1 ಯೋಹಾನೆ 3 - ಪೊಸ ಒಡಂಬಡಿಕೆದೇವೆರೆ ಜೋಕುಲು 1 ತೂಲೆ! ಅಮ್ಮೆ ಆದುಪ್ಪು ದೇವೆರ್ ನಮನ್ ಏತೊಂಜಿ ಪ್ರೀತಿ ಮಲ್ಪುವೆ. ಆಯೆ ನಮನ್ ತನ ಜೋಕುಲಂದ್‌ದ್ ಲೆಪ್ಪುವೆ, ಅಂಚಾದ್ ನಮ ಆಯನ ಜೋಕುಲು ಆದುಲ್ಲ. ಆಂಡ ಈ ಲೋಕದ ಜನೊಕುಲು ದೇವೆರೆನ್ ತೆರಿಯಂದಿನೆಡ್ದ್ ನಮನ್ ಆಯನ ಜೋಕುಲು ಇನ್ಪಿನೆನ್ ತೆರಿಯೊನುಜೆರ್. 2 ಪ್ರೀತಿದಾಕುಲೇ, ನಮ ಇತ್ತೆ ದೇವೆರೆ ಜೋಕುಲು ಆದುಲ್ಲ. ದುಂಬಗ್ ನಮ ಎಂಚ ಉಪ್ಪುವ ಅಂದ್‌ದ್ ನಂಕ್ ಗೊತ್ತುಜ್ಜಿ. ಆಂಡ ಕ್ರಿಸ್ತೆ ತೋಜಿದ್ ಬನ್ನಗ, ನಮ ಆಯ ಲೆಕ್ಕನೆ ಉಪ್ಪುವ ಇನ್ಪಿನೆನ್ ತೆರಿದ. ದಾಯೆಗಂದ್ಂಡ ಆಯೆ ಉಪ್ಪುಲೆಕ್ಕನೇ ನಮ ಆಯನ್ ತೂಪ. 3 ಆಯ ಮಿತ್ತ್ ಈ ನಿರೀಕ್ಷೆ ದೀತಿನ ಪ್ರತಿ ಒರಿಲಾ ಕ್ರಿಸ್ತೆ ಶುದ್ಧ ಆದುಪ್ಪುಲೆಕ್ಕನೇ ತನನ್ ತಾನೇ ಶುದ್ಧ ಮಲ್ತೊನ್ವೆ. 4 ಪಾಪ ಮಲ್ಪುನ ಪ್ರತಿ ಒರಿಲಾ ಅನ್ಯಾಯೊನು ಮಲ್ಪುನಾಯೆ ಆದುಲ್ಲೆ. ಪಾಪ ಅನ್ಯಾಯನೇ. 5 ಪಾಪೊಲೆನ್ ದೆತ್ತ್ ಪಾಡೆರೆಗಾದ್ ಕ್ರಿಸ್ತೆ ತೋಜಿದ್ ಬತ್ತೆ ಅಂದ್‌ದ್ ನಿಕ್ಲೆಗ್ ತೆರಿದುಂಡು; ಆಂಡ ಆಯಡ ಪಾಪ ಇಜ್ಜಿ. 6 ಆಯಡ್ ಒಂಜಾದುಪ್ಪುನಾಯೆ ಏರ್ಲಾ ಪಾಪ ಮಲ್ಪುಜೆ. ಪಾಪ ಮಲ್ಪುನಾಯೆ ಆಯನ್ ತೂತಿನ್ಲಾ ಇಜ್ಜಿ, ಅತ್ತ್‌ಡ ತೆರಿದಿನ್ಲಾ ಇಜ್ಜಿ. 7 ಪ್ರೀತಿದ ಜೋಕುಲೇ, ನಿಕ್ಲೆನ್ ಮೋಸ ಮಲ್ಪಂದಿಲೆಕ್ಕ ಏರೆಗ್ಲಾ ಅವಕಾಸ ಕೊರೊಡ್ಚಿ. ಕ್ರಿಸ್ತೆ ನೀತಿವಂತೆ ಆದುಪ್ಪುಲೆಕ್ಕನೇ, ನೀತಿಡ್ ನಡುಪುನಾಯೆ ನೀತಿವಂತೆ ಆದುಲ್ಲೆ. 8 ಏರಾಂಡಲಾ ಪಾಪ ಮಲ್ತೊಂದೇ ಇತ್ತೆರ್ಡ ಅಕುಲು ಸೈತಾನಗ್ ಸೇರ್ದಿನಾಕುಲು ಅಂದ್‌ದ್ ತೋಜಿದ್ ಬರ್ಪುಂಡು. ಸೈತಾನೆ ಆದಿಡ್ದಿಂಚಿಲಾ ಪಾಪ ಮಲ್ತೊಂದೇ ಇತ್ತೆ. ಆಂಡ ದೇವೆರೆ ಮಗೆ ಸೈತಾನನ ಕಾರ್ಯೊಲೆನ್ ನಾಶ ಮಲ್ಪೆರೆಗಾದ್ ಬತ್ತೆ. 9 ದೇವೆರೆಡ್ದ್ ಪುಟ್ಟಿನಾಯೆ ಏರ್ಲಾ ಪಾಪ ಮಲ್ಪುಜೆ, ದಾಯೆಗಂದ್ಂಡ ದೇವೆರೆ ಸ್ವಭಾವ ಆಯಡ ಉಂಡು. ಆಯೆ ದೇವೆರೆಡ್ದ್ ಪುಟ್ಟಿನಾಯೆ ಆದುಪ್ಪುನೆಡ್ದ್ ಪಾಪ ಮಲ್ತೊಂದುಪ್ಪುಜೆ. 10 ದೇವೆರೆ ಜೋಕುಲು ಏರ್ ಬೊಕ್ಕ ಪಿಶಾಚನ ಜೋಕುಲು ಏರ್ ಇನ್ಪಿನವು ಉಂದೆಡ್ದೇ ತೆರಿದ್ ಬರ್ಪುಂಡು. ನೀತಿಡ್ ನಡಪಂದಿನಾಯೆಲಾ ತನ ಸಹೋದ್ರನ್ ಪ್ರೀತಿ ಮಲ್ಪಂದಿನಾಯೆಲಾ ದೇವೆರೆಡ್ದ್ ಪುಟ್ಟಿನಾಯೆ ಅತ್ತ್. ಒರಿಯನ್ ಒರಿ ಪ್ರೀತಿ ಮಲ್ಪೊಡು ಇನ್ಪಿನವು 11 ನಮ ಒರಿಯನ್ ಒರಿ ಪ್ರೀತಿ ಮಲ್ಪೊಡು ಇನ್ಪಿನವೇ ನಿಕುಲು ಆದಿಡ್ದಿಂಚಿಲಾ ಕೇಂಡಿನ ಪಾತೆರ ಆದುಂಡು. 12 ನಮ ಕಾಯಿನ ಲೆಕ್ಕ ಉಪ್ಪೆರೆ ಬಲ್ಲಿ. ಕಾಯಿನೆ ಪಡಿಕೆಂತಿನಾಯೆ ಆದಿತ್ತಿನೆಡ್ದ್ ತನ ಮೆಗ್ಯನ್ ಕೆರಿಯೆ, ಆಯೆ ದಾಯೆಗ್ ತನ ಮೆಗ್ಯನ್ ಕೆರಿಯೆ? ದಾಯೆಗಂದ್ಂಡ ತನ ಕ್ರಿಯೊಲು ಪಡಿಕೆಂತಿನವು, ತನ ಮೆಗ್ಯನ ಕ್ರಿಯೊಲು ನೀತಿದವು ಆದಿತ್ತಿನೆಡ್ದೇ. 13 ಎನ ಸಹೋದ್ರೆರೇ, ಲೋಕದ ಜನೊಕುಲು ನಿಕ್ಲೆನ್ ಪಗೆ ಮಲ್ತೆರ್ಡ ಅಚ್ಚಿರ ಆವಡೆ. 14 ನಮ ಕ್ರೈಸ್ತಸಹೋದ್ರೆರೆನ್ ಪ್ರೀತಿ ಮಲ್ಪುನಾಕುಲು ಆದುಪ್ಪುನೆಡ್ದ್ ಮರಣೊಡ್ದು ಜೀವೊಗು ದಾಂಟ್‌ದ್ ಬತ್ತ ಅಂದ್‌ದ್ ನಂಕ್ ಗೊತ್ತಾತ್ತ್ಂಡ್. ತನ ಸಹೋದ್ರನ್ ಪ್ರೀತಿ ಮಲ್ಪಂದಿನಾಯೆ ಮರಣೊಡೇ ಉಲ್ಲೆ. 15 ತನ ಸಹೋದ್ರನ್ ಪಗೆ ಮಲ್ಪುನಾಯೆ ನಿಜಾದ್ ಒರಿ ಮಾನ್ಯ ಕೆರ್ಪಿನಾಯೆ ಆದುಲ್ಲೆ. ಬೊಕ್ಕ ವಾ ಮಾನ್ಯಕೆರ್ಪಿನಾಯಡಲಾ ನಿತ್ಯಜೀವ ಇಜ್ಜಿ ಅಂದ್‌ದ್ ನಿಕ್ಲೆಗ್ ಗೊತ್ತುಂಡು. 16 ಕ್ರಿಸ್ತೆ ನಂಕಾದ್ ತನ ಜೀವ ಕೊರ್ತಿನೆಡ್ದ್ ನಿಜವಾಯಿನ ಪ್ರೀತಿ ದಾನೆ ಅಂದ್‌ದ್ ನಂಕ್ ತೆರಿದ್‌ಂಡ್. ಅಂಚೆನೇ ನಮಲಾ ಸಹೋದ್ರೆರೆಗಾದ್ ನಮ ಪ್ರಾಣೊನು ಕೊರಿಯೆರೆ ತಯಾರಾದುಪ್ಪೊಡು. 17 ಈ ಲೋಕದ ಸಂಪೊತ್ತು ಇತ್ತಿನಾಯೆ ಕೊರತೆಡುಪ್ಪು ತನ ಸಹೋದ್ರನ್ ತೂದು ಕನಿಕರ ತೋಜಾಯಿಜೆಡ, ದೇವೆರೆ ಪ್ರೀತಿ ಆಯಡ ಎಂಚ ಉಪ್ಪುನು? 18 ಎನ ಪ್ರೀತಿದ ಜೋಕುಲೇ, ನಿಕುಲು ಬಜೀ ಪಾತೆರೊಡ್ದಾವಡ್ ಬಾಯಿ ಪ್ರಚಾರೊಡ್ದಾವಡ್ ಪ್ರೀತಿ ಮಲ್ಪುನಾಕುಲು ಆದುಪ್ಪಡೆ. ನಿಕ್ಲೆ ಪ್ರೀತಿ ಕ್ರಿಯೊಲೆಡ್ಲಾ ಸತ್ಯೊಡ್ಲಾ ತೋಜಿದ್ ಬರಡ್. ದೇವೆರೆ ದುಂಬು ಧೈರ್ಯ 19 ನಮ ಸತ್ಯೊಗು ಸೇರ್ದಿನಾಕುಲು ಅಂದ್‌ದ್ ಉಂದೆಡ್ದೇ ನಂಕ್ ಗೊತ್ತಾಪುಂಡು. ಬೊಕ್ಕ ದೇವೆರೆ ಎದುರು ನಮ ಉಡಲ್‌ಗ್ ಧೈರ್ಯ ಆಪುಂಡು. 20 ನಮ ಉಡಲ್ ನಮನ್ ತಪ್ಪುಗಾರೆರ್ ಅಂದ್‌ದ್ ತೀರ್ಪು ಮಲ್ತ್ಂಡಲಾ, ದೇವೆರ್ ನಮ ಮನಸಾಕ್ಷಿಡ್ದ್ ಮಲ್ಲಾಯೆ ಆದಿತ್ತ್‌ದ್ ಆಯಗ್ ಮಾತಲಾ ತೆರಿದುಂಡು. 21 ಪ್ರೀತಿದಾಕುಲೇ, ನಮ ಉಡಲ್ ನಮನ್ ತಪ್ಪುಗಾರೆರ್ ಅಂದ್‌ದ್ ತೀರ್ಪು ಮಲ್ಪುಜಿಡ ನಮ ದೇವೆರೆ ಎದುರು ಧೈರ್ಯೊಡು ಬರೊಲಿ. 22 ನಮ ಆಯ ಅಪ್ಪಣೆಲೆನ್ ಕೈಕೊಂದು ನಡಪುನೆಡ್ದ್‌ಲಾ ಆಯಗ್ ಮೆಚ್ಚಿಗೆ ಇತ್ತಿನೆನೇ ಮಲ್ಪುನಾಕುಲು ಆದುಪ್ಪುನೆಡ್ದ್‌ಲಾ ನಮ ನಟ್ಟೊಂಡಿನೆನ್ ಮಾತೆನ್ಲಾ ಆಯಡ್ದ್ ಹೊಂದುವ. 23 ದೇವೆರೆ ಅಪ್ಪಣೆ ದಾನೆಂದ್ಂಡ, ಆಯ ಮಗೆ ಆದುಪ್ಪು ಯೇಸು ಕ್ರಿಸ್ತನ್ ನಮ ನಂಬುದು ಬೊಕ್ಕ ಆಯೆ ಅಪ್ಪಣೆ ಕೊರಿಲೆಕ್ಕನೇ ಒರಿಯನ್ ಒರಿ ಪ್ರೀತಿ ಮಲ್ಪೊಡು ಇನ್ಪಿನವೇ. 24 ಆಯ ಅಪ್ಪಣೆಲೆನ್ ಕೈಕೊಂದು ನಡಪುನಾಯೆ ಆಯಡ್ ಒಂಜಾದುಲ್ಲೆ ಬೊಕ್ಕ ದೇವೆರ್ ಆಯಡ್ ಒಂಜಾದುಲ್ಲೆ. ಆಯೆ ನಮಡ ಒಂಜಾದುಲ್ಲೆ ಅಂದ್‌ದ್ ಆಯೆ ನಂಕ್ ಕೊರಿ ಆತ್ಮೊಡ್ದೇ ನಮ ತೆರಿಯೊನ್ವ |
New Life Literature