1 ಕೊರಿಂಥ್ಯೆರೆಗ್ 9 - ಪೊಸ ಒಡಂಬಡಿಕೆಅಪೊಸ್ತಲೆರೆ ಹಕ್ಕುಲು 1 ಯಾನ್ ಸ್ವತಂತ್ರೆ ಅತ್ತಾ? ಯಾನ್ ಅಪೊಸ್ತಲೆ ಅತ್ತಾ? ನಮ ಕರ್ತವೆ ಆದುಪ್ಪು ಯೇಸುನು ತೂಯಿನಾಯೆ ಅತ್ತಾ? ಯಾನ್ ಕರ್ತವ ಸೇವೆಡ್ ಮಲ್ತಿ ಬೇಲೆದ ಪ್ರತಿಫಲ ನಿಕುಲೇ ಅತ್ತಾ? 2 ಬೇತೆಕ್ಲೆಗ್ ಯಾನ್ ಅಪೊಸ್ತಲೆ ಅತ್ತ್‌ಡಲಾ ನಿಕ್ಲೆಗಾಂಡಲಾ ಅಪೊಸ್ತಲೆ ಆದುಲ್ಲೆ. ದಾಯೆಗಂದ್ಂಡ ಕರ್ತವಡ್ ಎನ ಅಪೊಸ್ತಲ ಕೆಲಸೊಗು ನಿಕುಲೇ ಎನ ಮುದ್ರೆ ಆದುಲ್ಲರ್. 3 ಎನನ್ ವಿಚಾರಣೆ ಮಲ್ಪುನಾಕುಲೆಗ್ ಉಂದೇ ಎನ ಉತ್ತರ. 4 ಎಂಕ್ಲೆಗ್ ಉನಿಯೆರೆ, ಪರಿಯೆರೆ ಅಧಿಕಾರ ಇಜ್ಜಾ? 5 ಬೊಡೆದಿನ್ ಒಟ್ಟುಗು ಲೆತ್ತೊಂದು ಪೋಯೆರೆ ಒರಿದಿನ ಅಪೊಸ್ತಲೆರೆಲೆಕ್ಕಲಾ ಕರ್ತವ ಸಹೋದ್ರೆರೆಲೆಕ್ಕಲಾ, ಕೇಫಲೆಕ್ಕಲಾ ಎಂಕ್ಲೆಗ್ ಹಕ್ಕ್ ಇಜ್ಜಾ. 6 ಅತ್ತ್‌ಡ, ಕೈಬೇಲೆ ಮಲ್ಪಂದೆ ಜೀವನ ಮಲ್ಪೆರೆ ಬೇತೆಕ್ಲೆಗ್ ಹಕ್ಕ್ ಇತ್ತಿಲೆಕ್ಕನೆ, ಎಂಕ್‌ಲಾ ಬಾರ್ನಬಗ್ಲಾ ಹಕ್ಕ್ ಇಜ್ಜಾ? 7 ಯುದ್ಧೊಗು ಏರಾಂಡಲಾ ತನ ಸ್ವಂತ ಖರ್ಚಿಡ್ ಪೋಪೆನಾ? ದ್ರಾಕ್ಷೆತೋಟ ಮಲ್ತಿನಾಯೆ ಐತ ಫಲೊನು ತಿನಂದೆ ಉಪ್ಪುನವು ಉಂಡಾ? ಕೈಕಂಜಿ ತಾಂಕಿನಾಯೆ ಐತ ಪೇರ್‌ದ ವಸ್ತುಲೆಡ್ ಜೀವನ ಮಲ್ಪಂದೆ ಉಪ್ಪೆನಾ? 8 ಯಾನ್ ಪಂಡಿನವು ಲೋಕರೂಢಿದ ಪಾತೆರ ಆದುಂಡಾ? ನ್ಯಾಯಕಟ್ಟ್‌ಲೆಡ್ಲಾ ಉಂದೆನೇ ಪನ್ಪುಂಡತ್ತಾ? 9 “ಕೆಯಿ ದೊಂಕುನ ಬೋರಿದ ಬಾಯಿನ್ ಕಟ್ಟಿಯೆರೆ ಬಲ್ಲಿ,” ಅಂದ್‌ದ್ ಮೋಶೆನ ನ್ಯಾಯಕಟ್ಟ್‌ಡ್ ಬರೆತ್ಂಡ್. ದೇವೆರ್ ಬೋರಿಲೆಗಾದ್ ಚಿಂತೆ ಮಲ್ಪುವೆನಾ? ಅತ್ತ್‌ಡ, ನಂಕಾದ್ ಪನ್ಪೆನಾ? 10 ಅಂದ್, ಕಂಡಿತಾದ್ ನಂಕಾದ್ ಬರೆತ್ಂಡ್. ದಪ್ಪುನಾಯೆ ತನ್ಕ್ ಪಾಲ್ ತಿಕ್ಕುಂಡು ಅಂದ್‌ದ್ ಭರವಸೊಡು ದಪ್ಪುವೆ. ಒಕ್ಕುನಾಯೆ ತನ್ಕ್ ಪಾಲ್ ತಿಕ್ಕುಂಡು ಪಂಡ್ದೇ ಭರವಸೊಡು ಒಕ್ಕುವೆ. 11 ಎಂಕುಲು ನಿಕ್ಲೆಗಾದ್ ಆತ್ಮಸಮ್ಮಂಧವಾಯಿನ ಬಿತ್ತ್‌ನ್ ಬಿತ್ತಿ ಬೊಕ್ಕ ನಿಕ್ಲೆಡ್ದ್ ಲೋಕಸಮ್ಮಂಧವಾಯಿನೆನ್ ಎಂಕುಲು ಕೊಯ್ಪಿನವು ಮಲ್ಲೆನಾ? 12 ಈ ಹಕ್ಕ್ ಬೇತೆಕ್ಲೆಗ್ ನಿಕ್ಲೆ ಮಿತ್ತ್ ಉಪ್ಪುನಾಂಡ, ಎಂಕ್‌ಲಾ ಬಾರ್ನಬಗ್ಲಾ ಏತೋ ಹೆಚ್ಚ್ ಉಪ್ಪೊಡತ್ತಾ. ಆಂಡಲಾ ಎಂಕುಲು ಈ ಹಕ್ಕ್‌ನ್ ತೋಜಾವಂದೆ ಕ್ರಿಸ್ತನ ಸುವಾರ್ತೆಗ್ ತಡೆ ಆಯೆರೆ ಬಲ್ಲಿ ಅಂದ್‌ದ್ ಮಾತೆನ್ ಸಹಿಸೊಂಡ. 13 ದೇವಾಲಯದ ಚಾಕ್ರಿದಾಕುಲು ದೇವಾಲಯದ ಸಂಪೊತ್ತುಡೇ ಬದುಕುವೆರ್ ಅಂದ್‌ದ್ ಬಲಿಪೀಠದ ಸೇವೆಡುಪ್ಪುನಾಕುಲು ಆ ಬಲಿಪೀಠಗ್ ಬರ್ಪಿನೆಟ್ಟ್ ಪಾಲ್‌ದಾರೆರ್ ಆದುಲ್ಲೆರ್ ಪಂಡ್ದ್‌ಲಾ ನಿಕ್ಲೆಗ್ ಗೊತ್ತಿಜ್ಜಾ? 14 ಅಂಚೆನೇ ಸುವಾರ್ತೆ ಸಾರಿಯುನಾಕುಲು ಸುವಾರ್ತೆಡೇ ಜೀವನ ಮಲ್ಪೊಡಂದ್‌ದ್ ಕರ್ತವೆ ಅಪ್ಪಣೆ ಕೊರ್ತೆ. 15 ಯಾನ್, ಈ ಹಕ್ಕ್‌ಲೆಡ್ ಒಂಜೆನ್ಲಾ ತೋಜಪಾದಿಜಿ; ಎನ ವಿಷಯೊಡ್ಲಾ ಇಂಚೆನೇ ಎಂಕ್ ತಿಕ್ಕೊಡು ಅಂದ್‌ದ್ ಈ ಸಂಗತಿಲೆನ್ ಬರೆತಿಜಿ. ಅವೆಡ್ದ್ ಸೈಪಿನವೇ ಎಂಕ್ ಎಡ್ಡೆ. ಪುಗರೊನಿಯೆರೆಗ್ ಎಂಕುಪ್ಪುನ ಈ ಅವಕಾಶೊನು ಏರ್ಲಾ ದೆತ್ತ್ ಪಾಡಿಯೆರೆ ಬಲ್ಲಿ. 16 ಯಾನ್ ಸುವಾರ್ತೆ ಸಾರಿಯೆಡಲಾ ಪುಗರೊನಿಯೆರೆ ಎಂಕ್ ಅವಕಾಶನೇ ಇಜ್ಜಿ. ಸಾರಿಯೊಡೇ ಅಂದ್‌ದ್ ಎಂಕ್ ಒತ್ತಾಯ ಉಂಡು. ಯಾನ್ ಸಾರಿಯಂದೆ ಇತ್ತ್ಂಡ ಎನ ಗತಿನ್ ದಾನೆ ಪನೊಲಿ? 17 ಉಂದೆನ್ ಯಾನ್ ಮನಸ್ ಕೊರ್ದು ಮಲ್ಪುವೆಡ ಎಂಕ್ ಉಡಿಗೆರೆ ತಿಕ್ಕುಂಡು; ಬೊಕ್ಕೊರಿಯನ ಇಷ್ಟದಂಚ ಮಲ್ತ್ಂಡ ಜವಾಬ್ದಾರಿಕೆ ಎಂಕ್ ಕೊರ್ತಿನವು ಆದುಂಡು. 18 ಅಪಗ ಎಂಕ್ ತಿಕ್ಕು ಉಡಿಗೆರೆ ಎಂಚಿನವು? ಯಾನ್ ಸುವಾರ್ತೆ ಸಾರಿನಗ ಐಡ್ದ್ ಜೀವನ ಮಲ್ಪುನ ಹಕ್ಕ್‌ನ್ ಉಪಯೋಗ ಮಲ್ಪಂದೆ ಎಡ್ಡೆ ರೀತಿಡ್ ಸುವಾರ್ತೆ ಸಾರಿಯುನನೇ ಎನ ಪ್ರತಿಫಲ. 19 ಯಾನ್ ಮಾತ ಸಂಗತಿಡ್ ಸ್ವತಂತ್ರೆ ಆದಿತ್ತ್‌ಂಡಲಾ ಹೆಚ್ಚಿನಾಕುಲೆನ್ ರಕ್ಷಣೆಗ್ ನಡಪಾಯೆರೆಗಾದ್ರ ಎನನ್ ಯಾನ್ ಮಾತೆರೆಗ್ಲಾ ಗುಲಾಮೆ ಆದ್ ಮಲ್ತೊಂಡೆ. 20 ಯೆಹೂದ್ಯೆರೆನ್ ರಕ್ಷಣೆಗ್ ನಡಪಾಯೆರೆಗಾದ್ರ ಯೆಹೂದ್ಯೆರೆಗ್ ಯಾನ್ ಒರಿ ಯೆಹೂದ್ಯೆ ಆಯೆ. ಯಾನ್ ಮೋಶೆನ ನ್ಯಾಯಕಟ್ಟ್‌ಲೆಗ್ ಅಡಿಯಾಳ್ ಆಯಿನಾಯೆ ಅತ್ತ್‌ಡಲಾ ಕಟ್ಟ್‌ಲೆಗ್ ಅಡಿಯಾಳ್ ಆಯಿನಾಕುಲೆನ್ ರಕ್ಷಣೆಗ್ ನಡಪಾಯೆರೆಗಾದ್ರ ಯಾನ್ಲಾ ಕಟ್ಟ್‌ಲೆಗ್ ಅಡಿಯಾಳ್ ಆತಿನಾಯೆ ಆಯೆ. 21 ಯಾನ್ ದೇವೆರೆ ನ್ಯಾಯಕಟ್ಟ್‌ದಾಂತಿನಾಯೆ ಅತ್ತ್, ಕ್ರಿಸ್ತನ ಕಟ್ಟ್‌ಗ್ ಅಡಿಯಾಳ್ ಆತಿನಾಯೆನೇ; ಆಂಡಲಾ ಮೋಶೆನ ಕಟ್ಟ್‌ದಾಂತಿನಾಕುಲೆನ್ ರಕ್ಷಣೆದ ಮಾರ್ಗೊಗು ನಡಪಾಯೆರೆಗಾದ್ರ ಯಾನ್ ಅಕ್ಲೆಗ್ ಕಟ್ಟ್‌ದಾಂತಿನಾಯಲೆಕ್ಕನೆ ಆಯೆ 22 ಬಲಹೀನೆರೆನ್ ರಕ್ಷಣೆಗ್ ನಡಪಾಯೆರೆಗಾದ್ರ ಯಾನ್ ಬಲಹೀನೆ ಆಯೆ. ಎಂಚಾಂಡಲಾ ಕೆಲೆವೆರೆನ್ ರಕ್ಷಣೆ ಮಲ್ಪೆರೆ ಮಾತೆರೆಗ್ ಮಾತಲಾ ಆಯೆ. 23 ಯಾನ್ ಬೇತೆಕ್ಲೆ ಒಟ್ಟುಗು ಸುವಾರ್ತೆದ ಫಲೊಟು ಪಾಲ್‌ದಾರೆ ಆಯೆರೆ ಬೋಡಾದ್ ಉಂದೆನ್ ಮಾತ ಸುವಾರ್ತೆಗಾದೇ ಮಲ್ಪುವೆ. 24 ಓಟದ ರಂಗಸ್ಥಳೊಟು ಬಲ್ಪುನಾಕುಲು ಮಾತೆರ್ಲಾ ಪಾರಿಯೆರ್ಡಲಾ ಒರಿಯಗ್ ಮಾತ್ರ ಇನಾಮು ತಿಕ್ಕುಂಡು ಅಂದ್‌ದ್ ಗೊತ್ತಿಜ್ಜಾ? ನಿಕುಲುಲಾ ಇನಾಮು ತಿಕ್ಕೆರೆಗಾದ್ರನೇ ಪಾರ್‌ಲೆ. 25 ಐಟ್ಟ್ ಪೊರ್‌ಂಬುನಾಕುಲು ಮಾತ ಸಂಗತಿಡ್ಲಾ ಮಿತಿಟ್ ಉಪ್ಪುವೆರ್. ಅಕುಲು ನಾಶಾದ್ ಪೋಪಿ ಜಯಮಾಲೆನ್ ಪಡೆಯೆರೆಗಾದ್ರ ಪೊರ್‌ಂಬುವೆರ್. ನಮ ಆಂಡಲಾ ನಾಶಾವಂದಿನ ಜಯಮಾಲೆಗಾದ್ರ ಪೊರ್ಂಬುನಾಕುಲಾದುಲ್ಲ. 26 ಅಂಚಾಯಿನೆಡ್ದ್ ಯಾನ್ಲಾ ಗೊತ್ತುಗುರಿದಾಂತಿನಾಯಲೆಕ್ಕ ಪಾರುಜಿ; ಯಾನ್ ಗಾಳಿಗ್ ಗುದ್ದುನಾಯೆ ಆದುಪ್ಪಂದೆ ಗೆಂದೊಡಂದ್ದೇ ಗುದ್ದುವೆ. 27 ಬೇತೆಕ್ಲೆಗ್ ಸುವಾರ್ತೆನ್ ಪ್ರಚಾರ ಮಲ್ತ್‌ದ್ ಯಾನೇ ಯೋಗ್ಯದಾಂತಿನಾಯೆ ಆದ್ ತೋಜಿದ್ ಬರ್ಪೆನಾ ಇನ್ಪಿ ಪೋಡಿಗೆಡ್ ಎನ ಶರೀರೊನು ಪೊಡಿಮಲ್ತ್‌ದ್ ಎನ ವಶೊಕ್ಕು ಮಲ್ತೊನ್ವೆ. |
New Life Literature