1 ಕೊರಿಂಥ್ಯೆರೆಗ್ 1 - ಪೊಸ ಒಡಂಬಡಿಕೆ

¹ ದೇವೆರೆ ಚಿತ್ತೊಗು ಸರಿಯಾದ್ ಕ್ರಿಸ್ತ ಯೇಸುನ ಅಪೊಸ್ತಲೆ ಆದುಪ್ಪೆರೆ ಲೆಪ್ಪು ಪಡೆಯಿನ ಪೌಲುಲಾ, ಎಂಕುಲೆ ಸಹೋದರೆ ಸೋಸ್ಥೆನೆಲಾ,

² ಕೊರಿಂಥ್ಯೊಡು ಉಪ್ಪುನ ದೇವೆರೆ ಸಭೆಕ್ ಬರೆಪಿನಿ. ನಿಕುಲು ಕ್ರಿಸ್ತ ಯೇಸುಡು ಪ್ರತಿಷ್ಟೆ ಆತಿನಾಕುಲುಲಾ ದೇವಜನೊಕುಲು ಆವೆರೆ ಲೆತ್ತ್‌ದಿ ಮಾತ ಜನೊಕುಲೆ ಒಟ್ಟುಗು ಓಲಿತ್ತ್‌ಂಡಲಾ ಎಂಕ್ಲೆನ ಕರ್ತವೆ ಆದುಪ್ಪು ಯೇಸು ಕ್ರಿಸ್ತನ ಪುದರ್‌ಡ್ ಆರಾಧನೆ ಮಲ್ಪುನ ದೇವಜನೊಕುಲು ಆದುಲ್ಲರ್. ಯೇಸು ಕ್ರಿಸ್ತೆ ಅಕ್ಲೆನಲಾ ಎಂಕ್ಲೆನಲಾ ಕರ್ತವೆ ಆದುಲ್ಲೆ.

³ ನಮ ಅಮ್ಮೆ ಆದುಪ್ಪು ದೇವೆರೆಡ್ದ್‌ಲಾ ಕರ್ತವೆ ಆದುಪ್ಪು ಯೇಸು ಕ್ರಿಸ್ತಡ್ದ್‌ಲಾ ನಿಕ್ಲೆಗ್ ದಯಲಾ ಸಮಾಧಾನಲಾ ಆವಡ್.

ಪೌಲು ದೇವೆರೆಗ್ ಸ್ತುತಿ ಮಲ್ಪುನವು

⁴ ಕ್ರಿಸ್ತ ಯೇಸುಡು ದೇವೆರ್ ನಿಕ್ಲೆಗ್ ಕೊರ್ತಿ ದಯೊಕಾದ್ರ ಯಾನ್ ನಿಕ್ಲೆ ಸಂಗತಿಡ್ ಏಪಲಾ ದೇವೆರೆಗ್ ಉಪಕಾರ ಮಲ್ಪುವೆ.

^5-6 ದಾಯೆಗಂದ್ಂಡ ಕ್ರಿಸ್ತನ ಸಾಕ್ಷಿ ನಿಕ್ಲೆಡ್ ಗಟ್ಟಿ ಆದ್ ನಿಲೆ ಆದುಪ್ಪುನೆಡ್ದ್, ಆಯಡ್ದ್ ನಿಕುಲು ಮಾತ ಪಾತೆರೊಡ್ಲಾ ಮಾತ ತಿಳುವಳಿಕೆಡ್ಲಾ ಸಂಪನ್ನೆರ್ ಆದುಲ್ಲರ್.

⁷ ಇಂಚ ನಿಕುಲು ವಾ ಆತ್ಮೀಕ ವರೊಟ್ಲಾ ಕಡಿಮೆದಾಕುಲು ಆದುಪ್ಪಂದೆ, ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತೆ ಕುಡ ಬರ್ಪಿನೆನ್ ಕಾತೊಂದುಲ್ಲರ್.

⁸ ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತೆ ಕುಡೊರ ಬನ್ನಗ, ಏರ್ಲಾ ನಿಕ್ಲೆ ಮಿತ್ತ್ ದೂರು ಪಾಡಂದಿಲೆಕ್ಕ ಆಯೆ ನಿಕ್ಲೆನ್ ಕಡೆ ಮುಟ್ಟ ದೃಢ ಮಲ್ಪುವೆ.

⁹ ದಾಯೆಗಂದ್ಂಡ ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತೆ ಇನ್ಪಿ ತನ ಮಗನ ಅನ್ಯಮನ್ಯಡ್ ನಿಕ್ಲೆನ್ ಲೆತ್ತಿ ದೇವೆರ್ ನಂಬಿಗಸ್ತೆ ಆದುಲ್ಲೆ.

ಸಭೆಟ್ ಉಂಡಾಯಿನ ಭೇದೊಲು

¹⁰ ಸಹೋದ್ರೆರೇ, ನಿಕ್ಲೆನ ಪಾತೆರ ಒಂಜೇ ಆದುಪ್ಪೊಡು; ನಿಕ್ಲೆಡ ಭೇದ ಉಪ್ಪೆರೆ ಬಲ್ಲಿ; ಆಂಡ ನಿಕುಲು ಒಂಜೇ ಮನಸ್‌ಡ್ಲಾ ಒಂಜೇ ಭಾವೊಡ್ಲಾ ಒಂಜಾದುಪ್ಪೊಡು ಅಂದ್‌ದ್ ಯಾನ್ ಎಂಕುಲೆ ಕರ್ತವೆ ಆದುಪ್ಪು ಯೇಸು ಕ್ರಿಸ್ತ ಪುದರ್‌ಡ್ ನಿಕ್ಲೆಡ ನಟ್ಟೊನ್ವೆ.

¹¹ ದಾಯೆಗಂದ್ಂಡ ಎನ ಸಹೋದ್ರೆರೇ, ನಿಕ್ಲೆ ಉಲಯಿ ತರ್ಕೊಲು ಉಂಡು ಅಂದ್‌ದ್ ಕ್ಲೋವೆನ ಇಲ್ಲದಾಕುಲೆಡ್ದ್ ಎಂಕ್ ತೆರಿದ್ ಬತ್ತ್ಂಡ್.

¹² ಅವು ದಾನೆಂದ್ಂಡ, ನಿಕ್ಲೆಡ್ ಒರಿ ಯಾನ್ ಪೌಲು ಕಡೆತಾಯೆ, ನನೊರಿ ಯಾನ್ ಪೇತ್ರ ಕಡೆತಾಯೆ, ಬೊಕ್ಕೊರಿ ಯಾನ್ ಅಪೊಲ್ಲೋಸು ಕಡೆತಾಯೆ, ಬೇತೆ ಒರಿ ಯಾನ್ ಕ್ರಿಸ್ತನಾಯೆ ಅಂದ್‌ದ್ ಪನ್ಪರ್.

¹³ ಕ್ರಿಸ್ತೆ ಪಾಲ್ ಆತೆನಾ? ನಿಕ್ಲೆಗಾದ್ರ ಕ್ರುಸ್ಸುಡು ಸೈತ್‌ದಿನಾಯೆ ಪೌಲಾ? ನಿಕುಲು ಪೌಲುನ ಪುದರ್‌ಡ್ ದೀಕ್ಷಾಸ್ನಾನ ಮಲ್ತೊಂದರಾ?

^14-15 ನಿಕ್ಲೆ ನಡುಟು ಕ್ರಿಸ್ಪಗ್ಲಾ, ಗಾಯಗ್ಲಾ ಅತ್ತಂದೆ ಬೇತೆ ಏರೆಗ್ಲಾ ಯಾನ್ ದೀಕ್ಷಾಸ್ನಾನ ಕೊರ್ತುಜಿ. ಅಂಚಾಯಿನೆಡ್ದ್ ನಿಕುಲು ಎನ ಪುದರ್‌ಡ್ ದೀಕ್ಷಾಸ್ನಾನ ಮಲ್ತೊಂಡರ್ ಅಂದ್‌ದ್ ಏರ್ಲಾ ಪನಿಯೆರೆ ಆವಂದ್. ಐಕಾದ್ ದೇವೆರೆಗ್ ಉಪಕಾರ ಮಲ್ಪುವೆ.

¹⁶ ಬೊಕ್ಕ ಯಾನ್ ಸ್ತೇಫನನ ಇಲ್ಲದಾಕುಲೆಗ್ಲಾ ದೀಕ್ಷಾಸ್ನಾನ ಕೊರ್ತೆ. ಮೊಕ್ಲೆಗ್ ಮಾತ್ರ ಅತ್ತಂದೆ ಬೇತೆ ಏರೆಗ್ಲಾ ಯಾನ್ ದೀಕ್ಷಾಸ್ನಾನ ಕೊರ್ತಿನವು ಎಂಕ್ ತೆರಿಯಂದ್.

¹⁷ ದೀಕ್ಷಾಸ್ನಾನ ಕೊರಿಯೆರೆಗ್ ಅತ್ತ್, ಸುವಾರ್ತೆ ಸಾರಿಯೆರೆ ಕ್ರಿಸ್ತೆ ಎನನ್ ಕಡಪುಡ್ದಿನಿ. ಆಂಡ ಪಾತೆರದ ಬುದ್ಧಿವಂತಿಕೆಡ್ ಸಾರಿಯೊಡು ಅಂದ್‌ದ್ ಕಡಪುಡ್ದಿನಿ ಅತ್ತ್; ಅಂಚ ಸಾರಿಂಡ ಕ್ರಿಸ್ತನ ಕ್ರುಸ್ಸುದ ಶಕ್ತಿ ಕುಂದು ಪೋವು.

ಕ್ರಿಸ್ತೆ ದೇವೆರೆ ಬಲಲಾ ಗೇನಲಾ

¹⁸ ಕ್ರುಸ್ಸುದ ಪಾತೆರ ನಾಶನದ ಸಾದಿಡುಪ್ಪುನಾಕುಲೆಗ್ ಮರ್ಲ್ ಪಾತೆರ ಆದ್ ತೋಜುಂಡು. ಆಂಡ ರಕ್ಷಣೆಡುಪ್ಪು ನಂಕಾಂಡಲಾ ಅವು ದೇವೆರ್‌ನ ಬಲ ಆದುಂಡು.

¹⁹ “ಯಾನ್ ಬುದ್ಧಿವಂತೆರೆ ಬುದ್ಧಿವಂತಿಗೆನ್ ನಾಶ ಮಲ್ಪುವೆ, ಗ್ರಹಿಕೆದಾಕುಲೆ ಗ್ರಹಿಕೆನ್ ದೆತ್ತ್‌ದ್ ಪಾಡುವೆ,” ಅಂದ್‌ದ್ ಶಾಸ್ತ್ರೊಡು ಬರೆತ್ಂಡ್.

²⁰ ದೇವೆರ್ ಈ ಯುಗತ್ತ ಬುದ್ಧಿವಂತಿಕೆನ್ ಹೆಡ್ಡ್‌ತನ ಮಲ್ತಿನೆಡ್ದ್ ಬುದ್ಧಿವಂತೆಲಾ ಇಜ್ಜೆ, ಶಾಸ್ತ್ರಿಲಾ ಇಜ್ಜೆ, ಈ ಲೋಕದ ತರ್ಕದಾಯೆಲಾ ಇಜ್ಜೆ.

²¹ ಎಂಚಂದ್ಂಡ ಲೋಕ ಗೇನ ಪನ್ಪಿ ಮಾರ್ಗೊಡ್ದು ದೇವೆರೆನ್ ತೆರಿಯಂದೆ ಪೋಯಿನವು ದೇವೆರೆ ಗೇನದ ಸಂಕಲ್ಪನೆ; ಇಂಚಾಯಿ ಬೊಕ್ಕ ಮರ್ಲ್ ಪಾತೆರ ಪಂಡ್ದ್ ಎನ್ನಿನವು ಎಂಕುಲೆ ಪ್ರಸಂಗೊಡ್ದೇ ನಂಬುನಾಕುಲೆನ್ ರಕ್ಷಣೆ ಮಲ್ಪುನವು ದೇವೆರೆಗ್ ಎಡ್ಡೆಂದ್‌ದ್ ತೋಜ್ಂಡ್.

²² ಯೆಹೂದ್ಯೆರ್ ಗುರ್ತೊನು ಕೇನ್ವೆರ್, ಗ್ರೀಕೆರ್ ಗೇನೊನು ನಾಡ್ವೆರ್.

²³ ಎಂಕುಲಾಂಡಲಾ ಕ್ರುಸ್ಸುಗು ಪಾಡ್ದಿನಾಯೆ ಆದುಪ್ಪು ಕ್ರಿಸ್ತನ್ ಸಾರಿಯ. ಆ ಪಾತೆರ ಯೆಹೂದ್ಯೆರೆಗ್ ಆತಂಕದ ಕಲ್ಲ್, ಪಿದಯಿದ ಜನೊಕುಲೆಗ್ ಹೆಡ್ಡ್‌ತನ ಆದುಂಡು.

²⁴ ಆಂಡ ದೇವೆರೆಡ್ದ್ ಲೆಪ್ಪು ಇತ್ತಿನಾಕುಲು ಯೆಹೂದ್ಯೆರಾವಡ್, ಗ್ರೀಕೆರಾವಡ್, ಅಕ್ಲೆಗ್ ಕ್ರಿಸ್ತೆ ದೇವೆರೆ ಬಲಲಾ, ದೇವೆರೆ ಗೇನಲಾ ಆದುಲ್ಲೆ.

²⁵ ಲೋಕದಾಕುಲು ದೇವೆರೆಡ್ ಒವೆನ್ ಹೆಡ್ಡ್‌ತನ ಅಂದ್‌ದ್ ಎನ್ನುವೆರಾ ಅವು ನರಮಾನಿನ ಬುದ್ಧಿಡ್ದ್‌ಲಾ ಹೆಚ್ಚಿನ ಬುದ್ಧಿ ಆದುಂಡು. ಅಕುಲು ದೇವೆರೆಡ್ ಒವೆನ್ ಬಲದಾಂತಿನವು ಅಂದ್‌ದ್ ಎನ್ನುವೆರಾ ಅವು ನರಮಾನಿನ ಬಲೊಡ್ದುಲಾ ಹೆಚ್ಚಿನವು ಆದುಂಡು.

²⁶ ಸಹೋದ್ರೆರೇ ದೇವೆರ್ ನಿಕ್ಲೆನ್ ಲೆತ್ತಿನಪಗ ಎಂಚಿತ್ತಿನಾಕುಲೆನ್ ಲೆತ್ತೆ ಅಂದ್‌ದ್ ಎನ್ನೊನ್ಲೆ. ನಿಕ್ಲೆಡ್ ಲೋಕದ ದೃಷ್ಟಿಡ್ ಬುದ್ಧಿವಂತೆರ್ ಮಸ್ತ್ ಜನ ಇತ್ತಿಜೆರ್, ಅಧಿಕಾರಿಲುಲಾ ಮಸ್ತ್ ಜನ ಇತ್ತಿಜೆರ್, ಪುದರ್ ಪೋಯಿನಾಕುಲುಲಾ ಮಸ್ತ್ ಜನ ಇತ್ತಿಜೆರ್.

²⁷ ದೇವೆರ್ ಬುದ್ಧಿವಂತೆರೆನ್ ನಾಚಿಗೆ ಆಪಿಲೆಕ್ಕ ಈ ಲೋಕದ ಬುದ್ಧಿದಾಂತಿನಾಕುಲೆನ್ ಅಜತ್‌ದ್ ದೆತ್ತೊಂಡೆ; ಬಲವಂತೆರೆಗ್ ನಾಚಿಗೆ ಆಪಿಲೆಕ್ಕ ಈ ಲೋಕದ ಬಲಹೀನೆರೆನ್ ಅಜತ್‌ದ್ ದೆತ್ತೊಂಡೆ.

²⁸ ದೇವೆರ್ ಈ ಲೋಕದ ಹೀನವಾಯಿನೆನ್ಲಾ ಅಲಕ್ಷವಾಯಿನೆನ್ಲಾ ಅಜತ್‌ದಿನಿ ಅತ್ತಂದೆ ಗನ್ಯೆರೆನ್ ಇಜ್ಜಾಂದಿಲೆಕ್ಕ ಮಲ್ಪೆರೆ ಬೋಡಾದ್ ಅಲ್ಪೆರೆನ್ ಅಜತೊಂಡೆ.

²⁹ ಇಂಚಾಯಿನೆಡ್ದ್ ದೇವೆರೆ ಎದುರು ಪುಗರೊನಿಯೆರೆಗ್ ಏರೆಗ್ಲಾ ಆಪುಜಿ.

^30-31 ದೇವೆರ್ ಈ ರೀತಿ ಮಲ್ತಿನೆಡ್ದಾವರನೇ ಇತ್ತೆ ನಿಕುಲು ಕ್ರಿಸ್ತ ಯೇಸುಡು ಜೀವನ ಮಲ್ತೊಂದುಲ್ಲರ್; ಆಯೆ ನಂಕ್ ದೇವೆರೆಡ್ ಬುದ್ಧಿಲಾ ನೀತಿಲಾ ಪರಿಶುದ್ಧತೆಲಾ ಅತ್ತಂದೆ ಪಾಪೊಡ್ದು ಬುಡುಗಡೆ ಮಲ್ಪುನಾಯೆಲಾ ಆದುಲ್ಲೆ. ಪುಗರೊನುನಾಯೆ ಕರ್ತವಡೇ ಪುಗರೊನಡ್ ಪನ್ಪಿನ ಶಾಸ್ತ್ರೊಡು ಬರೆತಿನವು ಪೂರ್ತಿ ಆಯೆರೆ ಸಾದಿ ಆಂಡ್.