ROME 12 - Akthar Trongirhna (BSI)

Ringpu Routloh Miivaa Chaan

¹ Alamchunna unaoeio, keiin nankuunga kisonchou, mah chuvah Ringpu vaa rilvotheih apaalla, nanruungta akring veia kat a, seenga mahche Ringpu in ajana ah malanve mahche Li tu veia mathruunve.

² Nannih in tukleiram ahoongta majuihnohve chuta akthra i khome mahche loua akchimma mapungpha veia Ringpu in amdon jangme majonna nanril mathar choulaia nanhoongta mathleive.

³ Alamva Ringpu in keikuunga amlan malungsi apaalla nannih in namidontuphu khannata ralla nantakrella inkaanga namidonnoh natu, chuta Ringpu in nannih khatkhat tinga nanimlan malotvaa chaang nujuih a seenga pichaar intlohve.

⁴ Alamva ruung inkhat ah akhol tam am, akhol naamte atlohtuthlou inchunnoh,

⁵ chunanga inih in tam samelakho Khrista ningva ruung inkhat ningme, che akhol in khatleh khat ruul veisei.

⁶ Inihkuunga inimlan malungsi nujuih a inihting ajeje kutthol am; mah naamtechu huuinarei, phoongnatu veileva imlot nujuih a phoongrei;

⁷ routlohnatu veile routlohna a huuinarei; matheihnatu veile amtheihmii inkho thra a amtheihso;

⁸ rilthoknatu veile rilthok mii inkho thra rilthokso, malannatu veile amlan mii inkho ril seenga malanso.

⁹ amthruun mii inkho ril luut a seenga mathruunso, amjoom mii inkho ril luut a majoomso, mii rilvoltheih inkho roomthok a rilvolso;

¹⁰ unao rilvolnanga khatleh khat ril involve; inkhat in khatta akral akthloisang madonnoh a inruruh a injahve.

¹¹ Thloutloh talnohve, Li soh inruuia tloh khalve, Akpu ta rou tlohve.

¹² Nangin namtuurna a roomthokve, klah knanga doutrangve, injomma Ngenve.

¹³ Akseeng mii andarkaar a malan aja malanve, rapkheina akthleng miita rou tlohve.

¹⁴ Nangta nakchut ankuunga doi malanve; anmah kuunga phool tlohnoh adoi malanve.

¹⁵ Roomthok mii eisoh roomthok jouve, aktrap eisoh trapjouve

¹⁶ Khatleh khat ril intrimma ringve; thoinohve, inruruh miisoh inruruh jouve; nanroua singsangta madonnohve.

¹⁷ Nankuunga thranoh aktloh miita thranoh malengnohve, chuta mii naamte kuunga ril liin thlouta mamuhve.

¹⁸ Vei ajaleva, nanchek makhei mii naamte leh oia amjouve.

¹⁹ Kirilvol eio, nanroua inthungnohve, chuta Ringpu malunghaangna ah mahve, alamva mah i injih a amsa, “Leiman akthungva keita, keiin leiman kithungtu, Akpu in ason.”

²⁰ Mahchunoh, “Nang Jekna inta traamle, masaakro; amah in atuii raalle, iinphu malanro, alamva nga itloh in akangchunga ak al meiholta nibunpei.”

²¹ Thranoh in nangta nakcheknohso, chuta akthra in nangta nakchekso.