1 ಕೊರಿಂಥ್ಯೆರೆಗ್ 12 - ಪೊಸ ಒಡಂಬಡಿಕೆ

ಆತ್ಮೀಕ ವರೊಲು

¹ ಇತ್ತೆ ಸಹೋದ್ರೆರೇ, ಆತ್ಮಡ್ದ್ ತಿಕ್ಕುನ ವರೊಕುಲೆ ಸಂಗತಿಡ್ ತೆರಿಪಾವೆ. ನಿಕುಲು ತೆರಿಯಂದೆ ಉಪ್ಪೆರೆ ಬಲ್ಲಿ ಅಂದ್‌ದ್ ಯಾನ್ ಬಯಕುವೆ.

² ನಿಕುಲು ಪಿದಯಿದ ಜನೊಕುಲು ಆದುಪ್ಪುನಗ ನಿಕುಲು ಸಾದಿ ತತ್ತ್‌ದ್ ಪೋಪಿಲೆಕ್ಕ ನಿಕ್ಲೆನ್ ಬಾಯಿಬರಂದಿ ಮೂರ್ತಿಲೆ ಕೈತಲ್‌ಗ್ ಕೊನೊ ಪೋವೊಂದಿತ್ತ್‌ಂಡ್ ಅಂದ್‌ದ್ ನಿಕ್ಲೆಗ್ ಗೊತ್ತುಂಡು.

³ ಅಂಚಾಯಿನೆಡ್ದ್ ಯಾನ್ ನಿಕ್ಲೆಗ್ ತೆರಿಪಾವುನೆನ್ ಕೇನ್ಲೆ; ದೇವೆರೆ ಆತ್ಮೊಡ್ದು ಪಾತೆರುನ ವಾ ನರಮಾನ್ಯೆಲಾ, “ಯೇಸುನು ಶಾಪಗ್ರಸ್ತೆ,” ಅಂದ್‌ದ್ ಪನಯೆ. ಅಂಚೆನೇ ಪರಿಶುದ್ಧಾತ್ಮೊಡು ಅತ್ತಂದೆ ವಾ ನರಮಾನ್ಯೆಲಾ, “ಯೇಸುನು ಕರ್ತವೆ,” ಅಂದ್‌ದ್ ಪನಯೆ.

⁴ ಆತ್ಮೀಕ ವರೊಕ್ಲೆಡ್ ಬೇತೆ ಬೇತೆ ವಿದ ಉಂಡು, ಆಂಡ ಆತ್ಮೆ ಒರಿಯೇ.

⁵ ಸೇವೆಲೆಡ್ ಬೇತೆ ಬೇತೆ ವಿದ ಉಂಡು, ಆಂಡ ಕರ್ತವೆ ಒರಿಯೇ.

⁶ ಕಾರ್ಯೊಲು ಬೇತೆ ಬೇತೆ ಉಂಡು, ಆಂಡ ಮಾತೆರೆಡ್ಲಾ ಮಾತ ಬೇಲೆ ಮಲ್ಪುನಾಯೆ ದೇವೆರ್ ಒರಿಯೇ.

⁷ ಆಂಡ ಒರಿ ಒರಿಯಡ ತೋಜಿದ್ ಬರ್ಪಿ ದೇವೆರಾತ್ಮನ ವರೊಕ್ಲು ಮಾತೆರೆನ ಪ್ರಯೋಜನೊಗಾದ್ ಕೊರ್ದುಪ್ಪುನವು ಆದುಂಡು.

⁸ ಎಂಚಂದ್ಂಡ ಒರಿಯಗ್ ದೇವೆರಾತ್ಮಡ್ದ್ ಗೇನದ ಪಾತೆರ, ನನೊರಿಯಗ್ ಅವ್ವೇ ಆತ್ಮಡ್ದ್ ಬುದ್ಧಿದ ಪಾತೆರ ಕೊರ್ತುಂಡು.

⁹ ಬೇತೆ ಒರಿಯಗ್ ಆ ಆತ್ಮಡ್ಡೇ ಮಲ್ಲ ನಂಬಿಕೆದ ವರ, ಬೊಕ್ಕ ನನೊರಿಯಗ್ ಸೀಕ್ ಗುಣ ಮಲ್ಪುನ ವರ,

¹⁰ ನನೊರಿಯಗ್ ಕಾರ್ನಿಕೊಲೆನ್ ಮಲ್ಪುನ ವರ, ನನೊರಿಯಗ್ ಪ್ರವಾದನೆದ ವರ, ನನೊರಿಯಗ್ ಆತ್ಮೊನು ತೆರಿಯೊನುನ ವರ, ನನೊರಿಯಗ್ ಬೇತೆ ಭಾಷೆಲೆಡ್ ಪಾತೆರುನ ವರ; ನನೊರಿಯಗ್ ಆ ಭಾಷೆಲೆ ಅರ್ಥೊನು ತೆರಿಪಾವುನ ವರ ಕೊರ್ದುಪ್ಪುಂಡು.

¹¹ ಈ ಮಾತ ವರೊಕ್ಲೆನ್ ಆ ಒರಿಯೇ ಆತ್ಮೆ ತನ ಚಿತ್ತೊಗು ಸರಿಯಾದ್ ಪ್ರತಿ ಒರಿಯಗ್ ಪಟ್ಟ್‌ದ್ ಕೊರ್ದು ನಡಪಾವೆ.

ಒಂಜೇ ಶರೀರ ಮಸ್ತ್ ಅಂಗೊಲು.

¹² ಎಂಚ ಶರೀರ ಒಂಜೇ ಆದಿತ್ತ್‌ಂಡಲಾ ಐಕ್ ಉಪ್ಪು ಅಂಗೊಲು ಮಸ್ತ್ ಉಲ್ಲನಾ, ಅಂಗೊಲು ಮಸ್ತ್ ಆದಿತ್ತ್‌ದ್ ಒಂಜೇ ಶರೀರ ಆದುಂಡಾ, ಅಂಚೆನೇ ಕ್ರಿಸ್ತೆಲಾ ಆದುಲ್ಲೆ.

¹³ ಯೆಹೂದ್ಯೆರಾವಡ್, ಗ್ರೀಕೆರಾವಡ್, ಗುಲಾಮೆರಾವಡ್, ಸ್ವತಂತ್ರೆರಾವಡ್ ನಮ ಮಾತೆರ್ಲಾ ಒಂಜೇ ಶರೀರ ಆವೆರೆಗಾದ್ ಒಂಜೇ ಆತ್ಮಡ್ದ್ ದೀಕ್ಷಾಸ್ನಾನ ಮಲ್ತೊಂಡ; ದೇವೆರ್ ಮಾತೆರೆಗ್ಲಾ ಒಂಜೇ ಆತ್ಮನ್ ಕೊರ್ತೆ.

¹⁴ ಶರೀರ ಒಂಜೇ ಅಂಗ ಅತ್ತ್, ಮಸ್ತ್ ಅಂಗೊಲಾದ್ ಉಂಡು.

¹⁵ ಕಾರ್, ಯಾನ್ ಕೈ ಅತ್ತಂದಿನೆಡ್ದ್ ಶರೀರದವು ಅತ್ತ್ ಪಂಡ್‌ಂಡಲಾ ಅವು ಶರೀರೊಗು ಸೇರಂದೆ ಉಂಡಾ?

¹⁶ ಕೆಬಿ, ಯಾನ್ ಕಣ್ಣ್ ಅತ್ತಂದಿನೆಡ್ದ್ ಯಾನ್ ಶರೀರದವು ಅತ್ತ್ ಪಂಡ್‌ಂಡಲಾ ಅವು ಶರೀರೊಗು ಸೇರಂದೆ ಉಂಡಾ?

¹⁷ ಇಡೀ ಶರೀರನೇ ಕಣ್ಣ್ ಆಂಡ ಕೇನುನು ಎಂಚ? ಅವು ಮಾತ ಕೆಬಿ ಆಂಡ, ಮೂಕು ಓಲು?

¹⁸ ಆಂಡ ದೇವೆರ್ ಈ ಅಂಗೊಲೆಡ್ ಒಂಜೊಂಜೆನ್ ತನ್ಕ್ ಸರಿ ತೋಜಿಲೆಕ್ಕ ಶರೀರದುಲಯಿ ದೀತೆ.

¹⁹ ಮಾತಲಾ ಒಂಜೇ ಅಂಗ ಆದಿತ್ತ್ಂಡ ಶರೀರ ಓಲುಂಡು?

²⁰ ಅಂಗೊಲಾಂಡಲಾ ಮಸ್ತ್, ಶರೀರ ಒಂಜೇ.

²¹ ಕಣ್ಣ್ ಕೈಕ್, ಈ ಎಂಕ್ ಅಗತ್ಯ ಇಜ್ಜಿ ಅಂದ್‌ದ್ ತರೆ ಕಾರ್‌ಗ್, ಈ ಎಂಕ್ ಅಗತ್ಯ ಇಜ್ಜಿ ಅಂದ್‌ದ್ ಪನಿಯೆರೆ ಆವಂದ್.

²² ಆಂಡ ಶರೀರೊಡು ಬಲಹೀನ ಅಂದ್‌ದ್ ತೋಜುನ ಅಂಗೊಲೆನ್ಲಾ ಅಗತ್ಯ ಅಂದ್‌ದ್ ತೆರಿಯೊಡು.

²³ ಬೊಕ್ಕ, ಎಂಕುಲೆ ಶರೀರೊಡು ಕಡಿಮೆ ಮಾನದವು ಅಂದ್‌ದ್ ತೋಜುನ ಅಂಗೊಲೆಗ್ಲಾ ತುತೈತೊಡು ಹೆಚ್ಚ್ ಮಾನೊನು ಕೊರ್ಪ ಅತ್ತಾ; ಇಂಚ ನಮಡ್ ಲಜ್ಜಾಭಾವ ಇತ್ತಿ ಅಂಗೊಲೆನ್ ಎಡ್ಡೆಡ್ ಮುಚ್ಚುವ.

^24-25 ಬೊಕ್ಕ ಹೆಚ್ಚ್ ಮಾನ ಇತ್ತಿ ಅಂಗೊಲೆಗ್ ದಾಲಾ ಮಲ್ಪುನ ಅಗತ್ಯ ಇಜ್ಜಿ. ಶರೀರೊಡು ಕಡಿಮೆ ಮಾನದಾಂತಿ ಅಂಗೊಲು ಒಂಜೊಂಜೆತ್ತ ಹಿತೊನು ಚಿಂತೆ ಮಲ್ಪುಲೆಕ್ಕ ದೇವೆರ್ ಕಡಿಮೆ ಇತ್ತಿನೆಕ್ಕ್ ಹೆಚ್ಚಾಯಿನ ಮಾನೊನು ಕೊರ್ದು ಶರೀರೊನು ಹದೊಟು ಕೂಡಾದೆ.

²⁶ ಒಂಜಿ ಅಂಗೊಗು ಬೇನೆ ಆಂಡ ಮಾತ ಅಂಗೊಲೆಗ್ಲಾ ಬೇನೆ ಆಪುಂಡು; ಒಂಜಿ ಅಂಗೊಗು ಮಾನ ಆಂಡ ಮಾತ ಅಂಗೊಲೆಗ್ಲಾ ಸಂತೋಷ ಆಪುಂಡು.

²⁷ ನಿಕುಲು ಕ್ರಿಸ್ತನ ಶರೀರದ ಒಂಜೊಂಜಿ ಅಂಗೊಲಾದ್ ಉಲ್ಲರ್. ಬೊಕ್ಕ ನಿಕುಲು ಒರಿ ಒರಿ ಆ ಶರೀರದ ಅಂಗ ಆದುಲ್ಲರ್

²⁸ ದೇವೆರ್ ಸಭೆಟ್ ಸುರುಕ್ಕು ಅಪೊಸ್ತಲೆರೆನ್, ರಡ್ಡನೇದಾದ್ ಪ್ರವಾದಿಲೆನ್, ಮೂಜನೆದಾದ್ ಬೋಧಕೆರೆನ್ ದೀತೆ; ಐಡ್ದ್ ಬೊಕ್ಕ ಕಾರ್ನಿಕೊಲೆನ್ ಮಲ್ಪುನ ಶಕ್ತಿನ್, ಸೀಕ್ ಗುಣ ಮಲ್ಪುನ ವರೊನು, ಬೇತೆಕ್ಲೆಗ್ ಸಹಾಯ ಮಲ್ಪುನ ಗುಣೊನು, ಆಳುನ ಸಮರ್ಥೊನು ಬೇತೆ ಬೇತೆ ಭಾಷೆಡ್ ಪಾತೆರುನ ವರೊನ್ಲಾ ಅಕುಲಾಕುಲೆಗ್ ಕೊರ್ತೆ.

²⁹ ಮಾತೆರ್ಲಾ ಅಪೊಸ್ತಲೆರಾ? ಮಾತೆರ್ಲಾ ಪ್ರವಾದಿಲಾ? ಮಾತೆರ್ಲಾ ಬೋಧಕೆರಾ? ಮಾತೆರ್ಲಾ ಕಾರ್ನಿಕೊಲೆನ್ ಮಲ್ಪುವೆರಾ?

³⁰ ಮಾತೆರೆಗ್ ಸೀಕ್ ಗುಣ ಮಲ್ಪುನ ವರ ಉಂಡಾ? ಮಾತೆರ್ಲಾ ಬೇತೆ ಬೇತೆ ಭಾಷೆಡ್ ಪಾತೆರಿಯೆರೆ ಸಮರ್ಥೆರಾ? ಮಾತೆರ್ಲಾ ಭಾಷೆದ ಅರ್ಥ ಪನಿಯೆರೆ ಸಮರ್ಥೆರಾ?

³¹ ಆಂಡ ಎಡ್ಡೆಂತಿನ ವರೊಕ್ಕಾದ್ ಪೇಚಾಡ್ಲೆ. ನಿಕ್ಲೆಗ್ ನನಲಾ ಎಡ್ಡೆಂತಿನ ಮಾರ್ಗೊನು ತೋಜಾವೆ.