1 ಕೊರಿಂಥ್ಯೆರೆಗ್ 10 - ಪೊಸ ಒಡಂಬಡಿಕೆ

ಮೂರ್ತಿಪೂಜೆದ ಸಂಗತಿಡ್ ಎಚ್ಚರಿಕೆ

¹ ಆಂಡ ಸಹೋದ್ರೆರೇ, ನಮ ಪೂರ್ವಿಕೆರೆ ಸಂಗತಿಡ್ ಯಾನ್ ತೆರಿಪಾವೆರೆ ಬಯಕುವೆ ಅವು ದಾನೆಂದ್ಂಡ, ದೇವೆರ್ ಅಕ್ಲೆನ್ ಮಾತೆರೆನ್ಲಾ ಮುಗಲ್‌ದ ನಿರೆಲ್‌ಡ್ ಕಾತ್‌ದ್ ಕೆಂಪು ಕಡಲ್‌ನ್ ದಾಂಟುಲೆಕ್ಕ ಮಲ್ತೆ.

² ಅಕುಲು ಮಾತೆರ್ಲಾ ಮುಗಲ್‌ಡ್ಲಾ ಕಡಲ್‌ಡ್ಲಾ ದೀಕ್ಷಾಸ್ನಾನ ಪಡೆದ್ ಮೋಶೆನ ಶಿಷ್ಯೆರ್ ಆಯೆರ್;

³ ಅಕುಲು ಮಾತೆರ್ಲಾ ಒಂಜೇ ಆತ್ಮಭಾವದ ತಿನಸ್ ತಿಂದೆರ್.

⁴ ಬೊಕ್ಕ ಆತ್ಮಭಾವದ ಒಂಜೇ ನೀರ್‌ನ್ ಪರಿಯೆರ್; ಎಂಚ ಪಂಡ ತನ್ಕುಲೆ ಬೆರಿಯೆ ಬರೊಂದಿತ್ತಿನ ಆತ್ಮಭಾವದ ಪಾದೆದ ಉಲಯಿಡ್ದ್ ಬೈದಿನ ನೀರ್‌ನ್ ಪರಿಯೆರ್; ಆ ಪಾದೆ ಕ್ರಿಸ್ತೆನೇ.

⁵ ಆಂಡಲಾ ಅಕ್ಲೆಡ್ ಮಸ್ತ್ ಜನೊಕುಲೆ ಸಂಗತಿಡ್ ದೇವೆರ್ ಮೆಚ್ಚಿಜೆ. ಅಕುಲು ಕಾಡ್‌ಡ್ ಸೈತ್ ಪೋಯೆರ್.

⁶ ಅಕುಲು ಹಾಳ್ ವಿಷಯೊಲೆನ್ ಆಸೆ ಮಲ್ತಿಲೆಕ್ಕ ಎಂಕುಲು ಆಸೆ ಮಲ್ಪೆರೆ ಬಲ್ಲಿ ಪನ್ಪಿನೆಕ್ಕ್ ಈ ಸಂಗತಿಲು ನಂಕ್ ಮಾದ್ರಿ ಆದುಂಡು.

⁷ ಅಕ್ಲೆಡ್ ಕೆಲೆವೆರ್ ಮೂರ್ತಿಪೂಜೆಕೆರ್ ಆದಿತ್ತೆರ್; “ಜನೊಕುಲು ಉನಿಯೆರೆಲಾ ಪರಿಯೆರೆಲಾ ಕುಲ್ಲೊಂಡೆರ್, ನಲಿಪೆರೆ ಲಕ್ಕೊಂಡೆರ್,” ಅಂದ್‌ದ್ ಬರೆತ್ಂಡತ್ತಾ; ನಿಕುಲು ಮೂರ್ತಿಪೂಜೆಕೆರ್ ಆವಡೆ.

⁸ ಅಕ್ಲೆಡ್ ಕೆಲೆವೆರ್ ಹಾದ್ರ ಮಲ್ತ್‌ದ್ ಒಂಜೇ ದಿನೊಟು ಇರ್ವತ್ತ ಮೂಜಿ ಸಾರ ಜನ ಸೈತೆರ್; ಎಂಕುಲು ಹಾದ್ರೊಗು ದೂರ ಆದುಪ್ಪುಗ.

⁹ ಅಕ್ಲೆಡ್ ಕೆಲೆವೆರ್ ಕರ್ತವನ್ ಪರೀಕ್ಷೆ ಮಲ್ತ್‌ದ್ ಸರ್ಪ ತುಚ್ಚಿದ್ ನಾಶ ಆಯಿ ಲೆಕ್ಕ. ನಮ ಕರ್ತವನ್ ಪರೀಕ್ಷೆ ಮಲ್ಪಂದೆ ಉಪ್ಪುಗ.

¹⁰ ಕೆಲೆವೆರ್ ಗುಣುಗುಟ್ಟುದು ಹಾಳ್ ಮಲ್ಪುನ ದೂತನ ಕೈಡ್ದ್ ನಾಶ ಆಯೆರ್. ನಿಕುಲು ಗುಣುಗುಟ್ಟಡೆ.

¹¹ ಉಂದು ಮಾತ ಅಕ್ಲೆಗ್ ಉದಾರಣೆಗಾದ್ ಉಂಡಾಂಡ್; ಯುಗದ ಅಂತ್ಯೊಡುಪ್ಪು ನಂಕ್ ಎಚ್ಚರಿಕೆಗಾದ್ ಬರೆತ್ಂಡ್.

¹² ಅಂಚಾಯಿನೆಡ್ದ್ ನಂಬಿಕೆಡ್ ಉಂತುದೆ ಅಂದ್‌ದ್ ಎನ್ನುನಾಯೆ ಪಾಪೊಡು ಬೂರಂದಿಲೆಕ್ಕ ತೂವೊನಡ್.

¹³ ನರಮಾನಿ ತಾಳೊನೊಲಿ ಪನ್ಪಿನ ಶೋಧನೆ ಅತ್ತಂದೆ ಬೇತೆ ಒವ್ವುಲಾ ನಿಕ್ಲೆಗ್ ಉಂಡಾತಿಜಿ. ದೇವೆರ್ ನಂಬಿಗಸ್ತೆ; ನಿಕ್ಲೆ ಶಕ್ತಿಗ್ ಮೀರುನ ಶೋಧನೆ ಕೊರಂದೆ ನಿಕುಲು ಅವೆನ್ ತಾಳೊನಿಯೆರೆ ಶಕ್ತೆರಾಪಿಲೆಕ್ಕ ಶೋಧನೆ ಆಪಿನಪಗನೆ ತಪ್ಪಾವೊನುನ ಸಾದಿನ್ಲಾ ಮಲ್ಪುವೆ.

¹⁴ ಅಂಚಾದ್ ಪ್ರೀತಿದ ಸಹೋದ್ರೆರೇ, ಮೂರ್ತಿಪೂಜೆ ಮಲ್ಪುನೆನ್ ಪೂರ ಬುಡ್ದು ಬುಡ್ಲೆ.

¹⁵ ನಿಕುಲು ಬುದ್ಧಿವಂತೆರಂದ್‌ದ್ ಉಂದೆನ್ ಯಾನ್ ಪನ್ಪೆ: ನಿಕುಲೇ ನಿರ್ಧಾರ ಮಲ್ಪುಲೆ.

¹⁶ ನಮ ದೇವೆರೆನ್ ಸುಗಿತ್‌ದ್, ದೆತ್ತೊನುನ ಪಾತ್ರೆ ಕ್ರಿಸ್ತನ ನೆತ್ತೆರ್‌ಡ್ ಪಾಲ್‌ದಾರೆರಾದುಲ್ಲಾ ಪನ್ಪಿನೆನ್ ತೋಜಾವುಂಡತ್ತಾ? ನಮ ಪೊಲ್ತುದು ದೆತ್ತೊನುನ ರೊಟ್ಟಿ ಕ್ರಿಸ್ತನ ಶರೀರೊಡು ಪಾಲ್‌ದಾರೆರ್ ಆದುಲ್ಲಾ ಪನ್ಪಿನೆನ್ಲಾ ತೋಜಾವುಂಡತ್ತಾ?

¹⁷ ರೊಟ್ಟಿ ಒಂಜೇ ಆದುಪ್ಪುನೆಡ್ದ್ ಮಸ್ತ್ ಜನ ಆದುಪ್ಪು ನಮ ಒಂಜೇ ಶರೀರದ ಲೆಕ್ಕ ಉಲ್ಲ. ದಾಯೆಗಂದ್ಂಡ ಒಂಜೇ ರೊಟ್ಟಿಡ್ ನಮ ಮಾತೆರ್ಲಾ ಪಾಲ್ ದೆತ್ತೊಂದು ತಿನ್ಪ.

¹⁸ ಇಸ್ರಾಯೇಲ್ಯೆರ್ ಆದುಪ್ಪುನಾಕುಲೆನ್ ಎನ್ನೊನ್ಲೆ, ಬಲಿ ಕಡ್ತಿನೆನ್ ತಿನ್ಪಿನಾಕುಲು ಬಲಿಪೀಠಗ್ ಸೇರ್ದಿನಕುಲತ್ತಾ?

¹⁹ ಅಂಚಾಂಡ ಯಾನ್ ದಾನೆ ಪಂಡೆ? ಮೂರ್ತಿ ಆವಡ್, ಮೂರ್ತಿಗ್ ಕಡ್ತಿನವು ಆವಡ್ ದಾಲಾಂಡಲಾ ಬಿಲೆ ಉಂಡಾ?

²⁰ ಆಂಡ ಪಿದಯಿದ ಜನೊಕುಲು ತನ್ಕುಲು ಅರ್ಪಣೆ ಮಲ್ತಿ ಬಲಿಕ್ಲೆನ್ ದೇವೆರೆಗ್ ಅತ್ತ್, ದೆವ್ವೊಲೆಗ್ ಅರ್ಪಣೆ ಮಲ್ಪುವೆರ್ ಅಂದ್‌ದ್ ಎನ ಅಂದಾಜಿ. ನಿಕುಲು ದೆವ್ವೊಲೊಟ್ಟುಗು ಸಂಸರ್ಗ ಮಲ್ಪೊಡು ಅಂದ್‌ದ್ ಎನ ಇಷ್ಟ ಅತ್ತ್.

²¹ ನಿಕುಲು ಕರ್ತವ ಪಾತ್ರೆಡ್ಲಾ ದೆವ್ವೊಲೆ ಪಾತ್ರೆಡ್ಲಾ ಪರಿಯೆರೆ ಬಲ್ಲಿ. ಕರ್ತವ ಮೇಜಿಡ್ಲಾ ದೆವ್ವೊಲೆ ಮೇಜಿಡ್ಲಾ ಉನಿಯೆರೆ ಬಲ್ಲಿ.

²² ನಮ ಕರ್ತವಗ್ ಉರಿ ಲಕ್ಕಾವೊಡಂದ್ ಉಲ್ಲನಾ? ಆಯಡ್ದ್‌ಲಾ ನಮ ಬಲತ್ತಾಕುಲಾ?

²³ “ಮಾತ ಕೆಲಸೊನ್ಲಾ ಮಲ್ಪೆರೆ ಸ್ವತಂತ್ರ ಉಂಡು,” ನಿಕುಲು ಪನ್ಪರ್. ಆಂಡ ಯಾನ್ ಪನ್ಪಿನಿ, “ಮಾತಲಾ ಕೆಲಸೊಗು ಬರ್ಪುಜಿ. ಮಾತೆಕ್ ಎಂಕ್ ಸ್ವತಂತ್ರ ಉಂಡು,” ಆಂಡ ಮಾತಲಾ ಅಭಿವೃದ್ಧಿದವು ಅತ್ತ್.

²⁴ ಪ್ರತಿ ಒರಿಲಾ ತನ ಸ್ವಂತ ಎಡ್ಡೆನ್ ತೂವೊನಂದೆ ನನೊರಿಯನ ಎಡ್ಡೆನ್ ಬಯಕಡ್.

²⁵ ಪೇಂಟೆಡ್ ಮಾರುನವು ಮಾತೆನ್ಲಾ ಮನಸಾಕ್ಷಿಡ್ ದಾಲಾ ಸಂಶಯ ಮಲ್ಪಂದೆ ತಿನ್ಲೆ.

²⁶ “ಭೂಮಿಲಾ ಐಟ್ಟ್ ಉಪ್ಪುನವು ಮಾತಲಾ ಕರ್ತವನವೇ ಆದುಂಡತ್ತಾ.”

²⁷ ನಂಬಿಕೆದಾಂತಿನಾಯೆ ಒರಿ ನಿಕ್ಲೆನ್ ವಣಸ್‌ಗ್ ಲೆಪ್ಪುನಗ, ನಿಕ್ಲೆಗ್ ಪೋಯೆರೆ ಇಷ್ಟ ಇತ್ತ್ಂಡ, ನಿಕ್ಲೆಗ್ ಎಂಚಿನ ಬಲಸಿರ್ಯೆಡಲಾ ಮನಸ್‌ಡ್ ಸಂಶಯ ಮಲ್ಪಂದೆ ತಿನ್ಲೆ.

²⁸ ಆಂಡ ಏರಾಂಡಲಾ ನಿಕ್ಲೆಡ, “ಉಂದು ಮೂರ್ತಿಗ್ ಅರ್ಪಣೆ ಮಲ್ತ್‌ದಿನವು,” ಅಂದ್‌ದ್ ಪಂಡೆಡ ಅವೆನ್ ತಿನೊಡ್ಚಿ. ತೆರಿಪಾಯಿನಾಯಗ್ಲಾ ಆಯನ ಮನಸಾಕ್ಷಿಗಾದ್ರಲಾ ತಿನೊಡ್ಚಿ.

²⁹ ಅವು ನಿನ ಮನಸಾಕ್ಷಿಗ್ ಅತ್ತ್, “ಬೊಕ್ಕೊರಿಯನ ಮನಸಾಕ್ಷಿಗ್ಲಾ ಎನ ಸ್ವತಂತ್ರೊಗ್ಲಾ ದಾಯೆ ತೀರ್ಪಾವೊಡು?

³⁰ ಯಾನ್ ಉಪಕಾರ ಪಂಡ್‌ದ್ ಉಂಡಿಬೊಕ್ಕ, ಉಪಕಾರ ಸ್ತುತಿ ಮಲ್ತ್‌ದ್ ತಿನ್ಪಿನ ತಿನಸ್‌ಗಾದ್ ಎಂಕ್ ದಾಯೆಗ್ ದೂಷಣೆ ಆವೊಡು?”

³¹ ಅಂಚಾದ್ ನಿಕುಲು ತಿಂದ್‌ಂಡಲಾ ಪರ್‌ಂಡಲಾ ದಾನೆ ಮಲ್ತ್ಂಡಲಾ ಮಾತೆನ್ಲಾ ದೇವೆರೆ ಮೈಮೆಗ್ ಮಲ್ಪುಲೆ.

³² ಯೆಹೂದ್ಯೆರೆಗಾವಡ್, ಗ್ರೀಕೆರೆಗಾವಡ್, ದೇವೆರೆ ಸಭೆಕಾವಡ್ ಅಡ್ಡಿ ಆದುಪ್ಪಡೆ.

³³ ಯಾನಾಂಡಲಾ ಎನ ಸ್ವಂತ ಪ್ರಯೋಜನೊಗು ಚಿಂತೆ ಮಲ್ಪಂದೆ ಮಾತ ನರಮಾನಿಲೆಗ್ ರಕ್ಷಣೆ ತಿಕ್ಕೊಡು ಅಂದ್‌ದ್ ಅಕ್ಲೆ ಎಡ್ಡೆಗಾದ್ರ ಚಿಂತೆ ಮಲ್ತ್‌ದ್ ಮಾತೆರೆನ್ ಮಾತ ವಿಷಯೊಲೆಡ್ ಮೆಚ್ಚಾವುನಾಯೆ ಆದುಲ್ಲೆ.