ROME 3 - Akthar Trongirhna (BSI)

¹ Chuleva Judiei in anchuungna jangamme? Chunoh a avuntan in achuungna jangamme?

² Billam anaamte achungava am. Mathronna veia, Ringpu trongkha Judi ankuunga amsilpei.

³ Mii ste in malotnoh eileva khavei useime? Anmah in amilotnoh akhannna Ringpu va malot aja khata kananoh amivei utame?

⁴ Mah chuvah khak veinohsoh! Mii naamtein chimnoh seilakho Ringpu va akchim vei, mah i nga tloh a injih khanangsa, “Nangin nitronglai nitrong khanna nangta chimche naktihso, che nangta pichaar naktlohlai nangningna akchim khanna nichekchu veiso.”

⁵ Chuta inih ithratnoh in Ringpu vaa akchimta ralla seenga madangleva, inih in khatloh a ison ume? Mah chuvah Ringpu in amlunghangna tandi inimlanlai amahta chimnohta ison ume? (keiin tukleiramna miihoonga trongsang.)

⁶ Mah chuvah khak veinohso! Chuleva khatloh a Ringpu in tukleiramta pichaar atloh ume?

⁷ Kei kichimnoh inna Ringpu vaa akchim in hanralla amahvaa paarthrata maliinle, alehchel keita jarelna pekphah a kamlaal angme?

⁸ Mahche akthra anthruhnatu inih in thranoh tlohreime? tih a mii arouin inihta inihrilh iniloonna anson. Anmah in amilaal i chimta ison.

Akchimlamseh Tukhatkho Amnoh

⁹ Cheva jangsa? Judi inih in Jental chung ralla thrameme? Mah chuvah amahnoh luung, alamva keiin Judi kho che Kriik kho alehvaa tuui athlanga am mii eita kisonpei;

¹⁰ mah i nga tloh a injih khanangsa: “Akchimlamseh mii tukhatkho amnoh, amnoh, tukhatkho amnoh;

¹¹ akromchek mii tukhatkho amnoh, Ringpu ta akjon mii tukhatkho amnoh.

¹² Annaamte anmai inheikirsei, anaamte in chimnoh lamma sehkirsei; akthra tloh tukhatkho amnoh, amnoh tukhat luungkho amnoh.”

¹³ “Anmah anrool anhoongva rusuunsa, anmah amilei in miita leemna ah anhuuina.” “Murulvaa tuur in anmah amileithuui a am.”

¹⁴ “Anmah annar a phoolleh inkhah in sip.”

¹⁵ “Anmah ankehva intha a thii masuuknatu am,

¹⁶ anmah in ansehna lamva kmaang krel lahna in am,

¹⁷ leh oi vaa lamta anmah in romnoh ei.”

¹⁸ “Anmah anmit in Ringpu ta trihnoh ei.”

¹⁹ Ipek inih in irom mah chuvah trongsuur in ason anaamte i trongsuur athlanga ak am mii kuungah trong, mah chuvah bao naamteta siinnatu, mahche tukleiramna mii annaamte in Ringpu vaa pichaar athlanga an amnatu relna.

²⁰ Alamva trongsuurta athlou veia aktloh tukhatkho Ringpu in machimnohtu, alamva trongsuur apaalla alehvaa lousing thlengsa.

Ringpu in Inihta Khatloh a Amahsoh Inichimpi Ume

²¹ Chuta trongsuur leh ringraan nirik ah maita sakhi veia amilanpei, pekva trongsuur noh a, Ringpu vaa akchim lamsehkha ammuhpei,

²² anmah in Jisu Khrista ta amilot apaalla Ringpu in anmahta akchim amveipei, Khrista amlot mii naamte kuunga Ringpu in maita amsuukpei. Alamva amahta amlot miikuung avah inthliin jakhatkho amnoh;

²³ mii naamtein aleh amsei chunna Ringpu vaa paarthra nata inleousei,

²⁴ Jisu Khrista tinga inthloknava akliia Ringpu vaa malungsi akutthol in anmahta khangvaalla amchimpei.

²⁵ Ringpu in amahta malannoh, chuta atak athih apaalla mii in amahta malot a anlehnata inthlok anphahpei, Ringpu in akchimlamseh ang tihchu maromnatu mah i amsuukpei.

²⁶ Amaa leithing akhanva amah in miivaa alehta doutranga anna am; chuta amahva akchimta maromnatu ta ipekva amah in miivaa alehta amdangpei. Nga tloh a kei i akchimlamseh angta atakta amdangpei mah chuvah Jisu Khrista ta amlot tukhatta akchimlamseh amveipei.

²⁷ Chunna inih in ithoina tuphu amme? Mah chuvah veinohso. Jaknang trongsuurme? Thloua trongsuur amme? Ochunoh, chuta malotva trongsuurna.

²⁸ Alamva trongsuur in asonthlou khannoh a mii in amlot apaalla amchim peita irom.

²⁹ Chunoh a Ringpu i Judi ei khoptu Ringpu me? Amahvah Jental jatih turelkho Ringpu nohme? Oi, Jental ei turelna khopning,

³⁰ alamva avun aktan ei in amahta amilot apaalla amchimpeime mahche avun aktannoh inkho amahta amilot apaalla anmahta amchimei. Ringpu khalekta amning

³¹ Malot apaalla trongsuurta jakhatnoh maveireime? Mah chuvah suuknohso! Mahchungut a, inih in trongsuurta imchet.