NOONNA THLOU 2 - Akthar Trongirhna (BSI)

Akseeng Li Thleng

¹ Pentikos aknichu athlengin, anmah naamte in amunchunna inchunna louamsei.

² Che kak hanga aktranghou ringramnata thlengsa, che anmah in anbokna innkha apumtea sipsa.

³ Cheva machunna mei nanga khalmo ahoutrang intheihsa, che mii naamte anchunga chuungsa.

⁴ Annaamte Li Akseeng in sipsei che aktlei tronga trong amithronpei, Li in atrongnatu antakchunga amlan nujuih a.

⁵ Ipek ringram athlanga ak am jaatboom naamtea malot aktrang Judiei Jerusalem a ammei.

⁶ Cheva mahou chunna miitam thlengjousei, che anmah in inhaltlamsei, alamva annaamte in anmah antak antaktronga trong antheihpei.

⁷ Che anmah in salungkhou seia anson, “Mah aktrong naamte ei i Kalili na miinoh eime?

⁸ Che khatloh a anmah in antrongi itrong itronganga itheih peime?

⁹ Parthia na, Media na, Ilami na Mesopotamia na, Judi na Kappadonia na, Pontas na che Asia na,

¹⁰ Phrikia na, Pomphilia na, Ijip na, che Sirini na vei Libia ramna che Rome ak an akthleng Judi leh akseengnoh Judi ei,

¹¹ Krita leh Arabia na mii in antrongta itrongnanga itheih i Ringpu atuui thlousa.”

¹² Annaamte salungkhoua inhaltlamsei cheva khatleh khat insonsei, “Mah i artha jangansonna meio?”

¹³ Chuta arou inva anmahta manuih a anson, “Anmah in akthar ngangli tuii inruisei.”

Pitar in Trong Araan

¹⁴ Chuta Pitar in somlei khatsoh inruuia angirhche hou inkaanga onga ankuunga asonei, “Judia leh Jesusalem a am miieio, mah i nannih in nanromchu veiso, kei kitrongi keirungaive.

¹⁵ Alamva mahmii ei i nannih in namidonnanga inruinoh ei, alamva ipek juktiing pung inthumta tlamang.

¹⁶ Chuta mah i ringraan Joel in atrongna khasa.

¹⁷ ‘Achena akniva oinang veitu, Ringpu in sonna amdang, chuta kei kikli anruungnaamte chunga kpoihtuei, che nansakupa, nansakumei in anphoongtu che nannih naolon in muh nanphahtu khatkho aktar ei in anmang mangtuei,

¹⁸ Kei roijuih kupaleh kumei anchungakho mahchunanga intrimma veitu, mahlai chunna kei kikli anchunga kpoihtuei che anmah in anphoongtu

¹⁹ che aksuuk tupotchu marvaan achungnata kammuh uchou che thalei athlanga daang jikcha, thii mahche mei khatkho meikhu ahu.

²⁰ Kini in inthim usa che thlakho thii nanga veitu, amahnoh amahnoh kliinthlou mahche muhphunoh muhna akni veitu, Akpu vaa akni athlengnoh amaa a.

²¹ Chunna tukhat in Akpu mingta ak ong miirel in inkal anphahtu.’

²² “Israel nannaamte keiin kison i rungaive, Najareth vaa Jisu Ringpu in tuuivaa athlousoh salungkhousoh, che daangsoh amah apaalla nannihta nanimtheih Akpu i nannih nantak in nanrom.

²³ Ringpu in matsah a romma amah in inlitnoh luunga amchaang aknujuih a Akpu ta nankuunga nanimlan, nannih in amahta louva trongsuur amnoh kut in thingkharh a namithlupei.

²⁴ Chuta Ringpu in kthivah klah knangnata majak a amahta amringpei, alamva amahta akthi in suura sih cheknohsa.

²⁵ Alamva amahrella Devit in ason, ‘Keiin Akputa lai amrella kimaa a kimuh, alamva amah in kikchang kuttonga am chunna keiin inloknohtung,

²⁶ Churella kiril in tlansa, che kamlei inkho aroomthoksa; thloiralla kiruungin matuura ringusa.

²⁷ Alamva kei kiklita repnanga mathlahnoh uche, nohle nang Akseeng Inkhat in thikhuta kammuhnohtu.

²⁸ Chaan lamta nangin keikuunga namrom peiang; nangin keisoh niam in keita roomthok namsuuktung.’

²⁹ “Unaoeio, keiin nankuunga inthohna ipa ipu Devit rella atak a kisonjava amah atakva thisa, mahche anphuumpei, che amah rusuunva mi in phah a inihsoh ammang.

³⁰ Churella ringraan khat veia, amah in aromcheva Ringpu in amahkuunga trongchet amtloh, tihva ruungtinga amah atu ate ankaar nata inkhat in amah phompii ah amboktu,

³¹ amah in matsah a muh a Khrista in veikhat aringna turella trong, mah chuvah amahta thikhua mathlahnohtu, chekho aruungin thranoh seengnoh muhnohtu.

³² Mah Jisu ita Ringpu in amringpei, che inih inaamin mairella sakhi veisame.

³³ Mahchurella Ringpu kut akchanga amahta ralla amliinpei, che Pa tingna Akseeng livaa trongchet aphahpei, nannih in nanmuh mahche nantheih i amah in nanchunga nanipoihpei.

³⁴ Alamva Devit va Ringram a kalnoh, chuta amah atak in ason, ‘Akpu in kei Akpu kuungah ason, nangin kei kikchanga inbokro,

³⁵ keiin nak andah mii eita nang nikehchuunna kamveinohsoot.’

³⁶ Churella Israel taploikuung naamtein tak a romeiso mah chuvah nannih in namithlu Jisu i Ringpu in amahta Akpu khatkho khrista amveipei.”

³⁷ Ipekva anmah in mahchuta antheih in anmah anril khalmo asokpei, che Pitar leh raangroi aktlei ankuunga ansonpei, “Unaoeio, kannih in jangkantloh usame?”

³⁸ Chunna Pitar in ankuunga asonei, “Nanril thlengve, mahche nannih nanlehnata naniipnatu Jisu Khrista akminga nannaam inlupve mahche nannih in Akseeng Li vaa kutthol nanphahtu.

³⁹ Alamva trongchet i nannih khatkho nansa turella mahche ramlah a amii eiturel Akpu Ringpu in annaamteta a ongna.”

⁴⁰ Mahche aktleitrong jikchasoh inruuia amah in ankuunga sakhi amlanei che anmahta bungthok a asonei, “Mah thranoh ringnatluun nata inkalve.”

⁴¹ Nga tloh a amah atrongta aklou ei in inlup anphahpei, che mahnichunna li akpul inthumvak amchunpei.

⁴² Chunna raangroi in amitheihna a, anchunna a, tol ankhoina a mahche ngenna a annaam in anril amiluutpei.

Amlot mii Ankaar a Akthar Chaan

⁴³ Li naamte anchunga intritna thlengsa; mahche raangroi anpaalla salungkhouna khatkho daang jikcha antlohpei.

⁴⁴ Mahche amlot mii naamte inchunna amjouei che poot anaamte inkhatveia miinaam in inchunna anhuina;

⁴⁵ Anmah in andoon ankhaal ram muul ansih pootcheita juura darkaar am ankuunga ansem.

⁴⁶ Chuche akni aknileh mathruunna thlaam a thlengjouei anmah in inn inna tol khoia roomthoksoh inruuia mahche anril liinna ansaak an injou,

⁴⁷ Ringpu ta amipaak inruuia mii naamtein rilvol anphah, mahche inkal akphah eita aknirel Akpu in mii daak a anmasing amralei.