ROME 14 - Akthar Trongirhna (BSI)

Niuh Ninaota Pichaar Tlohnohro

¹ Malottinga marnop miita lousoongve, chuta amah atak anroutu relnava trong inkharhpinohve

² Mii khat inva bilam saa aja tih a malot aja, chulata marnop mii inva inlou saru khopta asaakning.

³ Aksaa khanna aksaanoh khata usitnoh tlohnohso, che aksaanoh khanna aksaakhata pichaar tlonohso; alamva Ringpu in amahta asoongpei.

⁴ Aktlei roijuihta pichaar aktlohsam nangi tucheme? Atak in amah Akpu maikuunga ngirnoleh inriil amahta amngirhtu, alamva Akpu in amahta amngirhchek.

⁵ Mii khat in nikhatni i aktleini chunga thrabeb a aloh, mahsuungla aktlei inkhat in akni anaamteta intrimma aloh. Mairella mii khatkhat in arilla ngirso.

⁶ Tunangkhat in akni khatta amuveia louva akngaak mii khanna Akpu ta injah a ngaakso; tunangkhat akngaaknoh inkho Akpu ta injah a asaak a iin, alamva amah in Ringpu ta ampaak; aksaanoh amah inkho Ringpu ta injah a saanoh, che Ringpu ta ampaak.

⁷ Tunangkhat inkho atak akroukhop turella ringnoh, che tukhat inkho atak akroutukhop turella thinoh.

⁸ Inih in ringmele Akpu turella ringme, che inih in thimele Akpu turella thime; chunna inih in ring samelakho mahche thisamelakho Akpu turelnaning.

⁹ Alamva Khrista in athihche veikhat aringi akthi khatkho akring annihtu Akpu aveinatu relna.

¹⁰ Nangin jarella niuh ninaota pichaar nitlohme? Chunoh a nangin, jarella niuh ninaota usitnohcheme? Alamva inaamin Ringpu apichaar amaa a ngirume.

¹¹ Mah i injih a amsa, “Keiin kiringi Akpu nia mii naamte in ankhuk makamma amithruuntu, che malei anaam in Ringpu ta amipaaktu.”

¹² Chunna inih inaamin Ringpu kuunga itloh itlohthlouta imlantu.

Niuh Ninaoeita Thranoh ting Mathlaknohro

¹³ Chunna inih in khatleh khat insuia pichaar intlohnohrei, mahchu ngutva tukhat inkho amah unao pasata keh masuihnatu nohle anlam loukhaar noh natu tlohnoh luungve.

¹⁴ Keiin kirom, Akpu Jisu ta kamlot mah chuvah jakhatkho seengnoh ta isonnatu amnoh, chuta seengnoh ta amdon amahkuungva seengnohning.

¹⁵ Nangin nisaakpot khanna niuh ninaota aril masokchele, nangva rilvol nujuih a sehnohche Khrista in amah turella thisa churella nangin amahta nisaakpoot in mamotnohro.

¹⁶ Chunna nangin nithratkha thranoh nanga matrongnohrei.

¹⁷ Alamva Ringpu kurung huunnava saak iin khanoh chuta akchimlamseh che leh oi mahche akseeng Li a roomthok khare,

¹⁸ Nga tloh a tukhat in Khrista ta routloh i Ringpu ta ja a aloulohtuphu mahche mii inkho anja.

¹⁹ Chunna leh oi amnatu mahche khatleh khat inseemjounatu inih in tlohrei.

²⁰ Saak iin rella Ringpu thlouta mamaangnohve. Bilam anaamte i tak a akseeng, chuta tukhat in asaak in mii aktleita anloomnatu veile mah chuvah alaal,

²¹ Stak aksaanohle tuiibuh iin nohle niuh ninaota akeh masuihnatu jakhatkho nitlohnoh in chimtu.

²² Nangin namlotkha Ringpu leh nang nakaar a sihro; atak in ajache atak anroua pichaar intlohnohkha doipha veisa.

²³ Chuta aril inhalla saaleva akrouta amaraal inpesa, alamva amah in amlot khanna tlohnoh; alamva bilam malottinga innmun maveinoh a tlohkhalli aleh.