NOONNA THLOU 9 - Akthar Trongirhna (BSI)

Saul in Khrista kuunga Aluutna

¹ Chuta Saul in Akpu aroieita amthrit khatkho thatnatu akphuk sok a akthloi thiimpu kuunga sehsa

² che amahkuung nata Damascas ah am sinakok ankuunga phurhnatu tronjihthuun anihpei, mahchunna tunangkhat Akring lamma amah amii akvei kupaleh kumeita tuukleva, anmahta Jerusalem a athlennatu relna.

³ Ipek amah in nga tloh a asehlai Damaskas soh annai in, kak hanga ringramnata akvaar khat in amahta kooia vaarsa.

⁴ Mahchunna amah in tukleichunga inriilsa mahche amahkuunga ahoukhat in ason atheihpei, “Saul, Saul, nangin keita nakchut angi jarelname?”

⁵ Che amah in ason, “Akpu nang tucheme?” Chunna amah in ason, “Keiva nangin nakchut Jisu khasang;

⁶ chuta inthouva khuuboom akhanna luutro, mahche nangin jangnitloh umeta nangkuunga naksontu.”

⁷ Saul soh sehjou mii in anhou suuknoh luunga ngirra amsei, miihouva antheih chuta tukhatkho muhnoh ei.

⁸ Saul in kuleinata inthousa; mahche amit amengin jakhatkho muh cheknohsa; chunna amahsoh aksehjou in akutta matuhjoua Damaskas ah anthlenpei.

⁹ Nijan inthumkhek amah in muh cheknohsa mahche sanoh iinnoh a amsa.

¹⁰ Ipek akming Ananias an ong aroikhat Damaskas a am. Akpu in amahkuunga ahamuhkhat a ason, “Ananias.” Che amah in ason, “Akpu, kei onna amsang.”

¹¹ Mahche Akpu in amahkuunga ason, “Inthoua lam intluun antihna khanna sehro; che Judas in Tarsas na Saul an ong mii khat ruiro; alamva anro, amah in ngenna am,

¹² amah in amit veikhat muh acheknatu akming Ananias an ong kupakhat in thlenga amahchunga akut asih in muh achekpei.”

¹³ Chuta Ananias in amsang, “Akpu amah in Jerusalem a nang Akseeng nimii antakchunga khalmoa thranoh atlohpeita amah relna mii jikchah ningnata kitheihpei;

¹⁴ che amah in nang nikmingta ak ong mii naamteta suur makaangnatu akthloi thiimpu akuungnata akchek amneh rai aphahpei.”

¹⁵ Chuta Akpu in amahkuunga ason, “Sehro, alamva amah i Jental mahche kurung ankuunga khatkho Israel asa kupa ankuunga kei kikmingta phurh a araannatu amahta keiin kichar kutlaisa;

¹⁶ alamva kei kikming relna amah in maichah phah a klah knang athotu tlame tihkha kammuhtu tlasa.”

¹⁷ Chunna Ananias in seh a inn akhanna luutsa. Che akutta Saul achunga asihche ason, “Unao Saul, nangin nithlengna lamma nammuh Akpu Jisu in nangin veikhat nimit muh nicheknatu mahche Akseeng Li in nisipnatu keita kamthlah ang.”

¹⁸ Cheva mah laitalla kak hanga akornanga jamekhat amitnata tlasa che amah in veikhat muh achekpei. Mahcheva inthoua inlupsa,

¹⁹ che saakphu asaakche trangsa. Alamva nijan khalmo soot a amah in Damaskas na aroi eisoh amjousa.

Saul In Damaskas a Akthratrong Araan.

²⁰ Mahche kak hanga Sinakok ah Jisu ta raan raanna ason, “Amah i Ringpu vaa Asa kupa.”

²¹ Amah atrongta aktheih annaamte in salungkhoua ansonpei, “Amah akminga ak ong Jerusalem mii eita amnangmiikha mahmii inohme? Amah in anmahta makaanga akthloi thiimpu kuunga aphurhnatu madonna onna thlengnohme.”

²² Chuta Saul in ral ralla trangsa mahche Jisu i Khrista talsa chimta Damaskas na Judi eita anril amhalei.

²³ Nijan jikcha aknua, Judi in amahta anthatnatu ansilpei,

²⁴ chuta anmah in ansilkha Saul in arompei. Amahta anthatnatu suun khulouh phalkuung phalkuunga anmah in ruunga amsei;

²⁵ chuta aroi in amahta phurh a khulouh a lungpal chungnata athlanga buka khat a thunna anmithlakpei.

Saul In Jerusalem a Seh

²⁶ Mahche Jerusalem a amah in athlenglai aroi eisoh anchunpinatu insuulsa; cheva anmah annaam in amahta trihsei, alamva amahkho aroi inkhatsa ta anmah in malotnohsei.

²⁷ Chuta Barnabas in amahta aloulohpei, mahche Saul in Akpu ta lamma khatloh a amuhme che tunang in amahkuunga trongme chuche khatloh a Damaskas a amah in Jisu Khrista akminga karaanga trongme tihkha ankuunga asonpei.

²⁸ Nga tloh a Saul in Jerusalem a anmah ankaar a luut a sehloon atlohpei,

²⁹ amah in aril kraanga, Akpu akminga trong araanpei. Che amah in Kriik trong aktrong eita indah veia trongpia anjetpiei, chuta amahta anthatnatu anjon.

³⁰ Cheva amah unaoin mahchuta anrompeia, amahta Tarsas a anmithlahpei.

³¹ Nga tloh a Judia na, Kalili na mahche Samaria na khakla ei in leh oi anphah; mahche Akpu ta trih a Akseenga Li a inboh a miitam ahanral.

Pitar In Lidia leh Joppa a Seh

³² Pek Pitar in ankaar a sehloon tloh a amah in Akpu kuunga akseeng miian amna Lidia a Jungsa.

³³ Mah khanna akming Anias an ong khumchunga kum kirit intolh a apangnem thi mii khat aktuuk.

³⁴ Che Pitar in amahninga ason, “Anias, Jisu Khrista in nangta namthratpei, inthoua nantolhnakha seemro.” Cheva kak hanga amah in inthousa.

³⁵ Mahche Lidia ah che Sharon ak am annaamte in amahta anmuhpei, cheva anmah in Akpu kuunga inheisei.

³⁶ Ipek Joppa a akming Tabitha ta an ong aroikhat louam, Tabitha arthava Dorkas an ongna. Amah Kumei ivah akthra thloultloh ah che amlantheih ah thra.

³⁷ Mahnichunna amah in kna a thisa; cheva amahta ansilche, achungnung khumma anmitolhpei.

³⁸ Lidia va Joppa soh innai taningva, Pitar va mah khanna amta antheih a, kupa innihta amahkuunga mathlah a, “Nirilvolla mathilnoh a kankuunga thlengro;” ta angenpei.

³⁹ Chunna Pitar in inthoua anmahsoh sehjousa. Che amah in athlengsoh, amahta achungnung khum a ankalpipei. Trulmeinu annaam in akom anngirhche trap a amsei, Darkas in anmahsoh an amjou laia akthrui inluutei mahche aktlei puunrei eita amimuh.

⁴⁰ Chuta Pitar in annaamteta apaalla amthruh eiche akhuk makamma angenpei; che aruungtonga inheia ason, “Tabitha, inthouro.” Chunna amah in meengsa, che Pitar ta amuh in inthoua inboksa.

⁴¹ Mahche amah akutta jamma amahta kaia amthohpei. Mahcheva akseeng mii leh trulmeinu eita onga anmah ankuunga kumeita kiringa amlanei.

⁴² Cheva mah i Joppa apumtein arompei, che mii jikcha in Akpu ta anmilotpei.

⁴³ Che Pitar in Joppa a nijan khalmo soot a savun akseem Simon inkhatsoh amjousei.