METHIU 5 - Akthar Trongirhna (BSI)Muulchungah Amtheihna ( Met 5:1—7:29 ) 1 Jisu in miitam inboom amuhlai muul khatchunga kalsa, che amah in anbok in, aroikho amahkuunga thlengsei. 2 Cheva amah in ankuunga matheih amthronpei: Akchim Roomthok Tlan ( Luk 6:20–23 ) 3 “Doiphah eikha Li ah anran miikhasei, alamva ringram huunnakha anmah anta. 4 “Doiphah eikha marhuui miikhasei, alamva anmahta amthlantuei. 5 “Doipha eikha inruruh miikhasei, alamva anmah in thaleiram anphahtu. 6 “Doiphah eikha akchimlamseh rella traamkraal akphah miikhasei, alamva anmahta amvahtuei. 7 “Doiphah eikha rilvoltheih miikhasei, alamva anmah in Ringpu rilvol anphahtu. 8 “Doiphah eikha ril akseeng miikhasei, alamva anmah in Ringpu anmuhtu. 9 “Doiphah eikha leh oi akthlenmii khasei, alamva anmahta Ringpu vaa asa ih a aongtuei. 10 “Doiphah eikha akchimlamseh relna anchut miikhasei, alamva ringram huunnakha anmah antasa. 11 “Doiphah eikha kei turella mii in bilam anaamtea machimnoh janoh a thranoh amithlakche saal raanna anchut miikhasei. 12 Roomthok a tlan veive, alamva ringramma nannih nankhaan khalmo liin, oinanga nannih nanmaa a anmah in ringraan eita anchutei.” Machih Khatkho Akvaar ( Mak 9:50 ; Luk 14:34–35 ) 13 “Nannihva thaleiramtu machih sachou, chuta machih in a alnohsale, khatloh a a alnatu itloh ume? Jakhatkho athratna amnohsa, chuta ilonche ikeh a ichuun uningsa. 14 “Nannihva tukleiramtu akvaarchou, muul inkhatchunga anseem khuuboom inthup janoh. 15 Tunangkhat inkho mitton ataarche luktoong makhumma sinohme, chuta ataarna chunga ithongche innsuung apumtea amvaar. 16 Mahchunanga, nannihva akvaarkha aktlei miikuung akho vaarso, chunna anmah in nannihva akthrata muh a ringramma am nanpa in paarthratna veiso.” Trongsuur Relna Amtheihna 17 “Moses trongsuur nohle Ringpu trong akson ringraan antrongta ammaang thleng tih a kamdonnohve, keiva ammaang thlengnoh ang, chuta amthlung thlengsang. 18 Alamva, ringram mahche thalei amaang nohmiil Moses trongsuurnata tikta ansun nohle thretta ankai alip anaamte atlungnohmiil maangnoh tuta keiin nannihta taktak a kisonchou. 19 Mairella tunangkhat in trongthuun akaarnata andihrem inkhatta khoia mahchunang mii ninga amtheih amahta ringram kurung huunna a andihrem tih a aongusa. Chuta tunangkhat in majuih a miita matheihle ringramna amahta anrolrem tih a aongusa. 20 Nannih in akchimlamseh nanveiche Moses trongsuur lulok leh Pharisi ei akchimlamseh ta ralnoh chouleva nannih in ringramma luutnohluung uchouta kisonchou.” Malunghaang Relna Amtheihna ( Luk 12:57–59 ) 21 “Nangin mii thatnohve chuta tunangkhat in mii thatle pichaarnia amahvah thihnaringna veitu ta leithingnata anson nantheihpei. 22 Chulata tunangkhat in auh anaota biklam tihleva jama pichaara thihnaringna veitu tlasa, che tunangkhatta mongo tihleva repnanga thihnaringna aphahtuta nankuunga kisonpeichou. 23 Chunna nangin thiilla nikatphu kutthol nithlenlai niuhnao khat in nikuunga ajanoh intheihchele, 24 nikattuphu kuttholkha thiilkuung amaia nimahche inlengmanna niuhnaosoh injamanro. Che thlenga nang kuttholkha katro. 25 Niandah miisoh inruuia lamma nansehlai intha a inchamve, chunohleva amah in nangta pichaarpu kuunga namthruhtu. Chuleva pichaar Akpu in nangta jama ankuunga masilla simma niluutna veitu. 26 Keiin nankuunga tak a kitihchou, nannih in achena namilan tuphu baobeh nansiin nohmiil mah khannata inthruhnoh uchou.” Miimei Miisa Karaam rella Amtheihna 27 “Nannih in miimei miisa laalnohve tih i leithingnata nantheihpei. 28 Chuta tunangkhat in kumei khatta dia anleva arilsuunga amahmii khasoh inlaalthlou atlohpei. 29 Chunna nikchangna mit in nangta aleh ah nakthlakle kholla lonro, alamva nitak apumteta repnangah nakthlakpi ngutva nitakna akhol inkhat amnoh in nichuungna veitu. 30 Che nikchang kut in nangta aleh ah nakthlakle, tanna lonro, alamva nitak pumte repnanga nakthlakpi ngutva nitakna akhol inkhat amnoh in nangtu nichuungna veitu.” Kumei Madah Rella Amtheihna 31 “Maichung lakho anson am, ‘Tunangkhat in akmeita inthrekpi leva anthrekpina anjih rai malanso.’ 32 Chuta kumei kupa laalthlou nanoh a tunangkhat akmei inthrekpi miiva akral amsal amvei, che tunangkhat in anthrekpi kumeita changvaangle kumei laalthlou atlohpeita nankuunga kisonchou.” Suitatloh Rella Amtheihna 33 “Veikhatlakho nannih in leithinga anson nantheihpei, ‘Mah chuvah nangin chimnoh a suita tlohnohro, chuta nang suitakha Akpu ninga athlou veia tlohro.’ 34 Chunna keiin nannihta kisonchou, suita tlohnoh luungve thranoh, ringramkho sonna tlohnohve, alamva Ringpu amna, 35 thaleikho sonna tlohnohve, alamva amah akehchuunna, Jirulalem slakho sonna tlohnohve, alamva anrol kurung ankhuuboom. 36 Nikang matuh a suita tlohnohve, alamva nangin sam akmol khatrukho mangou nohle mavom cheknohche. 37 Chuta nangin ‘Oi’ nitihkha ‘Oisa’ che nangin ‘Ah’ nitihkha ‘Ah veisa’ alamva maannata akralkhava akthranoh tingnasa.” Mangsak Lou Rella Amtheihna ( Luk 6:29–30 ) 38 “ ‘Mit khatvaa angut mit inkhat, ha inkhatvaa angut aha inkhat’ tih i nantheihpei. 39 Chuta akthranoh miita roujanoh veta kisonchou, chunna tunangkhat in nikchangtongna nimaipi a nakbeengle khattingkho inheia roudohro. 40 Tunangkhat in nangta atuulmuk ah thlenna nilungluut ansuulta lou dile nilukphaikho malanro. 41 Che tunangkhat in nangta mel inkhat senoh janoh naktihle innih tihpi melkho sehpiro. 42 Nangkuunga naknih miita malanro, che amah in nang ningnata apujale inlenga masiinnohro.” Niandah Miita Ringvolro ( Luk 6:27–28 , 32–36 ) 43 “ ‘Nangin nanthringpi miita ringvolro, che niandah miita intirhro’ tih a anson nantheihpei. 44 Chuta keiinva niandah miita ringvolro, namtommii khata doi malanro, nangta nantirh miita akthra tlohro, che nangta nak antheihnoh a nakchutmii turelva ngenveta kisonchou. 45 Chuleva ringramma am nanpa vaa asa veiuchou, alamva amah in akthra leh thranoh anchunga kini amsuuk, che akchimlamseh leh akchimlamseh noh anchunga khu amsuur. 46 Alamva nangta nakringvol miikhopta ringvolchele jaknang khaan niphahtu amme? Baobeh thrai mii inkho mah chunanga tlohnoh eime? 47 Che nannih in nan uh nannaota mathruun chouleva aktlei miikuung avah akral jaknangthlou nantloh usa? Baobeh thrai miiluung inkho oinanga tlonoh eime? 48 Chunna ringramma ak am nanpa in athrat nangjimma nannih inkho akthra veive.” |
Tarao New Testament - Akthar Trongirhna
Copyright © 2017 by The Bible Society of India
Used by permission. All rights reserved worldwide.
Bible Society of India