1 ಯೋಹಾನೆ 4 - ಪೊಸ ಒಡಂಬಡಿಕೆಸತ್ಯ ಬೊಕ್ಕ ಸುಳ್ಳುದ ಆತ್ಮ 1 ಪ್ರೀತಿದಾಕುಲೇ, ಮಸ್ತ್ ಮಂದಿ ಸುಳ್ಳು ಪ್ರವಾದಿಲು ಲೋಕದುಲಯಿ ಬೈದಿನೆಡ್ದ್ ನಿಕುಲು ಆತ್ಮಸಮ್ಮಂಧವಾಯಿನ ಮಾತ ಪಾತೆರೊಲೆನ್ ನಂಬಡೆ, ಆ ಪಾತೆರೊಲು ದೇವೆರೆಡ್ದ್ ಬೈದಿನವಾ ಪಂಡ್ದ್ ತೆರಿಯೊನಿಯೆರೆಗಾದ್ ಪರೀಕ್ಷೆ ಮಲ್ಪುಲೆ. 2 ದೇವೆರೆ ಆತ್ಮ ಅಕ್ಲೆಡ್ ಉಂಡಾ ಇಜ್ಜಾ ಪಂಡ್ದ್ ನಮ ಎಂಚ ತೆರಿಯೊನೊಲಿ? ಏರಾಂಡಲಾ ಒರಿ ಯೇಸು ಕ್ರಿಸ್ತೆ ನಿಜ ಶರೀರೊಡು ಬತ್ತೆ ಇನ್ಪಿನೆನ್ ಒಪ್ಪಿಯೆಡ ಆಯಡ ದೇವೆರೆ ಆತ್ಮ ಉಂಡು. 3 ಆಂಡ ಒರಿ, ಯೇಸುನು ಒಪ್ಪಿಯೊನುಜೆಡ ಆಯೆ ದೇವೆರೆಡ್ದ್ ಬೈದಿನಾಯೆ ಅತ್ತ್. ಆಯಡ ಕ್ರಿಸ್ತ ವಿರೋಧಿನ ಆತ್ಮ ಉಂಡು. ಇಂಚಿನ ಆತ್ಮ ಲೋಕೊಗು ಬರು ಅಂದ್‌ದ್ ನಿಕುಲು ಕೇಂಡ್ದರತ್ತಾ? ಅವು ಇತ್ತೆನೇ ಲೋಕೊಡು ಉಂಡು. 4 ಪ್ರೀತಿದ ಜೋಕುಲೇ, ನಿಕುಲು ದೇವೆರೆಗ್ ಸೇರ್ದಿನಾಕುಲು, ಬೊಕ್ಕ ನಿಕ್ಲೆಗ್ ಇತ್ತೆನೇ ಸುಳ್ಳು ಪ್ರವಾದಿಲೆ ಮಿತ್ತ್ ಜಯ ತಿಕ್ಕ್‌ದ್ಂಡ್. ದಾಯೆಗಂದ್ಂಡ ನಿಕ್ಲೆಡ್ ಉಪ್ಪುನಾಯೆ ಲೋಕೊಡುಪ್ಪುನಾಯಡ್ದ್ ಶಕ್ತಿದಾಯೆ ಆದುಲ್ಲೆ. 5 ಆ ಜನೊಕುಲು ಈ ಲೋಕೊಗು ಸೇರ್ದಿನಾಕುಲು; ಅಂಚಾದ್ ಅಕುಲು ಲೋಕದ ರೀತಿಡ್ ಪಾತೆರ್‌ವೆರ್, ಬೊಕ್ಕ ಲೋಕ ಅಕ್ಲೆಗ್ ಕೆಬಿ ಕೊರ್ಪುಂಡು. 6 ಆಂಡ ನಮ ದೇವೆರೆಗ್ ಸೇರ್ದಿನಾಕುಲು; ದೇವೆರೆನ್ ತೆರಿದಿನಾಕುಲು ನಂಕ್ ಕೆಬಿ ಕೊರ್ಪೆರ್. ಅಕುಲು ದೇವೆರೆಗ್ ಸೇರ್ದ್ ಇಜ್ಜೆರ್ಡ ನಂಕ್ ಕೆಬಿ ಕೊರ್ಪುಜೆರ್. ಉಂದೆಡ್ದೇ ಸತ್ಯದ ಆತ್ಮೊನ್ಲಾ ಮೋಸದ ಆತ್ಮೊನ್ಲಾ ನಮ ತೆರಿಯೊನ್ವ. ದೇವೆರ್ ಪ್ರೀತಿ ಆದುಲ್ಲೆ 7 ಪ್ರೀತಿದಾಕುಲೇ, ನಮ ಒರಿಯನ್ ಒರಿ ಪ್ರೀತಿ ಮಲ್ಪಗ; ದಾಯೆಗಂದ್ಂಡ ಪ್ರೀತಿ ದೇವೆರೆಡ್ದ್ ಉಂಡಾಯಿನವು. ಪ್ರೀತಿ ಮಲ್ಪುನ ಪ್ರತಿ ಒರಿಲಾ ದೇವೆರೆಡ್ದ್ ಪುಟ್ಟಿನಾಯೆ ದೇವೆರೆನ್ ತೆರಿದಿನಾಯೆ ಆದುಲ್ಲೆ. 8 ಆಂಡ ಪ್ರೀತಿ ಮಲ್ಪಂದಿನಾಯೆ, ದೇವೆರೆನ್ ತೆರಿಯಂದಿನಾಯೆ ಆದುಲ್ಲೆ. ದಾಯೆಗಂದ್ಂಡ ದೇವೆರ್ ಪ್ರೀತಿಸ್ವರೂಪಿ ಆದುಲ್ಲೆ. 9 ದೇವೆರ್ ತನ ಒರಿಯೇ ಮಗನ್, ನಮ ಆಯಡ್ದ್ ಬದುಕುಲೆಕ್ಕ ಲೋಕೊಗು ಕಡಪುಡಿನೆಡ್ದೇ ದೇವೆರೆ ಪ್ರೀತಿ ತೋಜಿದ್ ಬತ್ತ್ಂಡ್. 10 ನಮ ದೇವೆರೆನ್ ಪ್ರೀತಿ ಮಲ್ತಿನೆಟ್ಟ್ ಅತ್ತ್, ಆಯೆ ನಮನ್ ಪ್ರೀತಿ ಮಲ್ತ್‌ದ್, ತನ ಮಗನ್ ನಮ ಪಾಪೊಲೆಗ್ ಬೋಡಾದ್ ಬಲಿ ಆದ್ ಕಡಪುಡಿನೆಟ್ಟೇ ತೋಜಿದ್ ಬರ್ಪುಂಡು. 11 ಪ್ರೀತಿದಾಕುಲೇ, ದೇವೆರ್ ನಮನ್ ಈತೊಂಜಿ ಪ್ರೀತಿ ಮಲ್ತಿನೆಡ್ದ್, ನಮಲಾ ಒರಿಯನ್ ಒರಿ ಪ್ರೀತಿ ಮಲ್ಪೊಡಾಪುಂಡು. 12 ದೇವೆರೆನ್ ಏರ್ಲಾ ಏಪಲಾ ತೂತುಜೆರ್. ಆಂಡ ನಮ ಒರಿಯನ್ ಒರಿ ಪ್ರೀತಿ ಮಲ್ಪುನಾಂಡ ದೇವೆರ್ ನಮಡ ನಿಲೆ ಆದುಲ್ಲೆ ಬೊಕ್ಕ ಆಯನ ಪ್ರೀತಿ ನಮಡ ಪೂರ್ತಿ ಆದುಂಡು. 13 ಬೊಕ್ಕ ದೇವೆರ್ ನಂಕ್ ತನ ಆತ್ಮೊನು ಕೊರಿನೆಡ್ದಾವರ ಆಯೆ ನಮಡ ಉಲ್ಲೆ, ನಮ ಆಯಡ ಉಲ್ಲ ಅಂದ್‌ದ್ ತೆರಿಯೊನ್ವ. 14 ಅಮ್ಮೆ ಆದುಪ್ಪು ದೇವೆರ್ ತನ ಮಗನ್ ಈ ಲೋಕದ ರಕ್ಷಕೆ ಆದ್ ಕಡಪುಡ್ದಿನೆನ್ ಎಂಕುಲು ಸ್ವಂತ ಕಣ್ಣ್‌ಡ್ ತೂದು, ಇತ್ತೆ ಐಕಾದ್ ಸಾಕ್ಷಿ ಕೊರ್ಪ. 15 ಯೇಸು ದೇವೆರೆ ಮಗೆ ಆದುಲ್ಲೆ ಇನ್ಪಿನೆನ್ ಏರ್ ಅರಿಕೆ ಮಲ್ಪುವೆನಾ, ಆಯಡ ದೇವೆರ್ ಒಂಜಾದುಲ್ಲೆ ಅಂಚೆನೇ ದೇವೆರ್ ಆಯಡ ಒಂಜಾದುಪ್ಪುವೆ. 16 ಅಂಚಾದ್ ದೇವೆರ್ ನಮನ್ ಏತೊಂಜಿ ಪ್ರೀತಿ ಮಲ್ಪುವೆ ಇನ್ಪಿನವು ನಂಕ್ ತೆರಿದುಂಡು. ಬೊಕ್ಕ ನಮ ಅವೆನ್ ನಂಬುದ. ದೇವೆರ್ ಪ್ರೀತಿಸ್ವರೂಪಿ ಆದುಲ್ಲೆ, ಪ್ರೀತಿಡ್ ನಿಲೆ ಆದುಪ್ಪುನಾಯೆ ದೇವೆರೆಡ್ ನಿಲೆ ಆದುಲ್ಲೆ ಬೊಕ್ಕ ದೇವೆರ್ ಆಯಡ ನಿಲೆ ಆದುಲ್ಲೆ. 17 ನ್ಯಾಯತೀರ್ಪುದ ದಿನೊಟು ನಮ ಧೈರ್ಯೊಡು ಉಪ್ಪುಲೆಕ್ಕ ಆಯನ ಪ್ರೀತಿ ನಮಡ ಪೂರ್ತಿ ಆದುಂಡು. ದಾಯೆಗಂದ್ಂಡ ಕ್ರಿಸ್ತೆ ಉಪ್ಪುಲೆಕ್ಕನೇ ನಮಲಾ ಈ ಲೋಕೊಡು ಉಲ್ಲ. 18 ಪ್ರೀತಿ ಉಪ್ಪುನಲ್ಪ ಪೋಡಿಗೆ ಇಜ್ಜಿ. ಆಂಡ ಪೂರ್ತಿ ಇತ್ತಿ ಪ್ರೀತಿ ಪೋಡಿಗೆನ್ ದೂರ ಮಲ್ಪುಂಡು. ಪೋಡಿಗೆ ಬೇನೆ ಕೊರೊಂದೇ ಉಪ್ಪುಂಡು. ಬೊಕ್ಕ ಪೋಡಿಯುನಾಯೆ ಪ್ರೀತಿಡ್ ಪೂರ್ತಿ ಆತಿನಾಯೆ ಅತ್ತ್. 19 ದೇವೆರ್ ನಮನ್ ಸುರು ಪ್ರೀತಿ ಮಲ್ತಿನೆಡ್ದ್ ನಮ ಆಯನ್ ಪ್ರೀತಿ ಮಲ್ಪುವ. 20 ಏರಾಂಡಲಾ ಒರಿ, ಯಾನ್ ದೇವೆರೆನ್ ಪ್ರೀತಿ ಮಲ್ಪುವೆ ಅಂದ್‌ದ್ ತನ ಸಹೋದ್ರನ್ ಪಗೆ ಮಲ್ಪುವೆಡ, ಆಯೆ ಸುಳ್ಳುಗಾರೆ ಆದುಲ್ಲೆ. ತಾನ್ ತೂಪಿ ಸಹೋದ್ರನ್ ಪ್ರೀತಿ ಮಲ್ಪಂದಿನಾಯೆ, ತಾನ್ ತೂವಂದಿ ದೇವೆರೆನ್ ಎಂಚ ಪ್ರೀತಿ ಮಲ್ಪೊಲಿ? 21 ದೇವೆರೆನ್ ಪ್ರೀತಿ ಮಲ್ಪುನಾಯೆ ತನ ಸಹೋದ್ರನ್ಲಾ ಪ್ರೀತಿ ಮಲ್ಪೊಡು ಇನ್ಪಿ ಅಪ್ಪಣೆ ನಂಕ್ ಆಯಡ್ದ್ ತಿಕ್ಕ್‌ದ್ಂಡ್. |
New Life Literature