ROME 13 - Akthar Trongirhna (BSI)

Rampuui Aktloh Akhal Ankuunga Itloh Ikhaltu Thlou

¹ Miirel in aktloh akhallei anthlanga amtutla. Alamva Ringpu noh a aktloh akhal akchek amneh amnoh, aktloh akhallei i Ringpu in asih ei.

² Alamchunna aktloh akhaleita andahmiiva Ringpu in thlou thunna asih eita indahsei, andah miichunga pichaar amtu.

³ Alamva rampuui eiin akthra thlou aktloh miita mathritnoh ei, chuta thranohthlou aktloh miita amithrit ei. Nangin aktloh akhaleita trihnoh cheme? Chuleva akthra thlou tlohro, che amah in ajapotkha nangin niphahtu,

⁴ Alamva nangkuunga akthra thlou tlohna turella aktloh akhal ei i Ringpu vaa routloh miisei. Chuta nanginta thranoh tlochele trihro, alamva amah chemseikha sulla choinoh; amahva Ringpu routloh miisa, chimnoh aktloh anchunga amah amlunghaangkha athlou veia aktloh khasa.

⁵ Alamchunna Ringpu vaa amlunghaang khannata inlitnatu khop noh achim chimnoh ril romna rellakho anthlanga amtupotchou.

⁶ Mahchusoh intrimma roithaang namilantu, alamva aktloh akhallei i Ringpu ta rou aktlohsei.

⁷ Mii naamtein malanphu malanso, roithaang antolh antolh in malanso, nitrihtu miikha trihro mahche najahtuphu miikha injahro.

Inkhat in Khat kuunga Itlohtu Thlou

⁸ Inkhat in inkhatchunga rilvol leimannoh a aktlei leiman intolnohve, alamva antongpi miita rilvol mii khanna trongsuur amthlungpei.

⁹ Trongthuun chuva, “Nangin miimei miimasalta laalnohro, nangin mii thatnoro, nangin inrunohro, nangin miita innarhnohro.” Mahche aktlei trongthuunva, “Nangin nantongpi miita nitaknanga rilvolro.”

¹⁰ Rilvol in antongpi kuunga chimnoh tlohnoh; churella rilvol in trongsuurta amthlungpei.

¹¹ Maichunga nangin jaknang pungme nirom, mah chuvah ipekva inih in inthohnata laikha aphahpei. Inih in matsah imlot khachunga chaanring in ipek ralla innaisa.

¹² Khulouh i chesamsa, ramvaarnatu innaisa. Inih in inthimlaina thlouta mathlah a avaarlaina raal puunrei silhrasei,

¹³ suunna itloh ikhalnanga inih in chimma sehrei, tuiibuh inruiinohve, nanhoong nanvaata mabuur mahche chimnoh thloua sehnohve, innah insuul mahche kallak tlohnohve.

¹⁴ Chuta nannih in Akpu Jisu Khrista ta puunrei nanga silhve, mahche ruung in akdit mathlungnatu ruunga tancha malannohve.