NOONNA THLOU 3 - Akthar Trongirhna (BSI)

Akehtu Miikhatta Amthrat

¹ Ipek Pitar leh John in ngennatu pungku atlak in mathruunna thlaam a hangsei.

² Che apok lainata sehtheihnoh mii khat anthlen mahmiichu aknirel mathruunna thlaam a Akthrathonga akluut mii eita doh nihnatu ansih mii.

³ Pitar leh John in mathruunna thlaamma anluutsam amuh in akut doh a amsa.

⁴ Mahchunna Pitar in John soh amahta minna an anche ason, “Kannihta kaniannro.”

⁵ Chunna amah in ankuungnata jangmekhat kaphah tunaita ramrinna alouannei.

⁶ Chuta Pitar in ason, “Keiva harngou khatkho ra–ao doonnoh ang, chuta keiin kdoonta nikuunga kamlanche; Najareth Jisu Khrista vaa minga sehro.”

⁷ Cheva amah akchangtong kut matuh a domma amthohpei, mahcheva kak hanga amah akeh leh akehringta trangsa.

⁸ Mahchunna amah in inthomma ngirsa che sehsa anmahsoh inruuijoua mathruunna thlaam a luutsa, inthomma seh a Ringpu ta ampaakpei.

⁹ Mahchunna amah in inthomma ngirsa che Ringpu ta mapaak mapaak a anmahsoh mathruunna thlaam a luutsei. Amah in sehtheih a Ringpu ta ampaakkha mii naamtein anmuhpei,

¹⁰ mahche mahmii in mathruunna thlaam a Akthrathong amunna inbok a doh a aksaa mii khasa ta anrompei; cheva amahkuunga aksuukthlou khanna salungkhousei.

Mathruunna Thlaam a Pitar in Trong Araan

¹¹ Amah in Pitar leh John ta antuukpilaia, mii naamtein ankuunga tlaanna Solomon Innmuk khanna miinaam in salungkhoua thlengsei.

¹² Che Pitar in anmahta amuh in ankuunga trongsa, Israel miieio, mah thlouin jarella salungkhou sachoume, kannih kantuuia chunohle malot akli a amahta akeh a kamisehrella nannih in kaniantlinga amschoume?

¹³ Abraham Aisaak mahche Jakop vaa Ringpu, inih ipa ipuei Ringpu roijuih Jisu ta paar amthratpei. Mahmii chuva Pilat in mathlah tangta anngirhlai nannih in namilanpei mahche amaikuung talla indahchou.

¹⁴ Chuta nannih in Akseeng khatkho Akchimlamsehta indahsachou, che nannih turella miikhatta amthlahnatu nanjapei,

¹⁵ Ringpu in kthinata ringsa Inthohna Akputa nanthatpei, kannih in mairella sakhisung.

¹⁶ Amah akmingta malot apaalla mah kupa i nannih in nanmuh nanrom mii i amtrangpei; che Jisu apaalla malot in amah aruung i nannaamte maikuunga mapung ampha.

¹⁷ “Chunna ipek unaoeio, nannihta nanipuuiin anloutloh khananga, nannih inkho romnoh a nantlohpeita krom.

¹⁸ Chuta Ringpu vah ringraan in annar a matsah a ansonche tihva Khrista in klah knang adoutu ta amah in amthlungpei.

¹⁹ Alamchunna nannih in nanril thlenga veikhat inheive. Chunna nannih nanlehta ammuhtu. Mahlaia Akpu tinga akthar rilchu thlengtu,

²⁰ mah chuvah nannih turella Jisu Khrista ta thlou athunche amthlahtu,

²¹ anaamte akthar laichu aphahnohmiil amahva ringram a amtutla mah chuvah amaanata Ringpu vaa akseeng ringraanei annar a amtrongpei.

²² Moses in asonei, ‘Akpu Ringpu in keita keijok keikemnanga nan unao kaarnata ringraan inkhat amthruhtu. Amah in nankuunga ason naamte rungaive.

²³ Mahche mai suuktu, mah chuvah amah ringraan chunna asonta thra arungainoh li makheita miikaarnata ammangtu.’

²⁴ Mahche Samuel nata akthleng ringraan annaamte in mahche amah aknua akthleng in ansonkha ipek akho ansonmang.

²⁵ Nannih ringraanei mahche Ringpu in nanpa nanpu ankuunga amlan trongirhnavaa asasachou ta Abraham kuunga ason, ‘Vaknu akthlengsam nantu nante a tukleiram a am taploikuung annaamtein doi anphahtu.’

²⁶ Ringpu in amah aroita amringpei, nannaamte nantak a nanthratnohnata inheia nannihta doi amlannatu amahta matsah a nankuunga amthlahpei.”