METHIU 24 - Akthar Trongirhna (BSI)

Mathruunna Thlaam Maangsam rella Jisu in Trong

¹ Jisu in mathruunna thlaam mathlah a asehlai, amah roijuih eiin akuungah thlenga mathruunna thlaamta amitheih.

² Chuta amah in ankuungah amsangei, “Nannih in anaamte nanmuh, muhnohrei choume? Tak a nankuungah kisonchou, lung khatin lungkhat chungah inthonga inmahnoh usa, anaamte inpilkirtu.”

Klah Knang Khatkho Chut

³ Amah in chorophol muulchungah anboklai, roijuih eiin inruktea akuungah thlenga anson, “Mah i tik a suuk ume, che nangin nithleng nasam daang mahche chup achena samchu khatloh a suuk ume kanisonro.”

⁴ Che Jisu in ankuungah amsangei, “Tukhat inkho chimnohting naniseh pinanohtu cheksilve.

⁵ Alamva ‘Kei i Khrista sang ta kikminga khalmo thlengtuei,’ che mii aktamta invaia nanisehpitu.

⁶ Che nannih in raal khatkho raalhou nantheihtu; romve mah chuvah nannih in inchoinohve; tihva mah i suuktutla, chuta achenavah nohmang.

⁷ Alamva jatih khat in jatih khat chungah che kurungram khatin kurungram khatchunga innah insuul suuktu, aram aramma saakchaal che runaangnu thou suuktu.

⁸ Anaamte i sapok in klah amthronnasa.

⁹ “Mahlai anmah in nannihta trihkhop klah knangting nanimlantu, mahche nanithattu, chuche jaat naamte in kei kikming rella nannihta nantirh tuei.

¹⁰ Mahlai mii aktam in malot inlengtuei, che khatleh khat inloontuei, mahche khatleh khat intirh suuktuei.

¹¹ Chuche akchimnoh ringraan khalmo inthruh ah mii khalmo invaia ansehpituei.

¹² Che thranoh in araltu miiringvol inlengtu.

¹³ Chuta achena phah a akdou mii khata akaltu.

¹⁴ Chuche amah kurung huunnavaa akthra trongraan i jaat anaamte ah sakhi veinatu tukleiram pumtea inraantu; mahche achenakha thlengtu.”

Trihkhop a Klah Knang

¹⁵ “Chunna ringraan Dainel kuungah amson intirhsa chimmnoh buurthlou in akseeng munna ngir nanmuhlai (akpaa in romeiso).

¹⁶ Mahlai Judia a am mii inkho muulla tlaaneiso,

¹⁷ innbunga am mii inkho innsuungah pootlou trumnoh eiso;

¹⁸ chela nao anpooileh naosonrooi anmah turelvah khalmo lahnasa a!

¹⁹ Che nao anpooileh naosonrooi anmah turelvah khalmo lahnasa a!

²⁰ Nannih in nantlaankha phalbi nohle inngeihni ah antuuk nanohtu ngenve.

²¹ Alamva mahlai tukleiram amthron lainata ipekphahkho lousuuknoh, che vaknuakho suuknoh tupot, trihkhop a klah knang suuktu.

²² Che mah aknieikha machomnoh leva, akringmii tukhatkho inkal phahnoh tuei; chuta acharche mii turelva aknieikha amchom usa.

²³ Chunna anve onna chunohle mah khanna Khrista amsa ta tukhat in nanisonle, mahchu malotnohve.

²⁴ Alamva Khrista khatkho ringraan veisin khalmo inthruhtuei che jaleva acharche miiluungkho invaia sehpinatu akliin daang leh salungkhouna khalmo amimuhtu.

²⁵ Anve, nankuungah matsahbeb a kisonpeichou.

²⁶ Chunna anmah in nankuungah ‘Anve, amahva raprilla amsa’ tih a nanisonle sehnohve.

²⁷ Alamva nisuuknata khu inthla in nitlaktonga kvaar nanmuhnanga miivaa Asa kupa in athlengkho mahchunang veitu.

²⁸ Akthi ruung amna a barmupii inlomma amtuei.”

Miivaa Asa kupa in Athlengna

²⁹ “Trihkhop a klah knang asuukche aknua kak hanga kni inthimtu, thla vaarnohtu, arsi in marvaannata tlatu, che marvaanna atuui anaam inloktu;

³⁰ Chunna marvaanna miivaa Asa kupava daangkha anmuhtu, che tukleiramna jaat anaamte in sinthruui tuei, che miivaa Asa kupa in amah atuuileh akliin paarthrasoh inruuia marvaan sumphai chungah thlengkha anmuhtu;

³¹ che amah ringroita pik ul anring ahousoh inruuia acharmiita ringroi eiin marvaan adongna khatnata adongna khat phah a, tukleiram akiing manli nata anmitlontu.”

Thotthing Nata Para

³² “Thotting nata para romve: Thotthing in abaak innoua abur asuunsamlai, thralpii innaisata nanrom.

³³ Chunanga, anaamte i nannih inkho nanmuhlai, Akpu in phalkuung phahsamma innaisata nanrom.

³⁴ Marvaan khatkho thaleiva maang umang, chuta kei trongva tiknikho mangnoh luungtu.

³⁵ Aknileh Pung tukhat Inkho romnoh.”

Akni Khatkho Pung Tukhat Inkho Romnoh

³⁶ “Amahvaa akni khatkho pungkha ringramna ringroi inkho, Asa kupa inkho che tukhat inkho romnoh, chuta Apa khop in aromning.

³⁷ Noah laia aksuuk khananga, miivaa Asa kupa in athlenglai akho veitu.

³⁸ Alamva tuiiliin akni aphahnoh maa a saa iinna, changvaanga che chang mavaanga Noah in mulisuunga aluutnohmiil ammei,

³⁹ che tuiiliin thlengta romnoh a annaamteta tuii in atlaannanga miivaa Asa kupa in athlengkho mahchunanga veitu.

⁴⁰ Chunna louva mii innih amtuei; inkhatva alohtu che khatva amahtu.

⁴¹ Kumei innih in buhsuk a amtuei; inkhatva alohtu che khatva amahtu.

⁴² Jih trangve, alamva nannihvaa Akpu in tik a thlengume romnohchou.

⁴³ Chuta mah i romve, inn Akpu in jaknang khulouh a inruin thlengtu tih romle amah in loujih a che amah innta makhoinoh uta.

⁴⁴ Alamva nannihkho inchaanga amve che nannih in namidonnoh pungkhan miivaa Asa kupa in thlengtu.”

Amlot Leh Amlotnoh Roijuih

⁴⁵ “Chunna aksing mahche malot aja roijuihta amah Akpu in inn lou amsil malot aja roijuihchu tume?

⁴⁶ Amah Akpu in athlenglai routloh a ak am roijuihkha doiphah veisa.

⁴⁷ Tak a nankuungah kisonchou mahchunanga miikuungah amah Akpu in adoon akhaal naamte amsiltu.

⁴⁸ Chuta akthranoh roijuih in akroua insontu, ‘Kei Akpu in thilla thlengtu’,

⁴⁹ che amahsoh rou atlohpijou eita khon amithronpei, che tuiibuh inruiieisoh ansaak an iinjou,

⁵⁰ roijuih khanna amdonnoh aknileh aromnoh punga amah Akpu in thlengtu,

⁵¹ mahche amahta innih suuk a atantu, che akthra veisin eisoh asihjoutu, mahchunna sinthruuia anha amikettu.”