PHILIPPIA 2 - Akthar Trongirhna (BSI)

Khrista in Inruruh Aveina Khatkho Aliinna

¹ Chunna Khrista kuungah ril masohnatu amle, khakha tloh a rilvol madoina Li ah joujouta phahmele, rilvolna mahche imchaalna amle,

² ril inmtrimma, rilvolla intrimma khalek veia, ril inchunna mahche ril inkhatveia keiin kiroomthokna ah mapung maphave.

³ Amah akroutukhop che thoiliin madonna jakhatkho tlohnohve. Chuta inruruh a nangchungah aktheih in thloita thra tih a madonnohve.

⁴ Mii in akroutukhop madonna kidi tlohnohso, chuta aktlei in andit khakho anso.

⁵ Jisu Khrista kuungah am rilkha nankuung akho amso,

⁶ amah in Ringpu hoongah rouam slakho Ringpu soh intrimma chet a amnatu madonnoh,

⁷ chuta atakta masanga roijuih khatvah ahoongta loua mii nanga poksa.

⁸ Mahche amah ahoongah mii nangjimma amah in kithih phah a atak in inruruh a che sonmajuih veia thingkharh ah thi aphahpei.

⁹ Alamchunna Ringpu in amahta thloi inkaanga adompei che aktleiming naamte chungah ankaang mingta amlan,

¹⁰ amahvah ringrammah, thaleiah mahche thaleithuui ah am annaamtein Jisu akmingah khuk makamma amithruunnatu relnasa,

¹¹ che Pa Ringpu ta paar mathratnatu, Jisu Khrista vah Akpu sa tih a maleirel in anphoongnatu.

Akvaar Nanga Tukleiramma Kvaar

¹² Alamchunna kirilvol eio, nannih in lai amrel son majuihnanga pekvah keiin nannihsoh kiamlai khop noh a pek keiin nannihsoh amnoh sanglakho trih a mahche inchuunsoh inruuia nannih chaanringta rou tlohve.

¹³ Alamvah amahta aril mapelnatu tloh a thlou nantlohnatu Ringpu in nankuungah thlou nanitloh a am.

¹⁴ Thlou anaamte insonoh a nohle inruii inri amnoh a tloh khalve,

¹⁵ mahchuvah nannih in amraal am chunohle jakhatkho romnoh, thranoh leh chimnoh ringnatluun akaara amraal amnoh Ringpu vaa asanang veive, anmah ankaara nannih in akvaar nanga tuklei ramchungah vaarve.

¹⁶ Chaan trongi chet a matuhve. Chunna Khrista vaa aknia keiin orhtung mahchuvah keiin sulla tlaannoh ang nohle sulla insuulnoh ang.

¹⁷ Kei kithiita nannih in poot nankatna ah poih a keita kamlan sachloulakho, keiin nannih nannaamtesoh inruuia tlansang mahche roomthoksang.

¹⁸ Oinanga nannih inkho keisoh tlan mahche roomthok jouve.

Timothi leh Epaphroditas

¹⁹ Timothi ta nankuungah inthabeb a kimthlahnatu Akpu Jisu ningah kimtuur, chunna nanpaota theih a keikho roomthok kiphahnatu.

²⁰ Nannih turella athratnatu chimma aktlohja amahnangmii khatkho doonohsang.

²¹ Jisu Khrista turelnavah annoh eichuta anmah antak turellakhop amidonning.

²² Chuta Timothi akul amaal nanrom, asa kupain apasoh thlou atlohnanga akthratrong turella amah in keisoh rou atlohjou.

²³ Alamchunna keita khakha intlohmeta keiroomso amahta nankuungah kimthlanatu kimtuurpei;

²⁴ Akpu ta kimlot kitakkho sootnohveia nankuungah thlengtung.

²⁵ Keiin kimdonvah kei kinao che keisoh tlohkhaljou mahche keisoh raalmii veijou, nannihting akthratrong akraan khatkho darkaar amma keita kamjoom Epaphroditas ta nankuungah mathlah darkaarsa,

²⁶ alamva amah in nannaamteta khalmo nanmuhpija hanga, alamva amahvah khalmo kanana vei tih nanatheihrel aril inlangtlamsa.

²⁷ Tak a amah in keiva kana angta asonnatu akirta vaatning, chuta Ringpu in amahta khalmoa amchaalpei; amahta amchaalkhop noh a keiin klahchungah klah kiphahnoh natu keikho kamchaalang.

²⁸ Keiin ralla madonna amahta nankuungah kimthlahlai, amahta veikhat inlenga nanmuhsoh nanroomthok natu, mahche kiril inlaangkha anlengnatu.

²⁹ Chunna roomthoksoh inruuia Akpu tinga amahta rousoongve; che oinang mii eita injahve,

³⁰ alamva amah in Khrista thlou rella athihnatu akirta vaatning, keita nannih in namijoom tuphutang amah in thlou amchenatu klah knang aphahpei.