1 ಕೊರಿಂಥ್ಯೆರೆಗ್ 4 - ಪೊಸ ಒಡಂಬಡಿಕೆಅಪೊಸ್ತಲೆರೆನ ಬೇಲೆ 1 ಜನೊಕುಲು ಎಂಕ್ಲೆನ್ ಕ್ರಿಸ್ತನ ಸೇವಕೆರ್ ಅಂದ್‌ದ್‌ಲಾ ದೇವೆರೆ ಮರ್ಮೊಲೆ ಪಾರುಪತ್ತೆದಾರೆರ್ ಅಂದ್‌ದ್‌ಲಾ ಎನ್ನೊನಡ್. 2 ಇಂಚ ಉಪ್ಪುನಗ, ಪಾರುಪತ್ತೆದಾಯೆ ನಂಬಿಗಸ್ತೆ ಆದ್ ತೋಜಿದ್ ಬರ್ಪಿನವು ಅಗತ್ಯ ಅತ್ತಾ? 3 ಆಂಡಲಾ ಎಂಕ್ ನಿಕ್ಲೆಡ್ದಾವಡ್, ನರಮಾನಿಲೆ ನ್ಯಾಯಾಲಯಡ್ದಾವಡ್ ವಿಚಾರಣೆ ಆಪಿನವು ಬಜೀ ಎಲ್ಯ ಸಂಗತಿ ಆದುಂಡು; ಯಾನ್ಲಾ ಎನನ್ ತೀರ್ಪು ಮಲ್ತೊನುಜಿ. 4 ಎನಡ್ ದೋಷ ಉಂಡು ಅಂದ್‌ದ್ ಎನ ಮನಸಾಕ್ಷಿಗ್ ತೋಜಿದ್ ಬತ್ತಿಜಿಡಲಾ ನೀತಿವಂತೆ ಅಂದ್‌ದ್ ತೀರ್ಪು ಉಂದೆಡ್ದ್ ಆಪುಜಿ; ಎನನ್ ಪರೀಕ್ಷೆ ಮಲ್ತ್‌ದ್ ತೀರ್ಪು ಮಲ್ಪುನಾಯೆ ಕರ್ತವೆನೇ. 5 ಅಂಚಾಯಿನೆಡ್ದ್ ಕಾಲೊಗು ದುಂಬು ಒವ್ವೆನ್ಲಾ ತೀರ್ಪು ಮಲ್ಪಡೆ; ಕರ್ತವೆ ಬರ್ಪಿನೆಟ್ಟ ತಡೆಲೆ. ಆಯೆ ಕತ್ತಲೆಡ್ ಮದೆ ಆದಿತ್ತಿ ಸಂಗತಿಲೆನ್ ಬೊಲ್ಪುಗು ಕನವೆ. ಉಡಲ್‌ದ ಆಲೋಚನೆಲೆನ್ ತೋಜಾದ್ ಕೊರುವೆ. ಅಪಗ ಪ್ರತಿ ಒರಿಯಗ್ ಬರೊಡಾಯಿ ಪುಗರಿಗೆ ದೇವೆರೆಡ್ದ್ ಬರು. 6 ಸಹೋದ್ರೆರೇ, ಯಾನ್ ನಿಕ್ಲೆ ಪ್ರಯೋಜನಗಾದೇ ಸರಿ ಇತ್ತಿ ರೂಪೊಡು ಎನ ಸಂಗತಿಡ್ಲಾ ಅಪೊಲ್ಲೋಸನ ಸಂಗತಿಡ್ಲಾ ಪಂಡೆ. ದಾಯೆಗಂದ್ಂಡ ನಿಕುಲು “ಶಾಸ್ತ್ರೊಡು ಬರೆತಿನೆನ್ ಮೀರ್‌ಯೆರೆ ಬಲ್ಲಿ,” ಅಂದ್‌ದ್ ಕಲ್ತೊನೊಡು. ಅಂಚ ಕಲ್ತ್ಂಡ ನಿಕ್ಲೆಡ್ ಏರ್ಲಾ ಒರಿ ಬೋಧಕನ್ ವಿರೋಧ ಮಲ್ತೊಂದು ಬೊಕ್ಕೊರಿಯನ್ ಪತ್ತೊಂದು ಸೊರ್ಕುದು ಪೋವಡೆ. 7 ದಾಯೆಗಂದ್ಂಡ, ನಿನನ್ ನನೊರಿಯಡ್ದ್ ಮಲ್ಲ ಮಲ್ಪುನಾಯೆ ಏರ್? ದೇವೆರೆಡ್ದ್ ತಿಕ್ಕಂದಿನವು ನಿನಡ ಒಂಜಾಂಡಲಾ ಉಂಡಾ? ತಿಕ್ಕಿಬೊಕ್ಕ, ಅವು ನಿನಡ್ದೇ ಆಯಿ ಲೆಕ್ಕ ಈ ದಾಯೆ ಪುಗರೊನ್ವ? 8 ಈತ್ ಬೇಗ ದಿಂಜಿದ್ ಪೋಯರ್ ಪಂಡ್ದ್ ಎನ್ನುವರಾ, ಈತ್ ಬೇಗ ಆತ್ಮೀಕ ರೀತಿಡ್ ಮಲ್ಲಾದಿಗೆದಾಕುಲು ಆಯರ್ ಅಂದ್‌ದ್ ಎನ್ನುವರಾ. ಎಂಕುಲೆ ಸಹಾಯದಾಂತೆ ಅರಸೆರಾಯರ್. ನಿಕುಲು ನಿಜವಾದ್ ಅರಸೆರ್ ಆದಿತ್ತ್ಂಡ ಎಂಕ್ ಏತೋ ಸಂತೋಷ ಆತು. ಅಪಗ ಎಂಕುಲುಲಾ ನಿಕ್ಲೆಡೊಪ್ಪ ಅರಸೆರಾದಿತ್ತ್‌ದ್ವ. 9 ಅಂಚಾವಂದೆ ದೇವೆರ್ ಅಪೊಸ್ತಲೆರಾಯಿ ಎಂಕ್ಲೆನ್ ಮರಣೊಗು ಮುಟ್ಟ ಆತಿನಾಕುಲು ಇನ್ಪಿಲೆಕ್ಕ ಕಡೆಟ್ಟ್ ದೀತೆ ಅಂದ್‌ದ್ ಯಾನ್ ಎನ್ನುವೆ. ಎಂಕುಲು ಲೋಕೊಗು ದೂತೆರೆಗ್ಲಾ ನರಮಾನಿಲೆಗ್ಲಾ ನೋಟದಕುಲಾಯ. 10 ಎಂಕುಲು ಕ್ರಿಸ್ತಗಾದ್ ತೂವೆರೆ ಹೆಡ್ಡೆರೆಲೆಕ್ಕ ತೋಜುವ; ಆಂಡ ನಿಕುಲು ಕ್ರಿಸ್ತಡ್ ಬುದ್ಧಿವಂತೆರಾದುಲ್ಲರ್ ಅಂದ್‌ದ್ ಎನ್ನುವರ್. ಎಂಕುಲು ಬಲಹೀನೆರ್; ನಿಕುಲು ಬಲವಂತೆರ್; ನಿಕುಲು ಮಾನದಾಕುಲು, ಎಂಕುಲು ಮಾನದಾಂತಿನಾಕುಲು. 11 ಈ ಗಳಿಗೆ ಮುಟ್ಟಲಾ ಎಂಕುಲು ಬಡವುದಾಕುಲುಲಾ ಬಾಜೆಲ್ ಆದುಪ್ಪುನಾಕುಲುಲಾ ಮೆಯಿಕ್ ಕುಂಟು ಕಡಿಮೆ ಇತ್ತಿನಾಕುಲುಲಾ ಆದುಲ್ಲಾ. ಅಪಗಪಗ ಗುದ್ದು ತಿನ್ಪಿನಾಕುಲುಲಾ; ಇಲ್ಲ್‌ದಾಂತಿನಾಕುಲುಲಾ ಆದುಲ್ಲ 12 ಎಂಕುಲು ಸ್ವಂತ ಕೈಟ್ ಬೇಲೆ ಮಲ್ತ್‌ದ್ ಬೆನ್ಪಿನಾಕುಲುಲಾ ಆದುಲ್ಲ. ನೆರ್ಪಣೆ ತಿಂದ್‌ದ್ ಆಶೀರ್ವದಿಪುವ; ಭಂಗ ಕೊರ್ನಗ ತಾಳೊನ್ವ; ಎಂಕ್ಲೆನ್ ದೂಷಣೆ ಮಲ್ಪುನಗ ಸಮಾಧಾನ ಪನ್ಪ. 13 ಎಂಕುಲು ಲೋಕದ ಕಜವುದಲೆಕ್ಕನೆ, ಇದ ಮುಟ್ಟ ಮಾತೆತ್ತ ಗಸಂಟ್ ಆಯ. 14 ನಿಕ್ಲೆಗ್ ನಾಚಿಗೆ ಪುಟ್ಟಾವರೆಗ್ ಉಂದೆನ್ ಬರೆವಂದೆ ಎನ ಪ್ರೀತಿದ ಜೋಕುಲು ಅಂದ್‌ದ್ ಎನ್ನ್‌ದ್ ನಿಕ್ಲೆಗ್ ಬುದ್ಧಿ ಪನಿಯೆರೆ ಬೋಡಾದೆ ಈ ಪಾತೆರೊಲೆನ್ ಬರೆತೆ. 15 ನಿಕ್ಲೆಗ್ ಕ್ರಿಸ್ತಡ್ ಪತ್ತ್ ಸಾರದಾತ್ ಕಲ್ಪಾವುನಾಕುಲು ಇತ್ತೆರ್ಡ ನಿಕ್ಲೆಗ್ ಅಮ್ಮಾಡ್ಲು ಮಸ್ತ್ ಜನ ಇಜ್ಜೆರ್. ಯಾನೇ ನಿಕ್ಲೆನ್ ಸುವಾರ್ತೆಡ್ದ್ ಕ್ರಿಸ್ತ ಯೇಸುಡು ಪಡೆಯೆ. 16 ಅಂಚಾದ್ ನಿಕ್ಲೆಡ ನಟ್ಟೊನ್ವೆ, ಎನನ್ ತೂದು ಅಂಚೆನೇ ನಡತೊನ್ಲೆ. 17 ಐಕಾದೇ ಕರ್ತವಡ್ ಎನ ಮಗೆ ಆದುಪ್ಪು ತಿಮೋಥಿನ್ ನಿಕ್ಲೆ ಕೈತಲ್‌ ಕಡಪುಡ್ದು ಕೊರ್ತೆ. ಆಯೆ ಎಂಕ್ ಪ್ರೀತಿದಾಯೆಲಾ ನಂಬಿಗಸ್ತೆಲಾ ಆದುಲ್ಲೆ. ಆಯೆ ಕ್ರಿಸ್ತನ ಸೇವೆಡುಪ್ಪು ಎನ ನಡಾವಳಿಕೆನ್, ಪಂಡ ಯಾನ್ ಮಾತ ಕಡೆಟ್ಟ್ ಬೊಕ್ಕ ಮಾತ ಸಭೆಕ್ಲೆಡ್ಲಾ ಬೋಧನೆ ಮಲ್ಪುನ ರೀತಿನ್ ನಿಕ್ಲೆನ ನೆನೆಪುಗು ಕನವೆ. 18 ನಿಕ್ಲೆಡ್ ಕೆಲೆವೆರ್, ಪೌಲು ಎಂಕುಲೆ ಕೈತಲ್‌ ಬರಯೆ ಅಂದ್‌ದ್ ಸೊರ್ಕುದುಪ್ಪೆರ್. 19 ಆಂಡ, ಕರ್ತವ ಚಿತ್ತ ಇತ್ತ್ಂಡ ಯಾನ್ ಬೇಗ ನಿಕ್ಲೆ ಕೈತಲ್‌ ಬತ್ತ್‌ದ್ ಆ ಸೊರ್ಕುದಿನಾಕುಲೆನ ಪಾತೆರೊಲೆನ್ ಅತ್ತ್, ಅಕ್ಲೆನ ಬಲೊನು ಗೊತ್ತು ಮಲ್ತೊನ್ವೆ. 20 ದಾಯೆಗಂದ್ಂಡ ದೇವೆರೆ ರಾಜ್ಯ ಪಾತೆರೊಡು ಅತ್ತ್ ಬಲೊಟೇ ಉಂಡು. 21 ನಿಕ್ಲೆಗ್ ಎಂಚಿನವು ಇಷ್ಟ? ಬೆತ್ತ ಪತ್ತೊಂದು ನಿಕ್ಲೆ ಕೈತಲ್‌ ಬರೊಡಾ? ಇಜ್ಜಾಂಡ ಪ್ರೀತಿಡ್ಲಾ ತಗ್ಗ್‌ತನೊಟ್ಲಾ ಬರೊಡಾ? |
New Life Literature