PHILIMON 1 - Akthar Trongirhna (BSI)

¹ Khrista Jisu rella simma am Paul mahche iuhnao Timothi in, Inih irilvol iuhnao mahche thlou itloh ikhalpijou Philimon kuunga

² che inih isar Aphia leh inihsoh raalmii iveipi Arkhipas che nang inna nanboompi khakla.

³ Inih Pa Ringpu mahche Akpu Jisu Khrista tingah malungsi khatkho leh oi nankuungah am veiso.

Rilvoltheih Philimon Khatkho Athlou

⁴ Keiin kingenrel nangta intheih anga lai amrel kei Ringpu ta kaipaak,

⁵ alamva nangin Akpu mahche Akseeng mii ankuungah niam nanga nang rilvoltheih mahche malotkhata kitheih in,

⁶ Khrista Jisu ah am inihvaa akthra khiial naamte nangin namlotkha miikuung akho chuum nijajounatu kingenche.

⁷ Alamva nang rilvol, roomthok mahche inbohkha kiphahpei, alamva nang napaalla kiuh kinao akseeng miiei anrilta namthlanpei.

Onesimas Rella Ngen

⁸ Alamchunna nangin darkaar amchu nitlohnatu keiin Khrista ningah amma nangta trongthuun namlan sanglakho,

⁹ trong akphurh Paul mahche Khrista Jisu rella simma am keiin kirilvolla nangkuungah kinoolche–

¹⁰ keiin simma kiamlai apa veia kisa Onesimas rella kinoolche.

¹¹ (Matsah avah amah i nangkuungah akanana amnoh mii, chuta pekva amah i nangtingkho kei tingkho tak a akana veisa.)

¹² Keiin amahta nangkuungah veikhat kimthlah, kei kiril laltu veia kamthlahpei.

¹³ Akthratrong rella simma kiamlai amah in nang ningut a keita rou keitlohnatu amahta keisoh inruuia roomthok a kiampi jounatu,

¹⁴ chuta nangin akthra thlou nitlohkha tlohnoh janohta nitloh veinohso, chuta nitlohja veia nitlohchu aveinatu nangin nikdit veinoh avah keiin jakhatkho cheknoh ang.

¹⁵ Amah in lai kaktu rella nangta nakmah a seh i ache amnoh a am aja,

¹⁶ amahvah naichi nangnoh chuta naichinata akral, ringvolna unao khat nanga, amuveia keiin kirilvol, unao khat nanga ruung akho che Akpu akho annih a kirilvol.

¹⁷ Chunna nanginta keita nipainanga kamdon chele, keita nangin nilouloh angkha mah khananga amahkho roulouro.

¹⁸ Amah inta nangkuungah alaal amle, nohle nang nitata antoolna amle, mahchu kei baobeh asehna khanna maluutro.

¹⁹ Paul keiin mah i kikuttal in kimjih, keiin mahchu kamlengtu mahchuvah keita intoolmangche tihtanoh ang.

²⁰ Oi, unao o, Akpu kuungah nang ningnata jangmekhat darkaarva kikdit. Khrista kuungah kiril kamthlanro.

²¹ Nangva trongson namjuih rella keiin nikuungah kimjih, keiin kisonchungah nangin thloiralla nitlohtuta kirom.

²² Che kei kithlengnatu khumkhat thlouraang keitlohro, alamva nangin keiturel ningen apaalla keita nankuungah veikhat inlenga nakphurhtung kamdon.

Achena Saambaan

²³ Khrista Jisu kuungah keisoh simma amjou Ipaphras in saambaan namlan,

²⁴ che keisoh thloutlohjou Mark, Aristarkhas, Demas mahche Luke inkho saambaan nanimlanei.

²⁵ Akpu Jisu Khrista vaa malungsi in nannih nanlita inruuipiso.