1 ಯೋಹಾನೆ 2 - ಪೊಸ ಒಡಂಬಡಿಕೆಯೇಸು ಕ್ರಿಸ್ತೆ ನಮ ಮದ್ಯಸ್ತೆಗಾರೆ 1 ಎನ ಪ್ರೀತಿದ ಜೋಕುಲೇ, ನಿಕುಲು ಪಾಪ ಮಲ್ಪಂದಿಲೆಕ್ಕ ಯಾನ್ ಉಂದೆನ್ ನಿಕ್ಲೆಗ್ ಬರೆವೊಂದುಲ್ಲೆ. ಏರಾಂಡಲಾ ಪಾಪ ಮಲ್ತೆಡ, ನೀತಿವಂತೆ ಆದುಪ್ಪು ಯೇಸು ಕ್ರಿಸ್ತೆ ಪನ್ಪಿ ನ್ಯಾಯವಾದಿ ನಂಕ್ ಅಮ್ಮೆರೆ ಕೈತಲ್ ಉಲ್ಲೆ. 2 ಆಯೆ ನಮ ಪಾಪೊಲೆನ್ ಪರಿಹಾರ ಮಲ್ಪುನ ಬಲಿ ಆದುಲ್ಲೆ. ನಮ ಪಾಪೊಲೆನ್ ಮಾತ್ರ ಅತ್ತಂದೆ ಇಡೀ ಲೋಕದ ಪಾಪೊಲೆನ್ಲಾ ಪರಿಹಾರ ಮಲ್ಪುವೆ. 3 ಬೊಕ್ಕ ನಮ ಆಯ ಅಪ್ಪಣೆಲೆನ್ ಕೈಕೊಂದು ನಡಪುವಡ, ಕಂಡಿತಾದ್ ನಮ ಆಯನ್ ತೆರಿದ ಅಂದ್‌ದ್ ಆಪುಂಡು. 4 ಒರಿ, ಯಾನ್ ಆಯನ್ ತೆರಿದುಲ್ಲೆ ಪಂಡ್ದ್, ಆಯ ಅಪ್ಪಣೆಲೆನ್ ಕೈಕೊಂದು ನಡತಿಜೆಡ, ಆಯೆ ಸುಳ್ಳುಗಾರೆ ಆದುಲ್ಲೆ. ಬೊಕ್ಕ ಸತ್ಯ ಆಯಡ ಉಪ್ಪುಜಿ. 5 ಏರಾಂಡಲಾ ಆಯನ ಪಾತೆರೊನು ಕೈಕೊಂದು ನಡಪುವೆಡ ಆಯಡ ನಿಜಾದ್ ದೇವೆರೆ ಪ್ರೀತಿ ಪೂರ್ತಿ ಆದುಂಡು. ಇಂಚಿನ ಕಾರ್ಯೊಡ್ದು ನಮ ಆಯಡ ಒಂಜಾದುಲ್ಲ ಅಂದ್‌ದ್ ತೆರಿಯೊನ್ವ. 6 ದೇವೆರೆಡ್ ನಿಲೆ ಆದುಲ್ಲೆ ಅಂದ್‌ದ್ ಪನ್ಪಿನಾಯೆ, ಕ್ರಿಸ್ತೆ ಎಂಚ ನಡತೊಂಡೆನಾ ಅಂಚೆನೆ ತಾನ್‌ಲಾ ನಡತೊನೊಡಾಪುಂಡು. ಒಂಜಿ ಪೊಸ ಅಪ್ಪಣೆ 7 ಪ್ರೀತಿದಾಕುಲೇ, ಯಾನ್ ನಿಕ್ಲೆಗ್ ಒಂಜಿ ಪೊಸ ಅಪ್ಪಣೆನ್ ಅತ್ತ್, ದುಂಬುಡ್ದಿಂಚಿ ನಿಕ್ಲೆಗ್ ಇತ್ತಿ ಪರ ಅಪ್ಪಣೆನೇ ಬರೆಪೆ. ಒರಿಯನ್ ಒರಿ ಪ್ರೀತಿ ಮಲ್ಪೊಡು ಪನ್ಪಿನ ಈ ಪರ ಅಪ್ಪಣೆ ನಿಕುಲು ಕೇಂಡಿನ ವಾಕ್ಯನೇ ಆದುಂಡು. 8 ಕುಡ ನಿಕ್ಲೆಗ್ ಒಂಜಿ ಪೊಸ ಅಪ್ಪಣೆ ಬರೆಪೆ. ಉಂದು ಆಯಡಲಾ ನಿಕ್ಲೆಡಲಾ ಸತ್ಯ ಆದುಂಡು. ದಾಯೆಗಂದ್ಂಡ ಕತ್ತಲೆ ಕರಿದ್ ಪೋಪುಂಡು, ನಿಜವಾಯಿನ ಬೊಲ್ಪು ಇತ್ತೆ ಮೂಡುಂಡು. 9 ಬೊಲ್ಪುಡುಲ್ಲೆ ಅಂದ್‌ದ್ ಪನ್ಪಿನಾಯೆ ತನ ಸಹೋದ್ರನ್ ಪಗೆ ಮಲ್ತೊಂದಿತ್ತ್‌ಂಡ, ಆಯೆ ನನಲಾ ಕತ್ತಲೆಡ್ ಉಲ್ಲೆ. 10 ತನ ಸಹೋದ್ರನ್ ಪ್ರೀತಿ ಮಲ್ಪುನಾಯೆ ಬೊಲ್ಪುಡು ನಿಲೆ ಆದುಲ್ಲೆ. ಬೊಕ್ಕ ಬೇತೆಕ್ಲು ದಂಟೆರೆ ಕಾರಣ ಆಪುಜೆ. 11 ಆಂಡ ತನ ಸಹೋದ್ರನ್ ಪಗೆ ಮಲ್ಪುನಾಯೆ ಕತ್ತಲೆಡ್ ಉಲ್ಲೆ ಬೊಕ್ಕ ಕತ್ತಲೆಡ್ ನಡತೊಂದುಲ್ಲೆ. ಕತ್ತಲೆ ಆಯನ ಕಣ್ಣ್‌ಲೆನ್ ಕುರುಡು ಮಲ್ತಿನೆಡ್ದ್ ಆಯೆ ಒಡೆಗ್ ಪೋವೊಂದುಲ್ಲೆ ಅಂದ್‌ದ್ ಆಯಗ್ ತೆರಿಯಂದ್. 12 ಎನ ಪ್ರೀತಿದ ಜೋಕುಲೇ, ಯೇಸು ಕ್ರಿಸ್ತನ ಪುದರ್‌ಡ್ದಾದ್ ನಿಕ್ಲೆ ಪಾಪೊಲು ಮಾಪು ಆತಿನೆಡ್ದ್ ನಿಕ್ಲೆಗ್ ಬರೆವೊಂದುಲ್ಲೆ. 13 ಅಮ್ಮಾಡ್ಲೇ, ಆದಿಡ್ದ್ ಇತ್ತಿನಾಯನ್ ನಿಕುಲು ತೆರಿದಿನೆಡ್ದ್ ನಿಕ್ಲೆಗ್ ಬರೆವೊಂದುಲ್ಲೆ. ಜವನ್ಯೆರೇ, ನಿಕುಲು ಪಡಿಕೆಂತಿನಾಯನ್ ಜೈಸಿನೆಡ್ದ್ ನಿಕ್ಲೆಗ್ ಬರೆವೊಂದುಲ್ಲೆ. ಜೋಕುಲೇ, ಅಮ್ಮೆ ಆದುಪ್ಪು ದೇವೆರೆನ್ ನಿಕುಲು ತೆರಿದಿನೆಡ್ದ್ ನಿಕ್ಲೆಗ್ ಬರೆತೆ. 14 ಅಮ್ಮಾಡ್ಲೆ, ಆದಿಡ್ದ್ ಇತ್ತಿನಾಯನ್ ನಿಕುಲು ತೆರಿದಿನೆಡ್ದ್ ನಿಕ್ಲೆಗ್ ಬರೆತೆ. ಜವನ್ಯೆರೇ, ನಿಕುಲು ಶಕ್ತಿದಾಕುಲು ಆದಿತ್ತಿನೆಡ್ದ್‌ಲಾ ದೇವೆರೆ ಪಾತೆರ ನಿಕ್ಲೆಡ್ ನಿಲೆ ಆದಿತ್ತಿನೆಡ್ದ್‌ಲಾ ನಿಕುಲು ಪಡಿಕೆಂತಿನಾಯನ್ ಜೈಸಿನೆಡ್ದ್‌ಲಾ ನಿಕ್ಲೆಗ್ ಬರೆತೆ. 15 ಲೋಕೊನ್ಲಾ ಲೋಕೊಡುಪ್ಪುನೆನ್ಲಾ ಪ್ರೀತಿ ಮಲ್ಪಡೆ. ಏರಾಂಡಲಾ ಲೋಕೊನು ಪ್ರೀತಿ ಮಲ್ಪುವೆಡ, ಆಯಡ ಅಮ್ಮೆ ಆದುಪ್ಪು ದೇವೆರೆನ ಪ್ರೀತಿ ಇಜ್ಜಿ. 16 ಶರೀರದ ಆಸೆ, ಕಣ್ಣ್‌ಲೆ ಆಸೆ, ಬದ್‌ಕ್‌ದ ಡಂಬ ಇನ್ಪಿನ ಲೋಕೊಡುಪ್ಪುನವು ಮಾತಲಾ ಅಮ್ಮೆರೆಡ್ದ್ ಪುಟ್ಟಂದೆ ಲೋಕೊಡ್ದು ಪುಟ್ಟಿನವು ಆದುಂಡು. 17 ಲೋಕಲಾ ಐತ ಮಾತ ಆಸೆಲಾ ಇಜ್ಜಾಂದೆ ಪೋಪುಂಡು. ಆಂಡ ದೇವೆರೆ ಚಿತ್ತೊನು ಮಲ್ಪುನಾಯೆ ಏಪೊಗ್ಲಾ ಬದುಕುವೆ. ಕ್ರಿಸ್ತ ವಿರೋಧಿ 18 ಜೋಕುಲೇ, ಕಡೆ ಗಳಿಗೆ ಬೈದ್‌ಂಡ್. ಕ್ರಿಸ್ತ ವಿರೋಧಿ ಬರ್ಪೆ ಅಂದ್‌ದ್ ನಿಕುಲು ಕೇಂಡ್ದರ್. ಇತ್ತೆನೇ ಮಸ್ತ್ ಕ್ರಿಸ್ತ ವಿರೋಧಿಲು ತೋಜಿದ್ ಬೈದೆರ್. ಉಂದೆಡ್ದ್ ಕಡೆ ಗಳಿಗೆ ಬೈದ್‌ಂಡ್ ಅಂದ್‌ದ್ ನಮ ತೆರಿಯೊನ್ವ. 19 ಕ್ರಿಸ್ತ ವಿರೋಧಿಲು ನಮಡ್ದ್ ಪಿದಯಿ ಪೋಯಿನಾಕುಲು; ಮೊಕುಲು ನಮ್ಮಾಕುಲು ಆದಿತ್ತ್‌ಜೆರ್. ನಮ್ಮಾಕುಲು ಆದಿತ್ತೆರ್ಡ ನಮ ಒಟ್ಟುಗೇ ಇತ್ತುದ್ವೆರ್. ಆಂಡ ಅಕುಲು ನಮನ್ ಬುಡ್ದು ಪೋಯಿನೆಡ್ದ್ ನಮ್ಮಾಕುಲು ಅತ್ತ್ ಇನ್ಪಿನವು ಸ್ಪಷ್ಟಾದ್ ತೋಜಿದ್ ಬರ್ಪುಂಡು. 20 ಆಂಡ ನಿಕ್ಲೆಗ್ ಪರಿಶುದ್ಧ ಇತ್ತಿನಾಯಡ್ದ್ ಅಭಿಷೇಕ ಆದಿತ್ತಿನೆಡ್ದ್ ನಿಕುಲು ಮಾತೆರ್ಲಾ ಸತ್ಯೊನು ತೆರಿಯೊಂದರ್. 21 ನಿಕ್ಲೆಗ್ ಸತ್ಯ ತೆರಿದಿಜಿ ಅಂದ್‌ದ್ ಯಾನ್ ನಿಕ್ಲೆಗ್ ಬರೆಪಿನಿ ಅತ್ತ್. ಆಂಡ ನಿಕ್ಲೆಗ್ ಸತ್ಯ ತೆರಿದಿನೆಡ್ದ್‌ಲಾ, ಸತ್ಯೊಡು ವಾ ಸುಳ್ಳುಲಾ ಪುಟ್ಟಂದಿನೆಡ್ದ್‌ಲಾ ಯಾನ್ ನಿಕ್ಲೆಗ್ ಬರೆವೊಂದುಲ್ಲೆ. 22 ಸುಳ್ಳುಗಾರೆ ಏರ್? ಯೇಸುನು ಕ್ರಿಸ್ತೆ ಅತ್ತ್ ಅಂದ್‌ದ್ ಪನ್ಪಿನಾಯೆನೇ ಅತ್ತಂದೆ ಬೇತೆ ಏರ್ಲಾ ಆವೆರೆ ಸಾದ್ಯ ಇಜ್ಜಿ? ಅಮ್ಮೆ ಆದುಪ್ಪು ದೇವೆರೆನ್ಲಾ ಆಯ ಮಗನ್ಲಾ ಅರೆಂಜುನಾಯೆ ಕ್ರಿಸ್ತ ವಿರೋಧಿ ಆದುಲ್ಲೆ. 23 ಏರ್ ದೇವೆರೆ ಮಗನ್ ಅರೆಂಜುವೆನಾ ಆಯೆ ದೇವೆರೆಗ್ ಸೇರ್ದಿನಾಯೆ ಅತ್ತ್. ಆಂಡ ಏರ್ ಮಗನ್ ಒಪ್ಪಿಯೊನ್ವೆನಾ ಆಯೆ ಅಮ್ಮೆ ಆದುಪ್ಪು ದೇವೆರೆಗ್ ಸೇರ್ದಿನಾಯೆ ಆದುಲ್ಲೆ. 24 ಅಂಚಾಂಡ, ನಿಕುಲು ಆದಿಡ್ದಿಂಚಿ ಕೇಂಡ್ದಿ ಬೋಧನೆಲು ನಿಕ್ಲೆಡ್ ನಿಲೆ ಆದುಪ್ಪಡ್. ನಿಕುಲು ಆದಿಡ್ದ್ ಕೇಂಡಿನವು ನಿಕ್ಲೆಡ್ ನಿಲೆ ಆದಿತ್ತ್ಂಡ, ನಿಕುಲು ಮಗನೊಟ್ಟುಗ್ಲಾ ಅಮ್ಮೆರೊಟ್ಟುಗ್ಲಾ ಒಂಜಾದುಪ್ಪುವರ್. 25 ಬೊಕ್ಕ ಕ್ರಿಸ್ತೆ ನಂಕ್ ಕೊರಿ ವಾಗ್ದಾನ ನಿತ್ಯಜೀವನೇ. 26 ನಿಕ್ಲೆನ್ ಮೋಸೊಡು ಪಾಡುನಾಕುಲೆ ವಿಚಾರೊಡು ಉಂದೆನ್ ಯಾನ್ ನಿಕ್ಲೆಗ್ ಬರೆವೊಂದುಲ್ಲೆ. 27 ಆಂಡ ಆಯಡ್ದ್ ನಿಕುಲು ಪಡೆತಿನ ಅಭಿಷೇಕ ನಿಕ್ಲೆಡ್ ನಿಲೆ ಆದುಪ್ಪುನೆಡ್ದ್ ಏರ್ಲಾ ನಿಕ್ಲೆಗ್ ಕಲ್ಪಾವೊಡು ಅಂದ್‌ದ್ ಇಜ್ಜಿ. ದಾಯೆಗಂದ್ಂಡ ನಿಕ್ಲೆಗ್ ತೆರಿಯೊಡಾಯಿನೆನ್ ಮಾತಲಾ ಆತ್ಮೆ ಕಲ್ಪಾವೆ. ಬೊಕ್ಕ ಆಯೆ ಕಲ್ಪಾವುನವು ಸತ್ಯನೇ, ಸುಳ್ಳತ್ತ್. ಅಂಚಾದ್ ಆಯೆ ನಿಕ್ಲೆಗ್ ಕಲ್ಪಾದ್ ಕೊರಿ ಲೆಕ್ಕ ಕ್ರಿಸ್ತಡ್ ಒಂಜಾದುಪ್ಪುಲೆ. 28 ಅಂಚಾದ್ ಜೋಕುಲೇ, ಆಯೆ ಕುಡೊರ ತೋಜಿದ್ ಬನ್ನಗ ನಂಕ್ ಆಯಡ್ದ್ ನಾಚಿಗೆ ಆವಂದೆ, ಆಯ ಎದುರುಡು ಧೈರ್ಯೊಡು ಉಂತುಲೆಕ್ಕ ಕ್ರಿಸ್ತಡ್ ಒಂಜಾದುಪ್ಪುಲೆ. 29 ಕ್ರಿಸ್ತನ್ ನೀತಿವಂತೆ ಅಂದ್‌ದ್ ನಿಕುಲು ತೆರಿದುಲ್ಲರ್ಡ ನೀತಿಡ್ ನಡಪುನಾಯೆ ಪ್ರತಿ ಒರಿಲಾ ದೇವೆರೆಡ್ದ್ ಪುಟ್ಟಿನಾಯೆ ಅಂದ್‌ದ್ ನಿಕ್ಲೆಗ್ ತೆರಿಯುಂಡು. |
New Life Literature