1 ಕೊರಿಂಥ್ಯೆರೆಗ್ 6 - ಪೊಸ ಒಡಂಬಡಿಕೆಕ್ರೈಸ್ತೆರ್ ನ್ಯಾಯಲಾಯೊಗು ಪೋಪಿನವು 1 ನಿಕ್ಲೆಡ್ ಒರಿಯಗ್ ಸಹೋದ್ರನ ಮಿತ್ತ್ ವ್ಯಾಜ್ಯ ಉಂಡುಡ ನ್ಯಾಯತೀರ್ಪುಗು ದೇವಜನೊಕುಲೆ ದುಂಬು ಪೋವಂದೆ, ನೀತಿಕೆಟ್ಟಿನಾಕುಲೆ ಎದುರು ಪೋಯೆರೆ ನಿಕ್ಲೆಗ್ ಧೈರ್ಯ ಎಂಚ ಬತ್ತ್ಂಡ್? 2 ದೇವಜನೊಕುಲು ಲೋಕೊನು ತೀರ್ಪು ಮಲ್ಪುನಾಕುಲು ಅಂದ್‌ದ್ ನಿಕ್ಲೆಗ್ ಗೊತ್ತಿಜ್ಜಾ? ಲೋಕೊಗು ನಿಕ್ಲೆಡ್ದ್ ತೀರ್ಪು ಆಪಿನವು ಆಂಡ, ನಿಕುಲು ಬಜೀ ಎಲ್ಲ್ಯ ಸಂಗತಿಲೆನ್ ತೀರ್ಪು ಮಲ್ಪೆರೆ ಆವಂದಿನಾಕುಲಾ? 3 ದೂತೆರೆನ್ಲಾ ನಮ ತೀರ್ಪು ಮಲ್ಪುವ ಅಂದ್‌ದ್ ನಿಕ್ಲೆಗ್ ಗೊತ್ತಿಜ್ಜಾ? ಅಂಚಾಂಡ ಈ ಲೋಕದ ವ್ಯಾಜ್ಯೊಲೆನ್ ತೀರ್ಪುನವು ಮಲ್ಲೆನಾ? 4 ಅಂಚಾಂಡ ಲೋಕದಜೀವ ಸಮ್ಮಂಧೊಡು ನಿರ್ಧಾರ ಮಲ್ಪು ಕಾರ್ಯೊಲು ನಿಕ್ಲೆಡ ಇತ್ತ್ಂಡ, ತೀರ್ಪು ಮಲ್ಪೆರೆ ಸಭೆಟ್ ಮಾನ ಪಡೆವಂದಿನಾಕುಲೆ ಎದುರು ಅವೆನ್ ದೆತ್ತೊಂದು ಪೋಪರಾ? 5 ನಿಕ್ಲೆಗ್ ನಾಚಿಗೆ ಆವೊಡು ಅಂದ್‌ದ್ ಇಂಚ ಪಾತೆರ್‌ವೆ. ಸಹೋದರೆರೆ ಉಲಯಿದ ವ್ಯಾಜ್ಯೊನು ತೀರ್ಪೆರೆ ನಿಕ್ಲೆ ನಡುಟು ಏರ್ಲಾ ಒರಿ ಬುದ್ಧಿವಂತೆ ಇಜ್ಜೆನಾ? 6 ಸಹೋದರೆ ತನ ಸಹೋದ್ರನ ಮಿತ್ತ್ ವ್ಯಾಜ್ಯ ಮಲ್ಪುನು ಅತ್ತಂದೆ ಅವೆನ್ ನಂಬಿಕೆದಾಂತಿನಾಕುಲೆ ಎದುರು ಕೊನೊಪಿನವು ಸರಿಯಾ? 7 ನಿಕ್ಲೆ ಉಲಯಿಡ್ ವ್ಯಾಜ್ಯೊಲು ಇತ್ತ್ಂಡ ನಿಕುಲು ಸೋತಿನಾಕುಲು ಪನ್ಪಿನೆಕ್ಕ್ ಗುರ್ತ. ಅವೆಡ್ದ್ ಅನ್ಯಾಯೊನು ತಾಳೊನುನವು ಎಡ್ಡೆ ಅತ್ತಾ? ಆಸ್ತಿ ನಷ್ಟೊನು ತಾಳೊಂದು ಸಮಾಧಾನೊಡು ಉಪ್ಪುನವು ಎಡ್ಡೆ ಅತ್ತಾ? 8 ಐತ ಬದಲ್‌ಗ್ ನಿಕುಲು ಅನ್ಯಾಯ ಮಲ್ಪುವರ್, ಬೇತೆಕ್ಲೆನ ಆಸ್ತಿ ಸುಲಿಗೆ ಮಲ್ಪುವರ್; ಅವುಲಾ ಸಹೋದ್ರೆರೆಗ್ ಇಂಚ ಮಲ್ಪುವರ್. 9 ಅನ್ಯಾಯಗಾರೆರ್ ದೇವೆರೆ ರಾಜ್ಯೊಗು ಹಕ್ಕ್‌ದಾರೆರ್ ಆಪುಜೆರ್ ಅಂದ್‌ದ್ ನಿಕ್ಲೆಗ್ ತೆರಿದಿಜಾ? ಮೋಸೊಗು ಗುರಿ ಆವೊಡ್ಚಿ, ಹಾದ್ರದಾಕುಲು, ಮೂರ್ತಿಪೂಜೆ ಮಲ್ಪುನಾಕುಲು, ವ್ಯಭಿಚಾರಿಲು, ಪುರುಷಗಾಮಿಲು, 10 ಕಲ್ವೆರ್, ಲೋಭಿಲು, ಪರ್ಪೆಲೆರ್, ನೆರ್ಪಿನಾಕುಲು, ಸುಲಿಗೆ ಮಲ್ಪುನಾಕುಲು ಮೊಕ್ಲೆಡ್ ಒರಿಯಗ್ಲಾ ದೇವೆರೆ ರಾಜ್ಯದ ಹಕ್ಕ್ ತಿಕ್ಕಂದ್. 11 ನಿಕ್ಲೆಡ್ ಕೆಲೆವೆರ್ ಇಂಚಿತ್ತಿನಾಕುಲಾದುಲ್ಲರ್; ಆಂಡಲಾ ಕರ್ತವೆ ಆದುಪ್ಪು ಯೇಸು ಕ್ರಿಸ್ತನ ಪುದರ್‌ಡ್ ಎಂಕುಲೆ ದೇವೆರೆ ಆತ್ಮೊಡು ಶುದ್ಧರಾಯರ್, ದೇವಜನೊಕುಲಾಯರ್, ನೀತಿವಂತೆರ್ ಪನ್ಪಿ ತೀರ್ಪು ಪಡೆಯರ್. ಶರೀರೊನು ದೇವೆರೆ ಮೈಮೆಗ್ ನಡಪಾವುನವು 12 ಕೆಲೆವೆರ್ ಇಂಚ ಪನೊಲಿ, “ಎಂಕ್ ಮಾತೆನ್ಲಾ ಮಲ್ಪುನ ಸ್ವತಂತ್ರ ಉಂಡು.” ಆಂಡ ಮಾತಲಾ ಪ್ರಯೋಜನೊಗು ಬೂರುಜಿ. “ಎಂಕ್ ಮಾತೆನ್ಲಾ ಮಲ್ಪುನ ಸ್ವತಂತ್ರ ಉಂಡು.” ಆಂಡ ಯಾನ್ ಒಯಿಕ್‌ಲಾ ಒಳಗಾಪುಜಿ. 13 ಕೆಲೆವೆರ್ ಇಂಚ ಪನೊಲಿ, “ತಿನ್ಪಿನ ವಸ್ತುಲು ಬಂಜಿಗಾದ್‌ಲಾ ಬಂಜಿ ತಿನ್ಪಿನ ವಸ್ತುಲೆಗಾದ್‌ಲಾ ಉಂಡು.” ಆಂಡ ದೇವೆರ್ ಉಂದೆನ್ಲಾ ಅವೆನ್ಲಾ ದೆತ್ತ್‌ದ್ ಪಾಡ್ವೆ. ಆಂಡ ಶರೀರ ಹಾದ್ರೊಗಾದ್ ಉಪ್ಪುನವು ಅತ್ತ್, ಕರ್ತವಗಾದ್ ಉಂಡು ನಮ ಶರೀರೊಲುಲಾ ಆಯನ ಸೇವೆಗಾದ್ ಉಂಡು. 14 ದೇವೆರ್ ಕರ್ತವನ್ ಲಕ್ಕಾಯಿ ಲೆಕ್ಕನೇ, ನಮನ್ಲಾ ತನ ಬಲೊಡ್ದು ಲಕ್ಕಾವೆ. 15 ನಿಕ್ಲೆ ಶರೀರೊಲು ಕ್ರಿಸ್ತನ ಅಂಗೊಲಾದ್ ಉಲ್ಲ ಅಂದ್‌ದ್ ನಿಕ್ಲೆಗ್ ತೆರಿದಿಜಾ? ಅಂಚಾದ್ ಯಾನ್ ಕ್ರಿಸ್ತನ ಅಂಗೊಲಾದ್ ಉಪ್ಪುನೆನ್ ದೆತ್ತ್‌ದ್ ಸೂಳೆನ ಅಂಗೊಲಾದ್ ಮಲ್ಪೊಲಿಯಾ? ಏಪೊಗ್ಲಾ ಮಲ್ಪೆರೆ ಬಲ್ಲಿ. 16 ಸೂಳೆಡೊಪ್ಪ ಕೂಡೊನುನಾಯೆ ಆಲೆಡೊಪ್ಪ ಒಂಜೇ ಶರೀರ ಆದುಪ್ಪುವೆ ಅಂದ್‌ದ್ ಗೊತ್ತಿಜ್ಜಾ? “ಅಕುಲು ಇರ್ವೆರ್ ಒಂಜೇ ಶರೀರ ಆದುಲ್ಲೆರ್.” ಅಂದ್‌ದ್ ದೇವೆರ್ ಪನ್ಪೆ ಅತ್ತಾ? 17 ಆಂಡ ಕರ್ತವನ್ ಕೂಡೊನುನಾಯೆ ಆಯಡೊಪ್ಪ ಒಂಜೇ ಆತ್ಮ ಆದುಲ್ಲೆ. 18 ಹಾದ್ರೊಗು ದೂರ ಆದುಪ್ಪುಲೆ, ನರಮಾನಿ ಮಲ್ಪುನ ಬೇತೆ ಮಾತ ಪಾಪ ಕೆಲಸೊಲು ಶರೀರೊಗು ತೊಂದರೆ ಆಪುಜಿ. ಆಂಡ ಹಾದ್ರ ಮಲ್ಪುನಾಯೆ ತನ ಶರೀರೊಗು ತೊಂದರೆ ಆಪಿನ ಪಾಪೊನು ಮಲ್ಪುವೆ. 19 ದೇವೆರೆಡ್ದ್ ನಿಕ್ಲೆಡ್ ನಿಲೆ ಆದುಪ್ಪುನ ಪರಿಶುದ್ಧಾತ್ಮೊಗು ನಿಕ್ಲೆ ಶರೀರ ದೇವಾಲಯ ಆದುಂಡು ಅಂದ್‌ದ್ ನಿಕ್ಲೆಗ್ ತೆರಿಯಂದಾ? ನಿಕುಲು ನಿಕ್ಲೆನ ಸ್ವಂತ ಸೊತ್ತು ಅತ್ತ್. 20 ನಿಕುಲು ಮಸ್ತ್ ಕ್ರಯೊಕು ದೆತ್ತೊಂಡಿನಾಕುಲು; ಅಂಚಾಯಿನೆಡ್ದ್ ನಿಕ್ಲೆ ಶರೀರೊಡ್ದು ದೇವೆರೆಗ್ ಮೈಮೆ ಪಡೆಪಾಲೆ. |
New Life Literature