1 ಕೊರಿಂಥ್ಯೆರೆಗ್ 2 - ಪೊಸ ಒಡಂಬಡಿಕೆ

ಕ್ರಿಸ್ತನ ಮರಣದ ವಿಷಯ

¹ ಸಹೋದ್ರೆರೇ, ಯಾನ್ ನಿಕ್ಲೆನಡೆ ಬತ್ತ್‌ದುಪ್ಪುನಗ ದೇವೆರೆ ಸಾಕ್ಷಿನ್ ನಿಕ್ಲೆಗ್ ಮಲ್ಲ ಪಾತೆರೊಡಾವಡ್ ಮಲ್ಲ ಬುದ್ಧಿಡಾವಡ್ ಸಾರಿಯೊಂದು ಬೈದಿಜಿ.

² ಯಾನ್ ಕ್ರುಸ್ಸುಗು ಪತ್ತಾದಿನಾಯೆ ಆದುಪ್ಪು ಯೇಸು ಕ್ರಿಸ್ತನೇ ಅತ್ತಂದೆ ಬೇತೆ ಒವೆನ್ಲಾ ಪನಂದೆ, ನಿಕ್ಲೆ ನಡುಟು ಉಪ್ಪುವೆ ಪಂಡ್ದ್ ತೀರ್ಮಾನ ಮಲ್ತೊಂಡೆ.

³ ಬೊಕ್ಕ ಯಾನ್ ನಿಕ್ಲೆ ಕೈತಲ್‌ ಬತ್ತ್‌ದುಪ್ಪುನಪಗ ಬಲದಾಂತಿನಾಯೆಲಾ ಪೋಡಿಗೆದಾಯೆಲಾ ದಿಂಜ ನಡುಗುನಾಯೆಲಾ ಆದಿತ್ತೆ.

⁴ ಎನ ಪಾತೆರೆಲಾ ಪ್ರಸಂಗಲಾ ನರಮಾನಿನ ಗೇನದ ಪೊರ್ಲು ಪಾತೆರೊಲೆನ್ ಪನಂದೆ, ಐತ ಪಗತೆಗ್ ದೇವೆರಾತ್ಮೊಡ್ದುಲಾ ಬಲೊಡ್ದುಲಾ ದಿಂಜಿದಿತ್ತ್ಂಡ್.

⁵ ದಾಯೆಗಂದ್ಂಡ ನಿಕ್ಲೆನ ನಂಬಿಕೆ ನರಮಾನಿನ ಗೇನೊಡು ಆಧಾರ ಮಲ್ಪಂದೆ ದೇವೆರೆ ಬಲೊಟು ಆಧಾರ ಮಲ್ಪೊಡು ಅಂದ್‌ದ್ ಎನ ಉದ್ದೇಶ ಆದಿತ್ತ್ಂಡ್.

⁶ ಆಂಡ ನಂಬಿಕೆಡ್ ದೃಢ ಆದುಪ್ಪುನಾಕುಲೆಡ ಎಂಕುಲು ಗೇನೊಡೇ ಪಾತೆರ್‌ವ; ಆಂಡ ಈ ಲೋಕದ ಗೇನೊಡತ್ತ್; ನಾಶಾದ್ ಪೋಪಿನ ಈ ಲೋಕದ ಅಧಿಕಾರಿಲೆ ಬುದ್ಧಿವಂತಿಕೆಡ್ಲಾ ಅತ್ತ್.

⁷ ಈತ್‌ನೆಟ್ಟ ಮದೆ ಆದಿತ್ತಿನ ದೇವೆರೆ ಗೇನೊನೇ ಪಾತೆರ್‌ವ; ಅವು ಒವ್ವು ಪಂಡ ನಮ ಮೈಮೆಗಾದ್ ಯುಗೊಲೆಡ್ದ್ ದುಂಬೇ ನೇಮಕ ಮಲ್ತ್‌ದ್ ಮದೆ ಮಲ್ತಿನ ಗೇನನೇ ಆದುಂಡು.

⁸ ಉಂದೆನ್ ಲೋಕದ ಅಧಿಕಾರಿಲೆಡ್ ಏರ್ಲಾ ತೆರಿಯೊಂಡಿಜೆರ್; ತೆರಿಯೊಂದ್ವೆರ್ಡ ಮೈಮೆದ ಕರ್ತವನ್ ಕ್ರುಸ್ಸುಗು ಪಾಡ್ದ್‌ವಯೆರ್.

⁹ ಆಂಡ ಗ್ರಂಥೊಡು ಬರೆದುಪ್ಪುಲೆಕ್ಕ “ದೇವೆರ್ ತನನ್ ಪ್ರೀತಿ ಮಲ್ತೊಂದು ಉಪ್ಪುನಾಕುಲೆಗ್ ತಯಾರ್ ಮಲ್ತಿನೆನ್ ಏರ್ಲಾ ತೂತುಜೆರ್; ಏರ್ಲಾ ಕೇಂಡ್ದಿಜೆರ್, ಅವು ನರಮಾನಿ ಉಡಲ್‌ಡ್ ಸೇರ್ದಿಜಿ.”

¹⁰ ಎಂಕ್ಲೆಗಾಂಡಲಾ ದೇವೆರ್ ತನ ಆತ್ಮೊಡ್ದು ಅವೆನ್ ತೋಜಾದ್ ಕೊರಿಯೆ. ಆ ಆತ್ಮೆ ಮಾತ ವಿಷಯೊನ್ಲಾ ದೇವೆರೆ ಮದೆ ಆದಿತ್ತಿನ ವಿಷಯೊನ್ಲಾ ನಾಡ್ ಪತ್ತುಂಡು.

¹¹ ನರಮಾನಿನ ಉಲಯಿದ ಆಲೋಚನೆಲು ಆಯಡೊಪ್ಪ ಉಪ್ಪುನ ಆತ್ಮೊಗು ಅತ್ತಂದೆ ಬೇತೆ ಏರೆಗ್ ತೆರಿಯು? ಅಂಚೆನೇ ದೇವೆರೆ ಆಲೋಚನೆಲೆನ್ಲಾ ದೇವೆರೆ ಆತ್ಮೆ ಅತ್ತಂದೆ ಬೇತೆ ಏರೆಗ್ಲಾ ತೆರಿಯಂದ್.

¹² ಎಂಕುಲು ಲೋಕದ ಆತ್ಮನ್ ಪಡೆಯಂದೆ ದೇವೆರ್ ನಂಕ್ ದಯ ಮಲ್ತಿನ ವರೊಕ್ಲೆನ್ ತೆರಿಯೊನಿಯೆರೆ ದೇವೆರೆಡ್ದ್ ಬೈದಿ ಆತ್ಮೊನೇ ಪಡೆವೊಂದ.

¹³ ಉಂದೆನ್ ಎಂಕುಲು ನರಮಾನಿನ ಬುದ್ಧಿ ಪಾತೆರೊಲೆಡ್ದ್ ಪನಂದೆ ದೇವೆರಾತ್ಮೆ ಕಲ್ಪಾಯಿನ ಪಾತೆರೊಲೆಡೇ ಪಂಡ. ಇಂಚ ಆತ್ಮದ ಸತ್ಯೊನು ಆತ್ಮಭಾವದಾಕುಲೆಗ್ ಯೋಗ್ಯವಾಯಿನ ರೀತಿಡ್ ತೆರಿಪಾವ.

¹⁴ ಲೋಕದ ನರಮಾನಿ ದೇವೆರೆ ಆತ್ಮದ ಸಂಗತಿಲೆನ್ ಬೊಡ್ಚಿ ಪನ್ಪೆ. ಅವು ಆಯಗ್ ಹೆಡ್ಡೆರೆ ಪಾತೆರದ ಲೆಕ್ಕ ತೋಜುಂಡು; ಆಯೆ ಅವೆನ್ ತೆರಿಯೊನುಜೆ. ದಾಯೆಗಂದ್ಂಡ ಅವೆನ್ ದೇವೆರೆ ಆತ್ಮಭಾವೊಡ್ದೇ ಪರೀಕ್ಷೆ ಮಲ್ತ್‌ದ್ ಸರಿಯಾದ್ ತೆರಿಯೊನಿಯೆರೆ ಸಾದ್ಯ.

¹⁵ ದೇವೆರಾತ್ಮೊಡ್ದು ನಡಪುನಾಯೆ ಮಾತೆನ್ಲಾ ಪರೀಕ್ಷೆ ಮಲ್ತ್‌ದ್ ತೆರಿಯೊನ್ವೆ. ಆಂಡ ಆಯನ್ ಪರೀಕ್ಷೆ ಮಲ್ಪೆರೆ ಏರೆಡ್ದ್‌ಲಾ ಆವಂದ್.

¹⁶ “ಕರ್ತವ ಮನಸ್‌ನ್ ಏರ್ ತೆರಿದುಲ್ಲೆ? ಕರ್ತವಗ್ ಉಪದೇಶ ಮಲ್ಪುನಾಕುಲು ಏರುಲ್ಲೆರ್?” ಪಂಡ್ದ್ ಗ್ರಂಥೊಡು ಬರೆದುಂಡು. ನಂಕಾಂಡಲಾ ಕ್ರಿಸ್ತನ ಮನಸ್ ಉಂಡು.