METHIU 11 - Akthar Trongirhna (BSI)

Aklup John Tingna Trongraan

¹ Jisu in aroi somleinihta amtheihche, mah khannata mathlah a anmah ankhupiita trong raanna amtheihnatu sehsa.

² Che John in sim suungah amlai Khrista in atlohthlouta atheih a, amah aroi innihta Jisu kuungah amthlah ei

³ che anmah in akuungah anson, “Nangi akthlengsam mii khacheme chunoh a aktleita kanloungaak umangme?”

⁴ Jisu in ankuungah amsangei, “Aksuukthlou nannih in nantheihta mahche nanmuhta seh a John kuungah tongve:

⁵ mah chuvah mitcho in muh anphahpei, che kehtlik in seh anchekpei, reichii kop in thrasei che makuur akpangin atheihpei, akthi mii in ringsei mahche anrankuunga akthra trong anraanpei.

⁶ Che keita keivatnoh miikha doiphah veisa.”

⁷ Chunnata anmah in ansehlai miitam ankuungah Jisu in John rella son amthronpei: “Nannih in jangta ak an raprilla sehchoume?

⁸ Raphalta thliraang in aklok khatame? Nannih in jangta ak an sehchoume? Lungluut ansuul aksilh miikhatame? Anve, lungluut insuul aksilh miiva kurung koolla amsei.

⁹ Nannih in jangta ak an sehchoume? Ringraan inkhattame? Oi, ringraan inkhatchunga akthloita keiin nankuungah kisonpeichou.

¹⁰ Alamva mahmii irella injih a amsa, ‘Anve, nanmaikunga keiin trongraanta kimthlah, amah in nannih nanlam amchaangtu.’

¹¹ Keiin nannihta tak a kisonchou, kumei in apok kaarnata aklup John chung ralla anrol tukhatkho inthruhnohmang, chuta ringram kurung huunna a andihrem mii khanna amahchungah ralla inrol.

¹² Che aklup John nata pekphah i ringram kurung huunna ah, klah knangin sip a, che inthat insunna namma phahnatu antloh.

¹³ Alamva ringraan leh trongsuur in anson naamte aklup John phah a ansonpei.

¹⁴ Chunna nannih in maita roujareita madonchoule mah i akthlengsam Elijah khasa.

¹⁵ Tunangkhat in arungeihnatu amkuur am miikhan rungaiso.

¹⁶ “Chuta keiin mah ringnatluun ita jangso kimlak ume? Maiva keithiil munna anbok naoin anmah anruulta an ong nangsa.

¹⁷ Mah chuvah nannih turel pasi kantum chuta nannih in laamnohchou; nannih turel klahsung chuta nannihva sinthruui noh sachou.

¹⁸ Alamva John in thlenga saakho saanoh, iinkho iinnoh, chunna nannih in, ‘Atak a khousaar chuungsa ta nanson.’

¹⁹ Miivaa Asa kupa in saa iinna thlengsa, che anmah in ansonlamang, ‘Anve, anvonpii injaa, tuiibuh inruii, roi akthrai eisoh mahche aleh ammiivaa anpaisa.’ Chuta lousingin amah athlouta amchim.”

Jisu Malotnoh Khuupii Lahnasa

²⁰ Chuche amah in salungkhouna thlou atlohna khuuboomta asaalei, alamva anmah in anril anthlengnoh relna.

²¹ Korajin, nangturel lahna veisanoh! Bethsaida, nangturel lahna veisanoh! Alamva salungkhouna thlou nankuungah kitlohkhata Tur leh Sodom nata anmah in bulapuun silh a mahche meivut inbah a mahlai khanna anril anthleng tupotta.

²² Chuta keiin nannihta kisonchou, pichaarniva nannih khachunga Tur leh Sodom in ralla andouchek veitu.

²³ Che Kaparnaum nangvah ringram phah indomnoh ucheme? Nangta repnang phah a indok uche. Alamva salungkhouna thlou nankuungah kitlohkhata Sodom a tloh angleva mi in phah a Sodom am tupotta.

²⁴ Chuta keiin kisonchou mah chuvah pichaarni avah Sodom ram in nannih khachunga ralla andouchek veitu.

Keikuungah Thlenga Inngeihna Phahve

²⁵ Mahlai achunna Jisu in asonei, “Kampaakche ringram leh thalei Akpu Pa, alamva nangin mah naamte i aktheih leh aksing miiningah mathup a nisihche nao ankuungah niphoongpei.

²⁶ Oi ajapei Pa, nang nikuungah akthrachu veiso.

²⁷ Mah naamte i Pa in keikuungah namsilang. Chunna Pa noh a tukhat inkho Asa kupata romnoh ei, che Asa kupa noh a tukhat inkho Pa ta romnoh ei, churella Asa kupa in Apata miikuungah phoong akdit.

²⁸ Thlou tranga aktloh mahche pootrik akroon naamte keikuungah thlengve, che keiin nannihta inngai kamphah uchou.

²⁹ Kei rukol nantak ah roonve, che keikuungnata keitamve, alamva keiva kiril tap ang che kiril inneemmang, nannih nanli a inngai nanphahtu.

³⁰ Alamva kei rukolva aklai che kipootva akjaang.”