ROME 7 - Akthar Trongirhna (BSI)

Changvaang Tingnata Anna Matheihna

¹ Unaoeio, keiin trongsuur akrom mii kuungah trongsang–mahchuva mii khat in aringlaiva trongsuur in khit a asihmang tih i nannih in romnoh choume?

² Nga tloh a changvaangche kumeikha amsal aringsoot laiva amsalrella trongsuur in khit a asihmang; chuta amsalta thisaleh trungsuur nujuih a amahta amthlahpei.

³ Mahchu nujuih a kumei khat in amsal aringsootva, amah inta aktlei miimasalsoh injouleva, amahta kupalaal itihtu. Chuta amsalta thisale mah kumeikha trongsuur nujuih a aningtam veisa, che amah inta aktlei kupakhatsoh paalleva kupalaal veinohsa.

⁴ Ohchunanga, kiuh kinaoeio, nannih in aktleikhat isonnava akthinata akringmii nanveinatu Khrista vaa aruungkhat veia thisachou, mah i Ringpu turella inih in akrah imrahnatu relna.

⁵ Inih iruungin iringlai trongsuurtu veia aleh in akdit ah thita amrahnatu iruungvaa akhol in thlou atloh.

⁶ Chuta amaa leithinga inih in pajatla veia iamrel ithihkhanna trongsuurnata inimthlahpei, mah i amlui nirik ah anjih khannanoh chuta Li vaa akthar chaanna inih in rou itlohnatu relna.

Trongsuur Khatkho Aleh

⁷ Chuleva inih in jangison ume? Trongsuur i alehsameh? Mah chuvah khak veinohsoh! Trongsuur amnolehva, keiin aleh romnoh tupot ang. Trongsuur inta, “Nangin dimalnohro” ta keisonnoh leva, keiin aleh romnoh utang.

⁸ Chuta trongthuun in reipakthratna roulouva ralladom ditnatu thlou khalmoa kamsuuk peiang. Alamva trongsuur noh a aleh in kthisa.

⁹ Keiin amaa leithing avah aleh jaonoh a ringang, chuta trongthuun athlengin, veikhatla aleh i ringsa mahche kei thisang,

¹⁰ Ringnatu trongchet trongthuun in keiturelva thihnatu veisa.

¹¹ Alamva trongthuun in taancha loulouva aleh in keisimnapei mahche trongthuun in keithatpei.

¹² Chunna trongsuur i kseeng, che trongthuunkho kseeng mahche chim khatkho thra.

¹³ Chunna akthra i keitu thihna veisame? Mah chuvah veinohsoh. Aleh i thranohta rom kicheknatu akthra akliia aleh in keita thihna kamsuuk peiang. Mah i trongthuun akliia aleh in ralla thranoh aveinatu relnasa.

Mii in Indahna

¹⁴ Inih in irom mah chuvah trongsuur i Li tu vei; chuta keiva aleh athlanga ringa keijurhche ruungtu miisang.

¹⁵ Kei kitaksaak in kitlohthlouta maromnoh ang. Alamva keiin kitlohjata tlohnoh ang, chuta keiin kintirhtalta kitloh.

¹⁶ Ipek keiin kitlohdah talta tloh angleva, trongsuur i thra tih a kitak in kijapei

¹⁷ Chunna amah kitlohkha keiin tlohnoh ang, chuta kitak ah ak am aleh in atloh.

¹⁸ Alamva kei kiruung asuunga akthra jakhatkho amnoh tih a kirom. Keiin akchim kitlohjakha kitak a am, ohchuta mahkha keiin tlohcheknoh ang.

¹⁹ Alamva keiin kitlohjata tlohnoh ang, chuta keiin thranoh romma ktloh.

²⁰ Ipekva keiin kitlohdah talta tloh angleva, mah aktlohkha keinoh ang, chuta keikuunga ak am aleh khanna atloh.

²¹ Chunna mah trongsuur i akthra thlou tih a keiin akthrachuta kitlohja laia, keininga thranoh am tih a rom kichekpei

²² Alamva kei kitaksuunga Ringpu trongsuurta kiroomthoksang.

²³ Chuta kei kiril in amdon andahta raalla kantlohpi kei kiruungvaa akholsuunga ak am aktlei trongsuurkhat kimuh, mah trongsuur in kei kiruung akholtinga thloutloh a alehvaa trongsuur in keita paja kamthlak ang.

²⁴ Kei i vaisi miisang akthisam ruungnata tunang in keikal ume?

²⁵ Inih Akpu Jisu Khrista apaalla Ringpu ta kampaak. Chunna kiril invah Ringpu atrongsuurta routloh a ammangta kimdon, chulata kei kiruung invah alehvaa trongsuurta routloh a amsang.