1 ಯೋಹಾನೆ 1 - ಪೊಸ ಒಡಂಬಡಿಕೆಜೀವದ ವಾಕ್ಯ 1 ಎಂಕುಲು ನಿಕ್ಲೆಗ್ ಜೀವದ ವಾಕ್ಯ ಬರೆವೊಂದುಲ್ಲ. ಆ ಜೀವದ ವಾಕ್ಯ ಆದಿಡ್ದ್ ಇತ್ತಿನವು. ಅವೆನ್ ಎಂಕುಲು ಕೆಬಿಟ್ ಕೇಂಡ್ದ್, ಕಣ್ಣ್‌ಡ್ ತೂದು, ದೃಷ್ಟಿ ದೀದ್, ಎಂಕ್ಲೆನ ಕೈಟ್ ಮುಟ್ಟುದ. 2 ಆ ಜೀವ ಎಂಕ್ಲೆಗ್ ತೋಜಿದ್ ಬತ್ತ್ಂಡ್; ಎಂಕುಲು ಆಯನ್ ತೂಯ, ಬೊಕ್ಕ ಆಯನ ಸಂಗತಿಡ್ ಸಾಕ್ಷಿ ಪನ್ತ. ಆಯೆ ಪರಲೋಕೊಡು ಅಮ್ಮೆರೆಡೊಪ್ಪ ಇತ್ತ್‌ದ್, ಎಂಕ್ಲೆಗ್ ತೋಜಿದ್ ಬತ್ತಿನ ನಿತ್ಯಜೀವೊನು ಇತ್ತೆ ನಿಕ್ಲೆಗ್ ತೆರಿಪಾವ. 3 ಎಂಕ್ಲೆಗ್ ಉಪ್ಪುನ ಅನ್ಯಮನ್ಯೊಡು ನಿಕುಲುಲಾ ಸೇರೊಡಂದ್‌ದ್ ಎಂಕುಲು ತೂಯಿನೆನ್ಲಾ ಕೇಂಡಿನೆನ್ಲಾ ನಿಕ್ಲೆಗ್ ತೆರಿಪಾವ. ಎಂಕ್ಲೆನ ಅನ್ಯಮನ್ಯ ಅಮ್ಮೆರೆಡೊಪ್ಪಲಾ ಆಯ ಮಗೆ ಆದುಪ್ಪು ಯೇಸು ಕ್ರಿಸ್ತಡೊಪ್ಪಲಾ ಉಂಡು. 4 ಎಂಕ್ಲೆನ ಸಂತೋಷ ಪೂರ್ತಿ ಆಪಿಲೆಕ್ಕ ಈ ಪಾತೆರೊಲೆನ್ ನಿಕ್ಲೆಗ್ ಬರೆವೊಂದುಲ್ಲ. ದೇವೆರ್ ಬೊಲ್ಪು ಆದುಲ್ಲೆ 5 ದೇವೆರ್ ಬೊಲ್ಪು ಆದುಲ್ಲೆ ಬೊಕ್ಕ ಆಯಡ ಏತ್ ಮಾತ್ರಲಾ ಕತ್ತಲೆ ಇಜ್ಜಿ. ಉಂದೆನ್ ಎಂಕುಲು ಆಯಡ್ದ್ ಕೇಂಡ್ದ್ ನಿಕ್ಲೆಗ್ ತೆರಿಪಾವುನ ಪಾತೆರ ಆದುಂಡು. 6 ನಂಕ್ ದೇವೆರೆಡೊಪ್ಪ ಅನ್ಯಮನ್ಯೊಡು ಉಲ್ಲ ಪಂಡ್ದ್, ಕತ್ತಲೆಡ್ ಬದುಕೊಂದಿತ್ತಡ, ನಮ ಸುಳ್ಳುಗಾರೆರಾದ್ ಸತ್ಯೊಡು ಉಪ್ಪುಜ. 7 ಆಂಡ ದೇವೆರ್ ಬೊಲ್ಪುಡು ಉಪ್ಪುಲೆಕ್ಕನೇ ನಮಲಾ ಬೊಲ್ಪುಡು ನಡತೊನ್ವಡ, ನಂಕ್ ಒರಿಯಡೊಪ್ಪ ಒರಿಯಗ್ ಅನ್ಯಮನ್ಯ ಉಂಡು, ಬೊಕ್ಕ ದೇವೆರೆ ಮಗೆ ಆದುಪ್ಪು ಯೇಸುನ ನೆತ್ತೆರ್ ನಮನ್ ಮಾತ ಪಾಪೊಡ್ದು ಶುದ್ಧ ಮಲ್ಪುಂಡು. 8 ನಮಡ ಪಾಪ ಇಜ್ಜಿ ಪಂಡಡ, ನಂಕ್ ನಮನೇ ಮೋಸ ಮಲ್ತೊಂದುಪ್ಪುವ, ಬೊಕ್ಕ ಸತ್ಯ ನಮಡ ಉಪ್ಪುಜಿ. 9 ನಮ ಪಾಪೊಲೆನ್ ಯೇಸುಡ ಅರಿಕೆ ಮಲ್ಪುವಡ, ಆಯೆ ನಮ ಪಾಪೊಲೆನ್ ಮಾಪು ಮಲ್ತ್‌ದ್, ನಮನ್ ಮಾತ ಅನ್ಯಾಯೊಡ್ದು ಶುದ್ಧ ಮಲ್ಪುವೆ. ದಾಯೆಗಂದ್ಂಡ ಆಯೆ ನಂಬಿಗೆದಾಯೆಲಾ ನೀತಿವಂತೆಲಾ ಆದುಲ್ಲೆ. 10 ನಮ ಪಾಪ ಮಲ್ತ್‌ದ್‌ಜ ಅಂದ್‌ದ್ ಪಂಡಡ, ನಮ ದೇವೆರೆನ್ ಸುಳ್ಳುಗಾರೆ ಮಲ್ಪುವ ಬೊಕ್ಕ ಆಯನ ಪಾತೆರ ನಮಡ ಇಜ್ಜಿ. ಆಮೆನ್. |
New Life Literature