MARK 8 - Akthar Trongirhna (BSI)

Jisu in Mii Akpul Manlita Amsaak

¹ Nikkhat nia, miitam in veikhat anboom laia, anmah in ansaaktu jakhatkho amnohsa, amah in aroita akuunga onga asonei,

² “Keiin miitamta kirilvol hangsei, alamva anmah in keisoh inruuia an amna ipek nithum aphahpei, che jakhatkho ansaaktu amnohsa;

³ che keiin anmahta traamma an inna mathlah sangeile, lamma dem asaaktuei; anmah in ram klahnata thlengsei.”

⁴ Che aroi in amisang, “Khatloh a mii vachah tam ita tunang in mah chaarram in tol amsaakchek tueime?”

⁵ Che amah in ankuunga aruiei, “Tol jikcha injaochoume?” Anmah in amisang, “Sirih.”

⁶ Che amah in miitamta meiphul chunga maboknatu jathang amlanpei; che tol sirihta alohche ampaak, mahchuhta khoia semnatu aroita amlanei, che anseempei.

⁷ Che anmah in nga indih ste injaoei; che doi amlanpei, mahchukho ansemnatu jathang amlanei.

⁸ Anmah in ansaakche invahsei, che anlei invuivi amichun in, luktoong sirih sip a inleisa.

⁹ Mahchu mii akpul manlivak ei.

¹⁰ Cheva anmahta amthlahpei ei; che kak hanga amah in muli achuungche aroieiso inruuia Dalmanutha ramsiinna sehsei.

Salungkhouna Thlou Rella Pharisi in Anrui

¹¹ Pharisi in thlenga amahsoh trong inkher amithronpei, amahta chaang anna veia, ringramna daangkhat amahkuunga anjon.

¹² Che amah in aril lah a ason, “Jarelna mah ringnatluun in daang anjonme? Atak a nankuunga keiin kisonchou, mah ringnatluunta daang malannohtung.”

¹³ Cheva anmahta amahpeiei, mahche veikhat mulia akalche aktleitonga sehsa.

Pharisi Leh Herot Anchol

¹⁴ Ipekva anmah in tol theihlou a maruuinohsei; mulisuunga tol khalekta ansih ningsa.

¹⁵ Chunna ansoi amnohnatu ankuunga, asonei. “Pharisi leh Herot vaa anchol kharelna cheksilve.”

¹⁶ Mahchurella anmah in khatleh khat intella insonsei, “Inih in tol amnohsa.”

¹⁷ Che mahchuta arompeia, Jisu in ankuunga asonei, “Tol amnohsata akchimrel jarella intelchoume? Pekphah romnoh mangchoume nohle lou theihnoh mangchoume? Nanrilkha trangsme?

¹⁸ Nanmit amrerea muhnoh sachou che namikuur amrerea rungainoh sachoume?

¹⁹ Keiin tol rangata khoia mii akpul rangata kamsaakchou, luktoong jikcha sip a anvuivi namitlonme?” Anmah in anson, “Somleinih.”

²⁰ Che tol sirih in mii akpul manlia, nannih in luktoong jikcha sip a anvuivi nanchunme? Anmah in akuunga anson, “Sirih.”

²¹ Che asonei, “Nannih in lou theihnoh mangchoume?”

Bethsaida a Jisu in Mitchokhat Amthrat

²² Mahche anmah in Bethsaida a thlengsei, che amahkuunga mitchokhat mii ste in anthlen, chunna amahta apalnatu akuunga anngen.

²³ Amah in mitchota akut a kaia, khuu apaalla anthruhpi, che amah in amit a amchilche achunga akut sih a amahkuunga arui, “Nangin jangta nimuhme?”

²⁴ Che amah in intoua anche ason, “Keiin mii kimuh; chuta anmahva thing inloinangei.”

²⁵ Che veikhatla amitchunga akut asihche amah in incheknoh a a an invah thrakhemsa, che anaamte seenga amuhpei.

²⁶ Che amahta a inna amthlahpei, akuunga ason, “Nangin khuusuunga luutnohro.”

Pitar in Jisu Relna Amdangna

²⁷ Che Jisu in aroisoh inruuia Keisaria Philippi khuua sehsei; che lamma amah in aroita aruiei, “Mii in keita tume kantih angme?”

²⁸ Che anmah in akuunga anson, “Aklup John; che aktlei in Elaijah; mahche aktleila in ringraan ankaarna inkhatcheta nansonei.”

²⁹ Che amah in ankuunga aruiei, “Chuta nannih inva keita tume nantih angme?” Pitar in amsang, “Nangva Khrista che.”

³⁰ Cheva amahrella tukhat kuungakho son janoh tuta tranga asonei.

Jisu in Klah knang Aphahsam Khatkho Athihnasam Relna Trong

³¹ Che miivaa Asa kupa in khalmo klah kanang aphahtuta ankuunga matheih amthronpei, mahche anparuul ei in, akthloi thiimpu ei in, che ringjih lulok ei in, amahta janohtuei chuche amahta anthattu, che nithum aknua veikhat ringlatu.

³² Mah i seenga ason, chunna Pitar in amahta athleia phurh a saal amthron.

³³ Chuta aroita inheia a aneiche, amah in Pitar ta saalla ason, “Kei kiknunga inmahro, Seitan! Alamva nangva Ringpu tongnanohche, chuta mii tongnache.”

³⁴ Che mii tamsoh inruuia aroieita amahkuunga aongei, che asonei, “Tunangkhat in kei kiknu keijuihtang tihleva, atak akroua indahsoh che atak thingkharhta louso che keijuihso.

³⁵ Alamva tukhat in amah chaanta ankaljale maangtu; che tukhat in amah chaanta kei turella che akthra trong rella maangle inkaltu.

³⁶ Alamva mii khat in tukleiram anaamte changslakho amah chaanta maangleva achuungnatu jangamme?

³⁷ Alamva mii khat in amah achaan ngut a inlenga jangpootta apekchek ume?

³⁸ Alamva tukhat in kei mahche kei kitrong rella miimei miisa laal khatkho alehsip ringnatluun inna injakleva amah in Apaso inruuia akseeng ringroi eisoh paarthra aveilaia, amah in miivaa Asa kupa kuungakho injak aphahtu.”