METHIU 14 - Akthar Trongirhna (BSI)

Aklup John Athihna

¹ Mahlai achunna rampuui Herot in Jisu akming inthangta atheihpei;

² che amah roijuihta asonei, “Mahmii i aklup John khasa; amah in thinata ringsa, alamchunna salungkhouna thlou tlohnatu tuui naamte amah kuungah amsa.”

³ Alamva Herod in anao Philip akmei Herodia rella John ta suura makaanga simma asih.

⁴ Alamva John in akuunga ason, “Nangin amahta nikmei veia niloh i janoh.”

⁵ Churella amah in John ta ringraan mii khat veia ateen.

⁶ Chuta Herot in apokna akni ahoonglaia, Herodia vaa asakumei in anmaikuungah laam che Herot ta ampelpei.

⁷ Chunna amah in anihchu kamlantuta Herot in akuunga trongchetsoh inruuia suita atlohpei.

⁸ Chunna amah in anu cherol nujuih a ason, “Tarpeng in khat chungah aklup John vaa akang kamlanro.”

⁹ Cheva kurung aril tlannohsa; chusalakho amah in suita atlohpei taningva mahche rapkheina akthlengei rella mahchuta akuunga malannatu jathang atlohpei;

¹⁰ Che sim suungah am John vaa ariing tannatu mii amthlahpei.

¹¹ Che John akangta tarpeng khat chungah thlenna rungaaksa kuungah amilanpei che mahchuta anukuungah athlenpei.

¹² Cheva John aroi in thlenga amah aruungta anlohche anphumpei, che Jisu kuungah seh a antongpei.

Jisu in Mii Akpul Rangata Amsaak

¹³ Ipek Jisu in mahchuta atheih invah amun chunnata mulikhat ah chuunga achitkengna khat a sehsa. Chuta miitam in mahchuta antheih in anmah in khuupiinata keh ah seh a anjuihpei.

¹⁴ Che Jisu in asehlai miitam amuh ei; chunna anmahrel Jisu in arilvol hangsei che anmah annat ansatna amthratei.

¹⁵ Khulouhram aphah in aroi in thlenga akuungah anson, “Maiva miihou miila intheihlouna amun, pekva thilsa; anmah in khuu khuua luut a ansaaktuphu anleinatu mathlah eirosa.”

¹⁶ Chuta Jisu in ankuungah asonei, “Anmah in ansehnatu darkaar amnoh, anmah kuungah ansaaktuphu malaneive.”

¹⁷ Chunna anmah in Jisu ta anson, “Inih tol ranga leh nga innihruta onna amning.”

¹⁸ Jisu in “Mahchuta maanna keithlenve” ta asonei.

¹⁹ Cheva amah in miitamta meiphul chunga maboknatu jathang amlanei; Jisu in tol ranga leh nga innihta alohche ringramma ahan an, amah in doi amlan mahche khoia aroita amlanei, che aroiin miitam ankuunga ansempei.

²⁰ Chunna annaamte in saa a anvon invahsa. Che anmah in anlei andihdah amitlonin luktoong somleinih sip.

²¹ Mah aksaa eichu kumei maksi leh nao teenpinnoh a akpul rangavak ei.

Jisu in Tuiiboom Chunga Akeh ah Seh

²² Kak hanga Jisu in aroita mulichung amchuungeiche araal inkhat ah matsah a amseh ei, Mahsuung Jisu in miitamta amlengei.

²³ Che miitamta Jisu in amlenglai, amah in muul in khat chungah ngennatu kalsa. Che khulouhram aphah in amunchunna akrouningsa,

²⁴ chuta mahsuungah mulivah tuiiboom alaia tuiisolh inlek a asihpei, alamva thliraangsoh intuuksa.

²⁵ Che khulouh nivaartum pung inthum atlaklaia Jisu in ankuungah tuiiboom chung akeh ah seh a thleng.

²⁶ Chuta tuiiboom chunga seh a thleng anmuh in anril lah a anson, “Mah i kukthlasa, che anmah in trih a ongsei.”

²⁷ Chuta Jisu in kak hang ankuunga asonei, “Nanril matrangve, keisang; intrinohve.”

²⁸ Che Pitar in amah kuungah amsang, “Akpu, nangcheleva, tuiichunga seh a nikuungah kivaanatu jathang kamlanro.”

²⁹ Chunna Jisu in ason, “Varo.” Che Pitar in mulinata trumma Jisu kuung avanatu tuiichungah sehsa.

³⁰ Chuta amah in thliraang amuh in intrisa, cheva tuiia anphuumsam invah onga ason, “Akpu keikalro!”

³¹ Che kak hanga Jisu in akut ajamche matuh a ason, “Malot a inleu nango, jarella niril intluunnoh cheme?”

³² Che anmah in mulisuung anluutlai thlikho inngaisa.

³³ Cheva mulisuunga ak am in Jisu kuungah thlenga mathruunna anson “Atak a nangvah Ringpu vaa Asa kupache.”

Jisu in Kennesaret ah Akna Amthrat

³⁴ Che anmah in mahchuta vanna Kennesaret ramma thlengsei.

³⁵ Che amunchunna mii in Jisu ta anromma anmah in anramma ak amiita trong amithuunpei mahche akna naamte amah kuungah anthlen.

³⁶ Che anmah in Jisu apuunta anpalnatu amah kuungah anngen. Che amah apuunrei akpaleita amah in amthratei.