1 ಕೊರಿಂಥ್ಯೆರೆಗ್ 16 - ಪೊಸ ಒಡಂಬಡಿಕೆ

ದೇವಜನೊಕುಲೆಗ್ ವಂತಿಗೆ ಕೂಡಾವುನವು

¹ ದೇವಜನೊಕುಲೆಗ್ ವಂತಿಗೆದ ಬಗೆಟ್ ಪನ್ಪಿನಿ ದಾನೆಂದ್ಂಡ, ಯಾನ್ ಗಲಾತ್ಯದ ಸಭೆಲೆಗ್ ಎಂಚ ನೇಮಿಸಿಯೆನಾ ಅಂಚೆನೆ ನಿಕುಲುಲಾ ಮಲ್ಪುಲೆ.

² ಯಾನ್ ಬನ್ನಗ ವಂತಿಗೆ ಕೂಡಾವುನ ಅಗತ್ಯ ಆವಂದಿಲೆಕ್ಕ ನಿಕ್ಲೆಡ್ ಪ್ರತಿ ಒರಿಲಾ ಪ್ರತಿ ವಾರದ ಸುರುತ್ತ ದಿನೊಟು, ದೇವೆರ್ ತನ್ಕುಲೆಗ್ ಕೊರಿ ಸಂಪಾದನೆಡ್ ಕೂಡಾದ್ ದೀವೊನಡ್.

³ ಬೊಕ್ಕ ಯಾನ್ ಬತ್ತಿನಪಗ ನಿಕುಲು ಏರೆನ್ ಯೋಗ್ಯದಾಕುಲು ಅಂದ್‌ದ್ ಪನ್ಪರಾ ಅಕ್ಲೆಡೊಪ್ಪ ನಿಕ್ಲೆ ಕಾಣಿಕೆದ ಒಟ್ಟುಗು ಕಾಕಜಿನ್ ಕೊರ್ದು ಯಾನ್ ಯೆರೂಸಲೇಮುಗು ಕಡಪುಡ್ವೆ.

⁴ ಯಾನ್ಲಾ ಪೋಪಿನವು ಸರಿ ತೋಜಿಂಡ ಅಕುಲು ಎನ ಒಟ್ಟುಗು ಬರೊಲಿ.

ಪ್ರಯಾಣದ ಯೋಜನೆ

⁵ ಯಾನ್ ಮಕೆದೋನ್ಯೊನು ಕಡತ್‌ದ್ ಪೋವೆರೆ ಉಪ್ಪುನೆಡ್ದ್, ಮಕದೋನ್ಯನ್ ಕಡತ್‌ದ್ ಪೋಯಿ ಬೊಕ್ಕ ನಿಕ್ಲೆನಡೆಗ್ ಬರ್ಪೆ.

⁶ ನಿಕ್ಲೆಡೊಪ್ಪ ಒಂತೆ ಸಮಯ ಉಂತುದು ಚಳಿಕಾಲ ಮುಟ್ಟ ಉಂತೆರೆ ಯಾವು. ಬೊಕ್ಕ ಯಾನ್ ಪೋವೊಡಾಯಿನ ಜಾಗ್‌ಗ್ ನಿಕುಲು ಎಂಕ್ ಸಹಾಯ ಮಲ್ಪುಲೆ.

⁷ ಯಾನ್ ಪೋಪಿ ಸಾದಿಡ್ ನಿಕ್ಲೆನ್ ಇತ್ತೆ ತೂವೆರೆ ಎಂಕ್ ಮನಸಿಜ್ಜಿ. ಕರ್ತವೆ ದಯ ಮಲ್ತೆಡ ನಿಕ್ಲೆಡೊಪ್ಪ ಒಂತೆ ಸಮಯ ಉಂತೆರೆ ಎಂಕ್ ಭರವಸ ಉಂಡು.

⁸ ಆಂಡ ಪಂಚಾಶತಮ ಪರ್ಬ ಮುಟ್ಟ ಎಫೆಸೊಡು ಉಂತುವೆ,

⁹ ದಾಯೆಗಂದ್ಂಡ ಸೇವೆ ಸಫಲ ಆಪಿನ ಮಲ್ಲ ಬಾಕಿಲ್ ಜತ್ತ್‌ದುಂಡು, ಬೊಕ್ಕ ವಿರೋಧಿಲುಲಾ ಮಸ್ತ್ ಜನ ಉಲ್ಲೆರ್.

¹⁰ ತಿಮೋಥಿ ಬತ್ತೆಡ ಆಯೆ ನಿಕ್ಲೆಡೊಪ್ಪ ಪೋಡಿಗೆದಾಂತೆ ಉಪ್ಪುಲೆಕ್ಕ ತೂವೊನ್ಲೆ. ಆಯೆ ಎನಲೆಕ್ಕನೇ ಕರ್ತವ ಸೇವೆನ್ ಮಲ್ತೊಂದುಲ್ಲೆ.

¹¹ ಅಂಚಾದ್ ಏರ್ಲಾ ಆಯನ್ ಹೀನ ಮಲ್ಪಂದೆ ಉಪ್ಪಡ್. ಬೊಕ್ಕ ಸಮಾಧಾನೊಡು ಆಯನ್ ಎನ ಕೈತಲ್‌ ಕಡಪುಡ್ದು ಕೊರ್ಲೆ; ದಾಯೆಗಂದ್ಂಡ ಯಾನ್ ಆಯನ್ ಸಹೋದ್ರೆರೊಟ್ಟುಗು ಬರ್ಪಿನ ಸಾದಿ ತೂವೊಂದುಲ್ಲೆ.

¹² ಸಹೋದರೆ ಆಯಿ ಅಪೊಲ್ಲೋಸನ ವಿಚಾರ ದಾನೆಂದ್ಂಡ, ಆಯೆ ಸಹೋದ್ರೆರೊಟ್ಟುಗು ನಿಕ್ಲೆ ಕಡೆಕ್ಕ್ ಬರೊಡಂದ್‌ದ್ ಯಾನ್ ಆಯಡ ದಿಂಜ ನಟ್ಟೊಂಡೆ. ಆಂಡ ಇತ್ತೆ ಬರಿಯೆರೆಗ್ ಆಯಗ್ ಒಂತೆಲಾ ಮನಸಿಜ್ಜಾಂಡ್. ಆಂಡ ಆಯೆ ಅನುಕೂಲ ಆಯಿನಪಗ ಬರುವೆ.

ಕಡೆತ ಪಾತೆರೊಲು

¹³ ಎಚ್ಚರಿಕೆ ಆದುಪ್ಪುಲೆ; ಕ್ರಿಸ್ತ ನಂಬಿಕೆಡ್ ದೃಢಾದ್ ಉಂತುಲೆ. ಬಲಿಷ್ಟೆರಾದುಪ್ಪುಲೆ.

¹⁴ ನಿಕುಲು ಮಲ್ಪುನೆನ್ ಮಾತೆನ್ಲಾ ಪ್ರೀತಿಡ್ ಮಲ್ಪುಲೆ.

^15-16 ಆಂಡ ಸಹೋದ್ರೆರೇ, ಸ್ತೇಫನನ ಇಲ್ಲದಾಕುಲು ಅಖಾಯೊಡು ಸುರುತ್ತ ಫಲ ಪಂಡ್ದ್‌ಲಾ ಅಕುಲು ದೇವಜನೊಕುಲೆ ಸೇವೆ ಮಲ್ಪುನೆಕ್ಕ್ ಅಕ್ಲೆನೇ ಒಚ್ಚಿದ್ ಕೊರ್ತಿನಾಕುಲು ಅಂದ್‌ದ್ ನಿಕುಲು ತೆರಿದರತ್ತಾ? ನಿಕುಲು ಇಂಚಿತ್ತಿನಾಕುಲೆಗ್ಲಾ ಸೇವೆಡ್ ಸಹಾಯ ಮಲ್ಪುನಾಕುಲೆಗ್ಲಾ ಪ್ರಯಾಸ ಬುಡ್ತಿನಾಕುಲೆಗ್ಲಾ ಒಳಗಾದ್ ಉಪ್ಪೊಡಂದ್‌ದ್ ಯಾನ್ ನಟ್ಟೊನ್ವೆ.

¹⁷ ಸ್ತೇಫನೆಲಾ ಫೊರ್ತುನಾತೆಲಾ ಅಖಾಯಿಕೆಲಾ ಬತ್ತಿನೆಟ್ಟ್ ಎಂಕ್ ಸಂತೋಷ ಆಂಡ್. ಎಂಕ್ ನಿಕ್ಲೆಡ್ದ್ ಆವಂದಿನೆನ್ ಅಕುಲು ಪರಿಹಾರ ಮಲ್ತೆರ್.

¹⁸ ಅಕುಲು ಎನ ಆತ್ಮೊಗ್ಲಾ ನಿಕ್ಲೆ ಆತ್ಮೊಗ್ಲಾ ಪೊಸ ಚೈತನ್ಯ ಪುಟ್ಟಾಯೆರ್. ಇಂಚಿತ್ತಿನಾಕುಲೆನ್ ಗಣ್ಯಮಲ್ಪುಲೆ.

¹⁹ ಆಸ್ಯ ಸೀಮೆದ ಸಭೆತಾಕುಲು ನಿಕ್ಲೆಗ್ ವಂದನೆ ತೆರಿಪಾವೆರ್. ಅಕ್ವಿಲೆಲಾ ಪ್ರಿಸ್ಕಿಲಲಾ ತನ್ಕುಲೆ ಇಲ್ಲಡ್ ಕೂಡ್ದು ಬರ್ಪಿ ಸಭೆತಾಕುಲೆಡೊಪ್ಪ ಕರ್ತವಡ್ ನಿಕ್ಲೆನ್ ಮಸ್ತ್ ವಂದಿಪುವೆರ್.

²⁰ ಮಾತ ಸಹೋದ್ರೆರೆಡ್ದ್ ನಿಕ್ಲೆಗ್ ವಂದನೆಲು. ಒರಿಯಗ್ ಒರಿ ಪರಿಶುದ್ಧದ ಮುದ್ದು ಕೊರ್ದು ವಂದಿತೊನ್ಲೆ.

²¹ ಪೌಲು ಪನ್ಪಿ ಯಾನ್ ಸ್ವಂತ ಕೈಟ್ ನಿಕ್ಲೆಗ್ ವಂದನೆಲೆನ್ ಬರೆತೆ.

²² ಏರಾಂಡಲಾ ಕರ್ತವನ್ ಪ್ರೀತಿ ಮಲ್ತ್‌ಜೆಡ ಆಯೆ ಶಾಪಗ್ರಸ್ತೆ ಆವಡ್. ಮಾರನಥ ಪಂಡ ಎಂಕುಲೆ ಕರ್ತವ ಬಲ!

²³ ನಮ ಕರ್ತವೆ ಆದುಪ್ಪು ಯೇಸುನ ದಯ ನಿಕ್ಲೆಡೊಪ್ಪ ಉಪ್ಪಡ್.

²⁴ ಕ್ರಿಸ್ತ ಯೇಸುಡು ಎನ ಪ್ರೀತಿ ನಿಕ್ಲೆ ಮಾತೆರೆಡೊಪ್ಪ ಉಪ್ಪಡ್. ಆಮೆನ್.