MARK 7 - Akthar Trongirhna (BSI)

Puthou Pathou ei Tingna Loua Matheihna

¹ Ipekva Jerusalem nata akthleng ringjih lulok arousoh inruuia, Pharisi ei in amahsoh anchun laia,

² aroi arouin ankut buura ansaak mah chuvah ankut silnoh eita anmah in anmuhpei,

³ (Alamva Pharisi, leh Judi annaamva ankut ansilnohmiil anmah in saanoh ei puthou pithou in antloh nonota anna;

⁴ che anmah in keithiil nata anthlengche, antakta amiseengnoh miil anmah in saanoh innoh ei; mahche anmah in aktlei antlohthlou jikchakho anjuih am, kam leh beel che pithrai kuchaikho anchaam.)

⁵ Pharisi leh ringjih lulok in akuunga anrui, “Jarella nang niroi in puthou pithou in antloh nujuih a ringnoh eime, che khatloh a ankut buura ansaakme?”

⁶ Che amah in ankuunga asonei, “Isaiah ringraan in thratea nannih in akthra nanveisinta amjihnanga nanisonpei, mahmii ei in annar avah keita kanjah ei, chuta anril avah kei kuungnata inlasei;

⁷ nannih in veinohtupot ah keita kamthruunna amchou, mii in matheihna nanga namitheih nohme?

⁸ Nannih in Ringpu trongthuunta namithlahche mii in antloh nonota matuh a amchou?”

⁹ Che amah in ankuunga asonei? “Nannih in Ringpu trongthuunta nandah natu akthra lam nantlohpei, nantlohthlou nonota tlohna turella!

¹⁰ Alamva Moses in ason, ‘Nannu leh nanpata injahve; che anu apata thranoh aktrong amahkha, inlitnoh a thitu;’

¹¹ chuta nannih in nanson, ‘Mii khat in apa nohle anuta; jangmekhat slakho nangin kikuunga kanana niktuk in Korban’ (mah chuvah Ringpu kuunga malan) ta sonleva,

¹² amah in apa nohle anuta jangmekhat tlohkhal majanoh usa,

¹³ nga tloh a Ringpu atrongta thou sanohchou nannih in nantloh nonota tloh a nan amrella. Che aktlei jikchakho nantloh.”

Miikhatta Ambuurna

¹⁴ Che veikhatla mii eita amahkuunga onga asonei, “Keirungaive, nannaamtea che loutheihve:

¹⁵ miivaa apaalna jangkhat inkho atak a aluutche amahta mabuur cheknoh; chuta miivaa asuungnata anthruhkhop in amahta ambuurning.”

¹⁶ “Tunangkhat in arungeihnatu amkuur am miikhan rungaiso.”

¹⁷ Che mii eita amthlahche innsuunga aluutlaia, aroi eiin pandam irelna akuunga anrui.

¹⁸ Che amah in ankuunga ason ei, “Mahchu nannih nannaam in loutheinoh sachoume? Nannih in muhnohchou mah chuvah jangmekhat slakho apaalnata mii ninga akluut in amahta abuur cheknoh,

¹⁹ mahchu luutleva malungnanoh chuta avonpiina, mahchu phao ume?” (Nga tloh a saakphu anaam kseeng amah in asonpei.)

²⁰ Che amah in asonei, “Mii kuungnata anthruh in amahta ambuurpei.

²¹ Alamva asuung tongna, miivaa malungnata anthruh thranoh ril kumei kupa inlaal, inru, miithat, miimei miisa laal,

²² karaam, ril seengnoh, machinthi, ralla karaam, amah ata amveijahang, miirilh miison, in orh, kmong.

²³ Mah thranoh anaam i asuung tongnata inthruh, che mah naamte in miita ambuur.”

Kumei khat in Amlot

²⁴ Che mah chunnata amah in inthousa mahche Sidon leh Tair aveella sehsa, mahchuche inn khat a luutsa, mahchu tukhatkho marom indah; chuta amah in inthup cheknohsa.

²⁵ Chuta kak hanga seengnoh li amruui nao kumeiva anuin, amah relna atheihpei, cheva thlenga akehkungah intolhsa.

²⁶ Ipekva kumeichu Kriik jatih, apok lainata Sairophonisia na mii. Che khousaarta asakumei ningnata amnomnatu anoolpei.

²⁷ Chunna kumei kuunga ason, “Naoei in matsah a invahmaan eiso, alamva naoin ansaaktuphu tolta loua uiikuunga loonna malanvah chimnoh.”

²⁸ Chuta amah in akuunga amsang, “Oi, Akpu; naoin ansaakna tebor thuuia aktlakho uii in ansaak.”

²⁹ Che kumei kuunga ason, “Alamva mahchu nisonche nang nilamting sehrosa; khousaar in nisa kumeita aloumahpei.”

³⁰ Chunna amah in inna inlengsa, che naochu kuktholla intolh a am antuukpipei, mahche khousaar in aloumahpei.

Jisu in Makuurpang Trong Suuknoh Miikhatta Amthrat

³¹ Cheva amah in Tair aveelnata inlengsa, che Sidom inthruh a Kalili tuiiboom, Dekapolis aveel vanna sehsa.

³² Che makuurpang trong suuknoh kupa khatta amahkuunga anthlen; che amah achunga akut ajamnatu anson.

³³ Che miitam kaarnata ajea alohche, akut majungin amkuurta apalche machilla amleita apal.

³⁴ Che amah in ringramta intouva anna, tranga in onga akuunga ason, “Iphatha,” mahchuva, “Inhoongrosa.”

³⁵ Che amah amkuurchu inhoongsa, amah amleikho inthruhsa, che amah in khleng khlengta trongsa.

³⁶ Che anmah in tukhat kuungkho antongnoh natu tranga asonei, chuta anmah in ral ralla ril malut a amiphorpei.

³⁷ Che anmah in ol cheknohna chaanga salungkhousei, che anroua insonsei, “Amah in anaamte amthratpei; amah in makuur akpangeikho mahoonga amtheih chekpei, che antrong aksuuknohkho amtrongchek peiei.”