ROME 1 - Akthar Trongirhna (BSI)

¹ Jisu Khrista vaa roijuih Paul, raangroi tih a aong, Ringpu vaa Akthra Trong rella athrekche

² mah chuvah akseeng ringjihta akraanei anlii a matsahna atrongchetsa,

³ akthratrong chuva Asa kupa rella, ruung nujuih avah Devit vaa atute tingnasa

⁴ mahche kthinata veikhat ring inihtu Akpu Jisu Khrista vaa Akseeng Li atuuia Ringpu Asa kupa amveipei,

⁵ amah akmingrella jaatboom anaamte in malot sonjuihkha thlennatu amah apaalla malungsi khatkho raangroivaa phom inih in iphahpei,

⁶ Jisu Khrista amii veinatu naniong akaar a nannihkho injaosachou;

⁷ Ringpu in arilvol khatkho akseeng mii tih a aong Rome na mii kuungah; inih Pa Ringpu khatkho Akpu Jisu Khrista tingna malungsi mahche leh oi am veiso.

Roomthok Malan Relna Ngen

⁸ Matsahremma nannih naamte turella Jisu Khrista apaalla keiva Ringpu ta kampaak, alamva nannih in namilot i tukleiram apumte ah sonna amithangkirpei.

⁹ Alamva Asa kupa vaa akthra trongin kei kiklisoh inruuia rou kitloh Ringpu in keitu sakhi veisa mah chuvah keiin inngainoh a kingenrel nannihta son sonna kingenpichou.

¹⁰ Ringpu in amdon veileva ipek keiin upai tloh a thlengtung kutthol ste keiin nankuunga malannatu kanmuhpija hangmangchou,

¹¹ alamva nannihta nanimtrang natu Li tu vei kutthol nankuunga kamlannatu nannihta khalmo kanmuhpija hangchou.

¹² Chunna keiin kamlot leh nannih in namilot khanna nannih leh kei ikaara khatleh khat insohnatu.

¹³ Unaopasa eio, keiin nankuunga kamromjava, keiin injomma nankuunga kithlengja (chuta pekphahva keijanoh mang) mah chuvah Jental ankaar a akrah kiluhnanga nannih nankaar akho akrah luhnatu.

¹⁴ Keiva Kriik mii akho, pungpornoh mii akho, che aksingmii akho kmongmii akho laman intoolsang.

¹⁵ Chunna Rome na miitingkho akthra trongta kiraanja hanga amsang.

Akthra Trongvaa Atuui

¹⁶ Alamva keiin akthratrong rella injaknoh ang: mahchu mii turel chaanring phahnatu Ringpu vaa atuuisa, matsah a Judi mahche Kriik akho.

¹⁷ Alamva ringjih in Pharaoh ta ason, “Alamva kei tuuita nangkuunga mamuhnatu che thalei pumtea keimingta sonna niraannatu keiin nangta akseeng phomma kimbokpeiche.”

Mii in Athratnoh

¹⁸ Alamva Ringpu amlung inhaangkha ringramnata amdangpei tihva miivaa anleh mahche anthratnohta andah a che anmah anthratnoh in akchimta namma ansih.

¹⁹ Alamva Ringpu rella jangmekhat rom ajanatu anmah kuunga seengbenga amtheihpei, alamva Ringpu ta ankuunga ammuhpei.

²⁰ Tukleiram aseemlai nata amah akutseem muh icheknoh mah chuvah ache amnoh tuui mahche inkhatru vei Ringpu in aseempot ei i amah akliia seenga muh ichekpei. Churella anmahta ip janohtu,

²¹ alamva anmah in Ringpu ta rom seilakho anmah in amahta Ringpu sa tih a injahnoh ei chekho amahta mapaak khonoh ei, chuta anmah in amidon anaam kananoh hukveisa che kanana amnoh anrilta amthimpei.

²² Ksing sungta son seilakho, anmah in kmong hukveisei,

²³ mahche kthi amnohluung Ringpu apaarthrata kthi nai amivei, che avonna intolla aksehsoh intrimma leilisoh inthlengsa.

²⁴ Churella Ringpu in anmah anrilla andit che akseengnohta tlennatu amthlahpei, anmahseeng seeng ankaar a antak anruung anruungta injahnoh natu relna.

²⁵ Jarella tihva anmah in Ringpu rella akchim chimnoh trongsoh anthlenpei, chuche akseem Akpu ta mathruun mahche amahta aroutloh ngut akut ah inseempot eita anmithruunpei che roukho antlohpei.

²⁶ Mairella Ringpu in anmah anhoong thranoh chimnoh tlohnatu amthlahpei ei. Anmah kumei ei inkho kumeitu thlou amche anhoong akchimta mathlah a thlou amnoh chimnoh anhoong khanna anthlengpei,

²⁷ Mahchunanga kupa inkho kumeisoh inkeih a louamche akchim anhoongta amithlahpei, che khatleh inkhat indi ringvolkhanna kaangkhemsei, kupa in kupata injak romnoh thlou atlohpipei mahche anmah in akchimnoh thlou antlohkhanna saak iin tandi anphahpei.

²⁸ Anmah in Ringpu ta innaipi indah taningeiva tlohphunoh thlou tlohnatu anmah kuunga chimnoh ril Ringpu in amlannei.

²⁹ Anmah in akthranoh hoong, chimnoh ditnatu ril, mii mamaangnatu suul, kallak in sip, miithat miisun, housuuk a innah insuul, mii masimna, mii maangnatu di,

³⁰ mii loonna trong, Ringpu ta intirh, intirhsa hoong, mii usitnoh, kei ningsangta insoon, thranohthlou amthron, anu apa in ason majuihnoh,

³¹ kmong, aril ngirnoh, rilvoltheih ril amnoh, mii turella madonnohluung, mah naamte i anrilla sipsei.

³² Mainang thlou aktlohmii in thi ajalam ta Ringpu atrongthuunta anmah in rom seilakho, anmah in mahchukhop tlohnoh a mainang aktloh miita amija lamang.