NOONNA THLOU 1 - Akthar Trongirhna (BSI)

¹ Matsahrem nirik a, Theophilas, Jisu in thlou atlohna mahche matheih amthronnata anaam kimjihpei,

² amahta Ringram a ahanni khaphah, amah in achar Raangroi ankuunga Akseeng Li apaalla amtheih trongthuun anaamtekho kimjihpei.

³ Amah in alah anang aknua anmah ankuunga kiringa malot aja sakhisoh ammuh ei, nijan sopli Akpu vaa ringram kurung huunna relna trong.

⁴ Anmahsoh a amjou laia, Jerusalem mathlah a ansehnoh natu anmahta akchaak ei, chuta Pa vaa trongchet ngaaknatu ason, “Mah i keikuungnata nantheih khasa,”

⁵ alamva John inva nannihta naniluppei, chuta nannihvah mi innata sootnoh luunga Li Akseenga inlup uchou.

Jisu ta Ringramting Ahan

⁶ Chunna anmah in pulla anthlengche akuunga anrui, “Akpu, ipek lai in Israel ankuunga amaana kurung ramkha veikhat namleng tupotme?”

⁷ Amah in ankuunga asonei, “Pa in amahvaa achek amneh a kak a asih lai mahche manjangnuramta nannih in nanromphunoh.

⁸ Chuta Akseeng Li in nanchunga athlenglai, nannih in tuui nanphahtu; mahche nannih in Jerusalem a, Judia naamtea, Samaria a che thalei adonga anaamte phah a nannih in keitu sakhi veiuchou.”

⁹ Mahchuta asonlai, amahta anna amsei, cheva sumphai in amahta ahanpeia muh cheknohsei.

¹⁰ Amah in akalsuunga anmah in ringramting intoungolh a an anlai, anve, puungou insuul silh mii innih in ankomma ngirra,

¹¹ anson, “Kalilina miieio, nannih in jarella ngirra ringramta anna amchoume? Jisu ta nannih nankuungnata ringram a ahan nanmuhnanga, veikhat athlengkho nannih in nanmuh umang.”

Judas Angutsil

¹² Cheva anmah in Jerusalem akomma am kouh inkhatvaa lam chorophol muulnata Jerusalem a inlengsei;

¹³ anmah in ohchunna anluut in, Pitar, John, Jems, Andriu, Philip, Thomas, Bartholomio, Mathiu, Alphias asa kupa Jems, Jilot an ong Simon, mahche Jems asa kupa Juda in an amna achungtong khumma kalsei.

¹⁴ Anmah naamte kumeieiso, Jisu anu Meri mahche anaoeisoh ril inkhatveia ril luut a anngenjou.

¹⁵ Mahlai chunna unaoei ankaarna Pitar in anngirhche (mah akpulmii eichu reijalei sopnivak ei) ason,

¹⁶ “Unaoeio, Akseeng Li in ringjih a, Jisu jurhnatu akchingmii Judas rella David in matsah a asonkha atlungna veisa.

¹⁷ Alamva amahvah inih ikaar akho inkhat vei mahche amahta routloh akho jao.

¹⁸ (Ipek amah kupa in athratnoh khaan lou inkhat aklei, chunna amah in inthoia, avon puuk a aril naamte in sonna intheksa.

¹⁹ Mah i Jerusalem vella am mii naamte in anrompei, chunna mah loupukchu antronga Alkeldama ta an ong, mah chuvah Thiivaa Loupuk.)

²⁰ Alamva mah i Leila nirik a injihsa, ‘Amah in a amnakha ksangkhem veiso che mahchunna tukhat inkho paalnohso’ mahche ‘Amah athlouta aktlei in angut masilso.’

²¹ Chunna kankaarna inkhat Akpu Jisu in lai amrel aseh alonrel anruuipijou,

²² aklup John nata mathronna amahta kankaarnata achunga ahanphah a, kannihsoh inruuijou khat in Jisu thinata veikhat ringchu sakhi veitu tla.”

²³ Chunna mii khat ancharnatu Barsabas an ong Joseph, Justus sakheina mahche Mathias ta andompei.

²⁴ Che amah in ngenna ason, “Mii naamte rilta akrom Akpu, mahmii innih ankaarna inkhat nicharchu kanimmuhro

²⁵ Judas in amthlah raangroi thlou mahche roitloh phomta lohnatu, amah in aphomkhan sehsa.”

²⁶ Che anmah innihturel reipak chaang an anpei, mahchu Mathias kuunga tlasa; cheva amahta raangroi somleikhat ankaara amijaopei.