METHIU 15 - Akthar Trongirhna (BSI)

Leithingna Anpa Anpu Hoongta Amtheihna

¹ Cheva Jerusalem nata ringjih lulok leh Pharisi in Jisu kuungah thlenga anson,

² “Jarelna nang niroi eiin anpa anpu in ansehna thlou ankhoihme? Alamva anmah in tol ansaaklai ankut silnoh ei.”

³ Chuta Jisu in ankuungah amsangei, “Sehna thlouin alamveia jarelna Ringpu vaa trongthuun nankhoihme?

⁴ Alamva Ringpu trongthuun in son, ‘Nannu nanpata injahve,’ che ‘Tunangkhat in anu nohle apata phool tlohle, mahmii khavah thiso.’

⁵ Chuta nannih in nanson, ‘Tunangkhat in anu nohle apata, kei ningnata akchuung nanphahphuta Ringpu kuungah kakatpei tihleva amah in apa injahna darkaar amnohsa.’

⁶ Nga tloh a nannih in sehnathlou khanna Ringpu trongta jakhatkho maveinohchou.

⁷ Akthra veisin eio! Ringraan Isaiah in nannih turel thratea aphoongpei:

⁸ ‘Mahmii eiin annar avah keita kanjonang, chuta anril avah kikuungnata inlasei;

⁹ Che anmah in miivaa trongsuurta amitheih che keita sulla kamithruunang.’ ”

Sakmangin Ammaang

¹⁰ Chunna Jisu in miitamta onga asonei, “Rungaia bahab tlave:

¹¹ narra akluut trongin miita sakmang maveinoh, chuta narnata anthruh khanna miita sakmang amvei.”

¹² Chunna amah aroiin akuungah thlenga anson, “Mah nison ita antheih lai Pharisi anril ansok i niromnohme?”

¹³ Chuta amah in amsangei, “Ringramma am Pa in alinnoh thing anaamte aktangtu.

¹⁴ Nga am eiso; anmahvah mitchoin aching mitchosei, chunna mitcho in mitchota lamchingleva khurra tlatuei.”

¹⁵ Chunna Pitar in amah kuungah ason, “Mah pandam i kankuunga invuia kanisonro.”

¹⁶ Chunna Jisu in asonei, “Nannihkho pekphah mah i bahap tlanoh mangchoume?

¹⁷ Bao suungah akluut naamte vonpiiah luut, che ruungnata inthruh tih a romnoh mangchoume?

¹⁸ Chuta baonata anthruhpot anaamte rilsuungnata thlengning, che mii in sakmang amivei.

¹⁹ Alamva rilsuungnata akthranoh miithat, kumei kupa laal, miimei miisa laal, inru inraan, chimnoh a sakhi malan, miirilh miiloonna trong.

²⁰ Miita sakmang amvei i mah anaamte isa, chuta kut silnoh a saa invah miita sakmang maveinoh.”

Kumei Khat in Malot

²¹ Cheva Jisu in mah chunnata inthurh a Tur leh Sidom ramting sehsa.

²² Che anve, Kanaan na kumei khat in thlenga onga Jisu kuungah ason, “O Akpu, Devit vaa Asa kupa, Keita niril kamvolro, alamva kisakumei khousaar chuunga khalmo akchutpei.”

²³ Chuta Jisu in trong inkhatkho masangnohsa. Che aroiin thlenga akuungah ngenna anson, “Kumei i mathlahrosa, alamva iknungah ong onga amsa.”

²⁴ Amah in amsangei, “Israel innsuunga akmaang Sadam khoptua keita kamthlah ang.”

²⁵ Chuta kumei in thlenga amthruunche ason, “Akpu, kamjoomro.”

²⁶ Che amah in amsang, “Naoei tolta louva uii ankuungah lon thranoh.”

²⁷ Che kumei in ason, “Oi Akpu, uiiluung inkho anmah akpu tebornata aktla akningta ansaak.”

²⁸ Chunna Jisu in kumei kuungah amsang, “Kumeio, nangin namlot i khalmoa liin! Nangin nikditkha nangkuungah tlung veiso.” Cheva kak hanga asa kumeita thrasa.

Jisu in Miitam Amthrat

²⁹ Che Jisu in mah khannata vanna Kalili tuiiboom akomma sehsa, che muul khat chungah kalla mahchunna inboksa.

³⁰ Chunna miitam kehtlik, mitcho, trongtheihnoh, mipuhnoh aktlei jikcha akehkungah thlenna amitlolh mahche Jisu in amthratei,

³¹ chunna trongtheihnoh in trong suuksei, mipuhnoh in mipuhsei, kehtlik in sehsei, che mitcho in muh anphahchuta anmuh in Israel vaa Ringpu ta paar amithratpei.

Mii Akpul Manlita Amsaak

³² Cheva Jisu in aroita amah kuungah onga asonei, “Keiin miitamta kirilvol hangsei, alamva anmah in ansaaktuphu jakhatkho amnoh a keisoh inruuia nithumkhek amsei, chunna anmahta lamma dem asaaknohna tuei anmahta traamma mathlah indah sangei.”

³³ Chunna aroiin akuungah anson, “Vachah miitam ita anvahnatu mah rapril in ramna tol iktuuk ume?”

³⁴ Jisu in ankuunga asonei, “Nannih tol jikcha nansih mangme?” Che anmah in anson, “Tol sirih leh nga andih ste am.”

³⁵ Che miitamta tukleia maboknatu jathang amlanei.

³⁶ Che amah in tol sirih leh ngata loua Ringpu ampaakche khoia aroita amlanei, che aroiin miitamta amilanpei.

³⁷ Che annaamte in invah a ansaakche, anmah in akirkaar amichun luktoong sirih sip a amilei.

³⁸ Mah aksaa eichu kumei maksi leh nao teenpinoh a mii akpul manlivak ei.

³⁹ Che Jisu in miitamta amthlah eiche muli inkhat a chuunga Makadan ramma sehsa.