ROME 4 - Akthar Trongirhna (BSI)

Abraham Ningnata Tamphu

¹ Chunna ruung nujuih a inih ipu Abraham rella inih in jangison ume?

² Alamva Abraham ta amah athlou nujuih a machimleva, amah in an orhna tuvah am, chuta Ringpu kuungna vanoh

³ Alamva ringjih in khatloh a asonme? “Abraham in Ringpu ta amlotpei che amahta akchimlamseh mii tih a ateenpipei.”

⁴ Ipek mii khat in thlou atlohlai atloh khaankha kuttholta ateenpi.

⁵ Mii khat in thlouva tlohnoh, chuta Akchimlamseh noh eita amchim amahta malot, amah malot i akchimlamseh tih a inteenpisa.

⁶ Davit inkho nga tloh a asonpei, athlouva tlohnoh miikhatta Ringpu in akchimlamseh tih a ateenpi mii i doiphahsa ta asonchuvah:

⁷ “Anmah in anchimnohta a ip ei, mahche anmah anlehta abahmii eikha doiphahsei;

⁸ Akpu indahmii anlehta teenpinohkha doiphahsei.”

⁹ Oinang doiphah i avun aktankhop mii turelname, mah i avun aktannoh mii turelna nohme? Inih in isonva malotkha Abraham kuunga akchimlamseh veia inteenpisa.

¹⁰ Mahchu khatloh a amahta inteenpime? Ohchu amahta avuntanche aknuname, chunoh a avun tannoh amaaname?

¹¹ Mahkha amahta avun tanna daang veia aphahpei, mah i akchimlamseh eita ateenpinatu relna, avun tannoh a amlot mii naamte ningkho anpa veinatu relnasa,

¹² Mahchunanga Abraham vah avun aktanchetu anpa veikhop noh a amaa leithinga amlotmiitu akthra pandam veia akcheche mii eitukho apa veisa.

Ringpu Trongchet i Malot Apaalla Inphahning

¹³ Anmah in tukleiram anphahtuta Abraham kuunga chunohle amah atute kuunga atrongchetkha trongsuur apaalla thlengnoh chuta malot apaalna.

¹⁴ Trongsuura akmaar mii in lalchun veiseileh, malot i apupusa che trongchet i jakhatkho veinohsa.

¹⁵ Alamva trongsuur in trihkhop a malunghaang amsuuk; chuta trongsuur amnoh in trong majuihnoh kho amnoh.

¹⁶ Oirella trongchetkha atute annaamte ah malungsita malot apaalla ngatkenga asihpei; mah i trongsuura tlepta akmaar ankuung khop noh a inih inaamtetu ipa Abraham in amlot khanna mii naamte ankuungakho veisa, alamva amahvah inaamtetu ipasa,

¹⁷ mah i nga tloh a injihsa, “Keiin nangta jatih tamtu apa kamvei peiche” — trongchet in thita kiring amlan mahche ak amnoh pootcheita onga amsuuk amah in Ringpu ta amlot.

¹⁸ Amah in amtuur amnoh slakho oinanga matuura amlotpei, mah chuvah “Nang nitu nitekho mainanga vei tuei,” ta amahrella asonnanga amah in jatih tamtu apa aveinatu relna.

¹⁹ Amah aruungtu amdonlai malottinga amah in marnopnoh, akthiche ruungnanga isonva kum reija tlungsa, Sarah naolom ah nao amnatukho jakhatkho madonnoh a.

²⁰ Amah in Ringpu atrongchetta malotnoh tlohnoh a aril intluunnoh amnoh, chuta Ringpu ta mapaak a amah in malotkho trang ahanral,

²¹ Ringpu trongchetva tlohtang tloh achek ta Abraham in arilla ngir.

²² Amah in amlotkha oirelna, “Amahta akchimlamsehsa ta ateenpipei.”

²³ Chuta trongah, “Akchimlamseh veia atenpipei” tihkha amah akroutu relna injihnoh,

²⁴ chuta inih turelkho injihsa, inihtu Akpu Jisu Khrista ta thinata amring Ringpu ta malotmele, chuleva amah in inihta akchimlamseh veia inihteenpitu;

²⁵ atrongta imjuihnoh rella amahta anthatpei che inihta inimchimnatu amahta amringpei.