PHILIPPIA 4 - Akthar Trongirhna (BSI)

Matheihna

¹ Alamchunna keiin kirilvol mahche khalmo klukanga kimdon unaoeio, keiin phlaak kihuuina mahche keitu boorpii akveieio, nga tloh a Akpu kuungah chet a ngirve.

² Eudia mahche Suntikhi in Akpu ting nan amnatu klukanga kisonchou.

³ Tak a rukol roonjou inlukjou nanga kinoolchou, anmah kumei eita majoom eive, alamvah akthratrong rella keisoh inruuia Klemen khatkho thlou kitloh kikhalpijou aktlei eikho, anmah anming akring nirik ah injih a am kumei eikho.

⁴ Lai amrel Akpu ting roomthokve, veikhatla kisonchou, roomthokve.

⁵ Akdouchek nanrilkha miinaam in naniromeiso. Akpu athlengnatu innaisa.

⁶ Aktleitlei rella nanril inhalhil tlohnohve, chuta bilam naamte ngenna che inruruh a chunohle mapaaksoh inruuia nannih in nanngenkha Ringpu ting maromve.

⁷ Che nannih in anaamte roomma bahabtlatingah nanralnatu Ringpu ningnata akthleng leh oi khanna nannih namilung khatkho nanrilkha Jisu Khrista in kemma nanisihtu.

⁸ Achena ah, unaoeio, akchim naamte, injah aja naamte, akchimlamseh naamte, akseeng naamte, rilvol naamte akthra kulta amle, matikcha mapaaknatuphu amle, mairella madonve.

⁹ Nannih in keikuungnata nanrom, nanpaa, nantheih mahche nanmuh eikhata tlohve; che leh oi vaa Ringpu in nannihta nanimruui veiso.

Kutthol Rella Mapaak

¹⁰ Keiin Akpu ting khalmo kiroomthok ang, mahchuvah nannih in keirella ipekkho namidonla ang; kei turella tak a nannih in namidon ang. Chuta akthra tancha amnoh.

¹¹ Keiin kivaat kisam rella tihnoh ang, alamvah keiin bilamma amah kuungah pelli kitampei.

¹² Khatloh a kiril in intoolla amtungme mahche khatloh a huuitanga amtungme kirom; bilamma mahche iamnahoong naamte inkhop inleiakho, vontraam akho, huuitang akho ikdik akho, anruk anrik naamte i kiloungaak natu kirom.

¹³ Keita kamtrang amah apaalla thlou naamte kitlohtu.

¹⁴ Chulata keiin klah knang kiphahlaia chuum nanjajou i miita rilvoltheih akthra thlouta nantlohpei.

¹⁵ Mahche Philippi ah am nannih in nanrom, mahchuvah akthratrong kamthronlaia, Mesidonia mah a kisehlai nannihnoh a tukhat khakla inkho malanle akphah rella keisoh kitloh kikhalpijou amnoh;

¹⁶ alamvah Thessalonika tingkho imjoomnatu thlou veikhat khop noh a inleng inlenga keita namithlah ang.

¹⁷ Keiin kuttholta jonnoh ang; chuta nannih turella akrah inrah ahanral khata kijon.

¹⁸ Keiin kiphahtuphu anamte kiphahpei, ralla amsa; nannih in keikuungah namithlah kutthol, Ringpu mapelnatu inkattuphu Epaphroditas nata kiphahpeia sip a amsang.

¹⁹ Kei Ringpu in nannihtu darkaar anaam Khrista Jisu apaalla amah paarthra adoon akhaal nujuih a nanimlantu.

²⁰ Inih Ringpu mahche inih Pa tingah ache amnoh a paarhtrakha am veiso. Amen.

Achena Saambaan

²¹ Khrista Jisu ting am akseeng miinaamta saambaan kimlanchou, keisoh amjou unaoei inkho nannihta saambaan nanimlan.

²² Akseeng mii annaamte in nannihta saambaan nanimlan, thloia Keisaar ataploikuung in nannihta saambaan nanimlan.

²³ Akpu Jisu Khrista vaa malungsi in nannih nanlita inruuipiso.