METHIU 23 - Akthar Trongirhna (BSI)

Trongsuur Lulok leh Pharisi eita Amthritna

¹ Che Jisu in miitam leh aroi ankuungah asonei,

² “Ringjih lulok mahche Pharisi eiin Moses anbokna a inbokei;

³ Churella nannih in athlou veia nantlohnatu anmah in nanisonkha ngaak a tlohve, chuta anmah in antlohthlou nujuih avah tlohnohve, alamva anmah in trongvah anraan, chuta athlouvah tlohnoh ei.

⁴ Alamva anmah in akrikpoot anphurh cheknoh lep a miidarchunga anthong. Chuta anmah antak inva ankut majung inkhat inkho puur indah ei.

⁵ Chuta anmah anthlou naamteva mii in anmuhnatu antloh. Anmah in ringjih trongta ankutbaang leh amichalla amijih mahche anluut insuul areia amikai.

⁶ Anmah in aktuirem buhdoonna leh sinakok ah akthrarem inbokna a inbokvah andit.

⁷ Keithiil munna mii in anmahta mathruunna, lulok lulokta ankuunga ongi andit.

⁸ Chuta nannihtalva mii in lulokta naniongnoh eiso, alamva nannih lulokva Khrista inkhatning che nannih naamte unaochou.

⁹ Thaleichungah tukhatkho pa ta ongnohve, alamva nan Pa inkhatning, amahvaa ringramma am.

¹⁰ Nannihta akpu tih akho mii in naniongnohso, alamva nannihtu Akpu Khrista khalekning.

¹¹ Tunangkhat nankaara anrolrem mii khanna nannihtu roijuih veitu;

¹² che tunangkhat in anroua indom mii khata amniimtu che tunangkhat inruruh miikha akdomtu.”

Akthra Anveisin Relna Jisu in Amlaalei

¹³ “Chuta ringjih lulok leh Pharisi akthra veisin nannihtu vei avah lahnasa a! Alamva nannih in ringram kurung huunnakha miita andah a nankhaarpei, nantak inkho mahkhan luutnohchou, che luuttangta akthleng miikho maluutnoh sachou.

¹⁴ Ringjih lulok leh Pharisi akthra veisin nannihtu vei avah lahnasa a! Alamva nannih in trulmeinu ei inn louta namma nansut, che malot miiung nantihnatu soot nanngen. Churella nannih in akliinrem maraal nanphahtu.

¹⁵ Ringjih lulok leh Pharisi akthra veisin nannihtu vei avah lahnasa a! Alamva nannih in tunangkhatta mathlengnatu tuiiboom mahche apaalla sehtlam hou, che amah in anthlenglai nannih in amahta nangchunga chuum innih ralla repnangvaa asa kupa namivei.

¹⁶ “Mitcho lamchingeio, nannihva lahnasa a! nannih in nanson, ‘Tunangkhat in mathruunna thlaamta sonna suita tlohleva, amah trongchet in amahta akaanpei.’

¹⁷ Kmong mitcho eio! Alamva ra–ao leh ra–aota amseeng mathruunna thlaamsoh jaknangin anrolme?

¹⁸ Che nannih in nanson, ‘Tunangkhat in thiilkuungta sonna suita tlohle, mahchu jakhatnoh; chuta tukhat in thiilkuungah am kuttholta sonna tlohleva, amah trongchet in amahta akaanpei.’

¹⁹ Mitcho miieio! Alamva kutthol leh kuttholta amseeng thiilkuung i jakanang in anrolme?

²⁰ Chunna tunangkhat in thiilkuungta sonna suita aktloh in thiilkuung mahche achunga bilam ak am naamteta sonna suita atlohpei;

²¹ che tunangkhat in mathruunna thlaamta sonna suita tlohleva, mahchuta che asuunga ak am anaamte jaoa suita atlohpei.

²² Che tunangkhat in ringramta sonna suita tlohleva, Ringpu khatkho mahchunga inbok a amkho sonna suita athohpei.

²³ “Akthra veisin ringjih lulok leh Pharisi eio, nannih turella lahnasa a! Alamva nannih in jupal aiileh hop mahche jira vah somsuung inkhat namilanche akchimleh rilvoltheih che malot; ralla trongsuura akrikpootva nannih in inleuchou, aktlei ei inkho inleunoh a, nannih in nantlohtupot.

²⁴ Mitcho lamchingeio, barthlepva nannih in naminomche uuksava namiduul!

²⁵ “Akthra veisin ringjih lulok leh pharisi eio, nannih turel lahnasa a! Alamva nannih in kam leh bukaan apaaltongva nantlen, chuta asuungtongva nannih in miithat leh akrou amdon tlungnatu suul in sipchou.

²⁶ Mitcho Pharisi eio! Matsah a kam leh pukaan asuungtongkha tlenmanve, mahchuche apaal tongkho tleng aja.

²⁷ “Akthra veisin ringjih lulok leh Pharisi eio, nannih turel lahnasa a! Alamva nannihva apaaltonga ameel akthra, inngou intei rusuun nangjimchou, chuta asuung avah nannihva intlenlou mahche akthi miiruh sip a amnangchou.

²⁸ Chunna nannihkho apaaltongva mii kuungah akchimlamseh nangchou, chuta asuung avah akthra veisin leh kochanoh a sipchou.”

Jisu in Anmah Tandi Turella Aphoong

²⁹ “Akthra veisin ringjih lulok leh Pharisi eio, nannih turelvah lahnasa a! Alamva nannih in ringraanei anrusuun namithrat che akchimei korou luungkho namithrat.

³⁰ Nanson lamang, ‘Inih in ipa ipu an amlaia louam meleva, inih in anmahsoh ringraan anthii mathlaakkha injaonoh utame.’

³¹ Nga tloh a nannih in ringraan akthatsungta nanroua sakhi namilan.

³² Nannih in nanpa nanpuvaa an olnakha masipve.

³³ Muruul eio, ruulsok asa eio, khatloh a repnanga luutsamnata inlit nanchek ume?

³⁴ Alamva keiin nankuungah ringraan leh aksing mii leh ringjih lulok eita kamthlah ei, nannih in arouva thingkharh a jamma nanthatsam, che arouin nannih sinakok ah naminangtu che khuupii khuupii a nanchuttu,

³⁵ Chunna nannih in nanthat akseeng munleh thiilkuung akaara akchim Abel thiinata Barakhi vaa asa Jekhariah thii thaleichunga aktla akchim thiinaamte nankuungah tlatu.

³⁶ Tak a nankuungah kisonchou, mah ringnatluun anchunga tlatu.”

Jerusalem Rella Jisu in Arilvol hang

³⁷ “O Jerusalem, Jerusalem, ringraan eita that a amchou che nannih turel kamthlah eita lung denna amchou! Jikcha intonga arpui in ateta amthlanuiah oh khananga keiin nansata pulla kikem uta chuta nannihva kamtlohnohchou!

³⁸ Anve, nannih nan innkha akroua chikkeng usa.

³⁹ Alamva keiin kisonchou, ‘Akpu minga akthleng eikha doiphah vei tuei,’ ta nansonnohmiil nannih in inlenga keimuhnoh usachou.”