1 ಕೊರಿಂಥ್ಯೆರೆಗ್ 15 - ಪೊಸ ಒಡಂಬಡಿಕೆ

ಯೇಸು ಸೈತ್‌ದ್ ಲಕ್ಕಿನ ಸಂಗತಿಡ್

¹ ಇತ್ತೆ ಸಹೋದ್ರೆರೇ, ಯಾನ್ ನಿಕ್ಲೆಗ್ ತೆರಿಪಾದಿ ಸುವಾರ್ತೆ ನಿಕ್ಲೆ ನೆನೆಪುಗು ಕನಬರ್ಪೆ; ನಿಕುಲು ಅವೆನ್ ಸ್ವೀಕಾರ ಮಲ್ತ್‌ದರ್, ಐಟ್ಟ್ ಉಂತುದರ್.

² ಯಾನ್ ಸಾರಿನ ಸುವಾರ್ತೆ ದೀವೊನಿಯರ್ಡ ನಿಕ್ಲೆಗ್ ರಕ್ಷಣೆ ಆವು. ಇಜ್ಜಾಂಡ ನಿಕ್ಲೆನ ನಂಬಿಕೆ ವ್ಯರ್ಥ ಆದ್ ಪೋವು.

³ ಯಾನ್ ನಿಕ್ಲೆಗ್ ತೆರಿಪಾದಿನ ಸುರುತ್ತ ಸಂಗತಿಲೆಡ್ ಒಂಜಿ ಸಂಗತಿನ್ ನಿಕ್ಲೆಗ್ ಮುಖ್ಯವಾದ್ ತೆರಿಪಾದ್ ಕೊರಿಯೆ. ಅವು ಯಾನ್ಲಾ ಕಲ್ತೊಂದಿನವೇ. ಅವು ದಾನೆಂದ್ಂಡ ಶಾಸ್ತ್ರೊಡು ತೆರಿಪಾಯಿ ಲೆಕ್ಕನೇ ಕ್ರಿಸ್ತೆ ನಮ ಪಾಪೊಲೆಗಾದ್ ಸೈತೆ.

⁴ ಆಯೆ ಕೌಂತುದಿನಾಯೆ ಆದ್ ಶಾಸ್ತ್ರದ ಪ್ರಕಾರನೇ ದೇವೆರ್ ಮೂಜನೇ ದಿನೊಟು ಸೈತಿನಾಕುಲೆಡ್ದ್ ಲಕ್ಕಾಯೆ.

⁵ ಬೊಕ್ಕ ಪೇತ್ರಗ್, ಐಡ್ದ್ ಬೊಕ್ಕ ಪದ್ರಾಡ್ ಅಪೊಸ್ತಲೆರೆಗ್ ತೋಜಿಯೆ.

⁶ ಐಡ್ದ್ ಬೊಕ್ಕ ಒಂಜೇ ಸರ್ತಿಗ್ ಐನೂದೆಡ್ದ್ ಹೆಚ್ಚ್ ಸಹೋದ್ರೆರೆಗ್ ತೋಜಿದ್ ಬತ್ತೆ. ಐಟ್ಟ್ ಹೆಚ್ಚಿನಾಕುಲು ಇನಿಕ್ಲಾ ಉಲ್ಲೆರ್; ಆಂಡ ಕೆಲೆವೆರ್ ಸೈತ್ ಪೋತೆರ್.

⁷ ಬೊಕ್ಕ ಆಯೆ ಯಾಕೋಬುಗ್ಲಾ ಮಾತ ಅಪೊಸ್ತಲೆರೆಗ್ಲಾ ತೋಜಿದ್ ಬತ್ತೆ.

⁸ ಕಡೆಕ್ಕ್ ಮಾತೆರೆಡ್ದ್ ದಿನ ದಿಂಜದೆ ಪುಟ್ಟಿನ ಬಾಲೆದ ಲೆಕ್ಕನೇ ಆದುಪ್ಪು ಎಂಕ್‌ಲಾ ತೋಜಿಯೆ.

⁹ ದಾಯೆಗಂದ್ಂಡ ಯಾನ್ ಅಪೊಸ್ತಲೆರೆಡ್ ಲೆಖ್ಖೊಗು ಬರಂದಿನಾಯೆ. ಯಾನ್ ದೇವೆರೆ ಸಭೆಕ್ ಭಂಗ ಕೊರಿನೆಡ್ದ್ ಅಪೊಸ್ತಲೆ ಅಂದ್‌ದ್ ಲೆಪ್ಪಾವೊನಿಯೆರೆಗ್ಲಾ ತಕ್ಕದಾಯೆ ಅತ್ತ್.

¹⁰ ಆಂಡ ಇತ್ತೆ ಯಾನ್ ಎಂಚಿನಾಯೆ ಆದುಲ್ಲೆನಾ, ಅವು ದೇವೆರೆ ದಯೊಡ್ದೇ. ಎನ ಮಿತ್ತ್ ತೋಜಿದ್ ಬತ್ತಿನ ಆಯನ ದಯ ವ್ಯರ್ಥ ಆದುಪ್ಪುಜಿ. ಯಾನ್ ಬೇತೆ ಅಪೊಸ್ತಲೆರೆಡ್ದ್ ಹೆಚ್ಚಾದ್ ಕಷ್ಟ ಪಡೆಯೆ. ಆಂಡ ಕಷ್ಟ ಪಡೆಯಿನಾಯೆ ಯಾನತ್ತ್, ಎನ ಮಿತ್ತುಪ್ಪುನ ದೇವೆರೆ ದಯೆನೇ.

¹¹ ಅಂಚಾಂಡ, ಯಾನಾವಡ್, ಅಕುಲಾವಡ್ ದಾನೆ, ಆ ಸಂಗತಿಲೆನೇ ಸಾರಿಯೊಂದುಲ್ಲ, ನಿಕುಲು ಅವೆನ್ ನಂಬಿಯರ್.

ಸೈತಿನಾಕುಲೆಡ್ದ್ ಲಕ್ಕಿನವು

¹² ದೇವೆರ್ ಯೇಸು ಕ್ರಿಸ್ತನ್ ಸೈತಿನಾಕುಲೆಡ್ದ್ ಲಕ್ಕಾಯೆ ಪಂಡ್ದ್ ಸಾರಿನಗ, ನಿಕ್ಲೆಡ್ ಕೆಲೆವೆರ್, ದೇವೆರ್ ಸೈತಿನಾಕುಲೆಗ್ ಜೀವ ಕೊರ್ತಿಜೆ ಪಂಡ್ದ್ ಪನ್ಪಿನಿ ಎಂಚ?

¹³ ದೇವೆರ್ ಸೈತಿನಾಕುಲೆಗ್ ಜೀವ ಕೊರ್ಪಿನವು ಇಜ್ಜಿ ಪನ್ಪಿನವು ನಿಜ ಆಂಡ ದೇವೆರ್ ಯೇಸು ಕ್ರಿಸ್ತನ್ ಸೈತಿನಾಕುಲೆಡ್ದ್ ಲಕ್ಕಾದಿಜೆ ಪಂಡ್ದ್ ಆಂಡ್.

¹⁴ ದೇವೆರ್ ಯೇಸು ಕ್ರಿಸ್ತನ್ ಸೈತಿನಾಕುಲೆಡ್ದ್ ಲಕ್ಕಾದಿಜೆಡ, ಎಂಕುಲೆ ಪ್ರಸಂಗ ಪೊಕ್ಕಡೆದವು; ನಿಕ್ಲೆ ನಂಬಿಕೆಲಾ ಪೊಕ್ಕಡೆದವೇ.

¹⁵ ದೇವೆರ್ ಯೇಸು ಕ್ರಿಸ್ತನ್ ಸೈತಿನಾಕುಲೆಡ್ದ್ ಲಕ್ಕಾದೆ ಪಂಡ್ದ್ ಎಂಕುಲು ಪಂತ. ಆಂಡ ದೇವೆರ್ ಸೈತಿನಾಕುಲೆನ್ ಲಕ್ಕಾವುಜೆ ಪಂಡ್ದ್ ಸತ್ಯ ಆಂಡ ದೇವೆರ್ ಕ್ರಿಸ್ತನ್ ಲಕ್ಕಾಯಿನೇ ಇಜ್ಜಿ; ಲಕ್ಕಾದೆ ಪಂಡ್ದ್ ಸಾಕ್ಷಿ ಕೊರಿನ ಎಂಕುಲು ದೇವೆರೆ ವಿಷಯೊಡು ಸುಳ್ಳು ಸಾಕ್ಷಿ ಪನ್ಪಿನಾಕುಲಾದ್ ತೋಜಿದ್ ಬತ್ತ.

¹⁶ ಸೈತಿನಾಕುಲು ಲಕ್ಕುಜೆರ್ಡ, ಕ್ರಿಸ್ತೆಲಾ ಸೈತಿನಾಕುಲೆಡ್ದ್ ಲಕ್ಕ್‌ದಿಜೆ.

¹⁷ ಕ್ರಿಸ್ತೆ ಸೈತಿನಾಕುಲೆಡ್ದ್ ಲಕ್ಕಾದಿಜಾಂಡ, ನಿಕ್ಲೆ ನಂಬಿಕೆ ವ್ಯರ್ಥದವು. ನಿಕುಲು ನನಲಾ ಪಾಪೊಡೇ ಉಲ್ಲರ್.

¹⁸ ಉಂದು ಮಾತ್ರ ಅತ್ತಂದೆ ಕ್ರಿಸ್ತನಾಕುಲಾದ್ ನಿದ್ರೆ ಪೋಯಿನಾಕುಲು ನಾಶಾದ್ ಪೋಯೆರ್.

¹⁹ ಈ ಜೀವಮಾನ ಕಾಲ ಪೂರ ಎಂಕುಲು ಕ್ರಿಸ್ತಡ್ ಭರವಸ ದೀವೊಂಡಿನವೇ ಅತ್ತಂದೆ ಬೇತೆ ದಾಲಾ ಇಜ್ಜಿಡ ಮಾತ ನರಮಾನಿಲೆಡ್ದ್ ಕಂಗಾಲಾಯಿನಕುಲೇ ಸರಿ.

²⁰ ಆಂಡ ಕ್ರಿಸ್ತೆ ನಿಜಾದ್‌ಲಾ ಜೀವ ಆದ್ ಲಕ್ಕ್‌ದ್ ಬೈದೆ ಪನ್ಪಿನವು ಸತ್ಯ. ಸೈತಿನಾಕುಲೆಡ್ ಲಕ್ಕ್‌ದ್ ಬತ್ತಿನೆಟ್ಟ್ ಕ್ರಿಸ್ತೆನೇ ಸುರುತ್ತ ಫಲ ಆಯೆ.

²¹ ದಾಯೆಗಂದ್ಂಡ, ಒರಿ ನರಮಾನಿಡ್ದ್ ಮರಣ ಬತ್ತಿಲೆಕ್ಕನೇ ಒರಿ ನರಮಾನಿಡ್ದೇ ಸೈತಿನಾಕುಲೆಡ್ದ್ ಕುಡ ಲಕ್ಕಾವುನಲಾ ಉಂಡು.

²² ವಾ ರೀತಿಡ್ ಸುರುತ್ತ ನರಮಾನಿ ಆದಾಮುನ ಸಮ್ಮಂಧೊಡ್ದು ಮಾತೆರ್ಲಾ ಸೈಪುನಾಕುಲಾಯೆರಾ, ಅವ್ವೇ ರೀತಿಡ್ ಕ್ರಿಸ್ತನ ಸಮ್ಮಂಧೊಡ್ದು ಮಾತೆರ್ಲಾ ಜೀವ ಆವೆರ್.

²³ ಆಂಡ ಪ್ರತಿ ಒರಿಲಾ ತನ ತನ ಕ್ರಮ ಪ್ರಕಾರ ಜೀವಾದ್ ಲಕ್ಕುವೆರ್, ಕ್ರಿಸ್ತೆ ಸುರುತ್ತ ಫಲ ಆದ್ ಜೀವಾದ್ ಲಕ್ಕಿಯೆ; ಬೊಕ್ಕ ಆಯೆ ಕುಡ ಬನ್ನಗ ಆಯನಾಕುಲುಲಾ ಜೀವಾದ್ ಲಕ್ಕುವೆರ್.

²⁴ ಬೊಕ್ಕ ಅಂತ್ಯ ಬರ್ಪುಂಡು. ಅಪಗ ಮಾತ ದೊರೆತನೊನು, ಅಧಿಕಾರೊನು, ಮಾತ ಬಲೊನು ಆಯೆ ದೆತ್ತ್‌ದ್ ಪಾಡುವೆ, ಬೊಕ್ಕ ಅಮ್ಮೆ ಆದುಪ್ಪು ದೇವೆರೆಗ್ ರಾಜ್ಯೊನು ಒಚ್ಚಿದ್ ಕೊರ್ಪೆ,

²⁵ ದಾಯೆಗಂದ್ಂಡ ದೇವೆರ್ ಮಾತ ವೈರಿಲೆನ್ ಕ್ರಿಸ್ತನ ಕಾರ್‌ದಡಿಕ್ ಪಾಡುನ ಮುಟ್ಟ ಆಳೊಡಾಪುಂಡು.

²⁶ ಮರಣ ಕಡೇತ ವೈರಿ ಆದ್ ನಾಶ ಆಪುಂಡು.

²⁷ “ದೇವೆರ್ ಮಾತೆನ್ಲಾ ಕ್ರಿಸ್ತನ ಕಾರ್‌ದಡಿಕ್ ಪಾಡ್ದ್ ಆಯಗ್ ಅಧೀನ ಮಲ್ಪುವೆ,” ಅಂದ್‌ದ್ ಶಾಸ್ತ್ರೊಡು ಬರೆತ್ಂಡ್. “ಮಾತೆನ್ಲಾ” ಆಯ ಕಾರ್‌ದಡಿಕ್ ಪಾಡ್ದೆ ಪಂಡಿನಪಗ ಅಧೀನ ಮಲ್ತಿನಾಯೆ ದೇವೆರ್ ಐಟ್ಟ್ ಸೇರ್ದಿಜೆ ಪನ್ಪಿನವು ನಿಗಂಟ್ ಆಂಡ್.

²⁸ ಬೊಕ್ಕ ದೇವೆರ್ ಮಾತ ವಸ್ತುಲಾ ಮಗನ ಅಧೀನೊಗು ಕೊರಿನೆಡ್ದಾವರ ಮಗೆಲಾ ತನ ದೇವೆರೆಗ್ ಅಧೀನ ಆಪೆ. ಇಂಚ ದೇವೆರ್ ಮಾತೆಟ್ಲಾ ಮಾತಲಾ ಆದುಲ್ಲೆ.

²⁹ ದೇವೆರ್ ಸೈತಿನಾಕುಲೆನ್ ಲಕ್ಕಾವುನವು ಇಜ್ಜಿಡ ನಿಕುಲು ಸೈತಿನಾಕುಲೆ ಪುದರ್‌ಡ್ ದೀಕ್ಷಾಸ್ನಾನ ಮಲ್ತೊನುನ ಕ್ರಮ ದಾಯೆಗ್? ಸೈತಿನಾಕುಲು ಲಕ್ಕುಜೆರ್ ಪನ್ಪಿನಾಂಡ ಅಕ್ಲೆಗಾದ್ ದೀಕ್ಷಾಸ್ನಾನ ದಾಯೆಗ್ ಮಲ್ತೊನ್ವೆರ್

³⁰ ಎಂಕುಲುಲಾ ಪ್ರತಿ ಗಳಿಗೆಡ್ ಸೈಪಿನ ವಿಷಯೊಡು ಪೋಡಿಗೆಡ್ ಉಪ್ಪುನು ದಾಯೆ?

³¹ ಸಹೋದ್ರೆರೇ, ನಮ ಕರ್ತವೆ ಆದುಪ್ಪು ಕ್ರಿಸ್ತ ಯೇಸುಡು ಎಂಕ್ ಉಪ್ಪುನ ಪುಗರಿಗೆದ ಮಿತ್ತ್ ಆಜ ದೀದ್ ಪನ್ಪೆ, ಯಾನ್ ದಿನಾಲ ಸೈಯೊಂದು ಉಲ್ಲೆ.

³² ಯಾನ್ ನರಮಾನಿ ಆಸೆಡ್ ಇತ್ತ್‌ದ್ ಈ ಕಾಡ್ ಮೃಗತ್ತಲೆಕ್ಕ ಎಫೆಸೊಡುಪ್ಪು ಜನೊಕುಲೆಡ ಉರ್ಡೊಡಾಂಡ ಎಂಕ್ ದಾನೆ ಪ್ರಯೋಜನ? ದೇವೆರ್ ಸೈತಿನಾಕುಲೆನ್ ಲಕ್ಕಾವುನವು ಇಜ್ಜಿಡ, “ನಮ ತಿನ್ಕ, ಪರ್ಕ; ದಾಯೆಗಂದ್ಂಡ ಎಲ್ಲೆ ನಮ ಸೈಪ ಅತ್ತಾ?”

³³ ಮೋಸೊಡು ಬೂರಡೆ, “ಪಡಿಕೆಂತಿನಾಕುಲೆ ಒಟ್ಟುಗು ಸೇರೊನುಂಡ ಎಡ್ಡೆ ನಡತೆನ್ ತೆಟ್ಟಾವುಂಡು.”

³⁴ ಇಂಚಿತ್ತಿನ ಅಮಲ್‌ಡ್ದ್ ಲಕ್ಕ್‌ದ್ ನೀತಿವಂತೆರಾಲೆ; ಪಾಪ ಕೆಲಸೊಲೆನ್ ಬುಡ್ಲೆ. ಕೆಲೆವೆರೆಗ್ ದೇವೆರೆ ವಿಷಯೊಡು ಗೇನನೇ ಇಜ್ಜಿ; ನಿಕ್ಲೆಗ್ ನಾಚಿಗೆ ಆವೊಡು ಅಂದ್‌ದ್ ಉಂದೆನ್ ಪನ್ಪೆ.

ಜೀವಾದ್ ಲಕ್ಕುನ ಶರೀರ

³⁵ ಆಂಡ, “ಸೈತ್‌ದಿನಾಕುಲು ಎಂಚ ಲಕ್ಕುವೆರ್, ಎಂಚಿತ್ತಿ ಶರೀರೊಡು ಬರ್ಪೆರ್?” ಅಂದ್‌ದ್ ಒರಿ ಕೇನೊಲಿ.

³⁶ ಉಂದು ಬುದ್ಧಿದಾಂತಿ ಪ್ರಶ್ನೆ! ಈ ಬಿತ್ತುನ ಬಿತ್ತ್ ಸೈತ್‌ಜಿಡ ಕೊಡಿಯೆರೆ ಇಜ್ಜಿ,

³⁷ ಗೇನೊಗು ದೆತ್ತೊನ್ಲೆ; ಈ ಗೋದಿದ ಬಿತ್ತ್ ಆವಡ್, ಬೇತೆ ಒವ್ವೇ ಬಿತ್ತ್ ಆವಡ್ ಬಿತ್ತ್‌ನಗ ಬಜೀ ಬಿತ್ತೇ ಅತ್ತಂದೆ ದುಂಬು ಬುಲೆವೊಡಾಯಿ ದೈನ್ ಬಿತ್ತುಜ.

³⁸ ಆಂಡ ದೇವೆರ್ ತನ್ಕ್ ಸರಿ ತೋಜುಲೆಕ್ಕ ಐಕ್ ಒಂಜಿ ಶರೀರೊನು ಕೊರ್ಪೆ. ಪ್ರತಿ ಬಿತ್ತ್‌ಗ್ಲಾ ಐಕ್ ತಕ್ಕಂತಿನ ಶರೀರೊನು ಕೊರ್ಪೆ.

³⁹ ಮಾತ ಶರೀರೊಲುಲಾ ಒಂಜೆ ತರತವು ಆದುಪ್ಪುಜಿ. ನರಮಾನಿನ ಶರೀರ ಬೇತೆ, ಪಶುಕುಲೆನ ಶರೀರ ಬೇತೆ, ಪಕ್ಕಿಲೆನ ಶರೀರ ಬೇತೆ, ಮೀನ್‌ದ ಬೇತೆ.

⁴⁰ ಉಂದತ್ತಂದೆ, ಪರಲೋಕದ ಶರೀರೊಲುಲಾ ಉಂಡು, ಭೂಲೋಕದ ಶರೀರೊಲುಲಾ ಉಂಡು, ಪರಲೋಕದ ಶರೀರೊಲೆ ಮೈಮೆ ಬೇತೆನೇ, ಭೂಲೋಕದ ಶರೀರೊಲೆ ಮೈಮೆ ಬೇತೆನೇ.

⁴¹ ಸೂರ್ಯನ ಮೈಮೆ ಒಂಜಿ ತರತವು; ಚಂದ್ರನ ಮೈಮೆ ಬೊಕ್ಕೊಂಜಿ ತರತವು. ನಕ್ಷತ್ರೊಲೆನ ಮೈಮೆ ಕುಡೊಂಜಿ ತರತವು. ಮೈಮೆಡ್ ಒಂಜಿ ನಕ್ಷತ್ರೊಗ್ಲಾ ಕುಡೊಂಜಿ ನಕ್ಷತ್ರೊಗ್ಲಾ ಹೆಚ್ಚಿಕಡಿಮೆ ಉಂಡತ್ತಾ?

⁴² ಸೈತಿನಾಕುಲು ಕುಡ ಲಕ್ಕುನೆಟ್ಲಾ ಅಂಚೆನೇ ಆಪುಂಡು. ಕೌಂತಿನ ಶರೀರ ನಾಶಾದ್ ಪೋಪುಂಡು, ಜೀವೊಡು ಲಕ್ಕಾಯಿನ ಶರೀರ ನಾಶಾಪುಜಿ.

⁴³ ಕೌಂತಿನ ಶರೀರ ಪೊರ್ಲುದಾಂತೆ ಬಲದಾಂತೆ ಆದ್ ಪೋಪುಂಡು. ಜೀವೊಡು ಲಕ್ಕಾಯಿನ ಶರೀರ ಮೈಮೆಡ್ಲಾ ಬಲೊಟ್ಲಾ ಉಪ್ಪುಂಡು.

⁴⁴ ಕೌಂತಿನ ಶರೀರ ನರಭಾವ ಆದುಂಡು; ಜೀವೊಡು ಲಕ್ಕುನ ಶರೀರ ಆತ್ಮೀಕ ಆದುಂಡು. ನರಭಾವದ ಶರೀರೊಲು ಉಪ್ಪುನಾಂಡ ಆತ್ಮೀಕ ಶರೀರೊಲುಲಾ ಉಂಡು.

⁴⁵ “ಸುರುತ್ತ ನರಮಾನಿ ಆದಾಮೆ ಬದುಕುನ ಪ್ರಾಣಿ ಆಯೆ,” ಅಂದ್‌ದ್ ಶಾಸ್ತ್ರೊಡು ಬರೆತ್ಂಡತ್ತಾ. ಕಡೇತ ಆದಾಮೆ ಪಂಡ ಕ್ರಿಸ್ತೆ ಜೀವ ಕೊರ್ಪಿನಾಯೆ ಆದುಲ್ಲೆ.

⁴⁶ ಆತ್ಮಭಾವದವು ಸುರುತ್ತವು ಅತ್ತ್, ನರಭಾವದವು ಸುರುತ್ತವು. ಐಡ್ದ್ ಬೊಕ್ಕ ಆತ್ಮಭಾವದವು.

⁴⁷ ಸುರುತ್ತ ನರಮಾನಿ ಭೂಮಿದ ಮಣ್ಣ್‌ಡ್ದ್ ಉಂಡಾಯಿನಾಯೆ, ರಡ್ಡನೆ ನರಮಾನಿ ಪಂಡ ಕ್ರಿಸ್ತೆ ಪರಲೋಕೊಡ್ದು ಬೈದಿನಾಯೆ.

⁴⁸ ಭೂಮಿದಾಕುಲು ಮಣ್ಣ್‌ಡ್ ಉಂಡಾಯಿನ ನರಮಾನಿಲೆಕ್ಕ ಆಂಡ ಪರಲೋಕದಾಕುಲು ಪರಲೋಕೊಡ್ದು ಬತ್ತಿ ನರಮಾನಿಲೆಕ್ಕ.

⁴⁹ ಎಂಕುಲು ಮಣ್ಣ್‌ಡ್ದ್ ಪುಟ್ಟಿ ಆದಾಮುನ ಸ್ವರೂಪ ಪಾಡೊಂಡಿಲೆಕ್ಕನೇ ಪರಲೋಕೊಡ್ದು ಬತ್ತಿ ಕ್ರಿಸ್ತನ ಸ್ವರೂಪೊನ್ಲಾ ಪಾಡೊನ್ವ.

⁵⁰ ಸಹೋದ್ರೆರೇ, ಯಾನ್ ಪನ್ಪಿನಿ ದಾನೆಂದ್ಂಡ, ನಮ ಮಾಸ ನೆತ್ತೆರ್ ಇತ್ತಿನ ಶರೀರೊಲು ದೇವೆರೆ ರಾಜ್ಯೊಗು ಬಾಧ್ಯ ಆಪುಜಿ. ನಾಶ ಆಪಿನ ಶರೀರ ನಾಶ ಆವಂದಿನೆಕ್ಕ್ ಬಾಧ್ಯ ಆಪುಜಿ.

⁵¹ ಕೇನ್ಲೆ ಇದ ಮುಟ್ಟ ಗುಟ್ಟುಡಿತ್ತಿನ ಒಂಜಿ ಸಂಗತಿನ್ ನಿಕ್ಲೆಗ್ ತೆರಿಪಾವೆ. ನಮ ಮಾತೆರ್ಲಾ ಸೈಪುಜ; ಆಂಡ ದೇವೆರ್ ಎಂಕ್ಲೆನ್ ಮಾತೆರೆನ್ಲಾ ಬದಲಾವಣೆ ಮಲ್ಪುವೆ.

⁵² ಆಂಡ ಕಡೇತ ತುತೂರಿದ ಶಬ್ಧ ಆನಗ ಒಂಜಿ ಕ್ಷಣೊಟೇ ಕಣ್ಣ್ ಮುಚ್ಚಿ ಜಪ್ಪುನೆತ್ತ ಉಲಯಿ ಉಂದು ಆಪುಂಡು. ತುತೂರಿ ಉರ್ಪುನಗ ದೇವೆರ್ ಸೈತಿನಾಕುಲೆನ್ ಲಕ್ಕಾದ್ ನಾಶ ಆವಂದಿನಾಕುಲಾದ್ ನಮ ಬದಲಾದ್ ಪೋಪ.

⁵³ ದಾಯೆಗಂದ್ಂಡ ನಾಶಾದ್ ಪೋಪಿನ ಈ ಶರೀರ ನಾಶಾವಂದಿನೆನ್ ಪಾಡೊನುಂಡು; ಮರಣೊಗು ಅಧೀನವಾದುಪ್ಪು ಈ ಶರೀರ ಅಮರತ್ತ್ವೊನು ಪಾಡೊನುನವು ಅಗತ್ಯ.

⁵⁴ ನಾಶಾಪಿನ ಈ ಶರೀರ ನಾಶಾವಂದಿನೆನ್ ಪಾಡೊನ್ನಗ, ಮರಣೊಗು ಅಧೀನವಾದುಪ್ಪು ಈ ಶರೀರ ಅಮರತ್ತ್ವೊನು ಪಾಡೊನ್ನಗ ಬರೆದುಪ್ಪು ಈ ಪಾತೆರ ನೆರವೇರುಂಡು. ಆ ಪಾತೆರ ದಾನೆಂದ್ಂಡ, “ಮರಣೊನು ನಾಶ ಮಲ್ತ್‌ದ್, ಜಯೊನು ಜೈಸಿಯೆ.”

⁵⁵ “ಓ ಮರಣ, ನಿನ ಜಯ ಓಲು? ಓ ಮರಣ, ನಿನ ವಿಷತ ಕೊಂಡಿ ಓಲು?”

⁵⁶ ಮರಣದ ಕೊಂಡಿ ಪಾಪನೇ; ಬೊಕ್ಕ ಪಾಪದ ಬಲೊಕು ಆಧಾರ ಮೋಶೆನ ನ್ಯಾಯಕಟ್ಟಲೆ.

⁵⁷ ಆಂಡ, ದೇವೆರ್ ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತಡ್ದ್ ನಂಕ್ ಜಯೊನು ಕೊರ್ತೆ, ಆಯಗ್ ಉಪಕಾರ ಸ್ತುತಿ ಆವಡ್.

⁵⁸ ಅಂಚಾಯಿನೆಡ್ದ್ ಎನ ಪ್ರೀತಿದ ಸಹೋದ್ರೆರೇ, ನಿಕುಲು ಸ್ಥಿರಚಿತ್ತೊಡ್ಲಾ ದೃಢಾದ್‌ಲಾ ಉಪ್ಪುಲೆ. ನಿಕುಲು ಕರ್ತವ ಪುದರ್‌ಡ್ ಮಲ್ಪು ಪ್ರಯಾಸ ವ್ಯರ್ಥ ಆಪುಜಿ ಅಂದ್‌ದ್ ಎನ್ನೊಂದು ಕರ್ತವ ಕೆಲಸೊಲೆನ್ ಏಪಲಾ ಮಸ್ತ್ ಆಸಕ್ತಿಡ್ ಮಲ್ಪುಲೆ.