METHIU 16 - Akthar Trongirhna (BSI)

Daang Relna Ngen

¹ Cheva Pharisi leh Sadukiis in amah kuungah thlenga, chaang anna veia ringram tingna daangkhat mamuhnatu anrui.

² Jisu in ankuungah amsangei, “Khulouhram aphah in nannih in nanson, ‘Kini in aangsa; nihoongi thrasa.’

³ Che ‘Juktiinga nihoongi thranoh alamva marvaan in aang che olthem am.’ Akthra veisin eio! Nannih in marvaan ni ahoongva anna rom nanchek, chuta nannih in daangvaa lai mahche ahoongva romnohchou.

⁴ Akthranoh leh miimei miisa laal ringnatluun in daang nanjon, chuta ringraan Jonah daangnoh a daang nanimlan nohtung.” Che anmahta mah a sehsa.

Pharisi leh Sadukiis Anchol

⁵ Che Jisu aroiin araalkhat ah antlunglai, anmah in tol amipolhpei.

⁶ Chunna Jisu in ankuungah asonei, “Pharisi leh Sadukiis ancholkha cheksilve,”

⁷ cheva anmahseeng seeng intella insonsei “Alamva inih in tolkho choinohsame.”

⁸ Chuta Jisu in mahchu aromma ankuunga asonei, “Ah, malot ah trangnoh eio, jarella nannih seengta intella amchoume, alamva nannih in tol thlennoh choume?

⁹ Nannih in tol ranga a mii akpul ranga mahche luktoong jikchah nanhomme bahaptla intheihnoh choume?

¹⁰ Chunohle tol sirih ah mii akpul manli, che anrol luktoong jikchah nanhomme bahaptla intheihnoh choume?

¹¹ Keiin tol rella trongnoh ang tihvah khatloh a nannih in nanromme? Chuta nannih in Pharisi mahche Sadukii ei cholta cheksil tupotchou.”

¹² Chunna Jisu in anmahta chol jao tolta sonnoh chuta Pharisi mahche Sadukiis amtheihnata asonta bahab tlasei.

Pitar in Jisu ta Khrista Tak tih a Ason

¹³ Ipek Jisu in Keisaria Philippi ramsiin asuungah athlenglai, aroita aruiei, “Miivaa Asa kupata mii in tunangme kantih angme?”

¹⁴ Chunna anmah in anson, “Mii arouin aklup John, arouin Elijah, che aktlei in Jeremiah nohle ringraan ankaarna inkhatche nantih ei.”

¹⁵ Jisu in ankuungah asonei, “Chuta nannih invah keita tunangme nantih angme?”

¹⁶ Cheva Simon Pitar in amsang, “Nangva akring Ringpu vaa Asa kupa Khrista che.”

¹⁷ Jisu in akuunga amsang, “Simon Bar Jona! Doiphahkha nangche, alamva ruung leh thii in nangta nakphoongnoh, chuta ringramma am Pa in nangta nakphoongpei.

¹⁸ Che keiinkho nangta kisonche, mah chuvah nangvah Pitar che, chunna kei khakla i mah lungpii chungin kimthrungtu, che akthivaa tuui in nangta nakcheknohtu.

¹⁹ Keiin ringram huunna chapi kamlan uche, chunna nangin thaleichungah nikhitkha ringram akho inkhittu, nangin thaleichungah nak annohkha ringram akho veitu.”

²⁰ Chunnata Jisu i Khrista sa tih a tunangkhat ankuung akho anmah in ansonnoh natu aroita akchaak ei.

Jisu in Alah Anangsam Mahche Athisam Rella Ason

²¹ Mahlai chunnata Jisu in aroi ankuungah thloui mamuh amthronpei, mah chuvah amah in Jerusalem a sehtu che anparuulei akthloi thiimpuei mahche ringjih lulokei ankut ah klah knang thoa anthattu, mahchuche nithum tihpia ringtu.

²² Chunna Pitar in Jisu ta athleipiche amahta saalla son amthronpei, mahchuva, “Akpu, mahchunang nikuungah veinohtu, nikuungnata inla veiso.”

²³ Chuta Jisu in Pitar kuungah anheiche ason, “Seitan, kikuung nata inheirosa! Nangin keita nakvat ang, alamva nangva Ringpu tingnanohche, chuta miitu veia nimdon.”

Thingkharh Mahche Atak Andahna

²⁴ Jisu in aroita atih ei, “Tunangkhat in kei kiknu juihtang tihle, atakin indahso, che amah thingkharhta domma kiknu keijuihso.

²⁵ Alamva tunangkhat in amah achaan ankaljale mahkha maangtu, chuta keirella amah achaan mathlah miikhan aringna aktuuktu.

²⁶ Alamva mii khat in tukleiram apumte aphahche amah achaanta maangle, amakuunga jangachuungnah amme? Nohle mii khat in amah achaanta jaknangsoh amthleng ume?

²⁷ Alamva miivaa Asa kupa in Apavaa paarthra a amah ringroisoh inruuia thlengtu che amah in mii eita amah amah athlou nujuih a khaan amlantu.

²⁸ Keiin nankuungah tak a kisonchou, onna akngirmii arouin miivaa Asa kupa in amah ringram kurung huunna a athlenglai anmuhnohsot thikha matemnoh tuei.”