METHIU 17 - Akthar Trongirhna (BSI)

Jisu Ameel Amthleina

¹ Niruk aknua Jisu in Pitar, Jems mahche anao John phurh a ankaang muul khat chungah kalsei.

² Che anmah maikuunga amah ameel tleisa, Jisu vaa amai kini nanga intle che apuunrei in kvaar nanga inngousa

³ Che anve, Moses leh Elaiah in Jisu soh inruuia tronga am anmuh.

⁴ Cheva Pitar in Jisu kuungah ason, “Akpu inih in onna iam thratu, nangin jacheleva, onna thiil inthum seemtang, inkhat in nangtu, inkhat in Moses tu che inkhat in Elaiah tu.”

⁵ Amah in atrongsuung, anve, antle sumphai in anmahta amlihpei, che kak hanga sumphai kaarnata hou inkhat in thlenga ason, “Mah i keiin khalmo kirilvol Kisakupa, amah kuungah keiin pelsang, amah in ason rungaive.”

⁶ Che aroiin mahchuta antheih lai, anmai makhup a khalmo intrisei.

⁷ Chuta Jisu in thlenga anmahta palla asonei, “Inthouve, intrinohve.”

⁸ Che anmah in inthoua an anlai Jisu noh a tukhatkho muhnohsei.

⁹ Anmah in muulnata antrumsuunga Jisu in trong asonei, “Miivaa Asa kupa in thinata aringnosoot mah ahamuh i tukhat kuungkho sonnnohve.”

¹⁰ Che aroi in Jisu ta anrui, “Chuleva Jarella ringjih lulok in Elaiah matsah a thlengtu antihme?”

¹¹ Amah in amsangei, “Elaiah in matsah a thlengtu, mahche poot anaamte amlengtu;

¹² chuta keiin nankuungah kitihchou, mah chuvah Elaiah va thlengchesa, anmah in amahta louromnoh ei, chuta anmah in antlohja akuungah antloh. Chunanga miivaa Asa kupakho anmah ankut a klah knang aphahtu tla.”

¹³ Chunna Jisu in aklup John rella trongsa tih a aroiin anrompei.

Khousaar chuung Kupasa Khatta Jisu in Amthrat

¹⁴ Che anmah in miitam kuungah anthlenglai, mii khat in Jisu kuungah thlenga akhuk makamma ason,

¹⁵ “Akpu, kisa kupata niril mavolro, alamva amahta surpitumma klahsa; che amah in injomma mei leh tuiikaara luut.

¹⁶ Chunna keiin amahta nang niroi ankuungah kithlen, chuta anmah in mathrat cheknohsei.”

¹⁷ Chunna Jisu in akuunga amsang, “Ah, malot amnoh chimnoh akseh ringnatluun nannihsoh jikcha soot a keiin am umang angme? Amahta keikuungah keithlenve.”

¹⁸ Cheva Jisu in khousaarta asaal, mahche amah ningnata inthruhsa, che mah laitalla naochu thrasa.

¹⁹ Chunna Jisu kuungah aroiin inrukte thlenga anson, “Jarelna kannih in khousaarta manom cheknoh ungme?”

²⁰ Amah in ankuungah asonei, “Nannih in namilotnoh relna. Alamva keiin nannihta tak a kitihchou, nannih in intrammu tuihru malotchoule muultumta nantihtu, ‘Onnata ousonna inlenro’ che mahchu inlentu, che nankuungah veinohtu jakhatkho amnohtu.

²¹ Chuta mainangi huh hella ngennoh avah tikniakho veinohtu.”

Jisu in Athihsam Rella Veikhat Asonla

²² Anmah in Kalili ah an amlai Jisu in ankuungah asonei, “Miiva Asa kupata miikut ah amilan usa,

²³ che anmah in anthattu, mahche nithum tihpia amah in ringtu.” Ohchuna anrilsok a klahsei.

Mathruunna Thlaamvaa Roithaang

²⁴ Anmah in Kaparnaum a anthlenglai, Ringpu mathruunna thlaamma sekel aher akthrai in Pitar kuungah thlenga ason, “Nannih lulok in roithaang malannohme?”

²⁵ Amah in ason “Oi, athaang.” Che amah in innsuung aluutlai Jisu in akuungah ason, “Simon nangin jangta nimdonme? Thaleiramna kurung eiin tuningnata roithaang anlohme? Anmah ansakuung name chunohle aktlei ningnata anlohme?”

²⁶ Pitar in Jisu kuunga ason, “Rapkheimii ankuungnata amithaang.” Chunna Jisu in akuungah ason, “Chunohleva ansakupava khangvalmii veisei.

²⁷ Chusalakho inih in anmahta thlouvat eveinoh nahtu tuiiboomma seh a kuui thaangro, che matsah nikai ngakha abao ma aanga nianlai nangin baobeh apumkhat niktuuktu, mahchu loua nangleh keiturel ankuunga malanro.”