1 ಕೊರಿಂಥ್ಯೆರೆಗ್ 8 - ಪೊಸ ಒಡಂಬಡಿಕೆಮೂರ್ತಿಪೂಜೆಗ್ ನೈವೇದ್ಯ ಮಲ್ಪುನವು 1 ಇತ್ತೆ ಮೂರ್ತಿಪೂಜೆಗ್ ನೈವೇದ್ಯ ಮಲ್ತಿನ ವಸ್ತುಲೆ ಬಗೆಟ್ ತೂಕ. ನಂಕ್ ಮಾತೆರೆಗ್ಲಾ ಗೇನ ಉಂಡು ಅಂದ್‌ದ್ ತೆರಿದ. ಉಂದು ಉಬ್ಬೆರುನೆಕ್ಕ್ ಕಾರಣ ಆಪುಂಡು, ಆಂಡ ಪ್ರೀತಿ ಆತ್ಮೀಕತೆನ್ ದೃಢ ಮಲ್ಪುಂಡು. 2 ಉಂದೆನ್ ಮಾತ ತೆರಿದೆ ಅಂದ್‌ದ್ ಎನ್ನುನಾಯೆ ತಾನ್ ತೆರಿಯೊಡಾಯಿನ ರೀತಿಡ್ ನನಲಾ ತೆರಿದಿಜೆ. 3 ಆಂಡ ಒರಿ ದೇವೆರೆನ್ ಪ್ರೀತಿ ಮಲ್ಪುವೆಡ, ಆಯನ್ ದೇವೆರ್ ತೆರಿಯೊನ್ವೆ. 4 ಮೂರ್ತಿಪೂಜೆಗ್ ನೈವೇದ್ಯ ಮಲ್ತ್‌ದಿನ ವಸ್ತುಲೆನ್ ತಿನ್ಪಿನ ಬಗೆಟ್ ದಾನೆಂದ್ಂಡ, ಲೋಕೊಡು ಮೂರ್ತಿಪೂಜೆಲು ದಾಲಾ ಅತ್ತ್, ದೇವೆರ್ ಒರಿಯೇ, ಬೇತೆ ದೇವೆರ್ ಇಜ್ಜೆ ಅಂದ್‌ದ್ ತೆರಿದುಲ್ಲ. 5 ಮಸ್ತ್ ದೇವೆರೆನ್ಲಾ ಕರ್ತವನ್ಲಾ ಪೂಜೆ ಮಲ್ಪುನಾಕುಲು ಉಲ್ಲೆರ್. ನಿಜನೇ; ಪರಲೋಕೊಡಾವಡ್, ಭೂಮಿದ ಮಿತ್ತಾವಡ್ ದೇವೆರ್ ಅಂದ್‌ದ್ ಎನ್ನೊನುನಾಕುಲು ಇತ್ತೆರ್ಡಲಾ 6 ನಂಕ್ ಒರಿಯೇ ದೇವೆರ್ ಉಲ್ಲೆ; ಆಯೆ ಅಮ್ಮೆ ಆದುಪ್ಪುನಾಯೆನೇ; ಎಂಕುಲು ಆಯಗಾದ್ ಉಂಡಾದ್ ಬದುಕುವ. ಬೊಕ್ಕ ನಂಕ್ ಒರಿಯೇ ಕರ್ತವೆ; ಆಯೆ ಯೇಸು ಕ್ರಿಸ್ತೆನೇ; ಆಯಡ್ದ್ ಮಾತ ಉಂಡಾಂಡ್, ಎಂಕುಲುಲಾ ಆಯಡ್ದೇ ಜೀವೊಡುಲ್ಲ. 7 ಆಂಡ ಈ ಬುದ್ಧಿ ಮಾತೆರೆಡ್ಲಾ ಇಜ್ಜಿ; ಕೆಲೆವೆರ್ ಇತ್ತೆಲಾ ಮೂರ್ತಿಲೆ ಕೈತಲ್‌ ಪೋಪಿನ ರೂಢಿಡ್ ಉಪ್ಪುನೆಡ್ದ್ ತನ್ಕುಲು ತಿನ್ಪಿನೆನ್ ಮೂರ್ತಿಗ್ ನೈವೇದ್ಯ ಮಲ್ತಿನವು ಅಂದ್‌ದ್ ಎನ್ನೊಂದು ತಿನ್ಪೆರ್; ಇಂಚ ಅಕ್ಲೆ ಮನಸಾಕ್ಷಿ ಬಲದಾಂತಿನವು ಆಯಿನೆಡ್ದ್ ಅಕುಲು ಅಶುದ್ಧೆರ್ ಅಂದ್‌ದ್ ಎನ್ನುವೆರ್. 8 ಆಂಡ ತಿನ್ಪಿನವು ಎಂಕ್ಲೆನ್ ದೇವೆರೆ ಸನ್ನಿಧಿಗ್ ಸೇರಾವಂದ್. ತಿಂದ್‌ಜಿಡ ಎಂಕ್ಲೆಗ್ ಕಡಿಮೆ ಇಜ್ಜಿ, ತಿಂದ್‌ಂಡ ನಂಕ್ ಹೆಚ್ಚಿಗೆ ಆಪುಜಿ. 9 ಆಂಡಲಾ ನಿಕ್ಲೆನ ಈ ಸ್ವತಂತ್ರ ನಂಬಿಕೆಡ್ ಬಲಹೀನೆರೆಗ್ ಒಂಜಿ ವೇಳೆ ಅಡ್ಡಿ ಆವು, ಎಚ್ಚರಿಕೆ ಆದುಪ್ಪುಲೆ. 10 ಬುದ್ಧಿದಾಯೆ ಈ ದೇವಸ್ಥಾನೊಡು ವಣಸ್‌ಗ್ ಕುಲ್ಲುದುಪ್ಪುನಗ, ಬಲದಾಂತಿ ಮನಸ್‌ದ ಒರಿ ಸಹೋದರೆ ತೂಯೆಡ ಆಯೆಲಾ ಮೂರ್ತಿಗ್ ನೈವೇದ್ಯ ಮಲ್ತಿನ ವಸ್ತುಲೆನ್ ತಿನಿಯೆರೆ ಧೈರ್ಯ ಮಲ್ಪೆ ಅತ್ತಾ? 11 ಇಂಚ ನಿನ ಗೇನೊಡ್ದಾದ್ ಆ ಬಲದಾಂತಿ ಸಹೋದರೆ ಆತ್ಮೀಕ ರೀತಿಡ್ ನಾಶಾಪೆ ಅತ್ತಾ? ಆಯಗಾದ್‌ಲಾ ಕ್ರಿಸ್ತೆ ತನ ಜೀವ ಕೊರ್ತೆ ಅತ್ತಾ. 12 ಇಂಚ ಉಪ್ಪುನಗ ನಿನ ಸಹೋದ್ರಗ್ ವಿರೋಧಾದ್ ಪಾಪ ಮಲ್ತ್‌ದ್ ಆಯ ಬಲದಾಂತಿ ಮನಸಾಕ್ಷಿಗ್ ಬೇನೆ ಕೊರಿಯಡ ಕ್ರಿಸ್ತಗ್ ವಿರೋಧಾದ್ ಪಾಪ ಮಲ್ಪುನಾಯೆ ಆದುಪ್ಪುವ. 13 ಅಂಚಾದ್, ತಿನ್ಪಿನೆಟ್ ಎನ ಸಹೋದ್ರಗ್ ಅಡ್ಡಿ ಆಪಿನಾಂಡ ಯಾನ್ ಏಪೊಗ್ಲಾ ಮಾಸನೇ ತಿನಯೆ; ಯಾನ್ ಎನ ಸಹೋದ್ರಗ್ ಅಡ್ಡಿ ಆಯೆರೆ ಬಲ್ಲಿ ಅತ್ತಾ? |
New Life Literature