METHIU 4 - Akthar Trongirhna (BSI)

Jisu ta Seitan in Amdoi

¹ Cheva Jisu ta Li in rapril kaara Seitan in amdoinatu aphurhpei.

² Jisu in suun sopli leh khulouh sopli saak in ahel, mahchuche aknua amah in traamsa.

³ Amdoi in amahkuunga thlenga ason, “Nganginta Ringpu vaa Asa kupa chele, mah lungita tol aveinatu jathang malanro.”

⁴ Chuta Jisu in amsang, “Mah i injih a am, mii in tol apaalla ringnohtu, chuta Ringpu vaa anarnata anthruh trongkhanna ringtuei.”

⁵ Chunnata Seitan in amahta phurh a akseeng khuuboomma asehpipei, che mathruunna thlaam ankaangrem abungchunga ambokche,

⁶ amahkuunga ason, “Nanginta Ringpu vaa Asa kupa chele, maannata injaamro; alamva mah i injih a am, ‘Amah ringroita nangturel madonna amthlahnatu jathang amlatu, che anmah ankut roudoh a nangta nakdomtuei, chuleva nang nikehkha lunga inrotnohtu.’ ”

⁷ Jisu in akuunga ason, “Veikhatla mah i injih a am, ‘Nangvaa Ringpu Akpu ta madoinohro.’ ”

⁸ Veikhatla, Seitan in amahta khalmo inkaang muul inkhat a aphurhpei, cheva tukleiram kurung huunna leh anmah paarthra anaamteta akuunga ammuhpei.

⁹ Che amahkuunga ason, “Nanginta keita intolhtlep a kamthruun cheleva, mah naamte i nangkuunga kamlankir uche.”

¹⁰ Mahchunna Jisu in akuunga ason, “Seitan sehrosa! alamva mah i injih a amsa, “ ‘Nangvaa Ringpu Akputa mathruunro “ ‘che amahruta rou tlohro.’ ”

¹¹ Cheva seitan in amahta amahpei, che anve, ringroi in thlenga amahta rou antlohpei.

Jisu in Kalili ah Thloutloh Amthron

¹² Pekva John ta ansuurpei ta Jisu in atheihlai amah in Kalili a sehsa.

¹³ Amah in Najareth amthlahche Kaparnaum a seh a tuiiboom akom Jebulun leh Naphtali ramma amsa.

¹⁴ Chunna ringraan Isaiah in asonkha atlungna veisa, mah chuvah:

¹⁵ “Jebulun vaa ram, Naphtali vaa ram, tuiiboom akomma, Jordon vanna Kalili na Jental,

¹⁶ inthim kaara ak am mii in akthloirem akvaarkha anmuhpei, che akthivaa aniim ak am mii turella akvaarkha suuksa.”

¹⁷ Mahlai chunnata Jisu in nga tloh a sonna trongraan amthronpei. “Nanril thlengve, alamva ringram kurung huunnakha innaisa.”

Jisu in Ngaman mii Manlita aong

¹⁸ Amah in Kalili tuiiboom akomma asehlai, Simon, Pitar ta an ong, che amah anao Andriu, unao innih tuiiboomma toro denna am amuh ei, alamva anmahva ngaman miiei.

¹⁹ Che amah in ankuunga asonei, “Keijuihve, che keiin nannihta mii akman kamvei uchou.”

²⁰ Kak hang achunna anmah torota anmahche Jisu ta anjuihpei.

²¹ Mah chunnata amah in asehlai, aktlei unao innih, Jebedi asa kupa Jems leh anao John mulisuunga anpa Jebedi soh inruuia anmah torota phoh a am amuh ei, che Jisu in anmahta aongei.

²² Kak hang achunna anmah in muli leh anpata mah a Jisu ta anjuihpei.

Jisu in amtheih ei, araanei, mahche amthrat ei

²³ Jisu in Kalili ram apumte seh a anmah Sinakok rella matheih a natna satna naamte mathrat a ringram kurung huunnavaa Akthra trongta sehseh a araan.

²⁴ Chunna Jisu akming Siria ram apumtea inthangsa, che natna rii alam jikcha ah akna aklah aknang, khousaar asuur, surpitum mahche apangnem akthi mii eita amthrat ei.

²⁵ Che Kalili ram, Dekapolis ram, Jerusalem ram, mahche Judea ram leh Jordon avaraalna mii khalmo tamin Jisu aknuta anjuih.