METHIU 10 - Akthar Trongirhna (BSI)

Raangroi Somleinih

¹ Che aroi somleinihta akuungah onga akseengnoh li manomnatu, natna satna rii anaamte mathrat cheknatu akchek amnehvaa lii ankuungah amlanei.

² Aroi somleinih anmingvah: matsah a Pitar an ong Simon, che amah anao Andriu; Jebidi asa kupa Jems khatkho amah anao John;

³ Philip mahche Bartholomi; Thomas che roithrai Methiu; Alphias asa kupa Jems, Thadias;

⁴ Kanan na Simon, mahche Jisu akjuur Judas Iskariot sei.

Aroi Somleinihta Amthlah

⁵ Anmah somleinihita Jisu in trongthuun sonna amthlah ei, “Jental anlamma senohve, che Samaria khuupii akho luutnohve,

⁶ chuta mah chuchungva akmaang Sadam Israel ankuunga luutve.

⁷ Che nannih in seh a, ‘Ringram huunnakha naisa,’ ta sonna raanve.

⁸ Akna mathratve, reichii mathratve, akthi maringve, khousaar manomve. Nannih in khangvaalla nanphah, khangvaalla inpeve.

⁹ Nannih in ra–ao slakho, harngou slakho, kuri slakho skhaoa baobeh thunnohve,

¹⁰ nannih in namiruuitu thong nohle, lungluut innih, nohle kekhraang, nohle, sungrolh phurhnohve; alamva thloutloh mii in asaaktuphu aphahkha matikchasa.

¹¹ Nannih in khuupii nohle khuusuung nanluutlai, matikcha tutu eimeta jonve, che nanseh nohsot mah khanna amve.

¹² Che nannih in innsuung nanluut laia, mathruun eive.

¹³ Innsuung khata matikcha eile, nankuungna leh oi kha anchunga phah eiso; chuta matik chanoh eile, nannih leh oi kha nankuunga inlengso.

¹⁴ Che tungangkhat in nannihta nanilounoh a nantrongta lounoh eile, nannih in khuu khannata nohle khuupii khannata nanthruhlai nankehna phil mathiimma mahve.

¹⁵ Keiin tak a kisonchou, pichaarniva mahkhanang khuupii khachunga Sodom leh Komorah ram in ralla adouchek veitu.”

Akthlengsam Chut Manangna

¹⁶ “Anve, keiin nannihta Sadam nanga uiiramui ankaara kamthlahpeichou; chunna nannih in muruul nanga singve che ukthru nanga inneemve.

¹⁷ Chuta miita jih a anve, alamva anmah in nannihta jama kaara nanimlantu che anmah in sinakok ah nanihaitu.

¹⁸ Che keiturel nannihta Jental ankuungah sakhi veinatu rampuui mahche kurung anmaikuungah kaia nanithlentu.

¹⁹ Chuta anmah in kaia nanithlenlaia nannih in khatloh a trong tu ungme nohle jangtrongta kanson umeta lah tlohnohve; alamva mahlaital pung achunna nannih in khatloh a trong uchoume nankuungah nanimlantu;

²⁰ alamva nannih in trongnoh uchou, chuta nan Pa vaa Li in nanimtrongtu.

²¹ Pekva unao khat in unao khatta, che apa in asata thihnatu antlohtu, chela ansa in annu anpata janoh a thihnatu antlohtu;

²² che keiturel nannihta miinaam in nantirh tuei. Chuta tunangkhat in achena phah akdou mii khata akaltu.

²³ Chuta anmah in khuupii suungah nanichutlai aktleia tlaanve; alamva keiin nannihta atak a kisonchou, miivaa Asa kupa in athlengnoh maa a nannih in Israel ankhupiita matangnoh uchou.

²⁴ “Aroi inkhat in amah lulokchung amnoh, chunohle roijuih khatin amah akpuchung amnoh;

²⁵ aroi inkhat in amah lulok nanga mahche roijuih khat in amah akpunangah amkhan chanasa. Inn akputa anmah in Beljabul ta ongeile, innsuunga ak am miiva jikcha phah thranoh a an ong usame!”

Tunangta Trih Uchoume

²⁶ “Churella anmahta trihnohve; alamva indangnoh a inbahtu jakhatkho amnoh, nohle inromnoh a anthuptu jakhatkho amnoh.

²⁷ Keiin inthim kaara nankuung kison naamte akvaar kaara trongve; che namikuura nantheihkha innbuung chunga raanve.

²⁸ Che nannih nanruungva akthatchek chuta nanliva that cheknoh miita trihnohve; mahchunga li leh nanruungta repnangah ammaangchek amahta trihve.

²⁹ Usak innihta baobeh inkhaturel nanjurhnome? Mah khannata nanpa in amdonnoh avah inkhatrukho tukleia tlanohtu.

³⁰ Chuta nankangna sam anaamte khakho ateenpei.

³¹ Alamchunna intri tlohnohve, nannihvah vasakchung aman chaalchou.”

Amaraal Phoong Khatkho Khrista ta Indah

³² “Chunna tukhat in miimai kuungah Khrista ta akja mii khavah keiinkho ringramma am kipa maikuungah kijatu.

³³ Chuta tunangkhat in miimai kuunga Khrista ta indahmii khavah keiinkho ringramma am Pa maikuunga indahtung.”

Leh oi noh Chuta Chemsei

³⁴ “Keita thaleichungah leh oi akthlen thlengta kamdonnohve; keivah leh oi akthlen thlengnoh ang chuta chemsei akthlensang.

³⁵ Alamva mii khat in apaso, asakumei inkhat in anusoh, che amou khat in anisoh injanohnatu thlengsang.

³⁶ Che amah innsuungna mii in a innsuungna miiluungta jekna veitu.

³⁷ Anu nohle apata keichunga ringvol mii khavah keitu veia matik chanoh, che asa kupa nohle asa kumeita keichunga ringvol miikhakho keitu veia matik chanoh.

³⁸ Che amah thingkharhta lounoh a kiknu akjuih mii khavah keitu veia matik chanoh.

³⁹ Amah achaanta inkal akphah mii in maangtu, keirella amah achaan akmaang miikhan inkal aphahtu.”

Khaan

⁴⁰ “Nannihta nanija a nanilou miikhan keita kanloh peiang, che keita ja a keilou miikhan keita kamthlah amahta anroulohpei.

⁴¹ Ringraan inkhatta ringraan inkhatvaa akminga aklou miikha ringraan inkhatvaa khaan aphahtu. Che akchimlamseh mii khat in akchimlamseh miikhatvaa akmingah aklou miikha akchimlamseh miikhatvaa khaan aphahtu.

⁴² Che keiin nannihta atak a kisonchou, tunangkhat in andih kaarna inkhatta amah aroisa tih a tuiidai chapla inkhatru malanle amah akhaan khak maangnohtu.”