METHIU 18 - Akthar Trongirhna (BSI)

Tunang in Akliin remme?

¹ Mahlai achunna aroiin thlenga Jisu ta anson, “Chunohle ringramma tunang in anrolrem ume?”

² Chunna Jisu in andihnao khatta anmah ankaara onga ambok,

³ che asonei, “Keiin nankuungah tak a kitihchou, nannih in nao nanga inlenga nanveinohmiil, nannih in ringram kurung huunna ah luut janohluung uchou.

⁴ Churella tunangkhat in andihnao nanga atak ah inruruh amahkhavah ringram kurung huunna ah anrolremsa.

⁵ Tunangkhat in keiminga mainang andihnao khatta roulouleh amah in keita keilohpei.”

Aleh ah Tlaknatu Madoi

⁶ “Chuta tunangkhat in keita kamlot naoei ankaarna inkhatta thranoh masuuk choule amah arukingah sumlung anrolkhat khit a tuiiboom athukna ah atlak in amahtu athratna veitu.

⁷ Miita madoia aleh ah akthlak tukleiram i lahnasa ah! Alamva madoi i thlengnoh janoh.

⁸ Nang nikut nohle nikeh in aleh ah nakthlakle mahkha tanna nang ningnata lonro, nikut innih nohle nikeh innih in nangta athih amnoh meikaara nakthlaktu ngutva, nikut tua nohle nikeh tua ringna ah niluut in nangtu akthra veitu.

⁹ Che nimit in nangta aleh ah nakthlakle, nang ningnata kholla lonro; nimit innih in repnanga nangta nakthlak ngutva, nimit inkhatru amma ringna ah niluut in nangtu akthratna veitu.”

Akmaang Sadamvaa Pandam

¹⁰ “Cheksilve, mah chuvah andih naoei ankaar nata nannih in usitnoh tlohnohve tih i romve; alamva keiin nannihta kisonchou, mah chuvah ringramma anmah ringroi in lai amrel ringram a am Pa vaa amaita muh a ammei.

¹¹ Alamva miivaa Asa kupa in akmaang khata kalnatu thlengsa.

¹² Nannih in jangta namidonme? Mii inkhat in Sadam reija asih, che ankaar nata inkhat maangsa, amah in sopkulei kuta amahche akmaang khatta muulla seh a jonnoh ume?

¹³ Keiin nannihta atak a kitihchou, mah chuvah amah in invainoh a ak am sadam sopkulei ku khachunga inkhat aktuukhan thloiralla aroomthokna veinoh ume?

¹⁴ Chunanaga andih naoei ankaar nata inkhat maangkha ringramma am Pa in amdon veinoh.”

Aleh Aktloh Miita Mathrat

¹⁵ “Mahchu chunga niuhnao in nangta janoh a aleh tlohle seh a nangleh amahrusoh alaalkha sonro. Amah inta nitrong rungaile, niuhnaota niktuukpei.

¹⁶ Chuta amah inta nitrong rungainohle, nangsoh inruuia mii inkhat nohle innihnata akralla thlengpiro. Chuleva nangin nisontrong anaamtekha innih nohle inthumma mangirhnatu sakhi veitu.

¹⁷ Che amah inta antrong rungai indahle khakla ah sonro, chuta amah in khakla akho nitrongta rungai indahle; niuhnaokha Jental leh roi akthrai mii nanga veisaso.”

Jaa nohle Janoh

¹⁸ “Keiin nankuungah tak a kisonchou, nannih in thaleichungah nankaankha ringram akho inkaantu, che nannih in thaleichungah nankaannohkha ringram akho inkaannohtu.

¹⁹ Veikhatlakho nankuungah kisonchou, mah chuvah nannih in jangmekhat thaleichunga mii innih in inja a ngenchoule, ringramma am Pa in ankuunga am veitu.

²⁰ Alamva keimingah mii innih nohle inthum nanchunna khannna keikho ankaara amsang.”

In ipnoh Roijuihvaa Pandam

²¹ Che Pitar in amah kuungah thlenga ason, “Akpu, kiuh kinaointa kichungah janoh a aleh tlohle, keiin amahta jikchakhek inlenga ki ip ume? Keiin amahta veisrih phah ki ip ume?”

²² Jisu in akuungah ason, “Keiin nikuungah veisrihru naktihnoh ang, chuta sirih kha sopsrih phaoa kitihche.”

²³ “Churella ringram kurung huunna kurung inkhat in amah roijuihsoh mapulna teenna am khanangsa.

²⁴ Amah in hmapulna teen amthronlai, talen akpulsom intool mii khat akuungah anthlen;

²⁵ amah in siin acheknohrel Akpu in roijuihta amah akmei, asa ei mahche adoon akhaal naamte juura asiinnatu jathang amlan.

²⁶ Chunna roijuih in amaikuungah akhuk makamma antolhche ason, ‘Akpu, kakru thoa keingaakro, anaamte naksiin kirtang.’

²⁷ Chunna roijuih akpuin amahta aringvol hanga amthlahpei.

²⁸ Chuta amah roijuihtal khanna seh a, amah denari reija antool aruul roijuih mii khat kuungah thlengsa mahmii chuta suura aruking raak a atih, ‘Nangin nantool baobehkha keisiinrosa.’

²⁹ Che aruul roijuih in akehkungah intolh a amthruunche atih, ‘Kakru thoa keingaakro, keiin anaamte naksiin kirtang.’

³⁰ Chuta amah in indah a, asehche aleiman antool naamte asiinnohsot amahta sim a asihpei.

³¹ Chunna aruul roijuih eiin aksuuk chuta anmuh in khalmo anril asokpeia aksuuk naamte akpu kuungah thlenga antongpei.

³² Chunna Akpu in amahta aongche ason, ‘Akthranoh roijuih, nangin kikuungah ningenrel keiin leiman nantol anaamte ki ipche.

³³ Keiin nangta kiringvol nanga nangkho niruul roijuihta niringvol phunohme?’

³⁴ Che amah akpu in amlung inhaanga amah in leiman antol asiinnoh miil aminang natu ankuungah amsilpei.

³⁵ Chunna nannih in nan uh nannaota ril luut a ipnoh choule, ringramna Pa inkho mah khananga nanitlohtu.”