METHIU 22 - Akthar Trongirhna (BSI)

Changvaang Buhdoonvaa Pandam

¹ Veikhatla Jisu in ankuungah pandam veia asonei,

² “Ringram kurung huunnakha kurung khat in asa kupa changvaangnatu amchaang nangsa.

³ Che changvaang anjaonantu mii akouh eita ongveta amah in aroita amthlah ei, chuta anmah in thleng indahsei.

⁴ Anro, keiin siilchal leh sa annou kithatpei, che khulouhram buhdoon saaknatu kamchaangpei, che bilam chesang, changvaang thlengveta sonna an ongnatu veikhatlakho amah roijuihta amthlah ei.

⁵ Chuta anmah in inleua anloh mahche ansehjana ah arouin anlouva, arouin anthlou aktleiah sehsei.

⁶ Che roijuih anleita anmah in suur mathrit a anthat.

⁷ Mahchuta kurung in atheihlai, amlung inhaangsa, che amah in raalmii mathlah a mii eikhata mamaangkirra amiramche ankhuuboomta meia anhaalpei.

⁸ Chunna amah roijuih eita asonei, changvaangnatu athlourang chesa, chuta ikouh miiva matik chanohsei.

⁹ Churella nannih in lamsuh lamsuh ah sehve, che nannih in nantuuk nantuukmii eita changvaangna ah kouh eive.

¹⁰ Mahchunna amah roijuih in lamsuh lamsuh a sehsei, che anmah in antuukmii naamte akthra mahche thranohta amichunkirpei, che changvaangna thlaampiia akthleng mii in sipsei.

¹¹ “Chuta kurung in akthleng miita annatu aluutlai, changvaangna puunrei aksilhnoh mii khat amuhpei;

¹² chunna amah kuungah ason, ‘Ruul o, changvaangna puunrei jaonoh a nangin khatloh a onna luutsacheme?’ Cheva amah in amsangna romnohsa.

¹³ Cheva kurung in amah roijuihta asonei, ‘Akut akeh makaangve che amahta phurh a apaal anthimna a loonve, mahchunna aha maket a traptruui veitu.’

¹⁴ Alamva miitam aong, chuta steruta acharning.”

Roithaang Rella Rui

¹⁵ Chunnata Pharisi in seh a Jisu ta khatloh a atronga maman reimeta intelsei.

¹⁶ Che anmah anroita Herot amiisoh inruuia Jisu kuunga mathlah a anson, “Lulok, kannih in nangva akchim cheta kanrom, che Ringpu vaa akchimlamta chimma namtheih, chuche tukhatkho nangin thousanohche, alamva nangin keimii miimii annohche.”

¹⁷ Chunna nangin kanisonro jangta nimdonme? “Mah chuvah Keisaar kuungah roithaang malanni tlohphume chunoh a tlohphunohme?”

¹⁸ Chuta Jisu in anmah anthratnohta aromma asonei, “Akthra veisin nannih in jarella keita chaang nan an angme?

¹⁹ Roithaangna baobehkha kammuhve.” Chunna anmah in nikhat kutlangna baobeh inkhat amimuhpei.

²⁰ Che amah in ankuungah ansonei, “Mahkha tunangmii asak leh akmingme?”

²¹ Anmah in anson, “Keisaar ta” che amah in asonei, “Chuleva, Keisaar taale Keisaar kuunga che Ringpu taale Ringpu kuungah malanve.”

²² Anmah in ohchuta antheih in, salungkhousei, che Jisu ta anmahche inlengsei.

Thinata Ring Rella Rui

²³ Mahnital achunna thinata ring amnoh aktih Sadukiis in Jisu kuungah thlenga anrui, mahchuva,

²⁴ “Lulok, Moses in ason, ‘Mii inkhat in inn apaalche asa amnoh a thile, anmah unaoin akmeita changvaangso, che anmah unao turella ansa anphahnatu’ tih a ason.

²⁵ Anmah unao sirih kannihsoh ammei, anparem in changvaangche asa amnoh a thisa, amah akmeivah amah unao eisoh amjouei.

²⁶ Mahchunanga innih tihpi leh inthumtihpi mahche sirih tihpi phah nga tloh a suuksa.

²⁷ Anaamte i aknua kumeikho thisa.

²⁸ Chunnava thinata anringlai kumeikha anmah mii sirih suunga tunang akmei vei ume? Alamva annaamte in amahta anlohpei.”

²⁹ Chuta Jisu in ankuungah amsangei, “Nannih chimnosachou, alamva nannih in ringjihkho Ringpu vaa atuuikho romnohsachou.

³⁰ Alamva thinata anringlai anmah in changvaangnoh tuei chekho changvaanga inpenoh tuei, chuta anmahva ringramma am ringroi veiusei.

³¹ Chuta thinata ring rella Ringpu in nanisonkha paanohchoume?

³² Mah chuvah Keiva Abraham vaa Ringpu, Aisaak vaa Ringpu che Jakop vaa Ringpu sang. Amahva akthivaa Ringpu noh chuta akringvaa Ringpu.”

³³ Miitam in mahchuta antheih in, amah in amtheih khanna salungkhousei.

Akliin Trongthuun

³⁴ Sadukiis in amah atrongta masang macheknohsei tih i Pharisi in antheih in, anmahseengta inchunsei.

³⁵ Cheva anmah ankaarna ukil inkhat in Jisu ta chaang anna arui,

³⁶ “Lulok, trongsuur suunga jaknangin akliinrem trongthuunme?”

³⁷ Jisu in akuunga ason, “Nangin nang Akpu Ringpu ta niril pumte, nikli pumte mahche nimdon pumtesoh inruuia rilvolro.”

³⁸ Oh inna matsahrem mahche akliinrem trongthuunsa.

³⁹ Che innih tihpiva, “Nangin nantongpi miita nitaktal nanga rilvolro.

⁴⁰ Mah trongthuun innih in trongsuur mahche ringraan in anson anaamte inthrungsa.”

Misaiah Relna Rui

⁴¹ Ipek Pharisi in inchunna an amlai, Jisu in trong aruiei,

⁴² “Nannih in Khrista relna jangnamidonme? Amah i tunang asame?” Anmah in akuunga anson, “Devit vaa Asa kupa.”

⁴³ Amah in asonei, “Chuleva khatloh a Devit in Li vaa Akpu tih a aongume?”

⁴⁴ “Akpu in kei Akpu ta ason, kikut kikchangtonga inbokro, nang jeknaeita nikeh majathuuia nisihnohmiil.”

⁴⁵ Devit in amahta “Akpu tih a ongleva khatloh a asa kupa vei ume?”

⁴⁶ Che amahni khannata tunangkhat inkho amahkuunga karaanga trong ruinohsei.