METHIU 7 - Akthar Trongirhna (BSI)

Aktleita Pichaar Tloh

¹ “Nannihta pichaar nanitlohnoh natu, miita pichaar tlohnohve.

² Alamva nannih in pichaar nantloh khananga nannihkho nanitlohtu, che nannih in nan olna chaang akhanna nannihta inlengah nanioltu.

³ Che nang nimit ah thinglip amva madonnoh chea, chuta jarelna niuhnao mit ah thinglip inniimta nianme?

⁴ Nang nimit ah thinglip ammangche khatloh a niuhnao mitna thinglip anniimta loutang nitihme?

⁵ Akthra veisin miieio! Matsah a nang nimitna thinglipkha loumanro, che niuhnao mitna thinglip iniimkha nilohnatu seenga nimuhtu.

⁶ “Akseeng pootta uiiting malannohve chunohle ra–aopiita vok kuungah loonnohve ankeh a chuunna ankhoihtu che inheia invuivia nanithreltu.”

Nih, Jon, Beeng

⁷ “Nihve, nanimlantu, jonve nanimtuuktu, che sunve nanimhoongtu.

⁸ Alamva, aknih mii in anphah, akjon miikhan antuuk, che inkhaar akbeengmii khata amhoongtu.

⁹ Nankaara tunangkhat in asa kupa in tol anihta lung amlan ume?

¹⁰ Chunohle naoin nga anihta muruul amlan ume?

¹¹ Mahchunanga akthranoh apavei choulakho naoningvah akthra kutthol malanta romchoule ringramma am nanpa in aknimii kuunga jikcha ralthloia akthra pootchei nanimlan ume:

¹² Churella nannih in miita nankuunga namitlohja khananga nannih inkho mii kuungah tlohve, alamva mah i Moses trongsuur khatkho ringraan antrong khasa.”

Ansiik Laam

¹³ “Ansiik kolon khanna luutve, alamva anrol kolol che anja lam khavah maangna vei, che mahchunna akluutmii tammei.

¹⁴ Alamva ansiik kolon khatkho sehna ansiik lam khava ringna vei, che mii steta luut uningei.”

Thing Mahche Akrah

¹⁵ “Chimnoh ringraan eita jih a anve apaalla sadam puunreita silh a nankuunga thlengei. Chuta anrilsuungvah aktraam uiiramuiisei.

¹⁶ Anmah akrah ah nanromtu, mii in kulingrui nata nganglirah che kuling thingnata thotthing akrah nanritme?

¹⁷ Mahchunanga akthra thingin akrah thra inrah. Chuta akthranoh thingin akrah thranoh inrah.

¹⁸ Akthra thingkhat in thranoh akrah inrahnoh, chunohle akthranoh thingin akrah thra inrahnoh.

¹⁹ Akrah thra inrahnoh thing anaamte phuura meikaara tanna alon.

²⁰ Churella nannih in akrahnata nanromtu.”

Nannihta Naniromnoh ang

²¹ “Keininga ‘Akpu, Akpu’ keiong mii naamte in ringram kurung huunna ah luutnoh uchou, chuta ringramma am kipa in amdon aktloh miiruin luut uning.

²² Mahni chunna mii aktam in keining antihtu, ‘Akpu, Akpu, nang nikminga trong akphoong, nang nikminga khousaar amnom che nang nikminga salungkhouna thlou jikcha aktloh miinoh sungme?’

²³ Mahlai chunna keiin indanglonga kison uchou, tlohphunoh aktloh eio, keimah vesa, keiin naniromnoh luungang!”

Aksing Khatkho Kmong Inntloh

²⁴ “Churella tunangkhat in kisonita arungeihche aktloh khavah aksing mii nanga lungpii chungah inntloh khasa.

²⁵ Che khusuur thliraang thlenga raanna innchunga marat a tuii liinsa, chuta innvah puurnoh alamva innkha lungpii chungah amngirh.

²⁶ Pekva tungangkhat in kisonita arungeihche aktlohnoh khavah kmongmii nanga philchunga inn aktloh khasa.

²⁷ Che khusuur thliraang athlengin raanna innchunga marat a tuii liinsa, chunna innkha puursa, mahche tlikkirra inriilsa.”

Jisu vah Akchek Amneh

²⁸ Chunna Jisu in anaamte i asonche arungai miita amtheihna trongkhanna anmah in salungkhousei.

²⁹ Alamva amah in ringjih lulokei nangnoh a akchek amneh mii khat veia anmahata amtheih ei.