METHIU 25 - Akthar Trongirhna (BSI)

Kumei Somvaa Pandam

¹ “Chunna ringram huunnachu antak antak mitton choia changri intuukpinatu akseh rungaak som nangjimtu.

² Rungaak rangava kmongei chuta rangavah ksingei.

³ Alamva kmong rangava anmah mitton anchoilai, thaova maruuinohsei;

⁴ chuta aksing rangava anmah mitton soh inruuia thao abuura amiruui.

⁵ Changri in athil inva annaam mitchua inkirsei.

⁶ Chuta khulouh jaanjaia onga, ‘Anve, changri! Intuukpi natu inthruhvesa.’

⁷ Mahlai rungaak in inthoua anmah mittonta antaarpei.

⁸ Che kmong rangain ksing ranga ankuunga anson, ‘Nannih nanthao ste kanimlanve, alamva kannih mitton thisamsei.’

⁹ Chuta ksing rangain amisang, ‘Kannihkho che nannih turelkho inkhopnoh aja, akjuurkuungah seh a nannih turella leive.’

¹⁰ Che aklei ansehnua, changrikha thlengsa, thlouraang akcheva amahsoh inruuia changvaangbuh doonna ah luutsei, che innkho ankhaarpei.

¹¹ Mahchu aknua aktlei rungaak inkho thlenga anson, ‘Akpu, akpu, inn kanimhoongro.’

¹² Chuta amah in amsangpei, ‘Tak a keiin kisonchou, keiin naniromnoh ang.’

¹³ Alamva jih trangve, nannih in aknikho apungkho romnohchou.”

Roijuih Inthumvaa Pandam

¹⁴ “Alamva mah i mii khat in ramlah ah asehtum amah roijuih eita onga adoon akhaal naamte amsilkir khanangsa;

¹⁵ Amah roijuih inkhatkuungah talen ranga amlan, aktleikhat kuungah innih, mahche aktleikhat kuungah inkhat amlanei, anmah anmah in anchektu chaanga amlannei. Che amah atakva aklah ramma sehsa.

¹⁶ Talen ranga akphah in kak hanga seh a amlat in, ranganata ranga amchuungpei.

¹⁷ Mahchunanga talen innih akphah inkho innihnata innih amchuungpei.

¹⁸ Chuta talen inkhat akphahva seh a tuklei achohche, amah Akpu vaa baobehta amthupei.

¹⁹ Pekva lai khalmo asotnua roijuih ei akpu athlenglai, anmahsoh inruuia baobeh anmilatna akseh akthleng an anjoupei.

²⁰ Che talen ranga akphah in akuunga luut a akchuung talen rangasoh thlenna ason, ‘Akpu, nangin talen ranga namlan ang; anro keiin talen ranga kamchuungpei.’

²¹ Amah Akpu in akuungah ason, ‘thra nitlohpei, akthra khatkho malot aja roijuih; nangva thlou andih a malot aja taningcheva, nangta thlou akliinna kampuih uche; nang akpu vaa aroomthokna a luutrosa.’

²² Che talen innih akphah inkho akuungah luut a amah in amchuung talen innihkho thlenna ason, ‘Akpu, nangin talen innih namlan ang, anro, keiin talen innih kamchuungpei.’

²³ Amah Akpu in akuungah asonpei, ‘Thra nitlohpei akthra khatkho malot aja taningcheva, nangta thlou akliinna kampuih uche; nang akpu vaa aroomthokna a luutrosa.’

²⁴ Talen inkhat akphah inlakho akuunga luut a ason, ‘Akpu, nangva linnoh a niluh mahche, vornoh a amtlonche, karaang miicheta kiromche;

²⁵ chunna keiin naktrih anga seh a nang talenta tuklei choua tukleisuungah kimthup. Nangtakha oire.’

²⁶ Chuta amah Akpu in akuungah amsang, ‘Thranoh che aktal roijuih! Keiin linnoh a kiluh, che vornoh a kamtlon tih a nirompei?

²⁷ Chunna kei baobehkha baobeh amlattheih ankuungah namlan uta, mahche kithlenglai keitakha akchuungsoh kphah uta.

²⁸ Chunna akuungnah talenkha loua talen som ak amkuungah malanve.

²⁹ Alamva ak am ankuungah ralla kimlantu, che thloia an amna veitu, chuta tukhat ak amnoh akuungah amah in asihkhakho kilohtu.

³⁰ Che akanana amnoh roijuih iva apaal anthimna kaa a lonve, mahchunna sinthruui ah anmah anha amikettu.’ ”

Achena Pichaar

³¹ “Miivaa Asa kupa in amah paarthrasoh che ringroi annaamsoh inruuia anthlenglai, amah paarthra phompii chunga inbok usa.

³² Jatih naamte in amah kuungah inchuntuei, sadamkem in keelnata sadam athreknanga, anaamte khatleh khat athrektuei,

³³ che sadam in amah akchanga, chuta keel in amah akveitonga asihtuei.

³⁴ Chunna kurung in akchangtong ak ameita asontuei, ‘Thlengve, Pa adoi akphah eio, tukleiram amthron lainata nannih turel machaanga asih kurung arami changvesa;

³⁵ alamva keiin kitraamlai saakphu namilanang, keiin tuii kraallai iinphu namilanang, keiin rapkhei kiveilai nanlousoongang,

³⁶ keiin athlaia kiamlai nannih in puun namilanang, keiin kinat kisatlai nannih in saakphu namisaak ang, keiin simma kiamlai nannih in kikuungah thlengchou.’

³⁷ Chunna akchimlamseh in akuungah anmisangtu, ‘Akpu, tik a traam kanmuhchea saakphu kamisaakcheme, chunoh a tik a tuii niraallai iinphu kamilancheme?

³⁸ Che tik a rapkhei veia kanmuhchea kanlousoong cheme, chunohle athlaia niamlai puun kamilancheme?

³⁹ Che tik a ninat nisatlai chunoh a simma niamlai kannih in kanmuhchea nikuungah thlengsungme?’

⁴⁰ Che kurung in ankuungah amsangtuei, ‘Atak a nankuungah kisonchou, kei kiuh kinao antool antaangrem inkhatta nannih in vachah nantloh i nannih in mahkha keita nantloh ang.’

⁴¹ Chunna akveitong ak am ankuungah asontuei, ‘Phool akphah eio, kikuungnata insenga repnanga che amah ringroi turella amchaang ache amnoh meia sehve;

⁴² alamva kitraamlai saak iin kamlannohchou, tuii kraallai iinphu kamlannohchou,

⁴³ rapkheia kiamlai keilousoong nohchou, athlaia kiamlai puun kamlannohchou, kinat kisatlai mahche simma kiamlai keita keian thlengnohchou;’

⁴⁴ mahlaia anmah inkho anloumasangtu, ‘Akpu, nitraamlai, tuii niraallai, rapkhei veia niamlai, athlaia niamlai, ninat nisatlai, chunohle sim a niamlai tik a kanmuhchea nangta rou naktlohnoh sungme.’

⁴⁵ Chunna ankuungah amsangtuei, ‘Keiin nankuungah tak a kisonchou, khalmo antool antaangrem inkhatta rou nantlohnoh i nannih in mahkha keita rou keitlohnohchou.’

⁴⁶ Che anmah in ache amnoh tanti a sehtuei, chuta akchimlamseh eiva ache amnoh ringna a sehtuei.”