1 ಕೊರಿಂಥ್ಯೆರೆಗ್ 3 - ಪೊಸ ಒಡಂಬಡಿಕೆ

ದೇವೆರೆನ ಸೇವಕೆರ್

¹ ಎನ ಸಹೋದ್ರೆರೇ, ನಿಕುಲು ಆತ್ಮಭಾವೊಡು ಭಕ್ತಿವಂತೆರ್ ಅಂದ್‌ದ್ ನಿಕ್ಲೆಡ ಪಾತೆರಂದೆ, ನನಲಾ ಶರೀರಭಾವದಾಕುಲು ಕ್ರಿಸ್ತಡ್ ಪುರುಬಾಲೆಲು ಆದುಪ್ಪುನಾಕುಲೆ ಲೆಕ್ಕ ನಿಕ್ಲೆಡ ಪಾತೆರೊಡಾಂಡ್.

² ಯಾನ್ ನಿಕ್ಲೆಗ್ ಪೇರ್ ಪರ್ಪಾಯೆ. ನುಪ್ಪು ಕೊರ್ತುಜಿ; ದಾಯೆ ಪಂಡ ನಿಕುಲು ನುಪ್ಪು ತಿನಿಯೆರೆ ಇದ ಮುಟ್ಟ ಶಕ್ತಿ ಇಜ್ಜಾಂಡ್, ಇತ್ತೆಲಾ ಶಕ್ತಿ ಇಜ್ಜಿ.

³ ದಾಯೆಗಂದ್ಂಡ ನಿಕುಲು ಶರೀರಭಾವದಾಕುಲಾದ್ ಬದುಕೊಂದು ಉಲ್ಲರ್; ನಿಕ್ಲೆ ಉಲಯಿ ಮಚ್ಚರ, ಲಡಾಯಿಲು ಉಪ್ಪುನೆಡ್ದ್ ನಿಕುಲು ಶರೀರಭಾವ ಇತ್ತಿನಕುಲಾದ್ ಸಾಧಾರಣ ನರಮಾನಿಲೆಕ್ಕ ಉಲ್ಲರತ್ತಾ?

⁴ “ಒರಿ ಯಾನ್ ಪೌಲುನಾಯೆ, ಬೊಕ್ಕೊರಿ ಯಾನ್ ಅಪೊಲ್ಲೋಸನಾಯೆ ಅಂದ್‌ದ್ ಪಂಡೊನ್ನಗ ನಿಕುಲು ಬಜೀ ನರಮಾನಿಲಾದ್ ಉಲ್ಲರತ್ತಾ?”

⁵ ಅಪಗಾಂಡ ಅಪೊಲ್ಲೋಸೆ ಏರ್? ಪೌಲು ಏರ್? ಅಕುಲು ಸೇವೆ ಮಲ್ಪುನಾಕುಲು; ಅಕ್ಲೆ ಪಾತೆರೊಡ್ದಾದ್ ನಿಕುಲು ಕ್ರಿಸ್ತನ್ ನಂಬಿಯರ್; ಕರ್ತವೆ ನಂಕ್ ಒರಿ ಒರಿಯಗ್ ಬೇಲೆ ಕೊರಿ ಲೆಕ್ಕ ಅಕುಲು ಬೇಲೆ ಮಲ್ಪುನಾಕುಲಾದ್ ಉಲ್ಲೆರ್.

⁶ ಯಾನ್ ನಿಕ್ಲೆಗ್ ಸುರುಟ್ಟು ಸುವಾರ್ತೆ ಬೀಜದಲೆಕ್ಕ ಬಿತ್ತಿಯೆ. ಅಪೊಲ್ಲೋಸೆ ನೀರ್ ಮೈತೆ. ಆಂಡ ಬುಲೆಪಾವೊಂದು ಬತ್ತಿನಾಯೆ ದೇವೆರ್.

⁷ ಇಂಚ ಉಪ್ಪುನಗ, ಬಿತ್ತಿನಾಯೆ ನೀರ್ ಮೈಪುನಾಯೆಲಾ ವಿಶೇಷದಾಕುಲು ಅತ್ತ್, ಬುಲೆಪಾವುನ ದೇವೆರೇ ವಿಶೇಷದಾಯೆ.

⁸ ಬಿತ್ತ್ ಬಿತ್ತಿನಾಯೆಲಾ ನೀರ್ ಮೈಪುನಾಯೆಲಾ ಒಂಜೇ ಆದುಲ್ಲೆರ್. ಆಂಡಲಾ ಪ್ರತಿ ಒರಿಯಗ್ಲಾ ಆಯಾಯನ ಕಷ್ಟೊಗು ತಕ್ಕದ ಕೂಲಿ ತಿಕ್ಕುಂಡು.

⁹ ದಾಯೆಗಂದ್ಂಡ, ಎಂಕುಲು ದೇವೆರೆ ಕೆಲಸೊಡು ಜತೆಸೇವಕೆರ್; ನಿಕುಲು ನಂಬುನಾಕುಲು ದೇವೆರೆ ಕಂಡಲಾ ದೇವೆರೆ ಕಟ್ಟಡಲಾ ಆದುಲ್ಲರ್.

¹⁰ ದೇವೆರ್ ಎಂಕ್ ದಯೆಡ್ದ್ ಕೊರಿನ ಕೆಲಸೊನು ನಡಪಾದ್ ಯಾನ್ ಬುದ್ಧಿ ಇತ್ತಿ ಮೇಸ್ತ್ರಿಲೆಕ್ಕ ಪಂಚಾಂಗ ಪಾಡಿಯೆ, ನನೊರಿ ಐತ ಮಿತ್ತ್ ಕಟ್ಟುವೆ. ಪ್ರತಿ ಒರಿಲಾ ತಾನ್ ಐತ ಮಿತ್ತ್ ಎಂಚ ಕಟ್ಟೊಂದುಲ್ಲೆ ಅಂದ್‌ದ್ ಎಚ್ಚರಿಕೆಡುಪ್ಪೊಡು.

¹¹ ದಾಯೆಗಂದ್ಂಡ, ಪಾಡ್ದಿನ ಪಂಚಾಂಗ ಯೇಸು ಕ್ರಿಸ್ತೆನೇ. ಈ ಪಂಚಾಂಗ ಅತ್ತಂದೆ ಬೇತೆ ಒಂಜಿ ಪಂಚಾಂಗೊನು ಏರೆಗ್ಲಾ ಪಾಡಿಯೆರೆಗ್ ಆವಂದ್.

¹² ಕೆಲೆವೆರ್ ಈ ಪಂಚಾಂಗದ ಮಿತ್ತ್ ಬಂಗಾರ್, ಬೊಳ್ಳಿ, ಮಸ್ತ್ ಬಿಲೆ ಇತ್ತಿ ಕಲ್ಲ್‌ಡ್ದ್, ಆಂಡ ಬಾಕಿ ಕೆಲೆವೆರ್ ಕನಕ್, ಪಜಿರ್, ಒಡ್ಡು ಇಂಚಿತ್ತಿನೆಟ್ಟ್ ಕಟ್ಟುವೆರ್.

¹³ ಕ್ರಿಸ್ತೆ ಬರ್ಪಿನ ದಿನೊಟು ಪ್ರತಿ ಒರಿಯನ ಬೇಲೆ ತೂಟು ತೋಜಿದ್ ಬರು. ಬೊಕ್ಕ ತೂ ಆಯಾಯನ ಎಂಚಿತ್ತಿನ ಬೇಲೆ ಅಂದ್‌ದ್ ಪರೀಕ್ಷೆ ಮಲ್ಪುಂಡು.

¹⁴ ಒರಿ ಆ ಪಂಚಾಂಗದ ಮಿತ್ತ್ ಕಟ್ಟ್‌ದಿನವು ಒರಿಂಡ ಆಯಗ್ ಇನಾಮ್ ತಿಕ್ಕುಂಡು.

¹⁵ ಒರಿಯನ ಬೇಲೆ ಪೊತ್ತುದು ಪೋಂಡ ಆಯಗ್ ನಷ್ಟ ಆವು. ಆಂಡ ಆಯಗ್ ರಕ್ಷಣೆ ಆವು, ಬೊಕ್ಕ ತೂತ ಉಲಯಿಡ್ದ್ ತಪ್ಪಾವೊಂಡಿಲೆಕ್ಕ ಉಪ್ಪೆ.

¹⁶ ನಿಕುಲು ಮಾತೆರ್ಲಾ ದೇವೆರೆ ಆಲಯ ಆದುಲ್ಲರ್ ಅಂದ್‌ದ್ ದೇವೆರೆ ಆತ್ಮೆ ನಿಕ್ಲೆಡ್ ವಾಸ ಮಲ್ಪುವೆ ಪಂಡ್ದ್‌ಲಾ ತೆರಿದಿಜರಾ?

¹⁷ ಏರಾಂಡಲಾ ದೇವೆರೆ ಆಲಯೊನು ಹಾಳ್ ಮಲ್ತೆಡ ದೇವೆರ್ ಆಯನ್ ಹಾಳ್ ಮಲ್ಪುವೆ; ದಾಯೆಗಂದ್ಂಡ ದೇವೆರೆ ಆಲಯ ಪರಿಶುದ್ಧಾದುಂಡು; ಅವು ನಿಕುಲೇ.

¹⁸ ಏರ್ಲಾ ತನನ್ ತಾನೇ ಮೋಸ ಮಲ್ತೊನಂದೆ ಉಪ್ಪಡ್. ನಿಕ್ಲೆಡ್ ಏರ್ಲಾ ತನನ್ ಈ ಲೋಕೊಡು ಬುದ್ಧಿವಂತೆ ಅಂದ್‌ದ್ ಎನ್ನೊನುವೆಡ ಆಯೆ ನಿಜಾದ್ ಬುದ್ಧಿವಂತೆ ಆಪಿಲೆಕ್ಕ ತನನ್ ತಾನ್ ಹೆಡ್ಡೆಲೆಕ್ಕ ಮಲ್ತೊನಡ್.

^19-20 ದಾಯೆಗಂದ್ಂಡ ಈ ಲೋಕದ ಬುದ್ಧಿವಂತಿಕೆ ದೇವೆರೆದುರುಡು ಹೆಡ್ಡ್‌ತನ ಆದುಂಡು. ಬುದ್ಧಿವಂತೆರೆನ್ ಅಕ್ಲೆನ ತಂತ್ರೊಡೇ ಪತ್ತುವೆ. ಬುದ್ಧಿವಂತೆರೆ ಯೋಚನೆಲು ವ್ಯರ್ಥದವು ಅಂದ್‌ದ್ ಕರ್ತವೆ ತೆರಿಯೊನ್ವೆ ಪಂಡ್ದ್‌ಲಾ ಬರೆತ್ಂಡ್.

²¹ ಅಂಚಾಯಿನೆಡ್ದ್ ಏರ್ಲಾ ನರಮಾನಿಲೆ ಸಂಗತಿಲೆಡ್ ಹೆಚ್ಚಲ್ಮೆ ಮಲ್ಪಂದೆ ಉಪ್ಪಡ್. ದಾಯೆಗಂದ್ಂಡ ಮಾತಲಾ ನಿಕ್ಲೆನವು;

²² ಪೌಲುನಾವಡ್, ಅಪೊಲ್ಲೋಸನಾವಡ್, ಪೇತ್ರನಾವಡ್ ಲೋಕ ಆವಡ್, ಜೀವ ಆವಡ್, ಮರಣ ಆವಡ್ ಇತ್ತೆ ಉಪ್ಪುನವು ಆವಡ್, ಬರ್ಪಿನವು ಆವಡ್ ಮಾತಲಾ ನಿಕ್ಲೆನವು.

²³ ನಿಕುಲು ಕ್ರಿಸ್ತನಾಕುಲು; ಬೊಕ್ಕ ಕ್ರಿಸ್ತೆ ದೇವೆರೆನಾಯನೇ.