ROME 8 - Akthar Trongirhna (BSI)

Li ah Ring

¹ Alamchunna pekva Khrista Jisu kuunga am mii turelva malaalnatu amnohsa.

² Alamva Khrista Jisu kuunga am akring Li vaa trongsuur in keita alehnata mahche akthivaa trongsuurnata mathlah a kining kamtam peiang.

³ Alamva trongsuur in iruunga marnop a trongsuur in atlohcheknohta Ringpu in Asa kupata alehchel iruung ahoongta loua, che alehrella amthlah a amah in ruunga alehta maraal amthlakpei.

⁴ Mah chuvah trongsuur in atlohphuta aleh in amdon nujuih a sehnoh li aknujuih a seh i inihtinga amthlungnatu relna.

⁵ Alamva ruung in amdon nujuih a akringmii aruungin amdonthlouta arilla asih, chuta Li in amdon nujuih a akring mii in Li in atlohthlouta arilla asih.

⁶ Ruunga irilsih i thihna chuta Li a irilksihva chaan mahche leh–oisa.

⁷ Alamva ruung in amdonna ah ril aksih mii in Ringpu vaa trongsuura luutkhemnoh.

⁸ Mahche ruunga am mii in Ringpu amdon mapel cheknoh.

⁹ Chuta nannih inta Li a am choulehva, nannih nanruunga amnohsachou, chulehva nannih in Ringpu vaa Li ah amsachou. Tunangkhat in Khrista vaa Li ah amnohleva amahva Khrista atanohsa.

¹⁰ Chuta Khrista in nankuung amleva, aleh hunhaia nanruungta thisalakho, akchimlamseh relnava nannih nanliva ringmang.

¹¹ Thinata amring Jisu vaa Li in nankuunga am amnoh Li vaa apaalla kthi nai nanruungta akring amlantu.

¹² Chunna unaoeio, inih in routloh ah intool veisame, ruung in amdon nujuih a iringnohnatu ruungvaa aleimanta intolnohme.

¹³ Alamva nannih inta ruung in amdon nujuih a ringchoule nannih in thiuchou, chuta nannih in Li akliia ruung athlou eikhata thatchoule nannih in ring uchou.

¹⁴ Alamva Ringpu in Li ah achingmii annaamteva Ringpu asa kupasei.

¹⁵ Alamva nannih in intritna a naichi nanveinatu Likha phahnohchou, chuta Asa kupa akvei miiva Li ta nanphahpei. Inih in, “Abba! Pa,” ta iongpei.

¹⁶ Inihvah Ringpu vaa asa veisame tih a inih iklisaak in sakhi imlanpei.

¹⁷ Inih inta asa veimeleva inihkno laalchun veisame, inih in alah anangnah chuum jajou meleva, inihta paarthra inimveitu.

Vaknua Paar Mathrat

¹⁸ Ipek lai in inih in klah knang itho inihkuunga iniphoongsam paarthrasoh imlak in phahnoh luungta kimdon.

¹⁹ Alamva kutseem anaam in Ringpu Asa kupata aphoongnatu ngaaklipnoh a ngaak a ammei;

²⁰ alamva kutseem in akanana amnoh athlanga amsa, amah in amdon nujuih vanoh a matuursoh inuruuia amahta akananoh athlanga asihpei;

²¹ Akmaangsam kutseemma suura insihnata mathlah a aningtam khakho Ringpu asa ei paarthra khanna anningtam amphahtu.

²² Inih in irom mah chuvah inseempot apumte pekphah khatloh a amme.

²³ Inseempot khop noh a, Li vaa akrah matsah akphah inisaakho akjok ihukveinatu, tihva inih iruungta inithlokha ngaaklipnoh a ingaak laia itaksuuga inthtruh sa.

²⁴ Alamva imtuur in inihta inikalpei; ipek inih in imuh matuur i matuur khanoh alamva tunang in amuhche pootrelna matuura am ume?

²⁵ Chuta inih in imuhnoh khanna matuura ammeleva, mah kharella inih in doucheksoh inruuia ngaak a amme.

²⁶ Mah khananga isolna jikcha ah Li in inimjoom; alamva khatloh a ingen ume ingennatu maromnome, chuta Lital in sinthruuisoh isoncheknoh trong jikchasoh inruuia inih turella trongtloh a am.

²⁷ Mahche miirilta akjon Li in miiril kha intlohme arom, alamva Li in akseeng mii turella Ringpu amdon nujuih a angen.

²⁸ Ringpu ta rilvol mii in amahturel amdon nujuih a aongmii turella Ringpu in bilam athratnatu atlohta inih in irom.

²⁹ Alamva unao pasa tam ankaar a matsah akpok aveinatu, matsah a inromche amahta Asa kupa in chunna matsah a amchaangpei.

³⁰ Amah in matsah a machaanga asih mii eikho aongei; aongche anmahkho amchimei amchimche anmahkho paar amthratei.

Christ Jisu Kuung Ringpu vaa Rilvol

³¹ Mah naamte irella inih in jangison ume? Ringpu in inih turella ngirleva tunang in inihta inindah umangme?

³² Amah Asa kupata khaaknoh a inih naamte turella amahta inimlansoh inihkuunga apumte i malungsisoh inruuia jarella khangvaalla inimlannoh ume?

³³ Ringpu in achar anchunga tunang in amlaal umangme? Ringpu vaa akchim.

³⁴ Tuta amlaal ume? Akthikha Khrista sa oi, thinata liimma aringche Ringpu akchanga amma initurel tak a angen.

³⁵ Khrista in inirilvol nata tunang in inithrek ume? Trihkhop a klah knang innahme, nohle chutchit innahme, nohle saakchaal innahme, nohle puunrei silh amnoh innahme, nohle thihnaringna innahme, nohle chemsei innahme?

³⁶ Mah i nga tloh a injih khanangsa, “Alamva nangrella kannihta suuntla kanithatnatu sadam eita thatnatu anmidonnanga amidonpei”

³⁷ Chuta alam apumtea kannihta kaniringvol amah akliia raal akchek ei anchunga kannih in ralla kanchek.

³⁸ Alamva kei kirilla seenga kilohva, akthi inkho, akring inkho, ringroi inkho, akchek amneh inkho, ipekna inkho, akthlengsam inkho, atuui inkho

³⁹ ankaang inkho, akthuuk inkho, inseemche bilam asuung am tukhat inkho inih Akpu Jisu Khrista kuunga Ringpu amlungsi khannata inihta inithrek cheknohtu.