್ದ್‌ಲಾ ಬತ್ತಿನಾಯೆ ಆದುಲ್ಲೆ ಅಂದ್‌ದ್ ತೋಜಾಯೆ. ಆಯೆ ನೀರ್‌ಡ್ದ್ ಮಾತ್ರ ಅತ್ತ್, ನೀರ್‌ಡ್ಲಾ ನೆತ್ತೆರ್‌‌ಡ್ಲಾ ಬತ್ತಿನಾಯೆ. ಉಂದೆಕ್ಕ್ ಆತ್ಮೆ ಸಾಕ್ಷಿ ಪನ್ಪಿನಾಯೆ ಆದುಲ್ಲೆ. ದಾಯೆಗಂದ್ಂಡ ಆತ್ಮೆ ಏಪಲಾ ಸತ್ಯೊನು ತೋಜಾಪಾವೆ. 8 ಅಂಚ ನಂಕ್ ಈ ಮೂಜಿ ಸಾಕ್ಷಿಲು ಉಂಡು. ಆತ್ಮೆ, ನೀರ್ ಬೊಕ್ಕ ನೆತ್ತೆರ್. ಬೊಕ್ಕ ಉಂದು ಮೂಜಿಲಾ ಒಂಜೇ ಸಾಕ್ಷಿನ್ ಒಪ್ಪಿಯೊನ್ವ. 9 ನರಮಾನಿಲೆ ಸಾಕ್ಷಿನ್ ನಮ ಒಪ್ಪಿಯೊನ್ವಡ, ದೇವೆರೆ ಸಾಕ್ಷಿ ಐಡ್ದ್ ಮಲ್ಲವು. ದಾಯೆಗಂದ್ಂಡ ದೇವೆರ್ ಒರಿಯೇ, ತನ ಮಗನ ಸಂಗತಿಡ್ ಸಾಕ್ಷಿ ಪನ್ತೆ. 10 ದೇವೆರೆ ಮಗನ್ ನಂಬುನಾಯನ ಉಡಲ್‌ಡ್ ಈ ಸಾಕ್ಷಿ ಉಂಡು; ದೇವೆರ್ ತನ ಮಗನ ಸಂಗತಿಡ್ ಪನ್ತಿನ ಸಾಕ್ಷಿನ್ ನಂಬಂದಿನಾಯೆ ದೇವೆರೆನ್ ಸುಳ್ಳುಗಾರೆ ಆದ್ ಮಲ್ಪುವೆ. 11 ಆ ಸಾಕ್ಷಿ ದಾನೆಂದ್ಂಡ, ದೇವೆರ್ ನಂಕ್ ನಿತ್ಯಜೀವೊನು ಕೊರ್ತೆ; ಬೊಕ್ಕ ಈ ಜೀವ ಆಯನ ಮಗಟ ಉಂಡು. 12 ದೇವೆರೆ ಮಗೆ ಏರೆಡ ಉಲ್ಲೆನಾ ಆಯಡ ಈ ನಿತ್ಯಜೀವ ಉಂಡು, ದೇವೆರೆ ಮಗೆ ಏರೆಡ ಇಜ್ಜೆನಾ ಆಯಡ ನಿತ್ಯಜೀವ ಇಜ್ಜಿ. ನಿತ್ಯಜೀವ 13 ದೇವೆರೆ ಮಗನ ಪುದರ್‌ನ್ ನಂಬುನಾಕುಲು ಆದುಪ್ಪು ನಿಕ್ಲೆಗ್ ನಿತ್ಯಜೀವ ಉಂಡು ಅಂದ್‌ದ್ ಗೊತ್ತಾಪಿಲೆಕ್ಕ ಯಾನ್ ಉಂದೆನ್ ನಿಕ್ಲೆಗ್ ಬರೆಯೆ. 14 ದೇವೆರೆ ಚಿತ್ತೊಗು ಸರಿಯಾದ್ ಒವೆನ್ ನಟ್ಟೊನ್ವಡಲಾ ಆಯೆ ನಮನ್ ಕೇನ್ವೆ. ಉಂದೇ ಆಯ ಮಿತ್ತ್ ನಂಕುಪ್ಪು ಧೈರ್ಯ. 15 ನಮ ನಟ್ಟೊನುನೆನ್ ಆಯೆ ಕೇನ್ವೆ ಅಂದ್‌ದ್ ನಂಕ್ ತೆರಿದಿತ್ತ್ಂಡಲಾ, ನಮ ನಟ್ಟೊಂಡಿನವು ಆಯಡ್ದ್ ತಿಕ್ಕುಂಡು ಪಂಡ್ದ್‌ಲಾ ನಂಕ್ ತೆರಿದುಂಡು. 16 ಏರಾಂಡಲಾ ಒರಿ ಸಹೋದರೆ ಮರಣೊಗು ಕಾರಣ ಅತ್ತಂದಿನ ಪಾಪ ಮಲ್ಪುನೆನ್ ತೂಂಡ, ಆಯೆ ಅಂಚಿತ್ತಿನಾಯಗ್ ಪ್ರಾರ್ಥನೆ ಮಲ್ಪಡ್. ಅಪಗ ದೇವೆರ್ ಆ ನರಮಾನಿಗ್ ಜೀವ ಕೊರ್ಪೆ. ಆಂಡ ಮರಣೊಗು ಕಾರಣ ಅತ್ತಂದಿ ಪಾಪದ ವಿಷಯೊಡೇ ಯಾನ್ ಪನೊಂದುಲ್ಲೆ. ಮರಣೊಗು ಕಾರಣ ಆದುಪ್ಪು ಪಾಪಲಾ ಉಂಡು, ಐಕ್ ಬೋಡಾದ್ ನಿಕುಲು ಪ್ರಾರ್ಥನೆ ಮಲ್ಪೊಡಂದ್‌ದ್ ಯಾನ್ ಪನ್ಪುಜಿ. 17 ಮಾತ ಅನ್ಯಾಯೊಲುಲಾ ಪಾಪನೇ, ಆಂಡ ಮರಣೊಗು ಕಾರಣ ಅತ್ತಂದಿನ ಪಾಪಲಾ ಉಂಡು. 18 ದೇವೆರೆಡ್ದ್ ಪುಟ್ಟಿನಾಯೆ ಏರ್ಲಾ ಪಾಪ ಮಲ್ಪುಜೆ ಅಂದ್‌ದ್ ನಂಕ್ ಗೊತ್ತುಂಡು. ದಾಯೆಗಂದ್ಂಡ ದೇವೆರೆಡ್ದ್ ಪುಟ್ಟಿನಾಯೆ ತನನ್ ಕಾತೊನ್ವೆ, ಪಡಿಕೆಂತಿನಾಯೆ ಆಯನ್ ಮುಟ್ಟುಜೆ. 19 ನಮ ದೇವೆರೆ ಜೋಕುಲು ಪಂಡ್ದ್‌ಲಾ, ಇಡೀ ಲೋಕ ಪಡಿಕೆಂತಿನಾಯನ ವಶೊಟು ಉಂಡು ಪಂಡ್ದ್‌ಲಾ ನಮ ತೆರಿದುಲ್ಲ. 20 ದೇವೆರೆ ಮಗೆ ಬತ್ತ್‌ದ್ ನಮ ಸತ್ಯ ಆದುಪ್ಪುನಾಯನ್ ತೆರಿಯೊನಿಯೆರೆ ಬೋಡಾಪಿ ಗೇನೊನು ನಂಕ್ ಕೊರ್ತೆ ಅಂದ್‌ದ್ ತೆರಿದ. ನಮ ನಿಜ ದೇವೆರೆಡ ಒಂಜಾದುಲ್ಲ, ಬೊಕ್ಕ ನಮ ದೇವೆರೆ ಮಗೆ ಆದುಪ್ಪು ಯೇಸು ಕ್ರಿಸ್ತಡ್ ಒಂಜಾದುಲ್ಲ. ಆಯೆನೇ ನಿಜ ದೇವೆರ್‌ಲಾ ನಿತ್ಯಜೀವಲಾ ಆದುಲ್ಲೆ. 21 ಪ್ರೀತಿದ ಜೋಕುಲೇ, ಮೂರ್ತಿ ಪೂಜೆಡ್ದ್ ದೂರಾದ್ ನಿಕುಲು ಜಾಗ್ರತೆಡುಪ್ಪುಲೆ. ಆಮೆನ್‌. |
New Life Literature